Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> لیبر ڈے دی اُچیچتا مذہبی حوالیاں نال

لیبر ڈے دی اُچیچتا مذہبی حوالیاں نال

وچار ڈیسک
September 5th, 2010

امریکا وچ سومورار، چھ ستمبر نوں لیبر ڈے منایا جاوے گا۔ ایس دیہاڑے پورے امریکا وچ عام چھٹی ہوندی اے۔ ایہہ دن 1894 وچ کم دی وڈیائی دی یاد مناؤن اتے محنت کرن والیاں نوں سلاہون لئی منایا جاندا ہے۔ پر اج کل بہتے امریکی ایس دیہاڑے نوں ایس لئی اڈیکدے نیں پئی ایہدے نال اوہناں نوں گرمیاں دے موسم دے اخیرلے تن دیہاڑیاں دی چھٹی مل جاندی ہے۔ چار وڈے مذہباں دے منن والیاں لئی ایس دیہاڑے دی روحانی اچیچتا کیہ ہے ایہہ جانن لئی ایہہ وچار پڑھو۔

کوئینز نیویارک وچ امام عبدالباقی بہت رجھے رہندے نیں۔ اپنے پڑھن پڑھاؤن دے فرضاں دے نال نال اوہ کمیونٹی دی سیوا تے سدھار وی کردے نیں۔ کدی کدی اوہ دن وچ پندراں گھنٹے رُجھے رہندے نیں۔ اوہ کہندے نیں پئی قرآن شریف موجب کم آپوں کوئی مقدس شے نہیں ہے سگوں کم اوہ وسیلہ ہے جیہدی راہیں تسیں رب نوں چنگے لگدے کم کر سکدے او۔ اوہناں موجب ''کم اوہ وسیلہ ہے جیہدے نال اسیں دولت اکٹھی کرنے آں تے جدوں لوک دولت اکٹھی کردے نیں، تے اوہناں لئی لازمی ہو جاندا ہے پئی اوہ کجھ فرض پورے کرن۔ جیہڑی شے سب توں پہلوں ضروری ہے اوہ ہے اپنے گھر دی خبر گیری کرنا''۔

امام عبدالباقی کہندے نیں اسلام وچ گھر دے خیال وچ تہاڈی کمیونٹی وی رلتی ہوندی ہے۔ اوہناں دا کہنا ہے جو اسلام دے پنج مڈھلے رکناں چوں اک زکوۃ ہے جیہڑا سب تے واجب ہے۔ زکوٰۃ لوڑ منداں، مسافراں، قرض داراں تے اوہناں لوکاں لئی ہے جیہڑے مدد دی درخواست کرن۔ ایہہ اسلام دی تبلیغ تے اوہناں نوں صحیح راہ تے لیاؤن لئی ورتی جا سکدی ہے تے کم اوہ وسیلہ ہے جیہدے نال اسیں زکوٰۃ دین جوگے ہوندے آں۔

کم کرنا عیسائیت وچ وی بڑا آدر جوگ ہے۔ڈین وولف ریاست کینساس وچ ایپسی کوپل بشپ نیں۔ اوہ ایس حقیقت ول دھیان دیندے نیں پئی حضرت عیسیٰ اک ترکھان دے پتر سن تے اوہناں بہتا ویلا محنت کشاں دے نال لنگھایا جیہناں وچ مچھیرے، کاشتکار، تے دوجے لوک رلتی سن جیہڑے اپنے ہتھاں نال محنت کردے سن۔ آپوں بشپ وولف دے پیو کاراں بناؤن والی فیکٹری وچ وچ کم کردے سن۔ اوہ ایہہ گل من دے نیں پئی مذہبی کتاباں وچ روحانی نالوں جسمانی محنت نوں اچیایا گیا ہے پر اوہناں دا خیال ہے پئی اصلی مقصد دوہاں نوں اک دوجے نال رلاؤنا ہے۔ اوہناں کہیا میرے خیال وچ ایہہ آس ہمیش موجود رہندی ہے پئی محنت تے عبادت انج اک دوجے نال جڑ جان پئی دوواں وچ فرق نہ پتہ لگ سکے یعنی اوہ اک ہو جان۔ اسمانی کتاباں وچ ایہہ خیال بہت ملدا ہے پئی عیسائیاں نوں اپنی حیاتی وچ حضرت عیسیٰ دی حیاتی دی ریس کرنی چاہیدی ہے تے حضرت عیسیٰ نے اپنی حیاتی انسان دی شکل وچ، عام انساناں وانگوں لنگھائی۔

گیری سنائیڈر بدھ مت دے پیروکار نیں تے شاعر نیں اوہ اپنا بہتا ویلا لکڑاں چیرن، پانی لیاؤن تے جسمانی محنت دے دوجے کماں وچ لاؤندے نیں۔ اوہ کہندے نیں پئی ''کم کیہ ہے ؟ کھیڈ توں کجھ بہتا اڈ نہیں۔ کم اوہ شے ہے جیہڑا اسیں اپنے گذارے لئی روز کرنے آں۔ اوہ کہندے نیں کم کرنا پیا ہے تے کم راہیں اسیں مسلسل نویاں گلاں سکھدے رہنے آں۔ اسیں کم توں پچھا نہیں چھڈا سکدے۔جے اسیں انج کیتا تے ساڈی قدر گھٹ ہو جاوے گی۔ ایہدے توں اڈ اسیں اک دوجے نال تے دنیا نال جڑے ہوئے آں سانوں ساریاں نوں کسے حد تیکر ایس دنیا وچ اپنی مادی زندگی دی ذمے واری قبول کرنی پیندی ہے۔

نیویارک دی اک یہودی ستھ CLAL دے رابی ارون کلا کہندے نیں پئی چنگے کم دی ایہہ خوبی پئی ایہدے نال انسان دی ہستی پاک صاف ہوجاندی ہے، یہودی مذہب دا اک اُچیچا عقیدہ ہے۔ ایس ریت موجب کسے دی محنت دی قدر ایس گل نال متھی جاندی ہے پئی کم کرن والے دی نیت تے مقصد کیہ سی۔ سب توں بہتا تخلیقی کم اوہ ہوندا ہے جیہدے وچ انسان نوں ایہہ تجربہ ہووے پئی ایہدے نال وسیب چنگا ہو رہیا ہے تے دنیا دے دکھ درد دور ہورہے نیں۔رابی کلا موجب ''ایہہ مقصد کئی قسم دے کماں توں حاصل ہو سکدا ہے۔ ضروری نہیں پئی کوئی اسکائی اسکریپر تعمیر کرے یاں کینسر دا علاج دریافت کرے۔ سڑکاں صاف کرن نال بہتا مہذب وسیب بندا ہے۔''

ایس حقیقت دا پتہ رابی کلا نوں ایس ویلے ہویا جدوں اوہ اپنے دادے نوں ملن گئے جیہڑے مرن دے نیڑے سن۔ اوہناں ویکھیا پئی اک نوکر اوہناں دا گند صاف کر رہیا سی۔ اوس بندے دے منہ تے اک حیرانی والی مسکان سی۔ ہن ذرا سوچو، ایہہ بندہ کسے ہور دا گند صاف کر رہیا سی تے اوہدے بدلے اوہنوں تھوڑی جہی مزدوور ملدی سی۔ اوہ کہندے نیں میرے دادے دے نال اوہدا ورتارا بڑا چنگا سی اوہ کنی توجہ تے دھیان نال ایہہ گندا کم کر رہیا سی۔ ایہہ ویکھ کے مینوں رونا آگیا۔

ایہہ کجھ خیال نیں جیہناں تے امریکی ایس ہفتے دے مکن تے، ساحل سمندر تے لمے پئے کتاب پڑھدے ہوئے، اپنے ٹبر دے نال پکنک مناؤندیاں ہوئیاں تے محنت دے مگروں آرام کردے ہوئے گوہ کر سکدے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels