Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> اڈوانی تے جناح دا پرچھاواں

اڈوانی تے جناح دا پرچھاواں

وچار ڈیسک
August 30th, 2009

بھارتیہ جنتا پارٹی دی بیڑی بھنور وچ ہے تے پاکستان دے موڈھی محمد علی جناح دی کتاب توں پھٹن والی بغاوت توں مگروں جیویں لال کرشن اڈوانی نوں نشانہ بنایا گیا ہے لگدا ہے بی جے پی دے '' مرد آہن '' دا سیاسی سفر ہن مک رہیا ہے۔ ایہہ اک حیرانی والا سفر سی جیہڑا ہندوستان دی ونڈ توں پہلوں جناح دے جمن بھوئیں کراچی توں شروع ہویا جتھے اڈوانی ہندو قوم پرست ستھ آر ایس ایس دے '' پرچارک '' سی۔ سوادی گل ایہہ ہے پئی ایس سفر وچ جدوں جدوں اہم موڑ آئے تے جناح دا پرچھاواں وی نظر آیا۔

اپنی لمی سیاسی حیاتی دے دو ہوائی سفر خورے اڈوانی نوں ہمیش یاد رہن گے۔ اوہناں وچوں اک نوں وی اوہ بھل نہیں سکدے تے دوجے نوں خورے چاہ کے وی ہن بھلا نہیں سکدے۔ پہلا سفر اوہناں نے ہندوستان دی ونڈ دے مگروں ستمبر انی سو سنتالی وچ کیتا۔کراچی دے اک چنگے علاقے وچ بمب دھماکہ ہویا سی۔ پلس نے آر ایس ایس وچ اڈوانی دے اٹھاراں سنگیاں نوں جدوں ایس شبے وچ پھڑیا تے ایس خطرے نوں ویکھدیاں ہوئیاں اوہ وی پھڑے جاسکدے نیں، اڈوانی ہوائی جہاز وچ بیٹھے تے اپنا وطن ہمیش لئی چھڈ کے دلی آگئے۔ ایہہ اوہ زمانہ سی جدوں سرحد دے دوہواں پاسیوں لوکاں دی ہجرت تے قتل دا سلسلہ پورے زوراں تے سی۔

ایس دور دی اک ہور سوادی کہانی اج تیکر گھمدی ہے پر ایہدی کدی تصدیق نہیں ہوسکی۔ مشہور لکھاری ڈامینیک لیپئر نے اپنی کتاب فریڈم ایٹ مڈ نائٹ وچ وی ایہدا دسیا سی۔ ونڈ توں مگروں جناح دے استقبال لئی کراچی وچ اک وڈا جلوس کڈھن دا پروگرام سی جیہدے وچ پاکستان دے موڈھی اک کھلی گڈی وچ سفر کرن والے سی۔

پر انٹیلی جنس دیاں اطلاعواں ایہہ سی پئی دو قومی نظریہ دے مخالف کجھ لوک ایسے جلوس وچکار اوہناں نوں قتل کرن دی سازش کر رہے سی۔ ایہہ منصوبہ تے کامیاب نہیں ہویا پر کہیا جاندا ہے پئی ایس سازش دے سلسلے وچ کراچی دے اک تھانے وچ (دس ستمبر انی سو سنتالی نوں؟) اک مقدمہ درج ہویا سی جیہدے وچ اڈوانی نوں وی نامزد کیتا گیا سی۔

اڈوانی نے اپنی کتاب ' مائی کنٹری مائی لائف ' وچ لکھیا ہے پئی اوہ بمب دھماکے دے مگروں گرفتاری توں بچن لئی باراں ستمبر انی سو سنتالی نوں چھ گھنٹے دا ہوائی سفر کر کے ہندوستان آئے سی۔

ہندوستان وچ بھاویں واہوا واری ایہہ سوال چکیا گیا، تے پاکستان میڈیا وچ وی ایس بارے دعوے کیتے گئے پر ایہہ کدی ثابت نہیں ہوسکیا پئی جناح نوں قتل کرن دی سازش وچ اوہناں نوں نامزد کیتا گیا سی یاں نہیں۔ ہندوستان آون توں مگروں اڈوانی دا سفر اوہناں نوں راجستھان لے گیا جتھے اوہ آر ایس ایس دے پرچارک دے طور تے کم کردے رہے۔ ایسے وچکار انی سو اکونجاہ وچ ہندو مہاسبھا دے لیڈر شیاما پرساد موکرجی نے آر ایس ایس دے پردھاناں نال صلاح مشورے توں مگروں اک سیاسی جماعت ' بھارتیہ جن سنگھ ' بنائی تے اڈوانی نوں راجستھان وچ اوہدیاں جڑاں مضبوط کرن دی ذمے واری سونپی گئی۔

جن سنگھ نے ہی مگروں بھارتیہ جنتا پارٹی دی شکل پھڑی ۔ گذریل وزیر اعظم اٹل بہاری واجپئی تے اڈوانی دا سیاسی سفر اصل وچ بی جے پی دا ہی سفر سی پر سن دو ہزار پنج وچ جدوں اڈوانی نے کراچی وچ جناح دے مزار تے حاضری دیندیاں ہوئیاں پاکستان دے موڈھی نوں سیکولر تے پاکستان بنن نوں اک حقیقت کہہ کے منیا تے آر ایس ایس توں اوہناں دے تقریبا سٹھ سالاں دے ساک وچ دراڑ پے گئی۔

اڈوانی نوں بی جے پی دی صدارت توں استعفیٰ دینا پیا۔

جدوں وی اڈوانی دی سیاسی حیاتی تے نظر ماری جاوے تے اوہناں دی سومناتھ توں اجودھیا دی رتھ یاترا، بابری مسیت تے گودھرا دا ذکر ضرور آوے گا۔بابری مسیت دے ڈھین دے سلسلے وچ ہن وی اوہناں دے خلاف مقدمیاں دی سنوائی جاری ہے جدوں کہ گجرات جھیڑیاں وچکار اوہ وفاقی وزیر داخلہ سی تے کئی مبصر ایہہ من دے نیں پئی ہزاراں لوکاں دیاں جاناں بچاون لئی اوہناں نوں جو کرنا چاہی دا سی اوہ اوہناں نے نہیں کیتا۔

اڈوانی نے اپنی پربندھی صلاحیتاں توں بی جے دی اقتدار تیکر اپڑاون وچ اہم کردار ادا کیتا پر نہ کدی بی جے پی صرف اپنے دم تے اقتدار وچ آسکی تے نہ کدی اڈوانی اک انج دی ہستی دے طور تے ابھر سکے جیہڑے اعتدال پسند اتحادی جماعتاں نوں لیڈر دی پکھ توں قبول ہووے ایسے لئی اوہ وزیر اعظم بنن دا سفنا پورا نہیں کرسکے۔

مارچ دیاں پارلیمانی چوناں توں مگروں اڈوانی نے سیاست توں وکھیویں دا اعلان کیتا سی پر پارٹی وچ اقتدار دی جنگ چھڑ جاون توں مگروں اوہناں نوں روک لیا گیا۔

پر ہن جناح تے گذریل وزیر خارجہ تے بی جے پی دے سینئر آگو جسونت سنگھ دی کتاب ساہمنے آئی ہے اڈوانی دیاں اوکڑا دنو دن ودھدیاں جارہیاں نیں۔ تے اوہناں دیاں اوکڑاں دی وجہ اوہ دوجا ہوائی سفر ہے جیہدے وچ آپوں موجود وی نہیں سی۔

بی جے پی وچ بغاوت دا جھنڈا اُچا ہے تن وڈے آگواں نے اڈوانی دے ایس دعوے نوں غلط کہیا ہے اوہناں نوں اک ہندوستانی طیارے دے اغواء توں مگروں جسونت سنگھ دے قندھار جاون دا پتہ نہیں سی۔ ( ہندوستان نے مولانا مسعود اظہر سنے تن ات وادیاں نوں چھڈیا سی تے جسونت سنگھ ایسے طیارے وچ قندہار گئے سی)

ہن اک پاسے اڈوانی نیں تے دوجے پاسے کمیٹی دے تن رکن۔ (برجیش مشرا، یشونت سنہا تے جسونت سنگھ)۔ تے دوہواں وچوں بس اک سچ بول رہیا ہے۔ سچ دا ساہمنا کرن دا ویلا آگیا ہے۔ اڈوانی دے ساہمنے دو راہواں نیں : اوہ اپنے پینترے تے قائم رہندیاں ہوئیاں پارٹی وچ قیادت دی بدلی تیکر اپنے عہدے تے لگے رہ سکدے نیں یاں پھیر چپیتیاں استعفیٰ دے کے سیاست نوں وکھ ہوسکدے نیں۔

اوہ جیہڑی وی راہ چنن گے ہن ایہہ گل منی جارہی ہے پئی اوہناں دا سیاسی سفر اپنے اخیر نوں اپڑ رہیا ہے تے جناح دا سایہ اک واری پھیر نظر آرہیا ہے۔

پہلوں جناح دی تعریف اوہناں نوں راس نہیں آئی تے ہن جناح تے جسونت سنگھ دی کتاب !


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels