Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> جہادی کہانیاں

جہادی کہانیاں

اعجاز مہر
February 2nd, 2010
3 / 5 (2 Votes)

دکھنی پنجاب دے ضلع ڈیرہ غازی خان دے غلام علی کھوسہ دے پتر دی کہانی پچھلی قسط وچ دسی گئی سی جیہڑا طالبان دے نال افغانستان دے شہر قندوز وچ مر گیا سی۔ پر ایس قسط وچ تہانوں غلام علی دے گوانڈھی گل شیر خان دے پتر دی کہانی سناؤنے آں۔

میرا پتر ویہہ سال دا سی جدوں ایتھوں گیا۔ افغانستان وچ پھڑیا گیا تے شبرگان دی جیل وچ چار سال رہیا۔ پل چرخی جیل وچ اپڑے تے اوہدے گردیاں نے کم کرنا چھڈ دتا۔ اوتھوں جدوں اوہ پشاور اپڑیا تے اسیں اوہدے نال ملنی کیتی جیہدے وچ اوہنے دسیا پئی اوہ ٹھیک ہو رہیا ہے۔ ایہدے مگروں اوہدے کسے سنگی دا فون آیا پئی تہاڈا پتر ہری پور جیل وچ ہے تے بمار ہے۔ اسیں اوہنوں ایوبیہ ہسپتال ایبٹ آباد لے گئے جتھے اوہدے گردیاں دی صفائی کیتی گئی۔ اٹھائی دن اوتھے رہیا اوہدی طبیعت فیر خراب ہو گئی تے ڈاکٹراں نے کہیا تہاڈا پتر مکن والا ہے۔ اوہناں نے راولپنڈی ملٹری ہسپتال گھلیا۔ اوہناں نے ساڈے کولوں ویہہ ہزار چار سو روپئے فیس لئی تے پتر ٹھیک ہو گیا۔ 31 دسمبر دو ہزار چار نوں اوتھوں پولیس اوہنوں فیر ہری پور جیل وچ لے گئی تے اسیں گھر آگئے۔ فیر چار تے پنج جنوری دی وچلی رات اطلاع ملی پئی تہاڈا پتر جیل وچ مر گیا ہے۔ اوہدے ساتھی لوتھ لے آئے تے اسیں دفنا دتا۔'

اوہناں دا کہنا سی پئی '' اوہناں تے رشید دوستم نے دھاڑا ماریا سی تے مجاہداں نوں کہیا پئی ہتھیار سٹ دیو تے میں تہانوں پاکستان گھل دیواں گا۔ فیر اوہناں نے مجاہداں دے نال دھوکہ کیتا تے اوہناں دے کامیاں نے پھڑ لیا تے جیل وچ رکھیا۔ پتر نے دسیا پئی دوستم دی جیل وچ پندراں دن مٹی دے نال روزہ رکھیا تے کھولیا۔ پانی دا اک گلاس چویہہ گھنٹیاں وچ ملدا سی۔ مگروں جدوں انسانی حقاں والے اوتھے اپڑے تے فیر اوہناں نوں سوکھت ملی۔ میرا پتر جیش محمد دے نال گیا سی۔ جدوں اوہدی لوتھ آئی تے ستھ والیاں نے ویہہ بائی ہزار دتے پر فیر کدی نہیں پچھیا۔

سرائیکی پٹی وچ کالعدم لشکر طیبہ ، حزب المجاہدین تے حرکت المجاہدین توں اڈ جیش محمد ناں دیاں ستھاں کم کر رہیاں نیں پر ضلع راجن پور دے شہر روجھان مزاری اپڑے تے اوتھے البدر ناں دی ستھ دے نال ہندوستان دے پربندھ وچ کشمیر وچ مارے جاون والے خیر بخش سہیجہ دے ناں دا اک سائن بورڈ وی نظر آیا۔

خیر بخش سہیجہ نو جنوری سن دو ہزار چار نوں ہندوستانی سیکورٹی فورسز دے ہتھوں بانڈی پورہ وچ مارے گئے۔ کجھ کارناں توں اوہناں دے گھر والیاں نال گل نہیں ہو سکی۔ اسلام آباد دی لال مسیت وچ فوجی آپریشن وچ مارے جاون والے غجزح عبدالرشید نوں وی ضلع راجن پور وچ دفن کیتا گیا۔

راجن پور توں ضلع مظفر گڑھ اپڑے تے اوتھے وی جہادیاں دے کئی قصے سنن نوں ملے۔مظفر گڑھ وچ وپاریاں دی اک ستھ دے آگو ریاض رمضان ڈوگر نال ملے تے اوہناں نے اک جہادی ستھ حرکت الانصار دے نال ہندوستان دے نال کشمیر وچ مارے جاون والے اپنے بھرا دی کہانی سنائی۔

'' میرا بھرا انی ویہہ سال دا سی جدوں انی سو چورانوے وچ کشمیر وچ جہاد لئی گیا۔ جامع مسیت مظفر گڑھ دے امام مولانا خلیل شاہ نے اوہناں نوں جہاد تے گھلیا، سانوں پتہ ای نہیں لگیا۔ کوٹلی توں بھرا نے دو چٹھیاں پائیاں پئی اوہ کشمیر وچ جہاد تے نیں تے اک دو ہفتے وچ واپس آؤن گے۔

چٹھی دے دو تن دن مگروں اوہ ماریا گیا تے سانوں مولانا خلیل شاہ نے رات نوں گیاراں وجے دسیا پئی تہاڈا بھرا شہید ہو گیا ہے۔ جدوں لوتھ آئی تے اوہدے پورے مونہہ تے چھرے وجے ہوئے سی تے جیویں اک شہید دی موت ہوندی ہے اُنج ہی سی۔ ستھ والیاں نے دسیا پئی اوہ مسیت وچ سی جتھے بمب دھماکہ ہویا تے اوتھے اوہ مقابلہ کردیاں ہوئیاں شہید ہوئے۔ میرے خیال وچ چویہہ منڈے سی۔ اک میرا بھرا سی اک منڈا شجاع آباد دا سی اک رحیم یار خان دا تے ایہہ چار پنج لوتھاں اکٹھیاں ملتان آئیاں سی۔ سانوں مگروں مجاہداں نے اوہ مسیت وی وکھائی۔ میرے بھرا نے لکھیا سی پئی میری بیوی تے کڑی دا خیال رکھیو۔ اوہدی دھی سی اوہ ہن دسویں وچ پڑھ رہی ہے۔ بھرجائی دا دوجا ویاہ کروا دتا۔ ستھ والے میرے پیو کول آؤندے سی تے شہید دی کڑی لئی امداد ہر سال دیندے سی جیہڑی دس سال تیکر جاری رہی ایہدے مگروں پیو چلانا کر گئے تے اوہ فیر نہیں آئے۔'

جدوں اوہناں نوں پچھیا گیا پئی تسیں مولوی ہوراں نال گل نہیں کیتی پئی اوہ نیانیاں نوں انج دے کم تے کیوں لاؤندے نیں تے ریاض رمضان ڈوگر نے کہیا نہیں اسیں انج دی کوئی گل نہیں کیتی کیوں جو اوہناں نے کہیا اوہ شہید نیں مجاہد نیں۔ ساڈا بھرا جنونی سی ایس لئی جہاد تے گیا اسیں تے کدی نہیں جاواں گے۔ اسیں جیہڑا گھر وچ کم کرنے آں بچے پالنے آں تے ماپیاں دا خیال رکھنے آں ایہہ وی تے جہاد ہے نہ۔

امریکہ وچ نائن الیون توں مگروں گذریل صدر پرویز مشرف نے عالمی دبا تے جدوں جہادی ستھاں تے روک لائی تے بہتیاں ستھاں لک چھپ گئیاں پچھوکڑ دیاں کجھ وڈیاں ستھاں ٹٹ وی گئیاں۔ کئی ستھاں دے سیکڑیاں سکھے ہوئے کھاڑکو القاعدہ تے طالبان دے نال رل گئے۔ انج دے جتھے جیہڑے پچھوکڑ وچ پاکستان دے ریاستی اداریاں ہیٹھ رہے ہن اوہناں وچکار ظاہر وچ اک وڈا پاڑ پے گیا ہویا ہے۔

پر کجھ مبصر کہندے نیں پئی کالعدم لشکر طیبہ ہووے یاں جیش محمد انج دیاں ستھاں نیں جیہڑیاں ہن وی پاکستان دی سیکورٹی اسٹیبلشمنٹ دے اثر توں باہر نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels