Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> دلت فیکٹر:بھارتی سیاست دا نواں بوتھا۔دلت، ٹھاکراں (ٹیگوراں)نوں ٹکر گئے

دلت فیکٹر:بھارتی سیاست دا نواں بوتھا۔دلت، ٹھاکراں (ٹیگوراں)نوں ٹکر گئے

June 16th, 2017

صدیاں توں چلدے ذات پات دے بندوبست نوں کئی وار وڈے چیلنج ملے کہ بدھ مت، اسلام تے سکھ مت سگوں جوگی صوفی ریت پاروں ایس خلاف وڈے یدھ ہوئے۔پر مسئلہ اودھوں ہور چوڑ ہویا جداں باہمنی بندوبست نوں للکارن والے آپ باہمن بن گئے۔تھلڑی ذاتاں دے راکھے لیفٹ والے ہو سکدے سن پر اوہ مزدور، کسان دے کتابی فلسفے توں اگے ناں گئے۔کجھ ترقی پسنداں تھلڑی ذاتاں وچ کم تے کیتا پر انہاں دے بیانیے وچ تھلڑی ذاتاں دی گنجائشاں گھٹ سن۔دلت، شودر، مصلی،مسلم شیخ،رانگڑ،شیڈیول کاسٹ، والمکی ،چوڑے انہاں دے بہوں ناں سن پر انگریز دے کھڑے کیتیادھ پچدے جمہوری بندوبست وچ انہاں دی کوئی تھاں نہیں سی۔جداں اک بندہ تے اک ووٹ دا آزادی مگروں چلن ہویا تاں امید سی کہ انہاں اونترے نکھتیاں دی سنی جا سی پر بیوروکریسی تے اشرافیہ جمہوریت نوں تھلے تیک نہ جان دتا۔1990دے دہاکے وچ بلدیاتی بندوبست تگڑا ہویا تے ہولے ہولے تھلڑی ذاتاں دی سیاستاں وچ جان پین لگی۔اج جس نوں دلت فیکٹر آکھیا جارہیا ہے ایس نوں کراہے پاون دا ودھیا طریقہ دھرمی تے قومیتی ونڈاں نیں۔انہاں دے لیڈراں تے کرپشن دا گھما چلانا اوکھا نہیں کہ ایہہ وائٹ کالر کرائم وچ مہارتاں نہیں رکھدے۔تازی صورتحال بارے بی بی سی اک آرٹیکل چھاپیا سی جس نوں تھلے دے رہے ہاں۔

دلتاں نے کجھ عرصے وچ ہی ملک دی کئی تھاواں تے وڈی گنتری وچ رل مل اپنی جاگرتی دا اشارہ دتا ہے۔مئی دے مہینے دی پہلی تریخاں وچ خبر آئی سی کہ بھارت دی سب توں وڈی ریاست اترپردیش دے سہارنپور ضلعے دے اک پِنڈ وچ دلتاں تے ٹھاکراں دے ٹکراؤ وچ دلتاں دا اک پنڈ فنا کر دتا گیا سی۔ دلتاں دے کئی مکاناں نوں جلا دتا تے بہوں سارے دلتاں نوں ماریا کٹیا۔ مغربی اترپردیش وچ دلتاں خلاف اک لمیرے چر توں ڈانگ سوٹا ہو رہیا ہے پر ایس وار دلتاں ٹھاکراں دے حملے دا جواب انہاں شوہدیاں دی زبان وچ دتا۔ ہلے زیادہ ویلہ نہیں لنگھیا جداں سہارنپور تے مظفر نگر دے فساداں وچ 50 توں ودھومسلمان مارے گئے سن تے ہزاراں مسلماناں نوں اپنا گھر بار چھڈ کے پناہ گیراں دے کیمپاں وچ رہن تے مجبورکر دتا گیا سی۔ انہاں چوں بہوں سارے اج دیہاڑ تیک اپنے پِنڈاں نوں پرت نہیں سکے۔ پر دلتاں ایس وار کجھ ہور فیصلے کیتے ہوئے سن۔ دلتاں نے نو مئی دے حملے دی نہ صرف مزاحمتاں کیتیاں سگوں ایس داکھلو کے جواب دتا۔ ایس حملے دے بعد مغربی اترپردیش وچ دلتاں دی اک تنظیم 'بھیم سینا' کھڑی ہو گئی۔ اس سینا(فوج یا لشکر) دی مقبولیت تیزی نال ودھ رہی ہے تے ایہہ تنظیم ہن مغربی اترپردیش توں نکل کے بہار، گجرات، دلی تے راجستھان تک پھیل رہی ہے۔ بھیم سینا نے پارلیمان دے سامنے ہزاراں حامیاں دے نال دلتاں خلاف ظلم نوں ڈکن پاروں وکھالا کیتا۔ بھیم سینا دی قیادت اک نوجوان وکیل چندرشیکھر کر رہے نیں۔ ایس مظاہرے وچ گجرات دے دلت رہنما جگنیش میوانی وی موجود سن۔ جگنیش گجرات دے علاقے سوراشٹر دے اونا وچ دلتاں تے گؤ رکشکوں دے حملے دے بعد دلت رہنما دے طور تے ابھر کے سامنے آئے سن۔ جگنیش میوانی نے گجرات دے اونا وچ ناں نہاد گؤ رکشکوں دے ہتھوں دلت دی موت تے دلتاں نوں یکجا کرن وچ اہم کردار ادا کیتا ہے۔ انڈیا وچ سیاست، معیشت، فوج، عدلیہ، میڈیا، تعلیمی ادارے غرض معاشرے تے سیاسی نظام دے ہر ادارے تے اعلیٰ ذات بالخصوص برہمناں دا غلبہ ہے۔ ہندو دھرم تے پورا پورا برہمنی قبضہ ہے۔ انڈیا دے برہمنی نظام وچ سب توں زیادہ تکلیفاں دلتاں چکیاں نیں۔ دلت اک عرصے توں تفریق تے نفرت دے ایس نظام خلاف لڑن توں بچ کے رہ رہے سن۔ اوہ ملک دے جمہوری آئین دے تحت ایس نظام نوں بدلن دی کوشش کردے رہے نیں۔ کاشی رام تے مایا وتی دی بہوجن سماج پارٹی، جنوبی انڈیا وچ پیریار دی دراوڈ تحریک تے مہاراشٹرا وچ رپبلکن پارٹی اسی دلت جاگرتی دا حصہ سی پر ایہہ تحریکاں ہن کمزور تے پرانیاں ہو چکیاں نیں۔ وزیر اعظم نریندر مودی دی قیادت وچ بی جے پی دی حکومت پاروں ملک دی سب توں وڈی ریاست اترپردیش وچ اک جارحانہ ہندو سادھو یوگی آدتیہ ناتھ دے وزیر اعلی بنن دے بعد ملک وچ کمزور ہوندے ہوئے برہمنی نظام وچ اک نویں روح پھونکن دی کوششاں ہو رہیاں نیں۔ پر ایس دے نال اک نوِیں جارحانہ دلت تحریک وی وجود وچ آ رہی ہے۔ اک طرف آئین وچ کوٹہ سسٹم پاروں پارلیمنٹ وچ ہر وقت 100 توں وادھو دلت الازمی آندے نیں تے دوجے پاسے ملازمتاں تے تعلیم دے کوٹے پاروں انہاں نوں معاشرے تے معیشت وچ چوکھی تھاں ،لدی ہے۔ بابا صاحب بھیم راؤ امبیدکر دلتاں نوں یکجا کرن وچ اہم کردار ادا کیتا سی تے اوہ انڈیا دے آئین دے بانیاں وچ شامل سن۔ برہمنی نظام نے معاشرے وچ دلتاں دے بارے وچ جو نفرت تے اہانت آمیز سوچ پیدا کیتی سی ایس وچ کجھ حد تک کمی تے آئی ہے پر معاشرے وچ ہن وی انہاں نوں اعلیٰ ذات دے ہندواں دے بربر دا درجہ نہیں مل سکیا ہے تے انہاں نوں عمومی طور تے نفرت تے اہانت دا سامنا ہے۔ بھیم سینا دے چندر شیکھر تے گجرات دے جگنیش میوانی ورگے درجناں دلت رہنما چھتیس گڑھ، مدھیہ پردیش، اترپردیش، بہار، گجرات، مہاراشٹر تے پنجاب ورگی وڈی ریاستاں وچ ابھر کے سامنے آ رہے نیں۔ ایس نوِیں قیادت دا رخ جارحانہ ہے تے ایہہ رفتہ رفتہ منظم ہو رہی ہے۔ انڈیا دی سیاست وچ پہلی وار ملک گیر سطح تے دلتاں دے ایس چیلنج نوں محسوس کیتا جا رہیا ہے۔ نوِیں قیادت دا آکھنا ہے کہ دلت ہن صرف بربری دے حق دی لڑائی نہیں لڑ رہے سگوں ہن اوہ ایس نظام نوں وی براہ راست چیلنج کر رہے نیں جس دے سبب انہاں نوں صدیاں توں بے پناہ مظالم دا سامنا رہیا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels