Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> دکھنی پنجاب دے جہادیاں دے قصے

دکھنی پنجاب دے جہادیاں دے قصے

اعجاز مہر
January 25th, 2010

ایہہ گل ہن کسے توں لُکی چھپی نہیں رہی پئی پچھوکڑ وچ افغانستان جہاد تے کشمیر جہاد وچ رلتی کئی کھاڑکو ستھاں نوں پاکستان دے ریاستی اداریاں دی پوری ہلا شیری رہی ہے۔ مارے جاون والے کئی کھاڑکواں نوں متعلقہ ستھاں یاں فیر '' گجے فرشتے '' واہوا چر تیکر مالی امداد وی دیندے رہے۔

پاکستان دے ہور علاقیاں وانگوں دکھنی پنجاب وچ اج وی کئی انج دے مرن والے جہادیاں دے گھر والیاں نوں مستقل امداد ملدی ہے۔ پنجاب دے ضلع بھکر دے محمد حسین جاوید نے دسیا پئی اوہناں دے بھرا عمران عباس کشمیر وچ مارے گئے۔ اوہناں نے اپنے بھرا دی کہانی کجھ انج دسی۔

'' میرے بھرا دی عمر اٹھاراں سال سی، دسویں وچ پڑھدا سی تے بھکر وچ داخلہ لے لیا۔ میرا پیو بمار سی میں اوہناں دے نال سی۔ جدوں واپس آگیا۔ اک واری میری امی نے ایس پی کول جا کے درخواست دتی پئی میرا پتر گواچ گیا ہے تقریباََ تن سال توں کوئی پچھن والا نہیں ہے فیر ایتھوں دے کجھ لوک سی جیہڑے حزب المجاہدین دے ناں توں ستھ سی اہناں لوکاں دی۔ اوہناں دسیا پئی تہاڈی امی نے ساڈے خلاف درخواست دتی ہے فیر اوہ گھر آگئے۔ تن مہینے گھر وچ رہے تے میں اوہناں دا ویاہ کروا دتا۔ ایہدے مگروں کجھ چر اوہ گھر وچ رہے تے پھیر ایہدے مگروں پتہ لگیا پئی اج تیکر واپس نہیں آیا۔

جدوں اوہ گھر آوندا سی تے دسدا سی پئی اسیں کشمیر وچ جانے آں جہاد لئی۔ ویاہ میں ایس لئی کروایا سی پئی اوہ گھر وچ رہ جاوے۔ جدوں میں اوہدا ویاہ کروا دتا تے ویاہ کرن دے چھ ست مہینے مگروں اوہ ٹر گئے۔ اوہناں دے جاون توں مگروں دو تن مہینے اوہناں دی دھی ہوئی۔ اوہناں اپنی دھی وی نہیں ویکھی۔ سن دو ہزار وچ اک دن میں ہٹی تے بیٹھا سی پئی اک ٹیلی فون آیا۔

اہناں لوکاں نے کہیا تہانوں مبارک ہووے تہاڈا بھرا شہید ہو گیا ہے۔ نہ لوتھ آئی نہ کسے نے رابطہ کیتا ایتھوں دے مقامی لوکاں نے کہیا پئی ساڈے افسر آون گے تہاڈے بھرا دی غائبانہ نماز جنازہ پڑھاون گے۔ تے سارے علاقے والیاں نے غائبانہ نماز جنازہ پڑھی۔ میں اینا بمار سی اودوں مینوں ٹائی فائڈ سی بڑا اوکھیاں اوہ ویلا لنگھایا میں۔ فیر ایہدے مگروں اوہناں دے افسر آئے سی کمانڈر سی کون سی ایہہ میں نہیں جاندا۔ اہناں لوکاں نے مینوں کہیا سی پئی تہاڈے بھرا شہید ہو گئے نیں۔ ساڈے کول اوہناں دے وصیت نامے نیں آڈیو تے وڈیو دی شکل وچ تے اوہناں دے کپڑے نیں تے کجھ امانتاں نیں اوہ تہانوں موڑن گے تاں جو تہانوں وی یقین ہو جاوے پئی تہاڈا بھرا شہید ہو گیا ہے۔ پر اج تیکر نہ کوئی شے انج دی نہیں لبھی پئی ساڈے بھرا شہید ہو گئے نیں۔

اسیں تے غریب لوک آں تازہ مزدور کرن والے میری بھتیجی میرے کول ہے تے ہن اوہدی عمر کوئی نو سال ہو گئی ہے پر اوہناں دی گھر والی اوہناں دے شہید ہوون توں چھماہی مگروں ایتھوں ٹر گئی اپنے ماں پیو دے گھر۔ مگروں میرے دوجے نکے بھرا نال ویاہ کیتا پر اوہناں دے نال وی اوہدی نہیں بنی تے مگروں دو ویاہ کر لئے نیں۔ ستھ دے کوئی بندے نیں یاں فیر کسے سرکاری ادارے دے لوک مینوں نہیں پتہ اوہ شہید ہوون والے بھرا دی دھی تے میری ماں دے ناں دا سانجھا اکاؤنٹ ہے ایہدے وچ ہر سال باراں ہزار جمع کرواندے نیں پئی ایہہ شہید دی کڑی دے ویاہ لئی کم آون گے۔ اک واری میں تے پیسے جمع کروان والے اک بندے نوں پچھیا پئی تسی کون او کتھوں آوندے او تے اوہناں نے کہیا سی پئی تسی سانوں اپنا بھر اسمجھو۔''

پنجاب دے ضلع بھکر وچ ہی اک ریٹائرڈ فوجی بہتر سالاں دے محمد شریف نال ملنی ہوئی تے اوہناں نے اک کالعدم جہادی ستھ دے نال مارے جاون والے اپنے پتر محمد تنویر دی کتھا سنائی۔

' میرا پتر حرکت المجاہدین والیاں دے نال ٹر گیا۔ اوہناں دے نال ٹریننگ کردا رہیا خوشاب وچ کمانڈو ٹریننگ کیتی مانسہرہ وچ وی اوہناں نے ٹریننگ کیتی۔ ایہدے مگروں فیر اوہ ایتھے اک واری آئی سانوں پتہ لگیا تے اسیں اوہنوں کہیا ایہہ کم چھڈ دے ایس کم وچ نہ پے۔تیرے نیانے نکے نیں اوہناں نوں سانبھ۔ اوہنے کہیا میری آفس وچ ڈیوٹی لگ جاوے گی میں محاذ تے نہیں جاواں گا پر اوہ وچو وچ محاذ وچ جاون لئی تیار سی تے جاون لئی بھرتی ہو گئی سی۔

سن دو ہزار اک وچ رمضان شریف توں مگروں میرے کول حرکت المجاہدین ولوں اک لیڈر آیا۔ اوہناں نے مبارک دتی پئی تہاڈا پتر بارڈر کراس کر گیا۔ میں اوہدے پچھے جاندا رہیا مینوں کوئی اطلاع نہیں ملی۔ فیر مینوں تریہہ مئی دو ہزار اک نوں اک اطلاع ملی پئی اوہ شہید ہو گیا ہے۔ ڈوڈا توں اوہ کتھے جارہے سی کسے مشن لئی دس باراں بندے سی تے اوتھے اوہناں نوں ڈوگرا ریجمنٹ نے گھیرا پا لیا۔ ایس گھیرے وچوں اوہناں نے دس اپنے سنگی باہر کڈھوا دتے جیہڑے بچ گئے۔ پر آپوں دوہواں سنگیاں سنے دس گھنٹے تیکر پوری ریجمنٹ دا مقابلہ کیتا تے پھیر شہید ہو گئے۔

' حرکت المجاہدین دے اوہدے کجھ سنگی میرے کول آئے تے اوہناں نے ایہہ کتھا مینوں سنائی۔ بھکر وچ اک محلہ ہے چمنی محلہ ایہدے وچ حرکت المجاہدین دا دفتر ہوندا سی عباس چوک دے نیڑے۔ اوہناں نے ایہہ وی دسیا پئی اوتھوں اک کشمیری عورت تے مرد سی اوہناں نے ڈوگرا ریجمنٹ نوں کہیا پئی ایہہ ساڈے اپنے نیانے نیں تے ساڈے حوالے کرو۔ ایس زبیدہ ناں دی عورت نوں کھسم سنے ڈوگرا ریجمنٹ والیاں نے شہید کر دتا۔ جدوں میرا پتر غائب ہویا تے میں راولپنڈی گیا مولانا فضل الرحمان خلیل نال ملیا، مولانا عمر فاروق نیں کشمیری اوہناں نوں وی ملیا اوہناں مینوں کہیا پئی تہاڈا رابطہ وائرلیس تے کروانے آں۔ کجھ چر توں مگروں اوہناں مینوں کہیا رابطہ نہیں ہورہیا ہے۔

' میں فیر اوتھے اک رات رہیا تے واپس آگیا۔ فیر مولانا فضل الرحمان خلیل ایتھے بھکر وچ مولانا سرفراز ہوراں دے مدرسے جامعہ فاروقیہ وچ آئے۔ میں اوہناں نوں وی ملیا تے کہیا پئی چلو میرا منڈا تے شہید ہو گیا گھٹو گھٹ اوہدی نشانی تے، اوہدا بیگ سی اوہ تے مینوں مل جاوے۔ اوہناں کہیا لبھ کے تہانوں دیواں گے حالی تیکر کجھ نہیں ملیا۔ اک واری اوہناں نے مینوں دس ہزار روپئے دتے تے ایہدے مگروں میرا اوہدے نال کوئی رابطہ نہیں ہویا۔ پتر دی شہادت دی خبر سن کے بڑی تکلیف ہوئی پر ایہہ جہاد والا معاملہ ہے تے مینوں خوشی وی ہوئی ہے۔ ایہدے وچ تے ایہہ ہے پئی چلو چنگا کیتا جو وی کیتا۔ ہوسکدا ہے ایہدے کارن رب مینوں معاف کرے '۔

بھکر توں ڈیرہ غازی خان اپڑے تے کجھ مقامی صحافیاں نے دسیا پئی اوہناں دے ضلع وچ کجھ سال پہلوں تیکر تے کشمیر تے افغانستان وچ مارے جاون والے جہادیاں دی نت غائبانہ نماز جنازہ ہوندی سی۔ پر اجکل صورتحال انج دی نہیں ہے ڈیرہ غازی خان دے غلام علی کھوسہ نے افغانستان وچ طالبان دے نال مارے جاون والے اپنے پتر تئی سالاں دے نیاز احمد دی کتھا سنائی۔

' میرے پتر نے قرآن شریف پڑھن توں مگروں ٹرکاں دے انجن دے اک ورکشاپ وچ کم شروع کیتا۔ سال دو سال اوتھے کم کردا رہیا تے اک دن شام نوں آیا تے آکھن لگا پئی ابا جی مینوں اجازت دیو میں جہاد تے جارہیاں۔ اوہنے اپنے استاد تے بھراواں توں پچھیا تے چلا گیا۔ باراں جولائی دو ہزار اک نوں اک وجے سانوں اطلاع ملی پئی تہاڈا پتر قندوز بارڈر تے شہید ہو گیا۔ چار دن مگروں اوہدی میت تابوت وچ مجاہداں نے ساڈے تیکر اپڑائی۔ رب ہی جاندا ہے پئی امریکہ نے میزائل ڈیگیا یاں کسے نے گولی ماری۔ اوہ جیش محمد دے نال گئے سی اوہناں دا ڈیرہ غازی خان وچ پہلوں دفتر سی تے فیر دفتر ہی مک گیا حکومت نے اوہناں تے روک لا دتی۔ شروع وچ کفن دفن لئی ستھ والیاں نے کجھ پیسے دتے مگروں کسے نے خبر نہیں لئی '۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels