Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> دِل دی گل لکھاری دلِیپ کَور ٹِوانہ

دِل دی گل لکھاری دلِیپ کَور ٹِوانہ

شاہ مُکھی رُوپ کار جاوید بُوٹا
February 5th, 2017

سمیں انوسار وکھو وکھ ہو سکدے نیں روس پرگٹ کرن دے ڈھنگ،
پِچھے جیہے میں اپنے راج تے سماج دے وِگڑدے رنگ ڈھنگ ویکھ کے روس وجوں ’پدم شری‘ موڑ دِتا سی۔ میں ہی نہیں، بُہت سارے ہور لیکھکاں، کلا کاراں تے وِگِیانِیاں نے وی اپنے اِنعام سنمان موڑ دِتے سن۔ مُلک دی ضمِیر نوں ہلُونا دین توں بِنا روس دے ایس پرگٹاوے دا ہور کیہ مقصد ہو سکدا سی؟ پر کُجھ لوک پُچھ رہے سن ہُن ہی کِیوں؟ اِک کیندری منتری نے میرے حوالے نال کیہا کہ چُراسی وِچ کِیوں نہیں واپس کِیتا ’پدم شِری‘۔ ’’اوہ بھائی، چُراسی ویلے ’پدم شِری‘ میرے کول سی ہی نہیں۔ اوہ تے 2004 وِچ مینوں مِلیا۔ دُکھ چوراسی ویلے بُہت سی۔ روس اودوں وی جاگیا سی۔ جدوں جدوں جبر ہُندے، روس جاگدے‘‘۔
ایس سمبندھ وِچ اِک گھٹنا دا ذِکر کرنا چاہاں گی۔ ایس دا مُختصر جیہا ورنن میں کراں گی۔ ایہہ گل اودوں دی ہے جدوں سِدھارتھ شنکر رے پنجاب دے گورنر سن۔ 1986 توں 1989 اوہ پنجاب رہے۔ اِک دِن میرے کول یونِیورسٹی دِیاں کُجھ معتبر عورتاں آئیاں تے کہن لگِیاں، ’ اسیں گورنر نوں مِل کے آئیاں ہاں۔ اسیں اوہناں نوں ایہہ کہن گئیاں سی کہ وائس چانسلر لاؤن ویلے تُہانوں مرد ہی کِیوں دِسدے نیں، کِسے عورت نوں کِیوں تُسیں کنسِڈر نہیں کردے۔ مثلاّ، ساڈی یونِیورسٹی دے ڈاکٹر دلِیپ کَور ٹِوانہ ہر پکھوں وڈی شخصِیت نیں۔ تُسیں اوہناں نوں لاؤ وی. سی.، اوہ اگوں کہن لگے، ’بھئی میرے کول تاں کِسے نے اوہناں دا ذِکر ہی نہیں کِیتا، نہ میں اوہناں نوں کدے مِلیاں‘۔ اسیں کیہا کہ تُسیں ٹائم دیو، اسیں میڈم ٹِوانہ نوں لے آواں گے۔ تے اوہناں نے خوش ہو کے دسیا کہ رے ہوراں نے پرسوں دا ٹائم دے دِتے۔‘‘
میں کیہا، ’’میں نہیں جانا، ’’تُسیں کیہڑا میتھوں پُچھ کے گئیاں سی اوہنوں مِلن‘۔ اوہ کیہندِیں، ’تُسیں چلے چلو، اپنے لئی نہ سہی، یونِیورسٹی دے بھلے لئی ہی سہی۔‘‘ کُجھ دیر اوہ زور پاؤندِیاں رہِیاں تے فیر نازاض ہو کے چلِیاں گئیاں۔ نہیں جاندی اوہناں گورنر نوں کیہ کیہا کیہ نہیں۔‘‘
کُجھ دِن بعد دی گل ہے۔ دو پی. سی. ایس. افسر میرے کول وِبھاگ آئے۔ کہندے، ’تُہانوں گورنر صاحب نے ڈِنر تے بُلایا ہے۔ اوہ تُہاڈے نال تے ہور معتبر بندیاں نال پنجاب مسئلے تے رائے کرنا چاہوندے نیں۔ میں کیہا، ’رات دے کِسے فنکشن تے میں نہیں جاندی۔‘ اوہ کہندے، ’تُسیں فِکر نہ کرو تُہاڈے نال پُلِس دی گڈی ہوئے گی۔‘ میں نانہہ کر دِتی۔ اِک دِن اوہی افسر فیر میرے کول آ گئے۔ ایس وار اوہ لنچ دا نیوتا لے کے آئے سی۔ کہندے، گورنر صاحب نے بُہت سارے پت ونتے سجناں نوں بُلایا ہے، پنجاب دی سبِھتا تے وِچار کرن لئی۔ میں کیہا، ’میں نہیں جا سکاں گی۔‘ ایہہ افسر کِتے پِچھلی وار میرے ڈِپارٹمنٹ دے مُکھی نوں مِلے ہونے ایں۔ اوہنے کیہا کہ جے مینوں تے میری وائف نوں سد لؤ تاں اسیں میڈم نوں اپنے نال لے آواں گے۔ ہُن جدوں میں دوبارہ نانہہ کر دِتی تاں میں سُنیا باہر اِک افسر فون پتا نہیں کیہنوں پُچھ رہیا سی: سر، میڈم تاں آ نہیں رہے۔ اوہناں دے مُکھی نوں اِنوائٹ کرنے کہ نہیں؟ جیہڑِیاں عورتاں میرے واسطے مِسٹر رے نوں مِلن گئیاں سی اوہناں دی لِیڈر میرے کول آئی۔ تھوڑا ہرکھ کے آکھدی، میڈم تُہاڈا گورنر نال کیہ وَیر اے۔ تُسیں اوہنوں مِلن کیوں نہیں جاندے۔ تُہانوں اوہنے وی. سی. لا دینا سی۔‘ میں کیہا، ’جِس بندے نے پہلاں بنگال وِچ اینے مُنڈے مروائے، ہُن پنجاب وِچ مروا رہیا، اوہدے کولوں مینوں کوئی رعایت، کوئی وائس چانسلری، نہیں چاہیدی۔‘ اوہ رُس کے چلی گئی تے بُہت سماں نہیں سی ہویا جدوں مینوں گورنر ’رے‘ نال رُو برُو ہونا پیا۔ مہِندرا کالج، جِتھے میں پڑھی سی، نے اپنے ستھاپنا دِوس تے مینوں سدّیا۔ اوہناں ایس موقع ہورناں دے نال مینوں وی سنمانت کرنا سی۔ سماروہ دی پردھانگی شِری ’رے‘ نے کِیتی۔ مینوں سنمان چِنھ دین لگیاں اوہناں مینوں پُچھیا، کیہ تُسیں چنڈی گڑھ پلاٹ لے لیا ہے؟‘‘ ایہہ ایس لئی کہ کُجھ لیکھکاں نے چنڈی گڑھ سرکار کولوں رعاتی پلاٹ لئے سن۔ میں کیہا، نہیں، مینوں پلاٹ نہیں چاہیدا۔
اپنے جِیون دی ایس گھٹنا دا ویروے سہِت میں پہلاں کدے ذِکر نہیں کِیتا۔ ہر گل دا ڈھنڈورا پِٹنا ضروری نہیں ہُندا۔ سو ایوں نہیں کہ چُراسی ویلے روس گھٹ سی، جاں روس پرگٹ نہیں کِیتا۔ روس پرگٹ کرن دے ڈھنگ سمیں انوسار وکھرے وکھرے ہو سکدے ہن۔
پدم شری واپس کرن سمبندھی
بھارت سرکار نوں لِکھی چِٹھی
’ بُدھ ‘ اَتے ’نانک ‘ دے دیش وِچ فِرقہ پرستی کارن 1984 وِچ سِکھاں اُپر ہوئے ظُلم اَتے ہُن مُسلِم اَتے ہور گھٹ گِنتِیاں تے ہو رہے ظُلم سرکار اَتے سماج لئی فِٹکار ہن۔ سچ اَتے حق دی آواز اُٹھاؤن والے لوکاں نوں مار دینا سانوں سنسار تے ربّ اگے شرم سار کردا ہے۔ ایس لئی میں روس وجوں بھارت سرکار ولوں 2004 چ مینوں دِتے گئے ’پدم شری ‘ اوارڈ نوں واپس کردی ہاں۔ نال ہی نین تارا سہگل تے ہور سارے لیکھک جو روس پرگٹا رہے ہن میں اوہناں نال اِک مُٹھتا پرگٹ کردی ہاں۔
مِتی13 : اکتُوبر2015 دلِیپ کَور ٹِوانہ موبائل۔90233-78007
ایہہ لِکھت ’ہُن‘ پنجابی پرچا جنوری -- اپریل2016 دے پراگے وِچوں لِتی گئی اے۔
' HUN' 102 2nd floor, Moona Paradise Shivali City, Sector 127, Greater Mohali-140301
Distt.SAS Nagar, Punjab. (India)
hunchandigarh@gmail.com
*****


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels