Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> پنجاب وچ اقتدار دی سرد جنگ

پنجاب وچ اقتدار دی سرد جنگ

علی سلمان
September 13th, 2008

پنجاب دے گورنر ہاؤس وچ وزیر اعظم دے دو مشیر منظور وٹو تے رحمان ملک دی پیپلزپارٹی دی صوبائی قیادت تے گورنر سلمان تاثیر نال ملنی ہوئی ہے۔ ملنی توں مگروںوزیر اعظم دے مشیر منظور وٹو نے میڈیا نوں دسیا کہ پیپلز پارٹی پنجاب دے حکمران اتحاد توں وکھ ہوون وچ پہل نہیں کرے گی۔ سینئر وزیر راجہ ریاض نے کہیا اوہناں دے وزیر معمول موجب اپنے دفتر جارہے ہین۔

مرکز وچ مسلم لیگ نون تے پیپلز پارٹی دے اتحاد دے مُکا توں مگروں پنجاب وچ دوہواں پارٹیاں وچکار پاڑ پایا جاندا ہے۔ مسلم لیگ نون دے آگو کئی وار منگ کر چکے ہین جو پیپلز پارٹی ہن پنجاب حکومت توں وکھ ہو جاوے۔ مسلم لیگ نون دے صوبائی وزیر قنون رانا ثناء اللہ نے تے ایتھوں تیکرکہہ دتا سی جو جے اوہ وکھرے نہ ہوئے تے صوبائی سیکرٹریاں نوں سد کے اینا کہہ دینا بوہت ہووے گا کہ اوہ پیپلز پارٹی دے وزیراں دے حکم نہ منن۔

پنجاب وچ وزارت اعلیٰ مسلم لیگ نون دے کول ہے جیس تے میاں شہباز شریف بیٹھے ہین جدوں کہ گورنر سلمان تاثیر دا کہنا ہے جو اوہ صوبے وچ پیپلز پارٹی دے نمائندے ہین۔ دوہواں جماعتاں وچکار سرد جنگ تے اتحاد شروع ہوندیاں ہی ہو گئی سی پر صدارتی چوناں دے موقعے تے ایہہ ودھ گئی تے کہیا گیا کہ جے مسلم لیگ نون دے صدارتی امیدوار دے ووٹ پنجاب اسمبلی توں گھٹ نکلے تے پیپلز پارٹی اوہنوں اپوزیشن بینچاں دا راہ وکھاون وچ کجھ دناں توںبوہتا چر نہیں لاوے گی۔

مسلم لیگ نون دے امیدوار نے جنے ووٹ لئے اوہ سادہ اکثریت نال چوداں ودھ سن پر صدارتی چوناں دے موقعے تے اک دوجے دے رکناں تے اُچیچا اپوزیشن جماعت مسلم لیگ قاف دے فارورڈ بلاک دے رکناں دی کھچ دھرو دا جیہڑا سلسلہ شروع ہویا سی اوہ حالی جاری ہے۔

مال روڈ دے اک پاسے یعنی نوے شاہرہ قائد اعظم تے ایوان وزیر اعلیٰ وچ مسلم لیگ نون مسلم لیگ قاف دے رکناں دیاں دعوتاں کردی ہے۔ اوہناں دے نال مستقبل دے پلان بناوندی ہے تے مال روڈ دے دوجے پاسے گورنر ہاؤس پیپلز پارٹی دے ' قاف ملاؤ' مذاکرات دا مرکز بنیا ہے۔

مسلم لیگ قاف دیاں پنج زنانیاں رکناں پنجاب اسمبلی خدیجہ عمر وغیرہ نے جمعے نوں لہور وچ اک پریس کانفرنس نال خطاب کردیاں ہوئیاں ایہہ الزام لایا ہے جو حکومت اوہناںنوں نال رلاون لئی یرکا رہی ہے۔مسلم لیگ نون دے صدر وزیر اعلیٰ پنجاب شہباز شریف نے دو دیہاڑ پہلوں ایوان وزیر اعلیٰ وچ مسلم لیگ قاف دے پارٹی پالیسی مخالف رکناں نوں افطار پارٹی دتی سی جیس وچ دو درجن توں ودھ رکناں نے شرکت کیتی تے اوہناں وچوں اک رکن عطا مانیکا نے ایہہ بیان جاری کیتا جو اوہ تے اوہناں دے سنگی مسلم لیگ نون دا ساتھ دیون لئی اپنیاں سیٹاں قربان کرن توں وی نہیں ولاون گے تے انج دا ویلا آیا تے اوہ ضمنی چوناں مسلم لیگ نون دے ٹکٹ تے لڑن گے۔

پیپلز پارٹی نے فارورڈ بلاک دے کجھ رکناں نجف سیال وغیرہ نوں نال ملایا تے ہے پر اوہ مسلم لیگ قاف دی قیادت نال وی رابطے وچ ہین۔ گورنر پنجاب سلمان تاثیر نے مسلم لیگ قاف دے آگو چودھری پرویز الٰہی نال اوہناں دے گھر جا کے ملنی کیتی سی جدوں کہ منظور وٹو چودھری شجاعت نال رابطے وچ ہین۔

مقامی میڈیا وچ تے مسلسل تبصرے چھپ رہے ہین کہ پیپلز پارٹی مسلم لیگ قاف نوں نال رلا کے پنجاب وچ اپنی حکومت بناونا چاہندی ہے۔ پیپلز پارٹی دے کسے آگو نے کدی کھل کے انج دیاں کوششاں نوں نہیں منیا پر مسلم لیگ قاف دے آگو کہندے ہین جو اوہناں نال ملاقاتاں ایسے لئی ہوندیاں ہین۔

مسلم لیگ نون نوں پنجاب وچ سادہ اکثریت دی حکومت برقرار رکھن لئی اک سو ستاسی ووٹاں دی لوڑ ہے۔ اوہدے اپنے رکناں دی گنتی اک سو اکہتر ہے۔ مسلم لیگ فنکشنل تے ایم ایم اے دے پنجاں رکناں نے اوہدی حمیت دا اعلان کیتا ہویا ہے جدوں کہ شہباز حکومت فارورڈ بلاک دے دو درجن توں ودھ رکناں نوں پراں ہیٹھ لے کے بیٹھی ہے۔

سیاسی مبصراں دا کہنا ہے جو پارٹی مستقبل وچ اپنی حکومت دے رہن لئی پک کروان وچ کامیاب ہووے گی پنجاب اسمبلی دے ' بے وفا ' رکن اوہدے نال ہی رہن گے تے حالیں مسلم لیگ نون ایہہ دسن وچ کامیاب ہے۔

پیپلزپارٹی دے اک آگو دا کہنا ہے جو معاملہ اینا سادہ نہیں ہے۔ حالی وزیر اعلیٰ شہباز شریف ولوں عدالتی فیصلہ اگے پیا ہویا ہے تے جے ایہہ فیصلہ اوہناں دے خلاف ہویا تے ہوا دا رخ ویکھ کے پاسا بدلن والے پنچھی اوہناں دے کوٹھے توں اُڈ کے پیپلز پارٹی دی اقتدار والی چھت تے جا بیہن گے۔

مسلم لیگ نون دے مرکزی آگو نثار علی خان نے کہیا کہ پنجاب پیپلز پارٹی دے نال اتحاد برقرار رکھن دا فیصلہ نواز شریف دی لندن توں پاکستان واپسی تے ہووے گا اودوں تیکر اوہناں دی جماعت دا کوئی آگو پیپلز پارٹی دے خلاف بیان بازی نہیں کرے گا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels