Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> سیکورٹی ایجنسیاں، ذمے واریاں کیہ ؟

سیکورٹی ایجنسیاں، ذمے واریاں کیہ ؟

وچار ڈیسک
October 11th, 2009
4 / 5 (1 Votes)


مالا کنڈ تے قبائلی علاقیاں وچ آپریشن توں مگروں سرکاری دعوے پئی کھاڑکواں دا لک توڑ دتا گیا ہے۔ کھاڑکو اک واری پھیرتکھے ہو گئے نیں تے پچھلے پنجاں دناں وچ کھاڑکواں نے وفاقی دارالحکومت اسلام آباد تے راولپنڈی تے پشاور وچ تن دھارے کیتے نیں۔ اہناں دھاڑیاں وچ سٹھ توں ودھ بندے مارے تے اک سو توں ودھ پھٹڑ ہوئے نیں۔

سنیچر نوں راولپنڈی وچ پاکستانی فوج دے جنرل ہیڈ کوارٹر دے نیڑے ہوون والے دھاڑے وچ اک واری پھیر کھاڑکواں نے سیکورٹی فورسز دیاں اکھاں وچ مٹی پاون دی کوشش کیتی تے اوہناں نے کمانڈو یونیفارم پایا جیہدے وچ اوہ بڑی حد تیکر کامیاب ہوئے پر اُس دی عمارت تیکر اپڑن وچ کامیاب نہیں ہوئے۔

ایہدے توں پہلوں پنج اکتوبر نوں اسلام آباد دے علاقے سیکٹر ایف ایٹ وچ اقوام متحدہ دے خوراک دے ادارے دے دفتر وچ ہوون والے آپ مارو دھاڑے وچ وی آپ مارو دھاڑوی نے فرنٹیر کانسٹیبلری دی وردی پائی ہوئی سی۔ ایس عمارت دے باہر فرنٹیئر کانسٹیبلری دے چار اہلکار ہر ویلے ڈیوٹی تے لگے ہوندے نیں۔

پاکستان دے کئی شہراں وچ انج دیاں بے شمار ہٹیاں نیں جتھے پلس توں وکھ فوج، رینجرز فرنٹیئر کانسٹیبلری دیاں وردیاں وِک دیاں نیں۔ ایہدے توں اڈ اوتھے کئی رینک دے بیجز، بیلٹ تے ٹوپیاں وی ہوندیاں نیں۔ پلس موجب اہناں بندیاں نوں کوئی لائسنس جاری نہیں کیتا جاندا تے نہ ہی ایہہ ہٹیاں والے وردی خریدن والے توں اوہدی پچھان بارے یاں محکمے دے کارڈ بارے کجھ پچھن دی تکلیف کردے نیں۔

پلس دے محکمے وچ کانسٹیبل توں لے کے سب انسپکٹر دے افسر نوں ہر سال محکمے ولوں دو یونیفارم ملدے نیں پر کپڑے گھٹیا ہوون دے کارن کئی پلس والے اپنے طور تے وردی خریدنا پسند کردے نیں۔ لہور وچ مناواں پلس ٹریننگ سنٹر تے ہوون والے دھاڑے وچ وی دھاڑویاں نے پلس دیاں وردیاں خریدیاں ہوئیاں سی جیہدے مگروں انج دیاں ہٹیاں دے خلاف کاروائی دا فیصلہ کیتا گیا سی جیہدے تے حالی تیکر عمل نہیں ہویا۔

پلس دے جیہڑے افسراں دیاں ترقیاں ہوندیاں نیں اوہ بجائے ایہدے پئی ادارہ اپنے ولوں پلس افسراں نوں اگلے رینک دے بیج لاوے ایہہ افسر آپوں بازاروں بیج خرید کے لیاوندے نیں۔

انٹیلی جنس بیورو دے گذریل پردھان مسعود شریف دا کہنا ہے پئی انٹیلی جنس نیٹ ورک نوں ہور فیدے مند بناون توں وکھ قنون نافذ کرن والے اداریاں دی صلاحیت ودھاون دی وی لوڑ ہے۔ اوہناں کہیا انج دے دھاڑیاں وچ کالعدم ستھاں دے اہلکاراں توں وکھ پاکستان دے دشمن ملکاں دیاں ایجنسیاں وی رلتی ہو سکدیاں نیں۔

وزیر داخلہ رحمن ملک دا کہنا ہے پئی انٹیلی جنس ایجنسیاں نے سرکار نوں ایہہ اطلاعواں دتیاں سی پئی آپ مارو دھاڑوی سیکورٹی فورسز تے قنون نافذ کرن والے اداریاں دی وردی پاون توں اڈ گڈیاں تے سرکاری نمبر پلیٹاں لا کے وی کاروائی کر سکدے نیں۔ ایہدے توں وکھ ایمبولینساں نوں وی ات واد دیاں واپریاں وچ ورتیا جاسکدا ہے۔

وزارت داخلہ نے اسلام آباد سنے چواں صوبیاں دی پلس دے وڈے افسراں نوں ہدایتاں جاری کیتیاں سی پئی اینٹی کار لفٹنگ سیل وچ اک اُچیچا سیل بنایا جاوے جیہڑا فوجی افسراں دیاں چوریاں ہوئیاں گڈیاں، جنہاں تے فوجی ادارے وچ داخلے دے سٹیکرز لگے ہوون توں وکھ چوری کیتیاں سرکاری گڈیاں تے ایمبولینساں دی برآمدگی لئی کم کرے پر ایس حوالے نال کوئی بہتی کامیابی نہیں ہوئی۔.

پلس وسیلیاں موجب اسلام آباد تے راولپنڈی توں 20 توں ودھ انج دیاں گڈیاں چوری ہو چکیاں نیں جیہڑیاں فوجی افسراں دی ورتوں وچ سی تے اوہناں تے داخلے دے سٹیکرز وی لگے ہوئے سی۔

مبصراں دا خیال ہے پئی کھاڑکواں دے ارادیاں بارے حکومت نوں اکلا اطلاعواں دیون نال انٹیلی جنس ایجنسیاں دا کردار مک نہیں جاند سگوں اوہدے توں اڈ اوہناں دی کاروائی تے نظر رکھنا وی اہناں اداریاں دا کم ہے تے ایس حوالے نال اوہناں دا قنون نافذ کرن والے اداریاں دے نال رابطے وچ رہنا بہت ضروری ہے۔

سنیچر نوں راولپنڈی وچ جی ایچ کیو دے نیڑے ہوون والے دھاڑے دے مگروں پلس نے اسلام آباد تے راولپنڈی وچ سرچ آپریشن کرن توں وکھ اہناں علاقیاں وچ افغانی وستیاں وچ وسنیک بندیاں دی پن چھان شروع کر دتی ہے۔

بی بی سی دے شکریئے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels