Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> نین سُکھ دی نویں کتاب ’شہید؟‘ دی مُکھ وکھالی (رپورٹ تے ویڈیوکلپ)

نین سُکھ دی نویں کتاب ’شہید؟‘ دی مُکھ وکھالی (رپورٹ تے ویڈیوکلپ)

وچار ڈیسک
February 24th, 2017

نین سُکھ دی کتاب ’شہید‘ دی مُکھ وکھالی پیلاگ وچ پنجابی سنگت ،پاکستان دی چھتر چھاں 18 فروری نوں ہوئی جس وچ سجناں بھرویں رلت کیتی۔ کیونجے ایہہ مکھ وکھالی پنجابی سنگت دے ہفتہ وار اجلاس دا حصہ سی تاں مارے سنگت دے پچھلے اجلاس دی کاروئی پڑھن بعدوں ایس مکھ وکھالی دے پروگرام نوں عامر ریاض چلایا۔پروگرام دے اوچیچے پروہنے پنجابی ادبی بورد دے صدر مشتاق صوفی سن اتے پردھان کرنل (ر) نادر علی سن۔سبھ توں پہلاں نین سُکھ ہوراں اپنی پہلی کہانی ’شہید؟‘ وچوں کجھ پیرے پڑھے۔ سابق صدر لہور ہائیکورٹ بارعابد ساقی بھٹی نے گل بات کردے آکھیا پئی ایہہ کتاب ہڈ بیتی تے ہے پر ایہہ جگ بیتی وی اے۔جگ بیتی پاکستان دی اتے ہد بیتی خالد دھولکہ وکیل دی۔کسطراں اک وڈے افسر نے اپنی سپورٹ کار چیک کرن لئی دو چار جی مار دتے۔خالد ملک وکیل ہوون کارن دُکھ سہہ نہیں سکیا۔کنے لوک مر جاندے نیں جیہناں دیاں لاشاں نہیں ملدیاں۔ جیہڑی سزا کسے قاتل نوں ہو سکدی اے اوہ کسے وڈے افسر نوں نہیں ہو سکدی۔امن پسند شہری کول تلوار توپ نہیں اے۔اوہدے بھرا دا دُکھ ،زخم بہوں ڈونگا جے۔میں ایس دُکھ دا گواہ وی آں۔اوہناں جیہڑی کہانی لکھی اے اجتماعی المیے دا نتاراوی کردی اے۔خالد یاراں بیلیاں وچ بڑا چُپ چپیتا رہندا ہے پر اوہدے اندر کنی اگ ہے۔ایڈا ننگا سچ لکھنا سوکھا نہیں۔اوہ کوئی سینہا دینا چاہندا ہے۔مینوں جیہڑی گل سبھ توں وڈی لگی اوہ اوس دا سچ لکھنا جے۔میں ایہہ سچ لکھن اُتے اوہنوں سلام پیش کرنا آں۔شکیل دی کہانی سچ دی کہانی ہے۔اوہ وکیل نہ ہوندا تے اوس لئی ایہہ سب لکھنا اوکھا ہوندا۔اوہناں ہر کہانی وچ وکھرا لہجہ ورتیا ہے۔اسیں اوس دی لمی پگ نوں ہمش اوسدے سر تے ویکھنا چاہندے ہاں۔بھٹی ہوری ایہہ نہ دس سکے پئی خالد نوں ایہہ گلاں دسن والے وی اوسے ادارے دے لوک سن اتے انہاں ظلم نوں ظلم آکھیا۔ایس دا مطلب ایہو ہے پئی ہر ادارے وچ ہر طراں دے بندے ہوندے نیں اتے لکھاری وی کہانی لکھدے ایس نوں دسیا ہے۔اداریاں دی ٹٹ بھج ساڈا وڈا مسئلہ ہے اتے ایس وچ سب سیاسی تے غیر سیاسی ادارے رلتی نیں۔
For Pictures of the event Click Here
http://punjabpunch.blogspot.com/2017/02/unusual-book-unusual-book-launch-report.html
اگلی کہانی ’مارگلہ‘ بارے اقبال قیصر نے گل بات کیتی۔اوہناں آکھیا ایہہ پچھلی کہانی دی لڑی ہے تے اوس توں وکھ نہیں۔ کہانی اک لوک گیت توں شروع ہوندی اے۔مار گلّہ مطلب سپّ دا رستہ۔سپّ کدی کتھے وڑ جاندا ہے تے ساریاں شکلاں بناندا ہویا ملک ریاض دی شکل وچ ساہمنے آ جاندا ہے۔سپّ سو ورھیاں پچھوں روپ بدل جاندا ہے تے سانوں بڑی وڈی شکل وچ نظر آوندا ہے۔جوگیاں دا رشتہّ سپاّں نال چوکھا۔جیہڑے مالک سن اوہناں دی ملکیت صدیاں پچھے رہ گئی ۔جو نکلیا اوہ اک ہور سپّ جے جس دا ذکر ایہناں بہت ویروے نال کیتا ہے۔سپّ وی ساڈے،جوگی وی ساڈے ،اسیں وی ایہناں دے۔اوہناں سچی کہانی لکھی ہے۔اوہناں کسی درباری بولی وچ نہیں لکھیا۔ساڈی بولی نوں مان بخشیا ہے۔
تیجی کہانی بارے زویا ساجد نے گل بات کیتی۔لکھاری ہر تقریر توں پہلاں اک پیرا اوس کہانی توں پرھدا سی جس بار گل چھونی ہوندی۔زویا ہوراں کہانی ’’فورٹ مینرو گینگ ریپ ‘‘ بارے گل کیتی۔اوہناں پُچھیا جس ویلے اوس ایہہ کہانیاں لکھیاں اوس نوں کیہ ہویا سی؟سچچی پیڑ تہانوں سچا بنا دنیدی ہے۔ایہہ خالد دی ہوند اے، اوس جو لکھیا، سچ اے۔کہانیاں نوں اپنے توں وکھ کر کے لکھیا اے۔اوہ اک اسٹیج بناندا اے تے مُڑ ساری کہانی رچاندا ہے۔
چوتھی کہانی اُتے سعید بُھٹا نے گل بات کیتی۔ ایہہ کہانی سی’چُنبے دی بُوٹی‘۔پروفیسر ہوراں آکھیا خالد بڑبولا نہیں ہے۔محفلاں وچ بہندا اے پر خاموش رہندا ہے۔ایہناں پنجابی کہانی نوں نواں ناں دتا ہے۔کہانیاں ساریان ایکو جہیاں ہوندیاں نیں۔چڑی کاں دی کہانی ہوندی سی۔پھیر بادشاہ دی کہانی ، اوہدے نال اک عقل مند وزیر ہوندا ہے،مطلب بادشاہ بیوقوف اے۔اگلا کمال تے لکھاری دا ہوندا ہے۔نین سکھ ہوری حقیقت نوں گج وج کے لکھدے نیں۔اوہناں اُنج لکھیا اے جیویں ساڈے فکشن وچ اُودے پرکاش نے لکھیا ہے۔پہلی کہانی بہوں رُلا دین آلی اے۔خالد دی تواریخ دی پڑھائی کمال دی ہے۔چُنبے دی بُوٹی جو جھنگ بارے اے ایس بارے مینوں وی پتہ نہیں سی۔چُنبے دی بُوٹی رومانس دی کہانی ہے۔چناں محبت دا دریا ہے۔قدم قدم صوفیاں دے مزار نیں۔چناں جنگ عشق دا،فقر دی رمز ہے۔ایہہ کہانی انگریزی راج توں چھوہندی ہے۔جھنگ دے نواب سن۔انگریزاں نے سانوں ٹران لئی فرقیاں وچ ونڈیاتے گدی نشین جاگیردار بنے۔جھنگ دے نواب اک طاقت دے طور اُتے اُبھرے۔جھنگ ہندواں دا شہر سی۔افغان جنگ دی آڑ وچ سعودی مدرسے،ایران دی فنڈنگ،پھیر پیر پرستی نوں ہار ہوئی۔پھیر این جی او وی آئیاں۔ایہناں حقیقت نوں حقیقت کر کے لکھیا ہے۔ ایس توں پچھوں زبیر احمد ہوراں نے اپنا لیکھ پڑھیا جیہڑا تُسیں وچار اُتے پڑھ سکدے او۔’نین سُکھ دی کہانی مُکنی نہیں۔‘لنک تھلے دتا ہے۔
 http://www.wichaar.com/news/119/ARTICLE/32402/2017-02-19.html
پھیرمشاق صوفی گل بات کیتی تے اوہ اُچیچے پروہنے وی سن۔ اوہناں آکھیا میں دو کہانیاں پڑھیاں نیں،اجیہی لکھت دی مثال ساڈے نہیں لبھدی۔بعض ویلے پڑھدیاں لگدا ہے اوہ کہانی نہیں رپورٹ ہے،یاں ریسرچ پیپر جے، پر مُڑ اوہ اچانک کجھ اجیہا کردا ہے تے کسے ہور ویلے وچ ٹر جاندا ہے تے سانوں لگدا ہے ایہہ کہانی اے،کوئی رپورٹ نہیں۔بہت سارے لوک کہن گے ایہہ علمائی دا اظہار ہے،اپنا علم دسدا ہے۔اوس دی لکھت ملی جلی ہے۔سیاست وی ہے تے خاص تیکنیک وی ہے۔کہانی وچ اوہ ناں تے تھاواں نیں جیہناں نوں اسیں جاندے آں،ایہناں تھاواں نوں اسیں بطور حیقیقت جاندے آں۔جے اوہ کہانی لکھدے ہوئے ویلے نوں نہ ورتن تاں ایہہ مُڑ اِنج ای رہ جائے۔اک ویلا آوے گا ایہہ سارے پاتر فکشن ہون گے،پراپرٹی ڈیلر وی فکشن ہووے گا۔ایہہ خاص فکشن دے کردار ہون گے۔دوجی گل محنت دی ہے۔اسیں پنجابی لکھاری سُست تے نکّمے آں۔مشاعرے لئی نظماں لکھدے آں۔ایسی آلکس جس دی مثال نہیں ہے۔نین سُکھ جیہے لکھاریاں نوں پڑھ حونصلہ ہوندا ہے۔پڑھدیاں احساس نہیں ہوندا ہے۔
باقی اوہناں بڑی جرت نال لکھیا ہے تے جرت ساڈی وار تے ریت ہے۔بُلھے شاہ دا جنازہ وی نہیں پڑھن دتا گیا سی۔نابری دی گل ساڈی ریت دا حصہ ہے۔اک ہور گل انتھروپولوجی دی وی ہے تے سوشیالوجی وی۔مارگلہ ماڑے لوکاں دا سی۔پھیر ایس نوں کھوہن آلے نیں،ایہہ ساڈے وسیب دیاں کہانیاں نیں تے ساریاں کہانیاں اکّو نیں۔ایس نوں سمالنا اوکھا ہے۔ایس نوں خاص طراں کھولیا گیا ہے۔ اصل حیقیقت کیہہ اے؟ ایس نوں بیان کیتا گیا ہے۔رمزالی نہیں ورتی گئی۔ پرانے نوں نویں ساہمنے کھلار کے ٹکرا وکھا دتا گیا ہے۔
اخیری گل بات پردھان کرنل نادر علی ہوراں کیتی جو آپوں وی کہانی کار نیں۔اوہناں آکھیا اجکل جینس بارے بحث چلدی پئی ہے۔خاص قسم دی سار ہے ایس لکھاری دے اندر۔ بابے فرید آکھیا سی،’دُونی وجائی توں وی وجے نال‘۔نجم حسین سید ہوراں مینوں آکھیا پئی ایس بندے نوں پڑھو۔اوہناں آکھیا ایہہ ناول’’مادھو لال حسین،لہور دی ویل‘‘ ضرور پڑھو جے نہیں پڑھو گے تے پھیر اجوکا ادب مس کرو گے۔ہن ایہہ نویں ’’شہید؟‘‘ نرے دوسو سولہ صفحیاں دی کتاب ہے تے ایس وچ چار کہانیاں تے اک ناولٹ جے۔ہر کہانی دو سو کتاباں برابر ہے۔اسیں ایہنو بیان کرن توں آری آں۔میری ایس گل نوں رواجی گل نہ سمجھنا۔دیباچیاں تے صدارتی خطاباں وچ تعریفاں دے ڈھیر ہوندے نیں۔سن 70 وچ بڑا پریشان ساں۔احمدندیم قاسمی نوں ملیا۔اوہناں پُچھیا دبیاچہ لکھوانا جے۔پر ایہہ کتاب وکھری ہے۔میں تے انگریزی، اردو دی کتاباں پڑھدا رہندا ہاں پراجیہی کتاب پڑھیاں بڑے سال ہو گے نیں۔اجیہی کتاب نہیں پڑھی،ایس اندر بے انت رمزاں نیں،جیہڑیاں کسے کھولیاں نہیں۔ایہہ کتاب اوہناں کتاباں توں بہت نویکلی ہے ۔
کہانی ’شہید‘ کالجے نوں آندی ہے۔کسے بھرا دی موت ڈھاڈی سٹ ہوندی ہے۔میرا بھرا ، میرے وانگ فوجی سی تے اپنی موت مریا سی پر اچانک۔۔مینون اج وی سفنے آندے نیں پر خالد دا دکھ وڈا ہے۔پتہ نہ لگے قتل کنے کیتا سی۔ایس دی پُچھ پڑتال نہ کرو۔پھیرجس تے شک سی اوس نوں کڈھ دتا گیا،رشوتاں وچ۔پر گل دا نکھیڑا نہ ہویا۔دُکھ دی کہانی اے۔چوکھا بیان دُکھ دی کہانی اے۔
مارگلہ سپاّں دا راہ اے۔سپاّں دا ایجڑ اے۔کیہ فوجی تے کیہ سولین تے کیہ کاروباری تے کیہ اوہناں دے ’’درباری‘‘۔اوہدیاں کہانیاں نیں اوہناں کتھے کتھے قبضہ کیتا ۔سو کروڑ دا قبضہ اے۔بیوواں دی زمین سی۔اخیر اوہ ساری زمین جس نوں ملی اوہ دُنیا دی ستویں وڈی مسجد اوہنے بنائی اے۔لنگر چلائے نیں۔اسلام اباد دا ذکر ہے۔راولپنڈی ،پوٹھوہار دا ذکر ہے۔
’چُنبے دی بُوٹی‘ ذاتاں دی وکھری ونڈ کیتی۔ایہہ سیال دے حامی سن۔ایہہ انگریزاں دے حامی سن۔فرقیاں دی لڑائی اے۔ایہہ جھنگ دے اندر موجود سن۔اسیں جانوں ہوندے وی ان جانوں آں۔
ناولٹ جپھّی۔باراں کہانیاں نیں۔ایہدے کئی ناول بن سکدے نیں۔کہانی بُجھارت اے۔ایس بُجھارت نوں رولے وچ پا کے ہور بُجھارت اے۔ایہنوں پڑھوتے نیجھ نال پڑھو۔
کجھ ویڈیو لنک وی نیں، تہاڈے لئی۔۔۔کتاب نیو لائن چھاپی ہے اتے گلبرگ،لہور دے ’’ریڈنگز‘‘ والے ایس دے ڈسٹری بیوٹر نیں اتے ایس کتاب نوں انہاں دی ویب سائٹ توں آڈر کیتا جا سکدا ہے۔
For Orders Click
http://www.readings.com.pk/pages/BookDetails.aspx?BookID=428194

Some clips
https://www.facebook.com/nain.sukh.3958/videos/1803897206603228/

https://www.facebook.com/nain.sukh.3958/videos/1803935593266056/

Iqbal Qaiser
https://www.facebook.com/aamirr/videos/10154567782709032/
Col Nadir Ali
https://www.facebook.com/aamirr/videos/10154562469894032/
Zoya Sajid
https://www.facebook.com/aamirr/videos/10154562353064032/
Zubair Ahmad
https://www.facebook.com/aamirr/videos/10154562147424032/
A Book Review Published in Dawn
http://punjabpunch.blogspot.com/2017/02/review-shaheed-dawn-native-language.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels