Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> ساک:اِک جھاکی دا ناٹک، لکھاری این ٹون چیخوف (اخیری لڑی)

ساک:اِک جھاکی دا ناٹک، لکھاری این ٹون چیخوف (اخیری لڑی)

ناٹک’’پرپوزل‘‘دا پنجابی ترجمہ:جاوید بُوٹا
January 25th, 2017

پاتر:چودھری۔ 65-6oورھیاں دے گیڑے وِچ ۔رانو۔ چودھری دی دھی 27ورھیاں دے گیڑے وِچ۔
گُلشن۔ چودھری دا گوانڈھی 35ورھیاں دے گیڑے وِچ
چودھری۔ (اُٹھ کے کھلوندیاں) چلو چنگا ہویا ..... (ترِبک کے) ہیں مر گیا۔
(دوویں پیو دھی گُلشن ول نسدے نیں۔ گُلشن نُوں ہوش وِچ لیاؤن دا جتن کر دے نیں۔ جُتی سُنگھاوندے نیں ..... پانی پیاؤن دا جتن وی کر دے نیں۔)
چودھری۔ گُلشن یار پانی پی ..... ایہہ تاں نہیں پِیند ..... ایہہ تاں سچ مُچ مر گیا اے ..... ہُن کیہ کریئے .....پتہ نہیں کَوڑ وِچ آ کے میں کیہ آکھ دِتا اے ..... کیہ کر دِتا اے میں ..... جے میں کُجھ کِیتا اے (اُٹھ کھلوندا اے) تے میں آپنے آپ نُوں گولی مار لواں گا۔ کِتھے میری بندُوق۔
(چودھری پاگلاں واکن ایدھر اودھر بھَوندا اے۔ رانو پیو نُوں پھڑدی اے۔ گُلشن نُوں ہوش آوندی اے، لما پیا پیا ہی جھلیاں وانگ بولدا اے)
گُلشن۔ میں کِتھے آں ..... چن .... تارے ...... راجا ......لال کُھوہ ...... موتی ........ تائی دی دادی .......
(دوویں پیو دھی دوڑ کے گُلشن ول جاندے نیں۔ چودھری اوہنوں جپھا مار کے چُکدا اے تے کھلہارن دا جتن کر دا اے)
چودھری۔ گُلشن ..... گُلشن ..... ہوش وِچ آ ..... ایدھر ویکھ ..... چل ایس رپھڑ نُوں ایتھے ای مُکا دیئے ، میری دھی نُوں تیرا ساک منظُور اے ..... بس گل مُکی ..... میں بُڈھا ہوگیاں یار ، میرے کولوں ہُن ایہہ بھار نہیں چُکیا جاندا ..... ہُن تُوں ویاہ کر لے۔
(گُلشن جیہڑا چودھری دے جپھے وِچ لمکیا ہویا سی ویاہ دی گل سُن کے جھٹ چودھری دے جپھے وِچوں نِکل کے آپنے بھار کھلو جاندا اے۔ رانو ذرا پرے ہو کے کھلو جاندی اے تے شرماؤن لگ پیندی اے)
گُلشن۔ (ایدھر اودھر ویکھ کے) ویاہ ..... کیہدے نال کراں ویاہ ؟
چودھری۔ کملیا جا اوہدا ہتھ پھڑ لے ۔
گُلشن۔ (پھیر ایدھر اودھر ویکھ کے) کیہدا ہتھ پھڑ لواں؟
رانو۔ (شرماؤندیاں) میں ایدھر آں گُلشن جی۔
گُلشن۔ (نہال ہو کے) لے ایہہ تے ودِھیا گل ہوئی کے ہیں جی ..... ہیں جی ..... تے پھیر پھڑ لواں تُہاڈا ہتھ رانو جی؟
رانو۔ جی۔
گُلشن۔ (رانو دا ہتھ پھڑ کے) اج میں کِناں خوش آں۔
(رانو پیو ول ویکھ کے ہتھ چُھڈا لیندی اے ، گُلشن وی چودھری ول ویکھدا اے تے شرمِندہ جیہا ہوندا اے، چودھری ایہہ سبھ کُجھ ویکھ کے پولے پیریں کِھسک جاندا اے، گُلشن میدان خالی ویکھ کے)
گُلشن۔ (رانو نُوں) اِک واری پھیر پھڑ لواں ؟
رانو۔ ضرور ۔
(رانو ہتھ اگانہہ ودھاؤندی اے، گُلشن ہتھ پھڑن لگدا اے پر رانو ہتھ پِچھاں ہٹا لیندی اے)
رانو۔ پر اِک گل تُہانوں مننی پئے گی ،...... ساڈے موتی تے تُہاڈے راجے دا کوئی جوڑ نہیں۔
گُلشن۔ اصلوں نہیں جی، میرا راجا ہے ای ودِھیا۔
رانو۔ نہیں نہیں موتی ودِھیا اے۔
گُلشن۔ نہیں نہیں راجا ودِھیا اے۔
رانو۔ نہیں موتی۔
گُلشن۔ نہیں راجا۔
رانو۔ موتی۔
گُلشن۔ راجا۔
(چودھری تھالی وِچ مٹھیائی لے کے اندر آؤندا اے)
چودھری۔ میریو بچڑیو ، لڑدے رہنا جھگڑدے رہنا ، عُمر پئی اے ، پہلے چنگے چنگے شگناں نال ویاہ کر لؤ، ایہہ لؤ مُونہہ مِٹھا کرو ۔
(چودھری مٹھیائی دونہاں نُوں دین دی تھاں آپ کھاون لگ پیندا اے، دوویں مٹھیائی ول تے چودھری ول ویکھدے نیں)
پردہ
Link of Last part 5
http://www.wichaar.com/news/186/ARTICLE/32189/2017-01-22.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels