Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> جان برجر: 1926-2017 میرامُرشد لکھاری امرجیت چندن

جان برجر: 1926-2017 میرامُرشد لکھاری امرجیت چندن

انگریزوں: زبیراحمد
January 6th, 2017

جان برجر جیہڑا ساڈے ویلے دا لکھاری سی ہن نہیں رہیا۔اوس دیاں لکھتاں نے پورے جگ دے کرتی(تخلیقی) ذہناں اُتے اثر پایا تے پریرنا دتی۔ اوہدی پنجاب وچ وی بڑی مانتا سی۔سیلمہ ہاشمی،امرجیت چندن،مدن گوپال سنگھ،گیتا کپور،گروندرسنگھ،شاہد مرزا، اکرم وڑائچ،رشم سیدّ،اروندکرشن موہوترا،رتو سود تے ہور تے ہورارون دتی رے۔پنجاب یونیورسٹی چندی گڑھ وچ اوہ پوسٹ گریجویٹ انگلش لٹریچر کورس وچ شامل اے۔برجر 90 سال دی حیاتی جیون پچھوں 2 دسمبر2016 نوں سانوں چھڈ گئے نیں۔ ایتھے اسیں وچار دے پڑھیارا لئی امرجیت چندن دے وچار سانجھے کردے پئے آں۔ چندن پنجابی دا سرکڈھ شاعر تے سُوجھوان ہے تے لندن رہندا اے۔
میرامُرشد :امرجیت چندن
جان برجر میرا ہیرو اے،مُرشد اے۔میری اوس نال ادب دے رُوپ دی،سُوجھ تے سبھ توں ودھ سیاست دی سانجھ اے۔ اوہ ساڈے ویلے دا لکھاری سی، ساڈے ایمان نوں جیوندا رکھن والا۔میں کئی نظماں اوس توں پریرنا لے لکھیاں نیں۔اوہ میریاں نظماں دا پہلا پڑھیار سی تے اوہ ہمیش کُھل دلی نال سلاہنا جاں کجھ صلاحواں لے کے پرتدا سی۔ اک بیلی نے مینوں سن 77 وچ اوہدی جگ دُھمی کتاب ways of seeing دتی جد میں اپنی جلاوطنی لئی جرمنی تُر جانا سی۔ایہہ پہلی نظر دا پیار سی جاں میں آکھاں پہلی ویکھنی دا ۔ایس مگروں میں اُس دیاں دو ہور کتاباں روح تے سریر نال پڑھیاں، ’ستواں بندہ‘ یورپ دے 70 دے پردیسی مزدوراں بارے سی، تے دوجی ’ساڈے ویلے دا چترکار‘ دویں کتاباں میں فرینک فرٹ یونیورسٹی توں لئیاں۔
جان دی لکھت میرے لئی اک جذبے بھریا پندھ اے۔میں اوہنوں اکو جھٹکے وچ نہیں پڑھ سکدا۔ ہور تے ہور اوس دے کومے، فل سٹاپ تے سیمی کولن میرے لئی پتھر اُتے اُکرے نشان وانگ نیں۔میں ایس مہان ہستی نوں 15 ستمبر نوں 1995 وچ ملیا ساں۔اوہ آئی سی اے (آرٹ سنٹر،لندن) وچ اپنے ناول ’شادی بارے‘ گل کرن آئے سن۔ میں اپنی جانکاری کرائی میں اوہ ہاں جس نظم ’لہسن‘ لکھی سی۔(اوس نے اوہ نظم مینوں جانے بناں اوس فلم لئی پڑھی سی جیہڑی چار یورپی ملکاں نے اوس بارے بنائی سی)۔
ایس توں پچھوں اسیں چٹھی پتر وی کیتے تے کئی واری ملے وی۔اخیری وار میں اوس نوں پیرس وچ پچھلے سال اپریل وچ ملیا ساں۔ پھیر اوس میری دو بولڑی کتاب (پنجابی تے انگلش) ’سوناٹا فار فور ہینڈز‘ لئی ’مُکھ بند‘ وی لکھیا سی جیہڑی سن 2010 وچ چھپی سی۔ ایہہ میری بولی تے لوکاں لئی بڑیامان جوگ آدر سی۔اوہ ای میری شاعری وچوں ویلے دیاں چھ ڈائمنشنز دی گل کر سکدا سی۔اوس نے اک واری آکھیا سی اوس دیاں لکھتاں وچ تواریخ دی مارکسی اکھ تے پوتر دی سُوجھ، دھرم نالو نال موجود نیں۔ایہہ دولّ نہیں اے سگوں اصلوں لوڑندی ایکتا اے۔ پھیر جان برجر دے اثر ہیٹھ میں وی کجھ چر پچھوں پوترتا لبھی۔مزے والی گل ایہہ وے برطانیہ دی کیمونسٹ پارٹی دے رسالے ’مورننگ سٹار‘ دے سودھی نے’ سوناٹا فار فور ہینڈز‘ بارے ویروا کردیاں ایہناں نظماں نوں ’سیکولر روحانی‘ آکھیا۔ سنسکرت وچ اک سوہنا اکھر اے ’کرُنا اے جس دا مطلب اسیں ’کریم‘ کر سکدے آں۔ایہہ وی میں جان توں سکھیا۔ایہہ اوس دے سارے کم دی کُنجی اے تے نانک بانی دی وی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels