Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> داعش نہیں فاحش(فحاشی توں)،اسامہ نوں طالبان بچایا،ڈی ریڈیکلائزیشن دی لوڑ ،لندنی کردار۔ترکی الٖفیصل

داعش نہیں فاحش(فحاشی توں)،اسامہ نوں طالبان بچایا،ڈی ریڈیکلائزیشن دی لوڑ ،لندنی کردار۔ترکی الٖفیصل

وچار ڈیسک
October 5th, 2017

اسامہ بن لادن نوں سعودی پھڑیچنا چاہندے سن، سزا دینا چاہندے سن پر ملا عمر انکار کیتا تے پورا خطہ اتے دنیا بربادیاں دا شکار ہوئی۔سعودی عرب نے 1998وچ اوس ویلے طالبان نال سانگا توڑ لتا سی جداں ملا عمر مینوں اسامہ حوالے نہ کرن دا آکھیا سی۔میڈیا وچ داعش یا اسلامی سٹیٹ لکھن دی تھاں انہاں ات گرداں لئی لفظ ’’فاحش‘‘ ورتیا جانا چاہیدا ہے جیہڑا عربی دا لفظ ہت جس دا مطلب فحاشی ہے۔نرا فوجی کاروائیاں نال انہاں ات گرداں تے انتہا پسنداں نوں نہیں نکایا جا سکدا۔ اساں انہاں لئی ڈی ریڈیکلائزیشن دا پروسس شروع کیتا ہویا ہے۔ اتھے پہلے انہاں نوں تفسیاتی ڈاکٹر ویکھدے نیں اتے بعدوں انہاں نوں علماء کول گھلیا جاندا ہے۔ایہہ گلاں سعودی عرب دی خفیہ ایجنسی دے پرانے پردھان ترکی الفیصل روسی میڈیا سپوتنک نوں دتے انٹرویو وچ آکھیاں۔انٹرویو دا لنک وی تھلے دتا جا رہیا ہے جیہڑا سعودی عرب دے پادشاہ دے روسی دورے توں پہلاں چھاپیا گیا۔
انہاں اسامہ بن لادن دی کہانی وی سنائی کہ جداں سعودی عرب1998وچ طالبان دا ساتھ چھڈ دتا سی تاں فیر پاکستان کیوں انہاں نال جڑیا رہیا؟اوس ویلے تے میاں نواز شریف دی سرکار سی تے اوہ ایہہ دس سکدے نیں پئی ساڈی ریاست وچ طالبان دے حمائیتی کیہڑے کیہڑے سن؟
ترکی الفیصل دسیا ہے پئی روسی فوجاں نال لڑن اتے جہاد کرن وچ اسامہ بن لادن دا کوئی کردار نہیں سی۔ اوہ مجاہدین دی مدد تے کردا سی، موبائل میڈیکل یونٹ وی اوس بنائے سن اتے رقماں وی دیندا سی پر جنیوا معاہدے بعدوں اوہ سعودی ریاست دی آشیرباد توں بغیر پاکستان آیا سی۔ذرا غور کرو پئی جنیوا معاہدے بعدوں ، پاکستان وچ کون کون سن جیہڑے ایس معاہدے خلاف صفاں سدھیاں کرن تے لگ گئے سن؟ جنرل (ر) حمید گل دے انٹرویو تے ریکارڈ تے نیں پئی پوری دنیا دے برخلاف افغان جہاد نوں ضیا الحق دے انجام توں بعد وی جاری رکھن دی خاہشاں وچوں اسامہ تے طالبان وڈے ہوئے۔
نومبر1996وچ جداں بے نظیر بھٹو دی دوجی سرکار توڑی گئی تے طالبان اقتدار وچ آ چکے سن اتے اسامہ سوڈان توں افغانستان اپڑیا سی۔پاکستان وچ بنائی جاون والی نگران سرکار وچ نجم سیٹھی، ملک معراج خالد ورگے بندیاں نوں رلا کے کجھ ہور تاثر دتا جارہیا سی پر وڈا ٹیچا طالبان دی طاقتاں تے اسامے دی رقماں پاروں کجھ ہور کرنا سی۔فروری1997وچ نواز شریف دی سرکار بن گئی سی پر اوس ویلے مسلم لیگ سرکار دے نیڑے رہن والے سابق سفارتکار اکرم ذکی اپنے انٹرویو وچ آکھ چکے نیں پئی نواز کابینہ وچ طالبان دی سرکار نوں منن دے حوالے نال ونڈ اگڑویں سی اتے بہوں بحثاں بعدوں1998وچ طالبان نوں تسلیم کیتا گیا۔ترکی الٖفیصل دے انٹرویو نوں پاکستان وچ انہاں ویلیاں وچ ہون والی سیاستاں نال رکھ کے پڑھو تے سمجھ آندی ہے پئی کیوں ریاست نوں ضرب عضباں تے رد الفساداں دی لوڑ پئی۔
اسامہ دی کہانی سناندے ہوئے ترکی ہوراں دسیا پئی جداں اسامہ پشورتے کوئٹہ وچ افغان مہاجرین دے کیمپاں وچ لوک سیوا دے کم کریندا سی تے مجاہدین اوس نوں روسیاں نال لڑن نہیں جان دتا سی۔ اوہ اوس توں رقماں تے مدد اتے اسلحہ ہی لیندے سن۔
اوہ پہلی وار لڑدے افغان گروپاں دی ہک دھڑے نال رل کے قندہار ول پاکستان نوں ہون والی لڑائی وچ رلتی ہویا تے روسی افغان حملے پاروں اسامہ ہوری بے ہوش ہو گئے سن۔مجاہدین دے اپنے رسالے وچ اسامہ دا دتا انٹرویو میں آپ پڑھیا ہے جس وچ بے ہوش ہون والے وقوعے نوں بڑا پرسرار بنا کے پیش کیتا گیا۔جداں اوہ ہوش وچ آیا تے روسی اوتھوں دوڑ چکے سن۔ایہہ اوس آپ پہلی جنگ وچ رلن دا احوال لکھیا جس وچ ایڈا وڈا مجاہد آپ ستا ہی رہ گیا(قہقے)۔نہ تے اوہ مجاہد سی اتے نہ ہی اوس نوں سعودی سرکار گھلیا سی۔ پر فیر اوس نوں میڈیا راہیں ہیرو بنایا گیا۔ہوش وچ آون توں بعد اسامے ایہہ آکھیا پئی جداں میں بے ہوش ساں تے غیب توں فرشتے اترے اتے انہاں روسیاں نوں ماریا۔ایہہ اسامہ نوں بناون دا آغاز سی۔ویسے پاکستان وچ وی اسامہ کہانیاں میڈیا راہیں1988بعدوں مشہور کیتیاں گیاں اتے اوس دے تورا بورا توں انٹرویو وی ہالی وڈ دی فلماں وانگ کراوائے گئے۔ ایس وچ کون کون ملوث سی، پاکستانی سب جاندے نیں۔
شاہ فیصل دی تگڑی ترک بیوی عفت دے گھر1945وچ جمن والے ترکی الفیصل1979توں2001تیک سعودی عرب دے ڈائریکٹر آف جنرل انٹیلی جنس رہے اتے بعد وچ انہاں پہلی برطانیہ اتے فیر امریکہ وچ سفیر بن کے کم کیتا۔ انہاں دسیا پئی جداں میں برطانیہ وچ ساں تے میں برٹش وڈے افسراں نوں دسیا پئی لندن وچ مسیتاں دے بہوں سارے امام انتہا پسندیاں پھیلا رہے نیں اتے انہاں دا بیانیہ ات گردیاں نوں ودھا رہیا ہے۔اجہے ات گرد سپورٹراں نوں برٹش میڈیا وی چک رہیا ہے۔ ایہہ اسلام دی مار دھاڑ والی تصویر پیش کر رہے نیں جیہڑی بہوں خطرناک ہو سکدی ہے۔پر انہاں نون روکیا نہیں گیا اتے فری سپیچ دی آڑ وچ انہاں نوں ودھن دتا گیا۔یورپی تے امریکی سوسائٹیاں وچ انہاں دی موجودگی پاروں نسلی قوم پرست تگڑے ہو رہے نیں۔ ایہہ سب بربادی دا کھیڈ ہے۔
ات گرداں تے انتہا پسنداں نوں نرا فوجی یا پلس ایکشن نال مکایا نہیں جا سکدا۔ اساں ڈی ریڈیکلائزیشن دا وڈا پروگرام چلا رہے ہاں۔سعودی عرب دی داخلہ وزارت ایس ڈی ریڈکلائزیشن پروگرام دی انچارج ہے اتے جے تسی ساڈے ملک آؤ تے آپ انہاں نوں ویکھ سکدے ہو۔بہوں سارے انتہا پسنداں نوں تے انہاں دے خاندان والے چھڈ کے گئے نیں۔پہلے انہاں نوں سائیکولوجسٹ کول گھلیا جاندا ہے تے اوتھوں فارغ ہو کے انہاں نوں علماء کول گھلیا جاندا ہے اتے جداں انہاں بارے ساری رپورٹاں مثبت آ جاندیاں نیں فیر اک لمیرے چر بعدوں انہاں نوں سوسائٹی دا مڑ ممبر بنن دا موقعہ دتا جاندا ہے۔ پاکستان وچ اساں انہاں نوں سدھا چوناں وچ وی ریڈیکلائزیشن دے ناں تے لی جاندے ہاں اتے داخلہ وزارت تھلے نیکٹا نوں چلن ہی نہیں دتا جاندا۔
 Link of interview published in Sputnik
https://sputniknews.com/middleeast/201710021057855693-prince-turki-faisal-al-saud-interview/?utm_source=adfox_site_41917&utm_medium=adfox_banner_2235179&utm_campaign=adfox_campaign_626011&ues=1


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels