Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> '' بینظیر دیاں پالیسیاں تے سیکورٹی اداریاں نوں ڈر سی ''

'' بینظیر دیاں پالیسیاں تے سیکورٹی اداریاں نوں ڈر سی ''

ہارون رشید
July 24th, 2009
بریگیڈئر (ر) امتیاز احمد پاکستان دی تاریخ دے پندراں اہم سالاں تیکر گجے اداریاں آئی بی تے آئی ایس آئی وچ اہم عہدیاں تے ڈیوٹی کردے رہے نیں۔ اوہ انی سو نوے وچ ریٹائر ہوئے سی پر اوہناں نوں ویلے کویلے سیاست وچ مداخلت یاں بے ایمانی دے الزاماں ہیٹھ بینظیر بھٹو تے صدر مشرف دے دوراں وچ اٹھ سال تیکر قید وی جھلنا پئی۔ اوہناں تے بینظیر بھٹو دی پہلی حکومت دے مکا لئی '' آپریشن مڈنائٹ جیکل ' وچ رلتی ہوون دا وی الزام ہے۔

اپنی ریٹائرمنٹ توں مگروں انی سال دی لمی چپ توڑدیاں ہوئیاں اوہناں نے بی بی سی اردو سروس نوں اک اُچیچا انٹرویو دتا۔

اُنی سو نواسی وچ پیپلز پارٹی دی پہلی حکومت دے مکن دی اک سازش دے کلیدی کردار سمجھے جاون والے بریگیڈئیر (ر) امتیاز احمد کہندے نیں پئی اوہ '' مڈ نائٹ جیکل '' نہیں سگوں '' ڈے لائٹ ٹائیگر '' نیں۔

بی بی سی اردو سروس دے نال اپنے اُچیچے انٹرویو وچ پاکستان دیاں گجیاں ایجنسیاں وچ پندراں اہم سالاں وچکار ڈیوٹی دیون والے بریگیڈئیر امتیاز نے کہیا سی پئی سیاسی حکومت دے خلاف سازش پاکستانی گجے اداریاں دی نہیں سگوں ہندوستانی خفیہ ایجنسی را تے دو پاکستانیاں نے تیار کیتی سی۔

ایس سازش دے کلیدی کردار ملٹری انجینئرنگ سروس دے اک گذریل افسر تے وزیر اعظم سیکرٹریٹ وچ ایڈیشنل سیکرٹری اک گذریل فوجی سی۔ اوہناں دا مقصد پاکستانی سیکورٹی اداریاں نوں بدنام کرنا سی '۔

حکمران جماعت دے نمائندیاں دی حمیت خریدن دی ایس سازش نوں اک واپری کہندیاں ہوئیاں اوہناں کہیا اوہناں دا صرف اینا قصور سی پئی اوہناں نے اپنی فوج دی قیادت تے انھا اتبار کیتا۔ ' میں جے قصور وار سی تے میرے تے چار سال پہلوں بغاوت دا مقدمہ کیوں درج کیتا گیا ؟ میرے خلاف کورٹ مارشل کیوں نہیں ہویا؟''

اوہناں دے رلتی ہوون بارے ساہمنے آون والی آڈیو ٹیپ بارے اوہناں کہیا پئی اوہ جعلی سی اوہ کسے دی آواز سی۔ ایہدا ٹرانسکرپٹ تیار کرن والے وی سازش وچ رلتی سی۔'

اوہناں کہیا سی پئی جدوں ایہہ سازش ساہمنے آئی تے اودوں جنرل مرزا اسلم بیگ تے جنرل حمید گل نوں کھل کے ساہمنے آونا چاہی دا سی ' اوہناں نوں فوج دا دفاع کرن دے نال نال اپنے جونیئرز دے نال وفاداری دا وی ثبوت دینا چاہی دا سی۔ پر اوہناں نے سیاسی مصلحت یاں دبا وچ آکے انج نہیں کیتا جیہدی قیمت میں تے میرے نیانیاں نے ادا کیتی۔

بریگیڈئیر امتیاز دا کہنا سی پئی ملٹری انجینئرنگ سروس دے گذریل افسر مگروں واپس ملک آئے۔ اوہناں نوں سرسری سزا دتی گئی تے اک ہفتے پچھوں چھڈ دتا گیا۔' ایہہ سیاسی تے فوجی قیادت دی رضا نال ہویا۔ ایس بندے نوں ایف آئی اے وچ لایا جاندا ہے تے میرا کیس اوہنوں دتا جاندا ہے۔ پر ہن ایہہ دوہویں بندے گمنام زندگی گزار رہے نیں۔'

گذریل سپائے ماسٹر دا کہنا سی پئی کسے نوں محب وطن یاں غدار خفیہ ایجنسیاں نہیں کہندیاں۔ '' میرے ویلے وچ انج دے غلط فیصلے ہوئے ملک دے فیدیاں دے خلاف ہوئے۔ ایہہ فیصلہ طاقت دی تکون نے سیاسی مصلحتاں تے اپنے اقتدار نوں دوام دیون لئے کیتے۔ میں تے پر ہمیش ملکی مفاد نوں سب توں ودھ کے جانیا۔

اوہناں منیا پئی بینظیر بھٹو دی افغانستان پالیسی، جوہری پروگراماور فوج نوں اپنی گرفت وچ رکھن دی چاہ تے سیکورٹی اداریاں نوں خطرے سی۔' ایس بارے ساڈے کول انٹیلی جنس وی موجود سی۔ اوہناں دے وچلے تے باہرلے ملک بیاناں وچ پاڑ سی۔'

اوہناں نے ایس خیال نوں غلط کہیا پئی اوہ پیپلز پارٹی مخالف سی۔ اوہناں کہیا سی پئی جدوں اوہ سندھ وچ لگے ہوئے سی تے ایہو اوہ ویلا سی جدوں پیپلز پارٹی دے کجھ لوکاں نے بغاوت شروع کیتی۔ ایہدے وچ را ،خاد تے ہور ملکاں دیاں ایجنسیاں شامل ہو گئیاں۔ میری ڈیوٹی سی پئی ایس ات واد نوں روکاں۔ ایس لئی خورے ایہہ خیال قائم ہویا۔'

اوہناں نے منیا پئی عام لوکاں تے انٹیلی جنس ایجنسیاں دی رائے وچ فرق ہوندا ہے۔ ' خفیہ اداریاں دے کول جیہڑی معلومات ہوندیاں نیں اوہ اوہناں دے مڈھ تے رائے قائم کردے نیں پر لوکائی دے کول انج دی کوئی جانکاری نہیں ہوندی۔

اوہناں دا دعویٰ سی پئی گذریل صدر مشرف نے اوہناں نوں بینظیر بھٹو تے نواز شریف دے خلاف وعدہ معاف گوہ بنن توں انکار تے اٹھ مہینے اڈیالہ جیل وچ اکلاپے دی قید وچ رکھیا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels