Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> ہڑھ نال بے گھر ہون والیاں زنانیاں دیاں اوکڑاں

ہڑھ نال بے گھر ہون والیاں زنانیاں دیاں اوکڑاں

عباد الحق
August 18th, 2010

دکھنی پنجاب وچ ہڑھ نال بے گھر ہون والیاں وچ رلتی زنانیاں نوں ریلیف کیمپاں وچ اپنی رفع حاجت دیاں لوڑاں نوں پورا کرن وچ بڑیاں اوکڑاں دا ساہمنا ہے۔ پنجاب دے پنجاں ضلعیاں وچ ہڑھ دے پانی نے تباہی مچائی ہے تے کئی علاقے پورے ڈب گئے نیں جیہدے پاروں لوک اپنے گھر بار چھڈ کے سڑک کنڈیاں تے اُچیاں تھاواں تے ریلیف کیمپاں وچ پناہ لین تے مجبور ہو گئے۔

ہڑھ دے پانی نال بے گھر ہون والیاں وچ اک وڈی گنتی بالاں تے زنانیاں دی ہے جیہدے وچ بڈھیاں زنانیاں توں اڈ جوان کڑیاں وی رلتی نیں۔

ہڑھ دے پانی توں محفوظ کوئی اُچی تھاں ہووے یاں فیر ریلیف کیمپ دوہواں تھاواں وچ پناہ لین والے لوکاں دی رفع حاجت لئی کوئی چنگا پربندھ نہیں ہے تے اُچیچا زنانیاں نوں اپنیاں لوڑاں نوں پورا کرن لئی ویران تھاں لبھنی پیندی ہے۔ کوٹ ادو دے علاقے وچ منڈا چوک وچ اک سرکاری سکول وچ پناہ لین والے ہڑھ دیاں ماریاں دا کہنا ہے جو اوہناں نوں کھان لئی خوراک تے ملدی ہے پر اوہناں کول کوئی پربندھ نہیں ہے جیہدے نال اوہ پردے نال اپنی رفع حاجت پوریاں کرسکن۔

کیمپ وچ موجود اک زنانی آسیہ بی بی دا کہنا ہے جو سکول دی عمارت وچ جیہڑا ریلیف کیمپ لگیا ہے اوہدے وچ لیٹرین تے ضرور ہے پر جنے لوکاں نے پناہ لئی ہوئی ہے اوہناں لئی سکول دی لیٹرین گھٹ ہے تے اوہناں نوں لیٹرین ورتن لئی بڑا چر اُڈیکنا پیندا ہے۔

آسیہ موجب لیٹرین وچ صفائی نہیں ہوندی سگوں اینا گند ہوندا ہے پئی مجبور ہو کے اوہناں نوں اپنی لوڑ پوری کرن لئی دور علاقے ویران وچ جانا پیندا ہے تے اوہناں نوں اودوں بہت ڈر لگدا ہے جدوں اوہ اپنی لوڑ لئی کسے ویران تھاں تے جاندیاں نیں۔

شازیہ ناں دی زنانی دا کہنا ہے جو دن دے ویلے رفع حاجت لئی باہر جاندیاں ہوئیاں ایس لئی ڈر آؤندا ہے کیوں جو چاراں پاسے مرد ہوندے نیں تے رات نوں ایہہ ڈر لگدا ہے پئی کوئی سپ یاں کیڑا اوہناں نوں ڈنگ لوے گا۔ زنانیاں موجب ایسے ڈر توں اوہ دن وچ صرف اک واری جاندیاں نیں تے ایہدے توں اڈ کوئی چارہ نہیں۔

سلطان کالونی وچ کھلے اسمان ہیٹھ کیمپ وچ رہن والیاں زنانیاں نوں رفع حاجت تے نہاؤن لئی بڑی اوکھت ہوندی ہے تے اوہناں وچوں کجھ انج دیاں زنانیاں وی نیں جیہناں کدی ایہہ وچاریا وی نہیں سی جو اوہناں نوں کھلے اسمان ہیٹھ بناء لیٹرین دے انج اپنی حاجت پوری کرنی پوے گی۔


بشیراں بی بی دا کہنا ہے جو اوہناں دے کول کیمپ وچ نہاؤن دا وی کوئی پربندھ نہیں ہے تے ایس گرمی وچ کئی دناں توں اوہ نہا نہیں سکیاں جیہدے پاروں اوہناں نوں بہت تکلیف ہے۔طبی ماہراں دا کہنا ہے جو ہڑھ دے ماریاں نوں گند تے مچھراں توں بچاؤن دی بہت لوڑ ہے کیوں جو گند نال ہڑھ دے ماریاں وچ جلدی بماریاں پیدا ہون دا خطرہ ہے جدوں کہ مچھراں پاروں ملیریا دی وبا پھیل سکدی ہے۔

بی بی سی دے شکرئیے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels