Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> سچے جھوٹے سروے

سچے جھوٹے سروے

علی سلمان
November 6th, 2009

مارچ دا مہینہ آون والا ہووے تے کوئیک مارچ دا خطرہ ہوندا ہے ، جون جولائی وچ اسلام آباد دا موسم گرم ہو جاندا ہے ستمبر ستمگر اکھواندا ہے تے اہناں دناں وچ کہیا جارہیا ہے پئی نومبر تے دسمبر دیاں راتاں ٹھنڈیاں تے لمیاں ہوون گئیاں۔ موسمی سختیاں دیاں اہناں سیاسی پیشگوئیاں توں وکھ پاکستان دے ہر جمہوری دور وچ بوٹاں دی آواز سنن لگ پیندی ہے فرشتیاں دے پر کھڑکن لگ پیندے نیں جادو دی سوٹی گھمن والی ہوندی ہے۔

ایہہ ساریاں اصطلاحواں اج کل ورتیاں جارہیاں نیں۔

مقبولیت تے نامقبولیت دے سچے جھوٹے سروے وی آون لگے نیں۔ انج ہی اک سروے موجب ریٹائرڈ جنرل تے عسکری طاقت دے سر تے پاکستان دے چیف ایگزیکٹو بنن والے پرویز مشرف پاکستان وچ بہت غیر مقبول نیں تے پاکستان دی سب توں وڈی سیاسی جماعت اکھوان والی پیپلز پارٹی دے شریک چیئر مین آصف علی زرداری اوہناں توں ودھ کے غیر مقبول نیں۔

کرپشن دیاں کچیاں پکیاں کہانیاں مقامی میڈیا دے گلشن دا کاروبار چلا رہیاں نیں۔ آپ مارو بمب دھماکے مہنگائی طاقت دی کمی تے آٹے ، کھنڈ ، چاول دے پھردول کوڑیاں وانگوں اجوکی حکومت نوں ورہ رہے نیں پر بعضے اخباری کالماں تے سیاسی تبصریاں وچ بالواسطہ نشانہ اجوکا جمہوری نظام دسیا جاندا ہے۔

سیاسی ماہر آکھ رہے نیں پئی قومی مفاہمتی آرڈیننس تے حکومتی ہار تے ایہدے توں پہلوں ججاں دی بحالی تے حکومتی ہار، کیری لوگر بل دے ناں تے امریکی امداد دی تاریخی مخالفت، ایم کیو ایم تے جے یو آئی دا کئی ایشوز تے ساتھ چھڈ جانا ایس گل دے اشارے نیں پئی ایوان صدر اجاڑ منگداہے۔

سیاسی جوڑ توڑ دے چاہوند مبصر ایہدے تے ہی بس نہیں کردے سگوں آصف زرداری دے ٹرن نوں ایہدے توں وی وڈے قومی پھردولاں ولوں پہلاں وڈا قدم کہندے نیں۔پیپلز پارٹی دے گورنر پنجاب سلمان تاثیر نے وی کہہ دتا پئی ہن مائنس ون نہیں سگوں مائنس تن سو بتالی ہووے گا۔'

پاکستان وچ قومی اسمبلی دیاں سیٹاں دی گل گنتری تن سو بتالی ہے۔

گورنر پنجاب اصل وچ آصف زرداری دی حمیت وچ ایہہ آکھن دے جتن کر رہے نیں پئی اکلے صدر زرداری ہی نہیں جاون گے سگوں ساری پارلیمنٹ جاوے گی۔ افواہواں دے ایس سمے وچ آپوں صدر آصف علی زرداری نال اک جملہ جوڑ دتا گیا ہے پئی '' ایوان صدر توں میری لوتھ ہی جاوے گی ''۔ ہوسکدا ہے پئی آصف علی زرداری نے اپنی کسے ذاتی محفل وچ ایہہ جملہ نہ آکھیا ہووے پر اوہناں دے سبھا نوں ویکھدیاں ہوئیاں ایہہ جملہ قبولیت دی سند لئے سیاسی تے صحافتی حلقیاں وچ گھم رہیا ہے۔

حالات خراب ہوون دے کارن کدی چیف آف آرمی سٹاف دی نوکری دی مدت ودھاونا دسیا جاندا ہے تے کدی شیخ رشید سنے بعضے سیاست دان تے ماہر کہندے نیں پئی سانگے ٹٹنا کیری لوگربل وچ ہوون والیاں شرطاں توں شروع ہوئے۔امریکی امدادی پیکیج تے بنے کیری لوگر بل وچ فوج دی سیاسی معاملیاں وچ عدم مداخلت دی شرط وی رلتی ہے۔

دور دی خبر لیاون والیاں آکھیا ہے پئی ایہہ شرط پیپلز پارٹی دی حکومت نے بل وچ شامل کروائی ہووے گی۔ سب توں وڈی حزب اختلاف دی جماعت مسلم لیگ نون دے آگو ایہہ تے کہندے نیں پئی اوہ کسے وی غیر جمہوری کاروائی دی مخالفت کرن گے پر نال نال ایہہ وی کہندے نیں حکومت سرت کرے نہیں تاں کھجل ہووے گی۔

کیہ ایس گل دا مطلب کڈھیا جاوے پئی پھیر اپوزیشن غیر جمہوری ورتاریاں دی حمیت کر دیوے گی ؟

ایس گل توں پاسے پئی اجوکے سیاسی نظام نوں خطرہ ہو گیا ہے یاں ایہہ سارا کجھ چاء دی پیالی وچ طوفان ہے آصف زرداری حالات نوں سانبھن لئی آپوں سدھے ساہویں میدان وچ آئے نیں۔ قومی مفاہمتی آرڈیننس تے ہار توں مگروں اپنے اتحادی مولانا فضل الرحمان نال اُچیچی ملنی تے ایم کیو ایم دے وفد لئی ایوان صدر وچ ڈنر اہناں کوششاں دی اک کڑی ہے۔

صدارتی کیمپ دے لوک بھج نس تے کردے نظر آرہے نیں پر اوہناں وچ ظاہری طور تے بے دلی نہیں پائی جاندی۔ اوہناں دے سکون دے کئی کارن ہوسکدے نیں جنہاں وچ اجوکے جمہوری سیٹ اپ لئی امریکی حمیت تے پاکستانی فوج دا قبائلی علاقے وچ حالت جنگ وچ ہوونا رلتی ہے۔ فوج قبائلی علاقے وچ اک انج دی جنگ وچ رُجھی ہے جیہدے وچ اوہدا اپنا آپ داء تے لگیا ہے ایہہ اک انج دی جنگ ہے جیہدے وچ جت دے اعلان توں ودھ ایس فتح نوں برقرار رکھنا اہم ہے۔

ایس صورتحال وچ فوج دا سیاسیی نظام نوں الٹ پلٹ کرن دا کم اوکھا لگ رہیا ہے پر تاریخ گواہ ہے پئی امریکی پالیسی تے پاکستانی فوج نوں اپنے تیور بدلن وچ چر نہیں لگدا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels