Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> پرویز مشرف دا سیاسی کمانڈو ایکشن

پرویز مشرف دا سیاسی کمانڈو ایکشن

وچار ڈیسک
October 10th, 2010

پاکستانی سیاست وچ گذریل صدر پرویز مشرف دی واپسی دے اعلان نال کجھ ہور ہویا یاں نہیں پر میڈیا وچ بڑی ہلچل پے گئی ہے۔ اوہناں دے ملکوں جان دے مگروں ایہہ پہلا موقع ہے پئی میڈیا چینلز تے اوہناں دے لمے انٹرویوز وکھائے جارہے نیں تے حالات حاضرہ دے پروگراماں وچ سیاست دان تے تجزیہ کار اوہناں دے بیاناں تے بحثاں کر رہے نیں۔

گذریل صدر پرویز مشرف کہندے نیں پئی اوہ اک وڈے آگو نیں تے فیس بک تے اوہناں دے پیج تے آؤن والیاں دی گنتی ساڈھے تن لکھ توں بہتی ہے۔ جیہدے تے اوہناں دے ناقد ایہہ اعتراض کردے سن پئی ستاراں کروڑ دی آبادی وچ ایہدی گنتی دی کیہ اُچیچتا ہے۔ پر سیاست وچ واپسی دے اعلان توں مگروں گذریل صدر میڈیا چینلاں تے اخباراں راہیں جیہڑے انداز وچ ہی سہی لکھاں لوکاں تیکر اپڑ رہے نیں تے عام محفلاں تے قہوہ خانیاں وچ مہنگائی دے مگروں گل بات دا اک وڈا موضوع بن رہے نیں۔

گذریل صدر نے یکم اکتوبر نوں لندن وچ اک اُچیچے جلسے وچ آل پاکستان مسلم لیگ ناں توں اپنی پارٹی لانچ کرن دا اعلان کیتا۔ سوادی گل ایہہ ہے پئی پاکستان دے ہر فوجی حکمران نے مسلم لیگ دے ہی جثے چوں اک نویں مسلم لیگ پیدا کیتی۔ پر پرویز مشرف ایس پاسیوں وکھ نیں اوہناں نے اک دی تھاں دو مسلم لیگاں نوں جنم دتا یعنی مسلم لیگ قاف تے آل پاکستان مسلم لیگ۔

گذریل صدر نے مگروں اپنی پارٹی دیاں ترجیحاں وچ تعلیم تے معیشت نوں رلایا ہے۔ اپنے نو سالاں دے اقتدار وچ اوہناں دی حکومت نے اعلیٰ تعلیم تے بڑی توجہ دتی تے یونیورسٹیاں دی پدھر تے تعلیمی نظام نوں نویں خطاں تے چلاؤن دی کوشش کیتی پر نکھیدی کرن والے کہندے نیں اوہناں دے دور وچ سکولوں دی پدھر دی تعلیم نوں نظر انداز کیتا گیا جیہناں دی تعلیمی نظام وچ مڈھلی اُچیچتا ہے۔

پرویز مشرف نے اپنے اک انٹرویو وچ کہیا ہے جو دو ہزار ست تیکر پاکستان کالھی نال ترقی کردا ہویا اک ملک سی تے معاشی ترقی دی رفتار اٹھ فیصد تیکر اپڑ گئی سی کرنسی مضبوط سی تے معیشت دا دائرہ کھلر رہیا سی۔ پر کئی تجزیہ کاراں دا کہنا ہے جو ایس دور دی معاشی ترقی دی ساری چمک حقیقت وچ سوکھے بینک قرضیاں دی پالیسی سی جیہدے نال ورتن والیاں نے وڈے پیمانے تے کریڈٹ نال خریداریاں کیتیاں۔ اجوکی سرکار دے پہلے خزانے دے وزیر اسحاق ڈار نے اپنے اک انٹرویو وچ کہیا سی پئی مشرف دور دی معاشی ترقی حساب کتاب دا ہیر پھیر سی۔

گذریل صدر مشرف کہندے نیں پئی اوہ لوکاں دی حالت ٹھیک کرن لئی سیاست وچ آئے نیں۔ جدوں کہ اوہناں دی نکھیدی کرن والے کہندے نیں جو کم اوہ اپنے نو سالاں دے اقتدار وچ ، جدوں اوہ ہر شے دے مالک سن۔ ایہنوں اوہ پنجاں سالاں دی جمہوری مدت وچ کیویں کر سکن گے جتھے اوہناں نوں اپوزیشن دا وی ساہمنا ہووے گا۔

پرویز مشرف نے اپنی باقاعدہ سیاست میاں نواز شریف دی کرڑی نکھیدی توں شروع کیتی۔ جدوں کہ نکھیدی کرن والے کہندے نیں پئی اوہناں نے اپنی بے قاعدہ سیاست دا مڈھ نواز شریف نوں اقتدار دے ایوان چوں باہر کڈھ کے رکھیا سی۔

پرویز مشرف نے اپنے انٹرویو چ ایہہ منیا ہے پئی دو ہزار ست وچ اوہناں کولوں سیاسی غلطیاں ہوئیاں۔ پر اوہناں نے کہیا میرا چیف جسٹس افتخار محمد چودھری دی معطلی نال کوئی سانگا نہیں سی۔ اوہ کہندے نیں ایہہ شوکت عزیز حکومت دا فیصلہ سی جیہدے تے اوہناں نے قانون موجب عمل کیتا۔ پر نکھیدی کرن والے کہندے نیں حالات تے واپریاں اوہناںدے دعوے نوں غلط ثابت کردے نیں۔

گذریل صدر پرویز مشرف نے اپنے بیان وچ این آر او نوں اک غلط فیصلہ تے سیاسی بھل متھیا ہے۔ اوہ کہندے نیں ایس فیصلے تے اوہ قوم کولوں معافی منگ چکے نیں پر اوہناں دا کہنا ہے اوہ ایس معاملے وچ بے قصور نیں۔ اوہناں کولوں ایہہ آرڈیننس چودھری شجاعت حسین تے چودھری پرویز الٰہی نے جاری کروایا سی۔ اوہ کہندے نیں پئی چودھری برادران نے کہیا سی مقدمے مکا دتے جان پر بینظیر بھٹو تے نواز شریف نوں الیکشن توں پہلوں وطن واپس آؤن دی اجازت نہ دتی جاوے۔ چودھری برادران ایس الزام نوں رد دے نیں تے گذریل صدر نوں جھوٹا کہندے نیں۔

این آر او دے سٹے وچ سب توں بہتا فائدہ ایم کیو ایم نوں ہویا جیہدے اٹھ ہزار توں بہتے کارکناں دے مقدمے مکا دتے گئے۔ پر ایس آرڈی ننس دی مخالفت وچ سب توں پہلوں آواز اوہناں نے چکی۔ دوجے نمبر تے فیدا چکن والی جماعت پیپلز پارٹی سی پر اوہنے سپریم کورٹ وچ این آر او دا دفاع نہیں کیتا تے عدالت نے ایہہ آرڈیننس خلاف قانون متھ دتا۔

پرویز مشرف دا کہنا ہے جو میاں نواز شریف نے سزاواں توں بچن لئی سعودی عرب دے حکمران نوں اپنے دیس نکالے دی سفارش کروائی سی جدوں کہ نواز شریف نے کہیا اوہ گذریل صدر دی کسے گل دا جواب نہیں دین گے۔

جرمنی دے اک میڈیا تے کشمیر بارے گذریل صدر دے بیان تے پاکستان وچ سرکاری تے سیاسی پدھر تے بڑی نکتہ چینی ہوئی ہے جیہدے وچ اوہناں نے کہیا سی پئی اوتھوں دی تحریک وچ پاکستانی ایجنسیاں دا ہتھ سی۔ پر مگروں اوہناں نے اک پاکستانی چینل تے اپنے انٹرویو وچ نانہہ کردیاں ہوئیاں الزام لایا پئی اوہناں دے بیان نوں تروڑ مروڑ کے پیش کیتا گیا ہے۔

یکم اکتوبر توں سیاست وچ اپنے فیر داخلے دے اعلان دے مگروں پرویز مشرف میاں نواز شریف دے مگروں سب توں بہتی نکھیدی چودھری برادران تے کر رہے نیں۔ چودھری شجاعت حسین نے اک ٹی وی چینل تے اپنے انٹرویو وچ کہیا ہے پرویز مشرف نے اپنی سیاسی مہم، صدر زرداری دے نال اک نویں ڈیل ہیٹھ شروع کیتی ہے جیہدے وچ اوہ صرف نواز شریف تے اوہناں دی نکھیدی کر رہے نیں تاں جو لوکاں دی توجہ حکومتی کارکردگی توں ہٹائی جاوے۔ کئی مبصر کہندے نیں جو گذریل صدر دے انٹرویوز تے بیاناں نال.حکومت نوں ویلے سر ریلیف ملیا ہے کیوں جو اجکل میڈیا دا بہتا موضوع پرویز مشرف بنے ہوئے نیں۔

گذریل صدر نے کہیا اوہ چوناں توں پہلوں کسے چنگے ویلے تے پاکستان واپس جان گے دوجے پاسے اوہناں دے کئی نکھیدی کرن والیاں نوں اوہناں دے پرتن تے شک ہے۔

جے گذریل صدر اپنی پارٹی دے پلیٹ فارم توں بھلک دیاں چوناں وچ حصہ لیندے نیں تے غالبا اوہناں دے سب توں وڈے مخالف عمران خان ہون گے کیوں جو دوہویں جوان نسل دی حمایت دے دعویدار نیں۔

وائس آف امریکہ دے شکرئیے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels