Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> ' امریکا نال معاہدے نہیں، مفاہمت سی '

' امریکا نال معاہدے نہیں، مفاہمت سی '

وچار ڈیسک
September 20th, 2008

مسلم لیگ نون دے آگو نواز شریف دے ایس بیان توں مگروں کہ اوہناں دی جماعت پچھلے اٹھاں سالاں وچ امریکہ نال ہوون والے معاہدیاں دا معاملہ پارلیمان وچ چکے گی پاکستان دے گذریل چیف آف جنرل سٹاف لیفٹیننٹ جنرل ریٹائرڈ شاہد عزیز نے کہیا ہے جو گیاراں ستمبر دے دھاڑیاں توں مگروں امریکہ نال تعاون دا کوئی باقاعدہ معاہدہ تے ہویا ہی نہیں سی۔اوہناں نے کہیا بس ' امریکی فوجیاں نوں پاکستان نے کجھ سوکھتاں دتیاں سن۔' گیاراں ستمبر توں مگروں وی دو سالاں تیکر بری فوج دے ہیڈ کوارٹر دے اہم عہدے تے رہن والے جنرل شاہد عزیز نے جمعے نوں بی بی سی نوں دسیا کہ ہن پاکستان۔امریکہ مفاہمت دی حالت وی بدل گئی ہے۔

اوہناں کہیا نائن الیون توں مگروں امریکی انٹیلی جنس پاکستان وچ کم کردی رہی، کجھ ہوائی اڈے امریکی فوج دی ورتوں وچ رہے (سنے پاکستان دا سب توں وڈا ائیر بیس جیکب آباد) پاکستان لاجسٹک مدد دیندا رہیا ( ہن وی تیل، خوراک تے ہور سامان پاکستان دیاں زمینی راہواں چمن تے طور خم توں جا رہیا ہے) تے پاکستان وچ القاعدہ دے آگوں نوں لبھن لئی ' ڈرونز ' یاں جاسوسی طیارے ورتے جاندے رہے۔

گذریل جنرل نے دسیا کہ جیویں ہی امریکہ تے اوہناں دیاں اتحادی فوجاں افغانستان وچ آئیاں تے سب توں پہلے پاکستان نوں کہیا گیا کہ طالبان حکومت دی حمیت مُکاون۔ اُس ویلے افغانستان وچ طالبان دی حکومت سی تے پاکستان اوہناں نوں قنونی حکومت من دیاں ہوئیاں اوہناں دی مدد وی کردا سی ایس لئی امریکہ نے کہیا ایہہ مکا دیوو۔

' نائن الیون توں مگروں ایہہ طے ہویا جو اسیں طالبان دی مدد توں اپنا ہتھ ہٹا لواں گے تے اوہدے مگروں طالبان توں لاتعلق ہو جاون گے تے امریکہ تے افغانستان دی لڑائی وچ اسیں حصے دار نہیں بناں گے۔'

اوہناں نے دسیا کہ امریکی انٹیلی جنس ادارے ' سی آئی اے ' دے کول ڈرونز سنے چنگی ٹیکنالوجی سی تے پاکستان وچ القاعدہ دے بندیاں نوں لبھن لئی پاکستانی انٹیلی جنس ایجنسی آئی ایس آئی اوہناں کولوں مدد لیندی سی تے فوج امریکہ توں معلومات آئی ایس آئی راہیں لیندی سی۔

جنرل شاہد عزیز نے دسیا کہ جدوں تیکر اوہ آرمی وچ رہے اُس ویلے تیکر القاعدہ دے شدت پسنداں دی تلاش لئی جیہڑے بناء پائلٹ جاسوسی طیارے پاکستان دے قبائلی علاقیاں وچ اُڈ دے سن تے اوہ ہور قسم دے سن تے اوہناں نال میزائل فائر نہیں کیتا جاسکدا سی۔

جنرل عزیز دیاں گلاں اپنی تھاں پر صدر پرویز مشرف ہوون یاں موجودہ حکومت، اوہ ات واد دے خلاف جنگ نوں اپنی جنگ کہندیاں ہوئیاں پاکستان نوں ایس جنگ وچ فرنٹ لائن ریاست کہندے رہے تے کئی مفاہمتاں ہیٹھ فوجی تے اقتصادی تعاون دی مد وچ دس ارب ڈالر دے نیڑے امداد وی ملی۔

اہناں معاہدیاں دیاں تفصیلاں لئی جدوں پاکستان دے وزیر خارجہ شاہ محمود قریشی نال رابطہ کیتا گیا تے اوہناں نے ایہدی کوئی تفصیل تے نہیں دسی پر اینا کہیا ' امریکہ دے نال جیہڑی وی ساڈی مفاہمت ہے اوہدے ہیٹھ پاکستان دے وچ کاروائی دا کسے غیر ملکی فورس نوں اختیار نہیں ہے۔'

امریکی فوجی کمانڈر ایڈمرل مولن تے صاف دسیا کہ امریکہ پاکستان دی خود مختاری دا آدر کردا رہیا ہے تے اگے وی کردا رہوے گا۔ جدوں اوہناں دی توجہ ایس پک دے مگروں وی پاکستان تے امریکی دھاڑے ول دوائی گئی تے وزیر خارجہ نے کہیا ایہدے تے عمل وچ کوئی کوتاہی ہے تے ایہہ امریکی اداریاں دی آپو وچ رابطیاں دی کمی ہے۔

شاہ محمود قریشی نوں جدوں پچھیا گیا کہ ایہہ خبراں وی ساہمنے آوندیاں رہیاں ہین کہ فوری لوڑ ہیٹھ امریکہ نوں کاروائی دی اجازت ہے تے اوہناں نے کہیا ساڈی رضا مندی دے بناء کوئی پاکستان وچ کاروائی نہیں کرسکدا تے حالیں ہوون والیاں کاروائیاں توں پہلوں کوئی اجازت نہیں لئی گئی۔'

وزیر خارجہ نے کہیا ات واد دے خلاف جنگ وچ امریکہ تے پاکستان نوں رل مل کے صلاح نال اگے ودھنا ہے۔ اوہناںموجب پاکستان حکومت نے امریکہ ساہمنے پاکستان تے امریکہ دے دھاڑیاں تے احتجاج کیتا ہے تے اقوام متحدہ دی جنرل اسمبلی دے اجلاس دے موقعے تے صدر بش نال صدر زرداری دی ملنی وچ ایہہ معاملہ پھیر چکیا جاوے گا۔

گیاراں ستمبر دے دھاڑیاں توں مگروں ات واد دے خلاف جنگ وچ پاکستان تے امریکہ دے وچکار تعاون دے کئی معاہدے تے موجود ہین پر حالیں ایہدے بارے کوئی پکی رپورٹ اک معمہ بنی ہوئی ہے۔

پاکستان امریکہ معاہدیاں ولوں سارے پاکستان وچ تجسس اُس ویلے ودھیا جدوں امریکہ نے پاکستان دے وچ دھاڑے شروع کیتے تے ایہدے بارے دوہواں ملکاں دے موقف وچ پاڑ ساہمنے آئے۔

پاکستان دی حزب مخالف دیاں جماعتاں حکومت تے زور پا رہیاں ہین جو اوہ صدر پرویز مشرف دے دور وچ امریکہ توں ہوون والے تعاون دے معاہدیاں دیاں تفصیلاں ساہمنے لیاون۔ جے ایہہ دبا جاری رہیا تے خورے حکومت پارلیمان نوں ایہدے بارے اعتماد وچ لوے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels