Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> پڑھائی توں بھگوڑے جگ دے امیر ترین بندے

پڑھائی توں بھگوڑے جگ دے امیر ترین بندے

وچار ڈیسک
May 12th, 2008

کیہ کالجوں کڈھے گئے کسے چنگے پڑھیار توں بوہتے کامیاب ہو سکدے نیں؟ جی ہاں، انج ہو سکدا ہے جیکر تُسیں کئیاں ارب پتیاں دی کتھا سُنو تاں کالج دے بھگوڑے آپ اپنا کیریئر بنا کے دنیا دے امیر ترین بندے بن گئے۔ کالج توں کڈھے جان والے کامیاب کاروباریاں دی لسٹ ویکھ کے انج لگدا ہے پئی وڈیاں ڈِگریاں بوہتی اہمیت نہیں رکھدیاں۔ اسیں کجھ دُنیا دے ارب پتیاں دی کتھا دَسدے ہاں جیہڑے پڑھائی وچ کالج توں کڈھے جاون مگروں اپنی پڑھائی جاری نہ رکھ سکے پر کامیاب کاروباری بن کے جگ اُتے چمکے۔



ولیم ہینری گیٹس تیجا (1955)
ولیم ہینری گیٹس نے پال ایلن نال رل کے جگ دی سبھ توں وڈی سافٹ ویئر بناون والی کمپنی، مائیکروسافٹ کارپوریشن دا مُڈھ بنھیا۔ بل گیٹس جگ دا سبھ توں امیر ترین بندہ خورے مشہور بھگوڑا ہے ،اوس دی دولت دا گویڑ 480 کروڑ ڈالر یعنی دو لکھ یاراں ہزار دوسو کروڑ رُپئے ہے۔ گیٹس نے سیٹل وچ شاندار پریپ سکول وچ داخلہ لیا مُڑ ہارورڈ یونیورسٹی پڑھائی لئی چلا گیا اوتھوں بھج کے سافٹ ویئر ڈیویلپمنٹ دا کم شروع کیتا۔ بطور پڑھیار ستر دے دہاکے وچ اوہنے پال ایلن نال رَل کے ایلٹائر 8800 لئی اوریجنل ایلٹائر بیسک انٹرپریٹر لکھی جو پہلا کامیاب کمرشل کمپیوٹر سی۔ 1975ء وچ مائکروسافٹ مگروں مائیکرو سافٹ کارپوریشن نے جنم لیا۔تِن دہاکیاں وچ گیٹس فوربز دے درجناں ورھیاں وچ چار سواں چوں اک نمبر تے رہیا۔ پر ایتھے خورے تُسی نہ جاندے ہووے دی بل اینڈ میلنڈا گیٹس فاؤنڈیشن پولیو دے خاتمے واسطے ورلڈ بجٹ دا 90 فیصدی مہیا کردی ہے۔


لیری ایلیسن
1944ء وچ جمے لارنس جوزف ایلیسن بھائیوال موڈھی تے اوریکل کارپوریشن دے چیف ایگزیکٹو آفیسر نے 1977 ء دے وارے اپنی کمپنی دو ہزار ڈالر نال بنائی۔ کدی سکولوں نٹھیا ایلسین فوربز دے مطابق ہُن امریکہ دے امیرترین بندیاں چوں 184 کروڑ ڈالر دی دولت دا مالک ہے۔ ایہہ آنکڑے اوہنوں جگ وچ وی نواں امیر دَسدے نیں۔

جوانی سَمے ایلیسن نے ایمپیکس کارپوریشن وچ کم کیتا جتھے اوہدا اک پراجیکٹ سی آئی اے لئی ڈیٹا بیس بناؤنا سی۔ اوہنے ایہنوں اوریکل دا ناں دِتا جو ناں اوہنے ورھیاں مگروں کمپنی لئی ورتیا جیہنے اوہنوں شہرت دِتی۔ مزے دی گل اے، ستھ دی پہلی ریلیز اوریکل 2 سی جیس وچ دعوٰی کیتا گیا سی کہ پہلے ورشن وچ موجود بگ مُکا دیتے گئے نیں۔
ایلیسن اک رنگین مزاج بندہ ہے تے ہر شے وچ وڑیا رہندا ہے۔ اوہدی ہڈورتی دی کتاب "دی ڈِیفرنس بٹوین گاڈ اینڈ لیری ایلیسن" پڑھن جوگ ہے۔



دھیروبھائی امبانی
دھیرو بھائی امبانی 1932 ء نوں اک سکول ٹیچر ہوراں دے گھر جمیا۔ ایہہ اک وِچلے میل دا ٹبر سی۔ سولھاں ورہیاں دی عمر وچ دھیرو بھائی ایڈن چلا گیا جتھے پہلے اوہنے گیس سٹیشن تے اٹینڈنٹ دا کم کیتا تے مگروں آئل کمپنی دا کلرک بن گیا۔ 26 سالاں دی عمر وچ ہندوستان پرتیا تے 375 ڈالر دی چھوٹی جیہی رقم نال کاروبار شروع کیتا۔ اوہدی موت ویلے، اوس دی کمپنی رلائینس انڈسٹریز لیمٹڈ اک ایمپائر بن چکی اے جیس سالانہ کاروبار دا گویڑ 120 کروڑ ڈالر لایا جاندا اے۔

دھیروبھائی نوں اپنی حیاتی وچ اِی فیڈریشن آف انڈین چیمبرز آف کامرس اینڈ انڈسٹری ولوں انڈین انٹراپریونر آف ٹوینٹھ سینچری ایوارڈ دِتاگیا۔ 2000 ء ٹائمز آف انڈیا ولوں کیتے گئے پول مطابق اوہدی گنتی صدی وچ سبھ توں ودھ دولت بناون والیاں چوں سی۔ دھیرو بھائی دی صرف دولت مند دی کہانی نہیں اوہنوں انڈین کارپوریٹ دی تاریخ نوں مُڑ اُلیکن والا تے سُچا گلوبل کارپوریٹ گروپ بناون والے دے طور تے یاد رکھیا جاوے گا۔ اوہنے اِکلے اِی انڈین سٹاک مارکیٹ وچ سرمایہ کاری کر کے اوہنوں ساہواں دِتیاں تے ایکسچینج وچ ہزاراں دی گنتری وچ انویسٹر لیایا۔


سٹیو جابز
سٹیو پال جابز تے ایپل کمپیوٹرز اوہ ناں نیں جیہڑے اک دوجے نال جُڑے نیں۔ اک غیرپچھانے مصری عرب پیو دے گھر امریکہ وچ جمے جابز نوں جمن توں تھوڑے چِر مگروں لے پالکی وچ لے لیا گیا۔ ہائی سکول گریجوایشن مگروں ریڈ کالج وچ داخلہ لیا تے اک سیمسٹر مگروں کڈھ دِتا گیا۔ 1976 ء وچ 21 ورہیاں دے جابز نے 26 ورہیاں دے سیٹیو وازنیاک نال رل کے فیملی گیراج وچ ایپل کمپیوٹر کمپنی دی نینہہ رکھی۔ جابز نے انڈسٹری وچ گھریلو کمپیوٹر دا نظریہ لیا کے انقلاب لیا دِتا۔ 1984 ء وچ میکنٹوش متعارف کروایا گیا۔ اوہدا ورلڈ وائڈ ویب دی اُساری وچ بھرواں کردار سی تے پکسار اینیمیشن سٹوڈیوز دا چیئرمین اتے سی ای او وی رہیا۔ اجکل ایپل، آئی پوڈ سبھ توں وڈے نیں۔ جابز نے کئی ورہیاں سالانہ اک ڈالر تنخواہ تے وی کم کیتا ہویا ہے اِنج اوہنوں گینس بُک وچ سبھ توں گھٹ دیہاڑی والا چیف ایگزیکٹو آفیسر دا اعزاز وی حاصل ہے۔ اوہنوں اک وار کمپنی نے 9 کروڑ ڈالر دا جیٹ وی تحفے وچ دِتا سی۔ اوہدی کُل دولت کِنی جے؟ تِن بلین ڈالر توں وی ودھ۔


مائیکل ڈیل
مائیکل ڈیل نے یونیورسٹی آف ٹیکساس آسٹن وچ فزیشن بنن دی تانگھ کرکے داخلہ لیا۔ پڑھائی وارے اوہنے اپنے ڈورمیٹوری وچ کمپیوٹر کمپنی کھول لئی تے پی سیز لیمٹڈ ناں رکھیا۔ 19 ورہیاں دی عمر وچ اوہنوں اینی کامیابی مل گئی جیہنے ڈیل نوں پڑھتا چھڈن دے مجبور کردتا۔ 1987 ء وچ پی سیز لیمٹڈ دا ناں بدل کے ڈیل کمپیوٹر کارپوریشن رکھیا گیا۔ 2003 ء تیک ڈیل انکارپوریٹڈ کمپیوٹر بناون والیاں چوں سبھ توں چوکھا منافع کھٹن والی کمپنی سی۔ فوربز دے مطابق 2005 ء اوہ دنیا دے امیراں چوں 18 ویں نمبر تے سی اوہدی دولت 1600 کروڑ ڈالر دے نیڑے ہے۔


سُبھاش چندر گوئل
بوہت سارے لوکاں نوں سُبھاش چندر گوئل بارے جانکاری نہیں ہے۔ زی ٹی وی دا چیئرمین بارہویں وچ پڑھائی توں بھگوڑا ہوگیا سی۔ سُبھاش نے اپنی ویجیٹیبل آئل دا یونٹ 19 سالاں دی عمر وچ شروع کیتا۔ کہن نوں تے ایہہ اوس دا پہلا کم سی پر اتفاقیہ دوردرشن اپنے سنگی نوں مِلن جاون تے اوہنوں اپنی براڈکاسٹنگ کمپنی بناون دا خیال آیا فیر اسیں جاندے اِی ہاں کہ کہانی کیویں تُری۔ چندر نوں پروگرامنگ، ڈسٹریبیوشن یاں فلم رائٹس بارے کوئی جانکاری نہیں سی۔ اوہنے جو کجھ سمجھیا اوہ اوویں سی جیویں اک ہندوستانی وِچاردا ہے۔ برطانوی کاروباری دی امداد نال زی ہندوستان دا پہلا سیٹلائٹ ٹی وی چینل بن گیا۔ ہُن ایہہ 320 لکھ گھراں تے دکھنی ایشانی دے 20 کروڑ لوکائی نوں جوڑ رہیا اے۔ ایہہ نیٹ ورک امریکہ، مڈل ایسٹ، یورپ،افریقہ وچ وسے ایشیائیاں دی کوریج کررہیا اے جو اک بھگوڑے نوں بہوں امیر کررہیا اے۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels