Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> قومی پالیسی بن دی نظر نہیں آوندی

قومی پالیسی بن دی نظر نہیں آوندی

وچار ڈیسک
September 12th, 2008

پاکستان پچھلے ستاں سالاں توں ات واد دے خلاف جنگ وچ ' فرنٹ لائن سٹیٹ' تے بنیا ہویا ہے پر حالیں اوہدی ایہہ پالیسی، نہ تے قومی پالیسی بن سکی تے نہ ہی مستقبل قریب وچ انج ہوندا نظر آوندا ہے۔ اوہدا اک وڈا کارن پاکستان وچ سیاسی تے مذہبی جماعتاں، فوج تے ہور دھراں دی ایس بارے اپنیاں اپنیاں ترجیحاں، وچار تے فیدے ہین۔ ایہو کارن ہے جو پاکستان وچ حکومت لئی وی ایس جنگ وچ فوری کامیابی پاونا بوہت اوکھا نظر آوندا ہے۔

ایہدے بارے انگریزی روزنامہ ڈیلی ٹائمز دے ایڈیٹر تے سینئر تجزیہ کار نجم سیٹھی کہندے ہین جدوں تیکر پاکستان دی سیاسی قیادت تے فوج اک ہی صف وچ نہیں ہوون گے مسئلہ حل نہیں ہووے گا۔ ' مینوں لگدا ہے فوج تے سیاسی اگوائی حالی اک صف وچ نہیں ہین۔'

اوہناں موجب ' زرداری ہوراں دی کوشش ہووے گی جو امریکہ نوں راضی رکھیا جاوے تاں جو اوتھوں پیسے وغیرہ آون تے معیشت دے مسئلے حل ہوون جیہدی لوکائی نوں وی لوڑ ہے۔۔۔ دوجے پاسے فوج دے اپنے سٹریٹیجک فیدے ہین افغانستان وچ۔۔ کیوں جو فوج ایہہ سمجھدی ہے جو ہندوستان وڈے پیمانے تے اپنا اثر ودھا رہیا ہے تے فوج پشتون طالبان مجاہداں نوں امریکہ لئی ضائع نہیں کرنا چاہندی تے پاکستان وچ لُکے طالبان دے خلاف کاروائی توں گھابر دی ہے ۔'

نجم سیٹھی نے ہور کہیا پاکستان حکومت تے شدت پسندی دے خلاف جنگ وچ دوہواں پاسیوں دبا ہووے گا۔ امریکہ چاہوے گا پاکستان بوہتے توں بوہتا کم کرے جدوں کہ پاکستان دی لوکائی چاہندی ہے جو کاروائی گھٹ توں گھٹ ہووے۔
اوہناں موجب انتہا پسندی دا مسئلہ حل کرنا ہی ہور مسئلیاں دا حل ہے تے آصف زرداری وی ایہہ گل چنگی طرحاں جاندے ہین جو انتہا پسندی دے مکا دیاں کاروائیاں توں جتھے امریکہ پاکستان دی اقتصادی مدد کرے گا اوتھے ملک وچ استحکام، معاشی مضبوطی تے بیرونی سرمایا کاری وی آوے گی۔

صدر پرویز مشرف دے تنقید کرن والے تے سیاسی ویری کہندے ہین جو ات واد دے خلاف جنگ وچ اوہناں نے فوجی طاقت تے انحصار کیتا تے اوہناں نوں پاپولر سیاسی طاقتا
ؓں دی حمیت نہیں رہی ایس لئی اوہناں دی حکمت عملی ناکام رہی۔

پیپلز پارٹی دے ترجمان فرحت اللہ بابر کہندے ہین ہن اوہناں دی جماعت نے ات واد دے خلاف جنگ وچ پالیسی بدل دتی ہے۔ اسیں ساریاں سیاسی جماعتاں اُچیچا عوامی نیشنل پارٹی نوں رلا کے کئی ٹولیاں نال گل بات کیتی تے ایہدے نال حالات چنگے ہوئے ہین۔ جتھے انتہا پسنداں نے گڑ بڑ تے شر پسندی کیتی اوتھے ریاست دی طاقت نوں بھرواں ورتیا۔ خیبر ایجنسی وچ منگل باغ دا صفایا کیتا۔۔۔ باجوڑ تے سوات وچ وی انج ہی ہویا ہے۔'

فرحت اللہ بابر نے دعویٰ کیتا کہ جدوں قبائلی لوکائی نوں یقین ہو گیا کہ حکومت طالبان دے خلاف سنجیدہ کاروائی کر رہی ہے تے اوہناں نے آپوں وی ہتھیار چکے، لشکر بنائے تے شدت پسنداں دے خلاف ہو گئے جیہڑی اوہناںموجب حکومت دی وڈی کامیابی ہے۔

اوہناں کہیا مشرف دور وچ کدی انج نہیں ہویا کیوں جو اوہ اک ہی ویلے وچ شکار تے شکاری دے نال نسے رہن والی پالیسی تے عمل کردے رہے۔

پیپلز پارٹی دا دعویٰ اپنی تھاں پر جماعت اسلامی دے سینیٹر پروفیسر خورشید دی پردھانی وچ قائم تحقیقی ادارے انسٹی ٹیوٹ آف پالیسی سٹڈیز دے ڈائریکٹر جنرل خالد رحمن کہندے ہین موجودہ حکومت ہن وی گذریل صدر پرویز مشرف دی پالیسی تے عمل کر رہی ہے۔

اوہناں کہیا جدوں تیکر شدت پسندی دی اصلی وجہ مک نہیں جاندی اُس ویلے تیکر مسئلہ حل نہیں ہووے گا تے اوہدی جڑ ہے امریکہ تے اوہناں دی اتحادی فوجاں دی افغانستان وچ آمد تے مداخلت۔

نجم سیٹھی کہندے ہین مذہبی جماعتاںکدی وی انتہا پسندی دے خلاف اک نہیں ہوون گئیاں۔ اوہناں موجب آصف علی زرداری نوں شدت پسنداں دے خلاف کاروائی وچ مسلم لیگ نون دی حمیت توں بغیر پیش قدمی کرنا اوکھا ہووے گا۔

'حالی تیکر میاں نواز شریف نے جیہڑا ورتارا رکھیا ہے اوہ ایہو ہے جو زرداری ہوراں دی حمیت نہیں کرن گے۔۔۔ زرداری ہوراں لئی اک مسئلہ ایہہ ہے جو فوج نوں کیہدے نال لے کے ٹرن تے دوجے پاسے اپوزیشن تے لوکائی دی مخالفت دا ساہمنا ہووے گا تے اوہ دلدل وچ پھسے ہین'۔

نجم سیٹھی دا کہنا ہے جو امریکہ چوناں توں پہلوں صدر بش نوں کسے ' ہائی ویلیو ٹارگٹ ' دی لوڑ ہے تاں جو اوہ اپنی لوکائی نوں وکھا سکن کہ اوہناں نوں کامیابی ہوئی ہے۔

بشکریہ بی بی سی


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels