Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> جیوتی باسو: کدے نہ وساریا جان والا کمیونسٹ آگو

جیوتی باسو: کدے نہ وساریا جان والا کمیونسٹ آگو

وچار ڈیسک
January 17th, 2010

ہندوستان دے مشہور کمیونسٹ آگو جیوتی باسو لمی بماری توں مگروں کلکتہ وچ چلانا کر گئے نیں۔ اوہناں دی عمر پچانوے سال سی۔ تئی سال لہندے بنگال دے وزیر اعلیٰ رہن والے جیوتی باسو نوں کوئی دو ہفتے پہلوں ہسپتال وچ داخل کیتا گیا سی تے ڈاکٹراں نے اوہناں نوں نمونیہ دسیا سی۔

اُنی سو چھیانوے دے پارلیمانی الیکشن توں پہلوں خورے ہی کسے نے جیوتی باسو بارے وچاریا ہووے گا پئی اوہ وزیر اعظم بن سکدے نیں۔ ایس لئی نہیں پئی اوہ کمیونسٹ پارٹی دے اک انج دے آگو سی جنہاں دا اثر ملک دیاں اُکا تناں ریاستاں تیکر سی سگوں ایس لئی پئی قومی سیاست وچ اوہناں دا کردار صرف پارٹی دی مرکزی کمیٹی تے پولٹ بیورو دیاں ملنیاں وچ رلت دی حد تیکر سی۔

جیویں جیویں ہندوستان دے سیاسی نظام وچ مسابقت ودھدی گئی تے کسے اک سیاسی جماعت دی اجارہ داری مکدی گئی کجھ علاقائی سیاسی جماعتاں دے بھاگ جاگ گئے۔

پر جیوتی باسو دا ستارہ نہیں چمکیا۔ جدوں کھبے پاسے دی اگوائی وچ علاقائی جماعتاں تے پچھونہیاں ذاتاں دیاں جماعتاں اکٹھیاں ہوئیاں تے جیوتی باسو نوں سانجھیاں وزارت عظمیٰ دا امیدوار چن لیا گیا۔ لہندے بنگال وچ واہوا چر تیکر کھبے پاسے دیاں جماعتاں دی مخلوط حکومت چلاؤن دا اوہناں دا تجربہ بہت اہمیت رکھدا سی تے کئی جماعتاں ایس گل تے اک سی پئی اوہ اپنے تجربے نال وفاق وچ درجناں جماعتاں دی مخلوط حکومت چلاؤن جوگے ثابت ہون گے۔

پر جیو تی باسو دی پارٹی مارکسی کمیونسٹ پارٹی دے وچار ایہدے الٹ سی۔ اوہنے مخلوط حکومت وچ رلن دی بجائے باہر رہ کے اوہدی حمیت کرن دا فیصلہ کیتا۔ انج باسو دے وزیر اعظم بنن دا ایہہ موقع ہمیش لئی چلا گیا۔ اوہناں نے مگروں اپنی پارٹی دے ایس فیصلے تے روس وکھالا کردیاں ہوئیاں تاریخی بھل آکھ دتا سی۔

جیوتی باسو اٹھ جنوری اُنی سو چوداں نوں مشرقی بنگال دے اک چنگے گھر وچ جمے۔ اوہناں دا بچپنا بڑا چنگا لنگھیا۔ اوہناں کولکتہ دے کیتھولک سکول تے سینٹ زیویر کالج وچ پڑھائی کیتی۔ اپنے پڑھن وچکار اوہناں اپنے سنگیاں دے نال کولکتہ دے اک انج دے کلب تے دھاوا بول دتا جیہڑا صرف انگریزاں لئی سی۔

اوہناں لندن توں وکالت پڑھی تے اُنی سو تریہہ دے دھاکے وچ وڈے برطانوی کمیونسٹ آگو رجنی پال دت نال جڑن توں مگروں کمیونسٹ پارٹی وچ رلت کیتی۔ اوہ ریلورے ورکرز فیڈریشن وچ اپنیاں کاروائیاں دے کارن پہلی واری نوٹس وچ آئے۔ اُنی سو ستونجا وچ اوہ لہندے بنگال اسمبلی وچ حزب اختلاف دے آگو چنے گئے۔ اُنی سو ستاٹھ وچ کھبے پاسے دے غلبے والی متحدہ محاذ دی حکومت وچ اوہ وزیر داخلہ لگے۔ پر مخلوط حکومت بہتا چر نہیں چل سکی تے نکسلی مارا ماری دی بھرویں لہر توں مگروں لہندے بنگال وچ صدر راج نافذ کر دتا گیا۔

پر جدوں اُنی سو ستتر وچ کمیونسٹ پہلوں توں چنگی حالت وچ اقتدار وچ آئی تے جیوتی باسو نوں سانجھیاں وزیر اعلیٰ چنیا گیا۔ ایہدے توں مگروں اوہ ہندوستان دے سب توں لمے چر تیکر حکومت کرن والے پہلوں چنے آگو بن گئے۔ اوہ تئی سال تیکر لہندے بنگال دے وزیر اعلیٰ رہے تے جدوں اوہناں دی صحت خراب ہون لگی تے اوہناں دی تھاں اجوکے وزیر اعلیٰ بدھ دیو بھٹا اچاریہ نے لئی۔ انج اوہ دنیا دے سب توں لمے چر تیکر حکومت کرن والے پہلے چنے ہوئے کمیونسٹ آگو سی۔

دنیا دے ہور ملکاں دے کمیونسٹ آگواں دے الٹ باسو 23 سال تیکر اقتدار وچ رہن توں مگروں اپنی مقبولیت دی سخر تے اپنی مرضی نال سیاست توں پاسے ہو گئے۔ باسو دی حکومت ریاست وچ کئی اہم کامیابیاں دا دعویٰ کر سکدی ہے۔

اُنی سو ستر دے دھاکے وچ نکسلی تحریک تے ایہدے تے قابو پاؤن لئی مارا ماری والا ٹاکرا ہویا سی جیہڑا ریاست وچ سیاسی عدم استحکام دا کارن بن گیا سی۔ باسو دی سب توں وڈی کامیابی ریاست وچ سیاسی استحکام دی شکل وچ ساہمنے آئی۔ اوہناں دی حکومت نے زمینی اصلاحواں دا کم شروع کیتا تے ایہنوں کامیابی دے نال لاگو کیتا۔

ایہدے تت وچ دس لکھ توں بہتے بے زمین کسان زمیناں دے مالک بن گئے۔ حکومت پنڈاں تھاواں وچ اُکا ویہہ سال وچ غربت وچ پنجھی فیصد کمی لیاؤن وچ کامیاب ہوئی۔ اوہنے پنڈ تے مقامی پدھر تے آپ پربندھی دے نظام تے توجہ دے کے عام لوکاں دے جمہوری حقاں دی حمیت کیتی۔ ایہو نہیں حکومت نے لہندے بنگال دی زرعی تے مچھلیاں دی پیداوار وچ بھرواں وادھا کیتا۔

پر جیوتی باسو نوں اپنے دور اقتدار وچ کئی ناکامیاں ویکھنا پئیاں۔ اوہناں دی حکومت سخت گیر ٹریڈ یونین تے کنٹرول کرن، صنعت نوں ودھاؤن تے باہرلی سرمایا کاری نوں لیاؤن وچ ناکام رہی۔ اوہ بنگال دے پڑھے لکھے تے تکنیکی ماہراں دیاں خوبیاں نوں دکھنی ریاست کرناٹک یاں آندھرا پردیش وانگوں انفارمیشن ٹیکنالوجی دی ترقی لئی ورتن توں ولا رہے۔

سرمایا کاری لئی باہرلے ملکاں دیاں کمپنیاں دے نال سیکڑیاں معاہدے ہوئے پر کرڑے ٹریڈ یونینز دے کارن اوہناں تے کدی وی عمل نہیں ہو سکیا۔ اوہ اپنی چھیکڑلی کابینہ دی میٹنگ تیکر کرڑیاں یونیناں دے خلاف لڑدے رہے تے اخیر بڑا اوکھیاں کولکتہ دے سرکاری ' گریٹ ایسٹرین ہوٹل ' فرانس دی اک کمپنی ' اکورا ایشیا' نوں دیون دی اوہناں دی صلاح منظور کر لئی۔

جیوتی باسو نوں سخت گیر شوشلسٹ دی تھاں فین ازم دا حمیتی منیا جاندا سی تے اوہ ایکے نال کم لئی جانے جاندے سی۔ اوہ دوجے دی رائے دا آدر کردے سی ایہو کارن ہے پئی اوہ مخلوط حکومت نوں بڑے سوہنے طریقے نال چلاؤندے رہے۔ اوہ اپنے فیصلیاں نوں منوا کے ہٹدے سی پر اوہناں دے کم کرن دا طریقہ آمرانہ نہیں سی۔ سبیہ ساچی رائے باسو موجب جیوتی باسو نے ' کمیونزم نوں اوس تھاں تے اپڑایا جتھے لوک اوہنوں عزت نال ویکھن لگے۔'

اخبار ٹیلگراف دے پولیٹکل ایڈیٹر اشیش چکرورتی دا کہنا ہے پئی جیوتی باسو کمیونسٹ توں بہتا معقولیت پسند نظر آؤندے سی پر اوہناں دی کامیابی نال ایہہ اشارہ ملدا ہے پئی سماجی جمہوریت یاں سوشل ڈیموکریسی دا بھلک چنگا ہے تے کمیونزم دا نہیں۔

جیوتی باسو سیاسی پدھر تے ہور کامیاب ہوندے جے سن اُنی سو چھیانوے وچ اوہناں نوں وزیر اعظم بنن دا موقع دے دتا جاندا۔ ایس ویلے مرکز وچ اوہناں نوں مخلوط حکومت دا وزیر اعظم بنن دی دعوت ملی پر اوہناں دی جماعت نے ایہہ آکھ کے ایہنوں رد کر دتا سی پر ایس حکومت وچ کمیونسٹ پارٹی فیصلیاں وچ اینا اثر نہیں پاسکدی۔ مسٹر باسو لئی صرف اوہی اک اکلا موقع سی جدوں اوہ وزیر اعظم بن سکدے سی پر انج نہیں ہویا جیہدے تے پارٹی نوں اج وی ہرکھ ہے تے ایس فیصلے نوں تاریخ دا سب توں ' بھیڑا باب ' کہیا جاندا ہے۔'

باسو نے پارٹی دے ایس فیصلے نوں تے من لیا سی پر ایس شرط تے پئی اوہ وزیر اعلیٰ دے طور تے ہی ریٹائر ہون گے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels