Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> پیپلز پارٹی دے 43 سال

پیپلز پارٹی دے 43 سال

اعجاز مہر
December 1st, 2010

تریہہ نومبر نوں پاکستان دی اک وڈی سیاسی جماعت پیپلز پارٹی نے اپنا 43 واں یوم تاسیس منایا تے ملک دے کئی شہراں وچ اکٹھ ہوئے پر ایس موقعے تے پارٹی دے چیئر پرسن بلاول بھٹو تے شریک چیئر پرسن تے صدر آصف علی زرداری کسے اکٹھ وچ نظر نہیں آئے۔

وزیر اعظم سید یوسف رضا گیلانی نے صوبہ خیبر پختونخواہ تے شام نوں صوبہ سندھ دے شہر سکھر وچ پارٹی دے اکٹھ وچ رلت کیتی۔ پیپلز پارٹی نے پچھلے چوتالی سالاں وچ بڑے لاہ چڑھا ویکھے نیں تے اوہناں وچوں تریہہ سال تے اوہنے حزب اختلاف دا کردار ادا کیتا ہے۔

ذوالفقار علی بھٹو نے ' اسلام ساڈا مذہب ، سوشلزم ساڈی معیشت، جمہوریت ساڈی سیاست، طاقت دا مڈھ عوام، دا منشور لے کے تریہہ نومبر 1967 نوں لہور وچ پاکستان پیپلز پارٹی بنا کے، روٹی کپڑا تے مکان ' دا نعرہ ماریا سی۔

اوہناں دی حکومت وچ پاکستان دا آئین بنایا گیا، ایٹمی پروگرام شروع ہویا، سٹیل ملز تے ہیوی مکینیکل کمپلیکس ورگیاں صنعتاں لگیاں، مزدوراں دے حقاں لئی قانون سازی سنے کئی ترقیاتی کم کیتے گئے۔ ایہدے اڈ اوہناں دی حکومت وچ ہی بلوچستان وچ فوجی آپریشن ہویا، نیپ دی حکومتاں مکیاں، مفتی محمود تے خان عبدالولی خان سنے بھٹو دے کئی مخالفاں نوں جیلاں وچ سٹیا گیا۔ ایہناں کاروائیاں پاروں بھٹو اک جھیڑے والی ہستی وی بنے۔ پر اج وی اوہناں دے ویری من دے نیں پئی جنے کم اوہناں نے پنجاں سالاں وچ کیتے اینے کم اوہناں دے مگروں آؤن والے فوجی یاں سیاسی آگو دساں سالاں وچ وی نہیں کرسکے۔ ایتھے ایہہ گل کھولنی ضروری ہے جو ذوالفقار علی بھٹو نوں انی سو ستتر وچ مارشل لاء لا کے ہٹاؤن دے مگروں جنا چر فوجی حکمران اقتدار تے قابض رہے اینا چر سیاسی جماعتاں نوں اقتدار نہیں ملیا۔

ذوالفقار علی بھٹو دی پھانسی دے مگروں اوہناں دی دھی بینظیر بھٹو نے پارٹی دی واگ ڈور سنبھالی تے ضیاء الحق دے مارشل لا وچ اوہناں دے پیو دے کئی نیڑلے سنگی اوہناں دا ساتھ چھڈ گئے جیہناں وچ غلام مصطفی جتوئی، ممتاز بھٹو، غلام مصطفی کھر، ڈاکٹر مبشر حسن، ڈاکٹر غلام حسین، عبدالحفیظ پیرزادہ وغیرہ رلتی نیں۔

پر ضیاء الحق دی ہوائی واپری وچ موت دے مگروں ریاستی سرپرستی وچ اسلامی جمہوری اتحاد بنا کے اوہناں دا راہ روکن دیاں کوششاں بھیڑی طرحاں ناکام ہوئیاں تے پیپلز پارٹی وڈی اکثریت نال جت گئی تے بینظیر بھٹو اسلامی دنیا دی پہلی زنانی وزیر اعظم بنیاں۔ پر اوہناں دی حکومت نوں مدت پوری نہیں کرن دتی گئی۔ انی سو ترانوے دیاں چوناں وچ اک واری فیر اوہناں دی جماعت وڈی گنتی نال جتی تے اوہ دوجی واری وزیر اعظم چون ہوئیاں۔ ستائی دسمبر سن دو ہزار ست نوں اوہناں نوں راولپنڈی وچ اک آپ مارو دھاڑے وچ قتل کر دتا گیا۔

انج دے حالات وچ پارٹی دی لیڈر شپ اوہناں دے خاوند آصف علی زرداری کول آگئی تے فروری سن دو ہزار اٹھ دیاں چوناں دے مگروں اقتدار سنبھالیا تے اوہناں نال وی کئی لوک غصے ہوئے۔ پہلوں تے مخدوم امین فہیم خوش نہیں سی پر مگروں اوہناں وزارت لے لئی۔ میاں رضا ربانی سینٹ چیئر مین نہ بناؤن تے غصے ہوئے پر آئین وچ ترمیم پارلیمان دی قومی سلامتی کمیٹی دی پردھانگی سنے وڈیاں ذمے واریاں وی نبھاؤندے رہے۔ ججاں دی بحالی دے سوال تے اعتزاز احسن پارٹی اگوائی توں دور ہو گئے پر مگروں حکومت تے عدلیہ وچ پل دا کردار وی ادا کیتا۔

پر بینظیر بھٹو دی سیاسی سیکرٹری ناہید خان تے اوہناں دے خاوند صفدر عباسی پیپلز پارٹی دے نویں پردھان دا شکار بنے تے ہن اوہ اوہناں دے وڈے ویری بن دے جارہے نیں۔ انج دے حالات وچ اک واری فیر پیپلز پارٹی ٹٹن دیاں گلاں شروع ہوگئیاں نیں۔

ناہید خان تے صفدر عباسی دی ناراضگی بارے سندھ دے وزیر داخلہ ڈاکٹر ذوالفقار مرزا دا کہنا ہے پئی ایہدا کارن سیاسی نہیں سگوں جائیداد دے معاملے نیں۔ اوہناں موجب ناہید خان نوں اوہ جائیداد بینظیر دے بالاں نوں دینی پوے گی جیہڑی اوہناں دے کول ہے۔

جتھوں تیکر پیپلز پارٹی دا سانگا ہے تے ایس گل وچ کوئی شک نہیں پئی اوہ گورننس، مہنگائی، کرپشن، غربت تے بے روزگاری ورگے مسئلیاں تے قابو نہیں پاسکے تے عوامی آساں تے پوری نہیں لتھی۔ پر پارٹی دا ایہہ وی کہنا ہے جو اوہ ضمنی چوناں وچ انج دیاں سیٹاں جت رہی ہے جیہڑی بینظیر دے قتل دے مگروں ہون والیاں چوناں وچ وی نہیں جت سکی سی۔ خورشید شاہ دے ' سارے لوک تے رب توں وی خوش نہیں ہوندے '۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels