Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> مسٹر ٹین پرسینٹ توں صدر پاکستان تیکر

مسٹر ٹین پرسینٹ توں صدر پاکستان تیکر

وسعت اللہ خان
September 6th, 2008

آصف علی زرداری اک بلوچ سندھی سیاست دان تے ذوالفقار علی بھٹو دے مڈھ دے سیاسی سنگیاں وچ رلتی حاکم علی زرداری دے پتر ہین۔ حاکم علی زرداری مگروں نیشنل عوامی پارٹی وچ شامل ہو گئے سن۔

آصف علی زرداری جولائی اُنی سو چھونجاہ وچ جمے۔ اوہناں دے پیو دا وچلے سندھ زمینداری دے نال کراچی وچ کاروبار تے سینما گھر سی۔ آصف علی زرداری دی مڈھلی تعلیم وی ایل کے ایڈوانی ، محمد خان جونیجو، شوکت عزیز تے پرویز مشرف وانگوں سینٹ پیٹرکس سکول کراچی وچ ہوئی جیہدے مگروں اوہناں نے دادو وچ قائم کیڈٹ کالج پٹارو توں اُنی سو چوہتر وچ انٹر میڈیٹ کیتا۔ کہیا جاندا ہے مگروں اوہناں نے لندن سکول آف اکنامکس اینڈ بزنس ناں دے کسے ادارے وچ وی داخلہ لیا سی۔

آصف علی زرداری مڈھوں ہی یاراں دے یار ٹائپ بندے دے طور تے کراچی دے کھاندے پیندے حلقیاں وچ جانے جاندے سن۔ اُنی سو اٹھاٹھ وچ شوقین سبھاء دے نکے جئے آصف علی زرداری نے فلمساز سجاد دی اردو فلم ' منزل دور نہیں ' وچ چائلڈ سٹار دے طور تے وی اداکاری کیتی۔ فلم دے ہیرو حنیف تے ہیروئین صوفیہ سن۔ پر ایہہ اک فلاپ فلم ثابت ہوئی۔

آصف علی زرداری پولو تے گھڑ سواری دے شوقین سن تے اوہناں دی پولو ٹیم زرداری فور دے ناں توں جانی جاندی سی۔ آصف علی زرداری دے ایس زمانے دے اک بیلی موجب آصف علی زرداری اک دل والا بندہ سی۔ اوہناں موجب اک واری کراچی دے نیڑے اسیں ہارس رائڈنگ کر رہے سی کہ ساڈے گروپ وچ رلتی اک جرمن سفارتکار دی دھی دا گھوڑا دلدل وچ پھس گیا۔ ایس صورتحال وچ کوئی اگے نہیں ودھیا۔ پر آصف علی زرداری دلدل وچ اتر گیا تے پہلے کڑی نوں بچایا پھیر گھوڑے نوں کڈھیا۔ ایس زمانے وچ کھلنڈرا آصف اپنے پرائیویٹ ڈسکو تھیک دے کارن وی واہوا جانیا جاندا سی۔

سیاست نال آصف علی زرداری دا سن اسی دے وچکار تیکر دور دور تیکر کوئی واسطہ نہیں سی۔ بس اک سوں ایہہ لگی ہے جو اُنی سو پچاسی دے غیر جماعتی الیکشن وچ آصف علی زرداری نے وی نواب شاہ وچ صوبائی اسمبلی دی اک سیٹ توں کاغذات نامزدگی جمع کروائے سن۔ پر ایہہ واپس لے لئے گئے۔ ایسے زمانے وچ آصف علی زرداری نے وزیر اعلیٰ غوث علی شاہ دے اک وزیر سید کوڑل شاہ دی صلاح نال کنسٹرکشن دے کاروبار وچ وی ہتھ پایا پر ایس شعبے وچ آصف زرداری نے صرف ڈھائی ورہے ہی کم کیتا۔

اُنی سو ستاسی آصف علی زرداری لئی بڑا فیصلے کن سال سی جدوں اوہناں دی مترئی ماں ٹمی بخاری تے بیگم نصرت بھٹو نے بینظیر بھٹو دے نال آصف دا رشتہ کیتا۔ اٹھاراں دسمبر اُنی سو ستاسی نوں ہوون والا ایہہ ویاہ کراچی دیاں یادگار تقریباں وچ گنیا جاندا ہے۔ جیہدا استقبالیہ امیر ترین علاقے کلفٹن دے نال نال غریب علاقے لیاری دے ککری گراؤنڈ وچ وی ہویا تے امیراں دے موڈھیاں نال موڈھا لا کے ہزاراں عام لوکاں نے وی شرکت کیتی۔ ذوالفقار علی بھٹو دی پھانسی دے مگروں بینظیر بھٹو تے اوہناں دے لکھاں سیاسی ستاریاں لئی ایہہ پہلی وڈی خوشی سی۔

اُنی سو اٹھاسی وچ جدوں بینظیر بھٹو وزیر اعظم بنیاں تے آصف زرداری وی وزیر اعظم ہاؤس وچ منتقل ہو گئے۔ تے اوہناں دی سیاسی زندگی صحیح طرحاں شروع ہو گئی۔ اُنی سو نوے وچ بینظیر حکومت دی معطلی توں مگروں ہوون والیاں چوناں وچ اوہ قومی اسمبلی دے رکن بنے۔ ۔ اُنی سوترانوے وچ اوہ نگراں وزیر اعظم میر بلخ شیر مزاری دی کابینہ وچ وزیر بنے پھیر بینظیر بھٹو دے دوجے دور وچ قومی اسمبلی دے رکن تے وزیر ماحولیات تے سرمایا کاری رہے۔ اوہ اُنی سو ستانوے توں نڑینوے تیکر سینٹ دے رکن رہے۔

اُنی سو نوے توں دوہزار چار تیکر دے چوداں سال آصف زرداری دی حیاتی دے سب توں ہنگامے والے سال ہین۔ بینظیر بھٹو دے پہلے دور وچ اوہناں تے کرپشن دے الزام لگنے شروع ہوئے تے اوہناں تے مسٹر ٹین پرسنٹ دا خطاب لاون دی کوشش کیتی گئی۔ سب توں پہلوں اُنی سو نوے وچ اوہناں نوں صدر غلام اسحاق خان دے دور وچ اک برطانوی تاجر مرتضیٰ بخاری دی لت تے بمب بنھ کے اٹھ لکھ ڈالر ہتھیاون دی سازش دے الزام وچ پھڑ لیا گیا۔ پر ایسے غلام اسحاق خان نے مگروں آصف علی زرداری نوں چھڈ دتا۔ آڈیٹر جنرل آف پاکستان دی اک رپورٹ موجب غلام اسحاق خان نے بینظیر تے آصف زرداری تے کرپشن دے اُنی ریفرینسز فائل کیتے پر اوہناں وچوں کوئی ثابت نہیں ہوسکیا۔

پنج نومبر اُنی سو چھیانوے نوں دوجی بینظیر حکومت دی معطلی توں مگروں آصف زرداری دا ناں مرتضیٰ بھٹو قتل کیس وچ آیا۔نواز شریف حکومت دے دوجے دور وچ اوہناں تے سٹیل مل دے پچھلے چیئر مین سجاد حسین تے سندھ ہائی کورٹ دے اک جج جسٹس نظام احمد دے قتل تے نشے دی سمگلنگ وچ رلتی ہوون، سوئس کمپنی ایس جی ایس کوٹیکنا، دوبئی دی اے آر وائی گولڈ کمپنی توں سونے دی درآمد، ہیلی کاپٹراں دی خریداری، پولش ٹریکٹراں دی خریداری تے فرانسیسی میراج طیاریاں دی ڈیل وچ کمیشن لین،برطانیہ وچ راک وڈ سٹیٹ خریدن، سوئس بینکاں راہیں منی لانڈرنگ تے سپین وچ آئیل فار فوڈ سکینڈل سنے کئی کیسز دسے گئے۔

انج دیاں فہرستاں وی جاری ہوئیاں کہ آصف علی زرداری نے حیدر آباد، نواب شاہ، تے کراچی وچ کئی ہزار ایکڑ قیمتی زرعی تے کمرشل زمین خریدی، چھ شوگر ملاں وچ حصص لئے۔ برطانیہ وچ نو، امریکہ وچ نو، بلجئم تے فرانس وچ دو دو تے دوبئی وچ کئی پروجیکٹس وچ کئی ناواں توں سرمایا کاری کیتی۔ جدوں کہ اپنی پراسرار دولت نوں لُکاون لئی سمندر پار کوئی چویہہ فرنٹ کمپنیاں بنا دتیاں۔

غلام اسحاق خان توں لے کے نواز شریف تے پرویز مشرف تیکر دیاں حکومتاں نے وچلے تے باہرلے ملک اہناں الزاماں، ریفرینسز تے مقدمیاں نوں اگے ودھاون لئی اک وڈی رقم خرچ کیتی۔ آصف زرداری کل ملا کے کوئی گیاراں ورہے جیل وچ رہے۔ جیل وچ وی آصف زرداری توجہ دا مرکز رہے۔کیوں کہ اوہناں نے قیدیاں دی بھلیائی لئی کئی کم کیتے جنہاں وچ کھانے تے کپڑے ونڈھنا تے غریب قیدیاں دی ضمانت لئی رقم دا بندوبست وی شامل رہیا۔ قید وچ اوہناں تے جسمانی تشدد وی ہویا۔ پر کوئی نتیجہ نہ نکلیا۔ قید دے وچ اوہناں نوں شوگر تے لک پیڑ دی شکایت وی ہوئی۔ دو ہزار پنج وچ آصف زرداری باہرلے ملک ٹر گئے۔ تے سیاست توں وکھ ہو کے آپنے آپ نوں دوبئی تے نیو یارک تیکر محدود کر لیا۔
جدوں پرویز مشرف تے بینظیر بھٹو دے وچکار امریکہ، برطانیہ، تے کجھ تگڑے سنگیاں دیاں کوششاں نال مصالحت شروع ہوئی۔ ایہدے مگروں اوہناں دے تے آصف زرداری دے خلاف عدالتی کاروائی سست پین لگی۔ کوئی اک مقدمہ وی یاں تے ثابت نہ ہوسکیا یاں واپس لے لیا گیا یاں حکومت ہور پیروی توں دستبردار ہو گئی۔ ایس سلسلے وچ اکتوبر دو ہزار ست وچ لیاندے گئے قومی مصالحتی آرڈیننس نے وی اہم کردار ادا کیتا۔

ستائی دسمبر دوہزار ست نوں بینظیر بھٹو دی شہادت دے مگروں آصف علی زرداری دی اگوائی وچ پیپلز پارٹی چوناں وچ سب توں وڈی پارٹی بن کے اُگڑی۔ شروع وچ گویڑ ایہہ سی جو آصف علی زرداری صرف پارٹی قیادت تے توجہ رکھن گے تے سونیا گاندھی بن کے رہن گے۔ پر پھیر اوہناں نے ملک دا صدر بنن دا فیصلہ کر لیا۔ تے اج آصف علی زرداری اپنا ایہہ ہدف پاون وچ کامیاب ہو گئے ہین۔ ذوالفقار علی بھٹو تے فاروق لغاری دے مگروں آصف زرداری پاکستان دے تیجے انج دے صدر ہین جیہڑے قید دے تجربے توں مگروں ملک دے سب توں وڈے عہدے تے لگے ہین۔ اوہناں دے پتر بلاول، دھی بختاور تے آصفہ نوں ستائی دسمبر نوں اپنی ماں دی شہادت توں مگروں پہلی واری کوئی وڈی خوشی ملی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels