Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> میں آپ مارو دھاڑوی بنن تے راضی ہو گیا

میں آپ مارو دھاڑوی بنن تے راضی ہو گیا

وچار ڈیسک
November 15th, 2009

پاکستان دے قبائلی علاقے باجوڑ وچ اک چوداں سالاں دے نیانے نے اپنی ہڈ بیتی دسی اوہنے کہیا طالبان نے اوہنوں آپ مارو دھاڑوی بنن تے مجبور کرن دی کوشش کیتی۔ پر ہن ایہہ نیانہ فوج دی پکڑ وچ ہے۔ 

باجوڑ وچ پنج بندیاں نے مینوں جھکاواں دے کے پھڑیا۔ اوہناں آکھیا جے میں اوہناں نال نہ گیا تے اوہ میرے پیو نوں مار دین گے، جیہڑا اوہناں دی قید وچ ہے۔ میں اوہناں دے نال ٹر گیا۔ میرا پیو اوتھے نہیں سی۔ اوہناں میرے ہتھ پیر بنھ دتے۔ اوہناں کہیا تیرے کول دو راہواں نیں یاں تے آپ مارُو دھاڑوی بن جا یاں فیر اسیں تیرا سر لاہ دیواں گے۔ میں انکار کیتا۔

اوتھے میری عمر دے دو ہور نیانے وی سی ۔ اوہناں نوں وی آپ مارو دھاڑی بننا سکھایا جا رہیا سی۔ جے اسیں انکار کردے سی تے اوہ سانوں ماردے کٹڈے سی۔ اوہناں نے سانوں ذہنی طور تے وی تیار کرن دی کوشش کیتی۔ جنت وچ جان دا لوبھ دتا تے آکھیا تیرے کول جنت وچ سوہنا گھر ہووے گا۔

مینوں دسیا گیا کہ مینوں اک مسیت وچ دھماکا کرنا ہووے گا۔ ایہہ اک عام مسیت سی۔ پر اوتھوں دے امام طالبان دے خلاف گلاں کردے سی تے اوہناں نوں ویری سمجھدے سی۔ طالبان نے مینوں کہیا ایہہ امام غیر مسلم ہے۔ طالبان نے میری قمیض لاہ دتی تے میرے موڈھیاں تے اک جیکٹ پائی۔ اوہناں کہیا مسیتے جا کے اللہ اکبر دا نعرہ ماریں تے اپنی جیکٹ دے دو بکسوئے کھول دیویں اوہناں مینوں مسیت دے نیڑے چھڈ دتا۔      

میں نشے والیاں دوائیاں دے اثر وچ سی۔ مینوں کجھ پتہ نہیں لگ رہیا سی۔ مینوں اودوں سرت آئی جدوں میں مسیت دے وچ اپڑ گیا۔ میں ویکھیا اوتھے قرآن دے کئی نسخے رکھے سی تے امام دا چہرہ بڑا شفیق سی۔ میں لوکاں نوں عبادت کردے ویکھیا۔ میں سوچیا ایہہ تے سارے مسلمان نیں۔ میں اہناں نوں کیویں ماراں۔ میں بمب دھماکے دا ارادہ چھڈ دتا تے مسیتوں باہر نکل آیا۔

میں مسیت دے باہر اک رکھ ہیٹھاں بیٹھ گیا تے نماز مکن نوں اُڈیک دا رہیا پھیر میں طالبان دے کول واپس گیا اوہناں مینوں گالھ مندا کیتا تے پچھیا مڑ کیوں آیاں؟

میں کہیا مسیت وچ نہیں وڑھ سکیا سی کیوں جو اوتھے ہر اک دی تلاشی لئی جارہی سی۔ اوہناں میری بمبار جیکٹ لاہ لئی تے مینوں مولوی فقیر دے حوالے کر دتا۔

اوہنے میرے ہتھ پیر بنھ دتے میں اوہناں نوں اک ہور موقع دیون دی بینتی کیتی۔ اوہنے میرا اعتبار کیتا۔ پر میں ایس واری اپنے گھر آگیا۔ اوہناں نے گھر تیکر میرا پچھا کیتا اوہ جاننا چاہندے سی پئی میں گھر آیاں یاں کِتے نس گیا۔ اوہناں مینوں اینا ماریا کٹیا سی میرے لک تے بڑے پھٹ وجے سی۔ میری ماں ویکھ کے روون لگی تے کہیا واپس طالبان کول نہ جاویں۔ میرے پیو نے اوہناں نوں پچھیا پئی اوہ میرے پچھے کیوں پئے ہوئے نیں۔ اک دن تے میرے پیو نے اپنی بندوق کڈھ لئی تے اوہناں دا پچھا کیتا پر اوہ کجھ نہ کرسکیا تے واپس آگیا۔

طالبان دے قبضے توں پہلوں اسیں آزاد سی۔ اسیں سکول جاندے سی تے دل بھر کے کھیڈ دے سی۔ ساڈے تے کوئی روک نہیں سی۔ پر طالبان دے آون توں مگروں سارا کجھ بدل گیا سانوں قیدیاں وانگوں لگدا ہے۔ میں پاکستانی فوج وچ رلنا چاہناں۔ اوہ ایس زمین دے راکھے نیں۔ میں طالبان دے خلاف لڑنا چاہناں۔ طالبان دا خاتمہ کر دینا چاہی دا۔ میں اوہناں نوں دسناں چاہناں پئی اوہ ظالم نیں تے جو کجھ میرے نال کیتا گیا اوہ نیاں نہیں سی۔ مینوں اوہناں دا کوئی ڈر نہیں۔ میں بس اپنے رب توں ڈرناں۔میں صرف اوہدے ساہمنے ہی جواب دہ آں۔

بی بی سی دے شکرئیے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels