Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> ہندوستانی سنگیت دا پچھوکڑ:سینما وچ پنجابی دا حصہ۔لکھاری اشتیاق احمد۔ لڑی10

ہندوستانی سنگیت دا پچھوکڑ:سینما وچ پنجابی دا حصہ۔لکھاری اشتیاق احمد۔ لڑی10

انگریزوں ترجمہ:زبیر احمد
January 10th, 2017

سن30دا دہاکہ ہندوستان وچ خاص ویلا سی۔ اک پاسے ہندوستانی فلم اپنے پیر جماندی پئی سی دوجے بنّے برطانوی سرکار تے ہندوستان دی بھلک دا ڈرامہ وی چلدا پیا سی۔ ہندوستانی سینما نے 40 دی دھرمی ونڈ دی سیاستاں دے سارے وار چھلے تے کدی وی ایس ساہمنے متھا نہ ٹیکیا تے ایس دے مگروں ونڈ توں اگدوں اپنا اگانہہ ودھو (ترقی پسند) سبھا ٹوری رکھیا۔ بہرحال 1930دے دہاکے وچ کانگریس توں پریر ی آزادی دی جہد دا وارا سی، جو ہندواں تے مسلماناں دی تے ہور دوجیاں ٹابریاں دی جُڑت دی گل کردا سی جیہڑی اکمُٹھ تے آزاد ہندوستان وچ ہی ہو سکدی سی۔ لہور،بمبئی،کلکتہ تے مدراس دیاں فلمی صعنتاں ایتھوں ای خیال لے کے تواریخی تے رہتلی پکھوں جو سانجھا سی اوس نوں اُگھیڑدیاں سن۔
ایہہ آکھنا چاہیدا اے پئی برصغیر دی ایکتا ایس دے سنگیت وچ اے ،کلاسیک تے لوک سنگیت وچ۔اُتری ہندوستان دا کلاسیک سنگیت ،جس دے اپنے مہان راگ تے راگنیاں نیں تے دکھنی کرناٹک سنگیت،جس دے اپنے موہ لین والے راگ تے راگنیاں نیں تے ایہہ دویں ہندوستانی سنگیت دے مُڈھلے نظام نیں۔ایہناں دواں ہیٹھ ای ہور ونڈاں تے دوجیاں مقامی تے علاقائی ونڈاں کیتیاں جا سکدیاں نیں۔ہندوستانی سنگیت دی مُڈھلی بُنتر سُر تے لے تال اے لہندے دے سنگیت دے اُلٹ جو اک سُرتا اُتے کھلوتا ہویا اے۔ایس گل اُتے جھیڑا ہو سکدا اے پئی ہندوستانی سنگیت اصلوں لوک سنگیت سی جاں مُڑ ایس نوں بنا سوار کے گُنیاں تے اُستاداں کلاسیک بنا دتا۔ اک گل اسیں سوکھ نال آکھ سکدے آں پئی دویں اکو بُنتر نوں مندے ہن تے اوہ راگ تے راگنیاں جیہڑیاں ایہناں نوں اکسار کررہیاں سن اوہ وی اکو سن۔ ہندوستانی سنگیت ہمیش راگ اُتے چلدا اے تے ایس نوں گاون وچ اک نویکلتا تے قدرتی اُلار ہوندا اے۔ایس لئی ایس دے سبق جاں لہا چڑھا جیہڑے لہندے دے سنگیت لئی لکھے جا سکدے ہن ایس وچ نہیں لکھے جا سکدے۔کرڑی گل کرئیے ، ایس نوں چیتے کیتا جا سکدا اے تے اندر سمایا جا سکدا اے تے ایس دی سکھلائی وی ساری زبانی اے۔
میری سمجھ ایہہ اے پئی اپنی اجوکی سمجھ وچ اُتری ہندوستانی سنگیت تے کرناٹک کلاسیک وی ہندو بھگتی تے مسلم رسیلی دا تت اے۔ خاص کر ایہہ اُتری ہندوستان بارے سچّ اے۔ راگ تے راگنیاں مندراں وچ بنیاں جد بھگت دیوتاواں نوں خُش کردے سن تے اوہناں دا دل جتدے سن۔ ایس طراں ہی مُریدی دا سنگیت جیہڑا صوفیاں دی تھاپڑے ہیٹھ اُسریا، خاص کر چشتیاں دا، اوہ وی رب نوں راضی کرن دی اک ونگی سی، رسول کریم] نوں جاں مہان صوفی ہستیاں نوں ،اوہناں توں خیر تے برکت پاون لئی۔پھیر ایہہ عقیدت توں دل پرچاوا تے ویگ بنیا، چونویاں سُنیراں لئی جس وچ حاکم نوں خُش کرنا وی سی۔مولوی تے دوجے کٹر سنگیت دیاں سنگتاں وچ نہیں سدّے جاندے سن۔مسلماناں دی جُڑت تے دین دا مطلب سی پئی مشرق وسطی تے مرکزی ایشاء توں وی ساز اتھاویں ورثے وچ رلائے گئے تے ایس نے سنگیت نوں ہور امیر کیتا۔
پھیر ہولی ہولی مُریدی سنگیت نے دل پرچاوے تے کامتا نوں راہ دے دتا تے بادشاہ اکبر نے سنگیت کاراں دی جو سرپرستی کیتی اوس اک اُچار میعار بنا دتا۔ دربار وچ گویاں تے سنگیت کاراں دی بہت مانتا سی تے ایہہ ریت برطانوی ویلے تیک چلی کیوں جے انگریزاں ایس ریت نوں اُکا نہ چھیڑیا۔ ایس پاروں اسیں ویکھنے آں مسلم اُستاد بہت گنتی وچ سن۔ نالے درباراں دے حاکماں اُتے ملوانیاں دا کوئی زور نہیں سی۔سینما تے فلماں برطانوی وارے وچ اُسریاں۔ بھاویں ایس ویلے ویکھن والے عام لوک سن پر ملوانیاں دا کوئی سیاسی اثر نہیں سی تے نہ ریاست ایہناں معاملیاں اُتے اوہناں دی راء لیندی سی۔ سنسر بورڈ دے قنون وچ ایہہ لکھیا سی سینما ملوانیاں جاں مذہب نوں نشانہ نہیں بنائے گا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels