Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> پاکستان دے دولت مند

پاکستان دے دولت مند

ایم طاہر میمن
April 24th, 2008

پاکستان دے بااثر اُچیاں یاں گروپاں دی کاہڈ کرنا کوئی سوکھا کم نہیں کیونجے ہر کوئی پچھے سٹھاں سالاں توں ہر حکومت  تے ہردور وچ طاقتور رہے فیر کجھ موسمی کاڈیاں نے طاقت دے ایواناں وچ کجھ دیر تائیں اپنی واج سُنائی لیکن کجھ وجہوں پاروں چُپ کر گئے۔ اسیں اجیہے کجھ سیٹھاں دی لسٹ تیار کیتی جیہڑے مُلک تاریخ دے ہر انگ وچ اپنی ہوند دا وِکھالا کردے رہے تے مُلکی سٹاک مارکیٹ، کرنسی ریئل اسٹیٹ تے ہر بزنس اُتے  چھائے رہے۔

 

1- میاں محمد منشاء            صنعتکار

 

1٫25 بلین پاؤنڈ دولت رکھن والے میاں محمد منشاء ہوراں دیاں چالھی کمپنیاں چل رہیاں نیں۔ منشاء جو مسلم کمرشل بینک دا مالک اے  17 ملین ڈالر دی پیپر مل لارہیا اے۔ نشاط گروپ ناں ہیٹھ ٹیکسٹائل، سیمنٹ، لیزنگ، انشورنس دیاں پنجاہ کمپنیاں کم کردیاں نیں۔ منشاء نوں 1970 ءوچ بھٹو ہوراں دی نیشنلائزیشن وچ چنگی مار پئی پر نواز شریف دی ڈی نیشنلائزیشن پاروں چوکھا اُپاہ ہویا۔ نشاط گروپ دے اثاثے 4٫4 بلین ڈالر نیں۔

 

2- آصف علی زرداری         سیاستدان

مُل: 900 ملین پاؤنڈ (1٫8 بلین ڈالر)

آصف زرداری مسٹر ٹین پرسنٹ اپنی گھروالی وزیراعظم بینظیر بھٹو دے عہدے دا بھرواں لابھ چُکیا تے  پاکستان اندر تے باہروں سودیاں وچ کِکس بیکس حاصل کیتیاں اوہناں دی دولت دا گویڑ 900 ملین پاؤنڈ یاں 1٫8 بلین ڈلر لائی جاندی ایس کمائی وچ سبھ توں مشہور ڈیل  چار بلین ڈالر دی  فرانسیسی کمپنی ڈسالٹ نال ڈیل سی جیس دا 5 فیصد کمیشن 200 ملین ڈالر مارلٹن بزنس جہنوں زرداری چلاؤندا سی ، نوں دِتا گیا۔ ایس توں وکھ زرداری ہوراں نے ایس جی ایس، اے آر وائے گولڈ، کوٹیکنا، زی پی سی یورس پولش ٹریکٹر کمپنی چوں کِکس بیکس کھٹیا۔ برطانیہ وچ زرداری دی مہنگیاں تھاواں تے جائیداد ہے جیویں سرے دی4٫35 ملین پاؤنڈ دی  365 ایکڑاں تے راک وُڈ اسٹیٹ جیہنوں ویچ کے پاکستان نوں رقم تاری گئی۔ امریکہ وچ 14 ملٹی ملین ڈالر مینشن جیویں  ہولیڈے ان ہوٹل ہوسٹن جو مسٹر ٹین پرسنٹ تے اقبال میمن تے صدر الدین ہاشوانی دی ملکیت ہے۔ ایس توں وکھ زرداری ہوراں دے مڈل ایسٹ وچ چنگے وڈے کاروبارنیں تے اوہ پاکستان بھر دیاں شوگر ملاں سکرنڈ شوگرملز نوابشاہ، انصاری شوگر ملزحیدرآباد، مرزا شوگر ملز بدین، پنگریو شوگرملز ٹھٹھہ تے بچانی شوگر ملز سانگھڑ دا حصے دار وی اے۔

 

3- سرانور پرویز،  یوکے             بزنس مین

 

تیجے نمبر تے 760 ملین پاؤنڈ دولت نال  برطانوی بیسٹ وے گروپ دے چیئر مین سر انور پرویز نیں ۔ بیسٹ وے گروپ دا بوہتا کاروبار  کیش کیری ویر ہاؤسز رہیا اے لیکن پاکستان وچ  ایہناں پراپرٹی انویسٹمنٹ، ریٹیل آؤٹ لٹس، رائس ملز، دالاں تے سیمنٹ سازی وچ سرمایہ کاری وی کیتی اے ۔ 1995 ء وچ بیسٹ وے گروپ نے پاکستانی سیمنٹ صنعت وچ سرمایہ کاری کرکے 120 ملین ڈالر نال سیمنٹ پلانٹ لایا۔ ایس توں وکھ 2002 ء وچ بیسٹ وے گروپ نے یونائٹڈ بینک دے 25٫5 فیصد شیئر وی حاصل کرلئے سن۔

 

4- نواز شریف تے شہباز شریف         سیاستدان، بزنس مین

 

بزنس مین توں  بَنے سیاستدان گذریل وزیراعظم شریف ہوراں  نوں 1999 ء دے ملٹری دھڑن تختے  مگروں 9 میلین ڈالر سَنے 5 ملین ڈالر دا رائے ونڈ محل رہن رکھنا پیا۔ وزیراعظم بنن توں پہلاں اپنے بھرواں تے چچیراں دے اتفاق گروپ  دے وڈے بھائیوال سن جیہناں دی دولت 90 دے دہاکے وچ 50 ملین پاؤنڈ سی۔ پر نواز شریف باہرلیاں کمپینیاں دی پاکستان وچ سرمایہ کاری توں کمیش حاصل کرکے ہور امیر ہوگئے سن۔ اوہناں موٹروے تے دوجیاں نویاں سڑکاں بناکے چوکھے کِکس بیکس اکٹھے کیتے مگروں اقراء فنڈ توں 100 ملین ڈالر، گھراپنا سکیم توں 40 ملین ڈالر تے قرض اُتارو مُلک سنوارو سکیم دی ساری کمائی اپنے بوجھے پائی۔ سعودی عرب وچ دیس نکالے دوران اوہناں دے چوکھے کاروبار چلدے رہے ہین۔

 

5- صدرالدین ہاشوانی              بزنس مین

 

پنجویں نمبر دے ہاشو گروپ دے چیئرمین صدرالدین ہاشوانی آؤندے ہین جیہناں دی دولت دا گویڑ 550 ملین پاؤنڈ یاں 1٫1 بلین ڈالر اے۔ ہاشوانی 1974 ء دی نیشنلائزیشن ویلے کپاہ، دالاں تے سٹیل دا بیوپار کردے رہے تے پاکستان دے کاٹن کنگ توں جانے جاندے سن۔ اجکل ایہہ گروپ چولاں، کنک، کپاہ، جوں دی ایکسپورٹ سَنے ٹیکسٹائل یونٹ دا مالک اے۔ ایس توں وکھ ایہناں کاناں، معدنیات، ہوٹل، انشورنس، بیٹریز، تمباکو، رہائشی جائیداداں، کنسٹرکشن، انجیئرنگ تے انفارمیشن ٹیکنالوجی وچ بتھیری سرمایہ کاری کیتی ہوئی اے۔ صدرالدین ہاشوانی تے اپنے بھتیجے حسن علی ہاشوانی نال رَل کے 45 کمپنیاں چلا رہیا اے۔ ایہناں دا اک بھرا اکبر دوجا ہاشوانی گروپ دا مالک اے تے سگریٹاں دی امپورٹ تے ڈیوٹی ناں بھرن تے پھڑیا وی گیا سی۔ اوہ پاکستان دا وڈا سرپینچ ہے جیہڑا ہر دور وچ ڈپلومیٹک انکلیو وچ سَدیا جاندا ہے۔

 

6- ناصر شون تے ٹبر           یو۔اے۔ای ، پاکستان

 

ناصر شون پاکستان دے اُگھے بزنس آگو ہین تے شون گروپ دے چیف ایگزیکٹو آفیسر نیں۔ پی آئی اے دے گذریل پائلٹ کیپٹن اطہر شون حسین دا پُتر ناصر شون دی دولت دا گویڑ 500 ملین پاؤنڈ یاں اک بلین ڈالر لایا جاندا ہے۔ شون ٹبر پاکستان دے گنتری دے امیر اردو مہاجر ٹبراں چوں اک اے۔ 1982ء وچ سنگاپور توں اُڈاری مارن والے شون گروپ199 وچ ٹیسی تے اپڑیا جدوں نیشنل فائبرز، شون بینک، شون ٹیکسٹائل تے پاک چائنہ فرٹیلائزر دے مالک بنے۔ اپنے سنگیاں وِچکار ٹرینڈ سیٹر توں جانے جاندے ناصر شون  پاکستان دے پہلے بندیاں چوں سن جیہناں کول رولز رائس گڈی سی۔ 1997 ء بینظیر بھٹو دی حکومت ختم ہون تے شون گروپ دے ڈائریکٹرز دوبئی اُڈاری مار گئے سن۔ شون گروپ دے ڈائریکٹر آصف زرداری دے بیلی سن تے نواز شریف نے شون گروپ دے کئی اثاثیاں دی بولی لوادِتی سی۔ پاکستان وچ اِکلا شون گروپ اِی جیہنے وطن پرتن لئی حکومت نوں تِن ارب رُپئے تارے۔ اجکل شون گروپ 830 ملین ڈالر نال ریئل اسٹیٹ  دوبیئ لاگون دے ناں توں چلا رہیا ہے تے اپنیاں شیواں نوں مُڑ واپس لین دے جتن کررہے نیں۔

 

7۔ عبدالرزاق داؤد تے ٹبر                   یو اے ای

 

500 ملین پاؤنڈ یاں اک بلین ڈالر دے مالک عبدالرزاق داؤد ہوراں دا امیراں وچ سَتواں پدھر اے۔ اوہ اُگھے باہرلے پاکستانی کاروباری تے آر وائی گروپ تے ورلڈ میمن آرگنائزیشن دے صدر نیں۔ اوہناں دے 7 ٹی وی چینل تے کراچی، اسلام آباد دوبئی وچ جائیداد دی ملکیت 200 ملین ڈالر ہے۔ اوہناں دا بوہتا کم سونے دا ہے تے ایشیاء وچ 20 آؤٹ لٹس نیں۔ اوہناں نے 1990 وارے آصف زرداری نوں 5 ملین ڈالر سونے دی امپورٹ ایکسپورٹ لئی تارے۔ جیس توں آصف انکاری ہے تے گورت دعوی لئی ثبوت منگدی ہے۔

 

8- رفیق حبیب تے رشید حبیب               بزنس مین

تاریخ دَسدی ہے کہ دولت دی دیوی کسے ہور توں ودھ حبیباں نال پیار کردی ہے۔ اٹھویں پدھر دے مالک حبیب بھراواں دی دولت دا گویڑ 450 ملین پاؤنڈ ہے تے بوہتے پنڈتاں نوں پَک اے کہ حبیباں کول جگ بھر وچ گھٹ توں گھٹ 100 کمپنیاں ہین۔ ایہہ انڈسٹریل گروپ دی نینہ، بمبئی دی اسماعیل علی اے فیکٹری دے گھر 1878 ء نوں جمن والے سیٹھ حبیب  متھا ہوراں رکھی۔ حبیباں دی دولت دا اندازہ ایتھوں لایا جاسکدا ہے کہ 1948 ءوچ محمد علی حبیب ہوراں قائداعظم نوں 8 کروڑ رُپئے دا چیک دِتا سی۔ 1912 ء تیک اوہناں دے یورپ وچ دفتر سن تے 1941 وچ حبیب بینک بنایا گیا۔ اوہناں کول حبیب بینک اے جی زیورخ، بینک الحبییب، کرولا اسمبلنگ دی انڈس موٹرز تے جیوٹ، پیپر سیک،منرلز، سٹیلز، ٹائلز، سنتھٹک شوگر، گلاس، کنسٹرکشن، کنکریٹ، فارم آٹوز، بینکنگ، آئل، کمپیوٹر، میوزک، پییپر، پیکیجز، لیز، کیپٹل مینیجمنٹ دے کھیتراں وچ چنگے یونٹاں دی ملکیت ہے۔ حبیب اجکل رفیق حبیب تے رشید حبیب  دے ناں توں دو وکھ گروپ چل رہے نیں۔ ہر سمے وچ اُچے کھیڈاری رہن والیاں دی ایہا حقیقت اے کہ اجکل دے اُچے کاروباریاں وچ حبیب اک کتھا بن کے رہ گئے نیں۔

 

9- طارق سہگل تے نسیم سہگل              صنعتکار

425 ملین پاؤنڈ دولت نال چھیویں نمبر تے جہلم دا سہگل خاندا ن ہے۔ موڈھی امین سہگل نے 1890 وچ اک جُتیاں دی دوکان توں سہگل خاندان دی مُڈھ بنھیا جیہڑی مُڑ کوہ نور ربڑ ورکس بن گیا ایس دے مگروں کوہ نور اِیناں چمکیا کہ نیشنلائزیشن دی ڈَک نال اوہناں دی دو تہائی دولت کھُس گئی۔ 1948 ء وچ سیہگلاں نے کوہ نور ٹیکسٹائل ملز اسی لکھ رُپئے مالیت نال لائی تے سٹیٹ بینک آف پاکستان توں پہلی وار ایل سی کھُلان والے سہگل اِی سن۔ بھٹو دور وچ سہگل سعودی عرب رہے۔ اجکل طارق تے نسیم سہگل نے خاندانی قلعہ سنبھالیا ہویا ہے تے ذاتی طور تے  خاندانی اُچیائیاں نوں چھوہیا اے۔ نیب نسیم دے پچھے لگی رہی جد کہ طارق نے ہر پاسیوں ملن والے انعام نوں قبول یاں ٹھُکراندے ہویاں ویلا لنگھایا۔ طارق بہترین بزنس مین گِیا جاندا ہے۔

 

10- دیوان یوسف فارقی                             بزنس مین

 

نویں نمبر تے 400 ملین پاؤنڈ دولت والے دیوان گروپ دے موڈھی فاروقی سندھ لوکل باڈیز دے صوبائی وزیر رہے۔ دیوان مشتاق گروپ پاکستان دا سبھ توں وڈا صنعتی گروپ جیہڑا اکریلک فائبرز، آٹوموٹوز دی مینوفیکچرنگ کردا ہے۔ دیوانی فاروقی موٹرز کول ہیونڈائی اتے کیا موٹرز کوریا نال ٹیکنیکل سمجھوتے ہیٹھ پاکستان وچ سالانہ دس ہزار گڈیاں بندیاں ہین۔ دیوان سلمان فائبرز دنیا وچ گیارہویں نمبر تے ہے۔ گروپ دی مالکی وچ  تِن ٹیکسٹائل یونٹ، اک موٹرسائیکل مینوفیکچرنگ اتے مُلک دی سبھ توں وڈا کھنڈ دا کارخانہ ہے۔ایہناں کول سعودی سیمنٹ، پاک لینڈ سیمنٹ دے لکھاں مالیت دے شیئر اتے پاکستان وچ بی ایم ڈبیلو تے رولزرائس گڈیاں دے شورومز تے فرینچائزیاں دا لائسنس وی ہے۔

 

11 ۔سلطان علی لاکھانی                 پاکستان

 

لاکھانی چارسو ملین پاؤنڈ دولت نال نویں پدھر نال گنڈھے ہوئے نیں۔ اجکل نیب دے ہتھوں لاکھانیاں تے اوکھا ویلا آئیا ہویا اے۔ سلطان لاکھانی تے اوہدے تِن بھر اُگھا گروپ تے پاکستان وچ میکڈونلڈز ریسٹورنٹس دی چین چلارہے نیں۔ لاکھانیاں اُتے جعلی کمپنیاں بنا کے بینکاں توں بھاری قرض لین دا کیس نیب وچ چل رہیا ہے۔ ہاشوانی تے لاکھانی اک دوجے دے مقابلے تے ہین

 

12- ملک ریاض حسین                  بزنس مین

لاہور، کراچی، اسلام آباد راولپنڈی وچ بحریہ ٹاؤن پراجیکٹ شروع کرکے چار میلن پاؤنڈ دولت نال نویں نمبر تے لاکھانی نال ڈٹے ملک ریاض حسین نیں۔ پاکستان تے باہر اوہناں دی جائیداد دا مُل اک بلین ڈالر دے نیڑے لایا جاندا ہے۔

 

ایہہ بارہ پاکستانی دولت مند لوک ہین جیہناں دا ہردور وچ ہتھ رہیا ایس توں بعد تیرھویں نمبر دے شیخ عابد حسین عرف سیٹھ عابد ہین 390 ملین پاؤنڈ دولت نال سیٹھ نے گرین فوٹ دے ناں ہیٹھ رہائشی سکیم شروع کیتی۔ سمگلنگ توں شہرت حاصل کرنے والے سیٹھ عابد  مشہوری توں دور رہندے نیں ۔

کاروبار

دولت

ناں

پدھر

چناب لیمیٹڈ، فیصل آباد

350 ملین پاؤنڈ

میاں محمد لطیف

14

ستارہ گروپ فیصل آباد

330 ملین پاؤنڈ

حاجی عبدالغفور تے حاجی بشیر احمد

15

ریل اسٹیٹ،گوادر پراجیکٹ

300 ملین  پاؤنڈ

شیخانی فیملی

16

ڈیسکون گروپ

250 ملین پاؤنڈ

 رزاق داؤد

17

آواری ہوٹلز، سی فرنٹ لگژری ہوٹل

200 ملین پاؤنڈ

بائی رام ڈنشا جی آواری

18

کوپلا گروپ، کے ایف سی

240 ملین پاؤنڈ

رفیق رنگون والا

19

کے مین ہولڈنگز امریکا

240 ملین پاؤنڈ

شمی قریشی

20

 

 

 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels