Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> انسانی سمگلنگ:سندھ ، پنجاب چنگی کارکردگی ،طیبہ کیس ،افغانستان،پاکستان، بھارت، ایران توجہ دین۔عالمی رپورٹ

انسانی سمگلنگ:سندھ ، پنجاب چنگی کارکردگی ،طیبہ کیس ،افغانستان،پاکستان، بھارت، ایران توجہ دین۔عالمی رپورٹ

June 28th, 2017

ساڈے خطہ وچ پھیلدی انتہا پسندیاں دا ایہہ اوہ حوالہ ہے جس بارے اکثر ملک انکاری صوتحال دا شکار نیں۔امریکہ توں انسانی سمگلنگ دی عالمی رپورٹ2017جاری کیتی جے۔انسانی سمگلنگ(human trafficking) وچ بچیاں نال زورزبردستیاں،جنسی کماں وچ بالڑیاں تے جوان کڑیاں،منڈیاں نوں ورتنا،زنانیاں تے جنسی تشدد،اک تھاں توں بچیاں تے جواناں نوں دوجی تھاواں تے لیجانا تے انہاں نوں نشیاں تے جنسی جرماں وچ پانا، اایہہ سب انسانی سمگلنگ وچ آندا ہے۔رپورٹ پڑھ کے پتہ چلدا ہے کہ وسط ایشیا، جنوبی ایشیا، ایران تے مڈل ایسٹ وچ انسانی سمگلنگ وڈے پدر تے ہوندی ہے۔پاکستان تے پورے پنج صفحیاں دے باب تے ٹی وی چینلاں نوں پروگرام اتے کالم لکھن والیاں نوں لکھتاں لکھنیاں چاہیدیاں نیں۔رپورٹ وچ ایسے ایسے ہوشربا انکشاف نیں کہ پتہ چلدا ہے کہ اشرافیہ تے میڈیا عام لوکاں دے مسئلیاں توں دو رنرے محلاتی سازشاں وچ رجھے ہوئے نیں۔ بحرین دی رپورٹ وچ لکھیا ہے کہ ایتھے ہر سال وڈی گنتری وچ بچیاں نوں پاکستان، بھارت، بنگلہ دیش،نیپال، تھائی لینڈ، مصر، یمن توں گھریلو کم کاج لئی لالچ دے کے لے آیا جاندا ہے۔انہاں نوں لیجان لئی انسانی سمگلر زمینی تے سمندری رستے ورتدے نیں تے غیر قنونی بندوبست پاروں مختلف ملکاں دے سیکورٹی ادارے مالی تے جنسی کرپشن وچ ملوث نیں۔پاکستان، بھارتتے افغانستان وچ بعض صوبیاں وچ کجھ رقم قرض تے دے کے انہاں دے منڈیاں، کڑیاں نوں مستقل طور تے لے جاندے نیں۔انہاں بچیاں توں ہر قسم دا جرم کریا جاندا ہے اتے انہاں دی وڈی گنتری دوڑ جاندی ہے کہ انسانی سمگلر اجہے بچیاں دی تاک وچ ہوندے نیں۔رپورٹ وچ دسیا گیا ہے کہ پچھلے سال دے مقابلے وچ2016 دے سال انسانی سمگلنگ وچ اصافہ ہویا ہے۔پاکستان تے ایران وچ افغان بچیاں دی ماڑی حالتاں دا ذکر کردے ہوئے رپورٹ دسدی ہے کہ انہاں بے گھر بچیاں توں جنسی تے دوجے جرم کروان والے وی افغان یا پختون ہی نیں۔پاکستان انسانی سمگلنگ پاروں انہاں ملکاں وچ ہے جتھے بہوں کم کرن دی لوڑ ہے پر پچھلے کجھ سالاں وچ ایتھے ریاستی تے حکومتی پدر تے کم وی کیتا گیا ہے۔پنجاب تے سندھ دی حکومتاں تے نویں قنون وی بنائے نیں تے انسانی سمگلراں خلاف گھیرا تنگ وی کیتا ہے۔پاکستان وچ انسانی سمگلراں نوں سزاواں دین دے حوالے نال ریکارڈ بہوں برا ہے۔ایہہ مسلہ جڈا وڈا تے اہم ہے ایس بارے ریاست ، سیکورٹی اداریاں تے سیاستداناں نوں رل مل کم کرن دی لوڑ ہے۔پنجاب وچپچھلے دوسالاں وچ1241تے1291مقدمے رجسٹرڈ ہوئے اتے 2015وچ 40مقدمیاں وچ سزاواں سنائی گیاں جداں کہ 2016وچ119مقدمیاں وشسزاواں سنائی گیاں۔خیبر پختونخوا وچ2015دے سال نرے55مقدمے بنائے گئے تے نرے27مقدمیاں وچ سزا ہوئی۔2016وچ خیبر پی کے وچ263مقدمے بنے پر اک وی انسانی سمگلر نوں سزا نہیں ہوئی۔رپورٹ دسدی ہے کہ بلوچستان تے خیبر پختونخوا وچ جتھے انسانی سمگلنگ دا گراف وی زیادہ ہے، سال2016نوں اک وی انسانی سمگلر سزا نہ پا سکیا۔ایف آئی اے تے پلس نوں پچھلے دوسالاں وچ انسانی سمگلنگ دے حوالے نال دتیاں عالمی پدر دی تربیتاں دا ذکر وی ہے پر ایہہ وی دسیا گیا ہے کہ انسانی سمگلراں دے حمائیتی وی ریاستی اداریاں وچ نیں اتے اوہ رشوتاں وی دیندے نیں۔ جیہڑا افسر فیر وی نہ منے اوس دی ٹرانسفر وی ہو جاندی ہے۔رپورٹ دے صفحہ312تے مشہور زمانہ طیبہ تشدد کیس دا وی ذکر ہے ارت اسلا آباد ہائی کورٹ دا وی کہ جس وچ اک سول جج تے تشدد داالزام ہے اتے اوس کیس تے اسلام آباد ہائی کورٹ جو تماشہ بنایا ہے اوس پاروں پاکستان دی عالمی پدر تے جگ ہسائی ہوئی ہے۔رپورٹ وچ اک پاکستانی سولجر دا وی ذکر ہے جیہڑا امن مشن وچ رلتی سی اتے اوس تے اکتوبر2016 نوں اک بچے نال زیادتی دا الزام سی پر رپورٹ تیار ہون تیک ایس بارے کھوج جاری سی۔زنانیاں دے تحفظ اتے انسانی سمگلنگ دا شکار زنانیاں دی سیوا لئی پاکستان وچ بنائے گئے ایمب پروٹیکشن سنٹراں دی گل وی رپورٹ وچ کیتی گئی ہے۔پنجاب دے پورے36 دے36ضعلیاں وچ اجہے سنٹر چل رہے نیں جداں کہ خیبر پی کے وچ چار، بلوچستان وچ اک تے سندھ وچ پنج اجہے سنٹر چل رہے نیں۔سندھ وچ اجہے سنٹراں دا بجٹ 48توں66ملین کر دتا۔رپورٹ وچ این جی اوز تے میڈیا دی تعریفاں وی نیں جنہاں پاکستان وچ انسانی سمگلنگ دا مسئلہ چکیا۔پر ایہہ گل وی لکھی ہے کہ جس پدر تے ایس مسئلہ پاروں پاکستان نوں نقصان ہو رہیا ہے اوس پدر تے ایس نال نبڑن دا احساس پایا نہیں جاندا۔رپورٹ وچ پاکستانی باڈراں تے ائیرپورٹاں توں غیرقنونی طور تے وڈے پدر تے ہون والی انسانی سمگلنگ دا ذکر وی وادھو ہے جس دی ذمہ واری پاکستان دی سیکورٹی اداریاں تے ہے۔لوکاں نوں باہر گھلن والے غیر رجسٹرڈ اداریاں تے ایجنٹاں دارپورٹ وچ وادھو ذکر ایف آئی اے تے دوجے اداریاں ول سوال چکدا ہے۔رپورٹ وچ انسانی سمگلراں دے ات گرداں تے نان سٹیٹ ایکٹراں نال سانگیاں دا ذکر بہوں سوال چکدا ہے؟پاکستان تے افغانستان وچ چنگے سانگے نہ ہون پاروں افغان مہاجراں تے آئی ڈی پیز نوں ات گردیاں وچ ورتن دے موقعے ودھ جاندے نیں۔پاکستان نوں انسانی سمگلنگ وچ بطور لانگے(ٹرانزٹ) ورتن دا حوالہ اپنی تھاں اک وڈا مسئلہ ہے جس بارے رپورٹ گل چکی ہے۔ایس لانگے نوں افغان، سری لنکن تے بنگلہ دیشی وڈے پیمانے تے ورتدے نیں۔پاکستانی معذوراں(نچے تے وڈے) دے ایران وچ بطور فقیر کم کرن دی گل وی رپورٹ وچ لکھی ہے۔پاکستان وچ باہروں آن کے سیکس ٹریڈ وچ رلتی زنانیاں دا ذکر وی رپورٹ دے پاکستانی باب وچ ہے کہ ایران،نیپال،آذربائیجان،ازبکستان،بنگلہ دیش، روس، چین تے افغانستان دی زنانیاں پاکستان وچ سیکس ٹریڈ نال جڑیاں نیں۔ ساڈی عدالتاں، پارلیمنٹ ،میڈیاتے سیکورٹی ادارے جے ایہہ رپورٹ پڑھ لین تے ہورے اوہ سارے مسئلے چھڈ کے انسانی سمگلنگ بارے اک صفحہ تے آون کہ بہوں سارے مسئلے ایس نال ہی جڑے نیں۔
 Link of the report
https://www.state.gov/documents/organization/271339.pdf


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels