Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> زین الدین قاری توں کمانڈر بنن تیکر

زین الدین قاری توں کمانڈر بنن تیکر

وچار ڈیسک
June 24th, 2009

قاری زین الدین محسود دکھنی وزیرستان دے سب ڈویژن سروکئی دے علاقے شہو ڈیبا دے رہن والے سی۔ اوہناں دا سانگا شمن خیل قبیلے نال سی اوہناں نے مڈھلی تعلیم جامعہ سپین مسیت توں لئی جیہدے مگروں اوہ دارالعلوم فیضو لکی مروت گئے۔ ایہدے مگروں اوہناں نے قاری کورنگی کراچی وچ مولانا تقی عثمانی دے مدرسے توں پڑھیا۔

ایہدے مگروں طالبان دی حکومت دے دور وچ افغانستان وچ رہے پر جدوں اوہناںنوں جوڑاں دی بماری لگی تے اوہ پاکستان آگئے تے ایتھے آپنا علاج کرایا۔

ایہدے مگروں اوہ طالبلان کمانڈر عبداللہ محسود دے نال رہے جیہڑے مگروں سیکورٹی فورسز دے نال اک جھڑپ وچ بلوچستان وچ مارے گئے۔

عبداللہ محسود نے چینی انجینئراں نوں اغوا کیتا سی جیہدے مگروں سکیورٹی فورسز نے کاروائی کیتی جیہدے تت وچ اک انجینئر نوں جیوندیاں چھڈوا لیا گیا سی۔

عبداللہ محسود دے بیت اللہ محسود نال جھیڑے اوہناں دے مرن توں پہلوں ہی ہو گئے ایس لئی جدوں عبداللہ محسود مارے گئے تے اوہناں دے چاچے دے پتر مسعود الرحمن نے جتھے دی پردھانی سانبھ لئی۔

پر مگروں مسعود الرحمن نوں وی اک بمب دھماکے وچ مار دتا گیا جیہدے مگروں قاری زین الدین نے عبداللہ محسود دے جتھے دی اگوائی کیتی۔ بیت اللہ محسود نال جھیڑیاں پاروں اوہناں نے وزیر دے علاقے شکئی وچ ملا نذیر دے کمانڈر خانان کول پناہ لئی اوہناں دے نال دو سو جنگ باز وی سی جیہڑے ویلے کویلے بیت اللہ محسود دے لوکاں تے دھاڑے ماردے سی۔

بیت اللہ محسود تے ملا نذیر وچکار ایس گل تے پاڑ سی پئی اوہناں اہناں ازبکاں نوں پناہ دتی سی جیہڑے ملا نذیر دے خلاف سی ایسے دے جواب وچ ملا نذیر نے قاری زین الدین نوں پناہ دتی۔

پرمگروں جدوں شوریٰ اتحاد مجاہدین بنی جیہدے وچ بیت اللہ محسود دے نال ملا نذیر تے حافظ گل بہادر وی رلتی سی۔ ایسے وچ ایہہ وی طے ہویا پئی ملا نذیر قاری زین الدین تے اوہناں دے سنگیاں نوں پناہ نہیں دیون گے۔ جیہدے تت وچ اوہ دکھنی وزیرستان دے گیٹ وے جنڈولہ وچ بیٹنی قبیلے کول آگئے تے خیسورہ ناں دے علاقے وچ رہے۔

ایہدے مگروں بیت اللہ محسود دے اک ہور مخالف ترکستان بیٹنی نے اوہناںنوں کڑی وام دے علاقے وچ پناہ دتی۔ایتھے رہندیاں اوہناں نے ٹانک بنوں تے نیڑے دے دوجے علاقیاں وچ بیت اللہ محسود دے کوئی تریہہ سنگیاں نوں ٹارگٹ کلنگ وچ ماریا۔

اہناں مرن والیاں وچ بیت اللہ محسود دا بھرا وی رلتی سی تے ایہو سمجھیا جاندا سی پئی اوہنوں قاری زین الدین نے ہی ماریا ہے۔

قاری زین الدین دا سارا خاندان بیت اللہ محسود دے ڈر توں ایبٹ آباد ٹر گیا سی جدوں کہ اوہناں دا اک چاچا بیت اللہ محسود دے گروپ وچ بڑے کامے لوکاں وچ رلتی سی۔ قاری زین الدین دا کہنا سی پئی بیت اللہ محسود نے اوہناں دے ستر سنگیاں نوں ماریا ہے۔

قاری زین الدین دی اہمیت اودوں بوہت ودھ گئی جدوں حکومت نے بیت اللہ محسود دے خلاف کاروائی دا فیصلہ کیتا۔ اوہناں نوں اسلام آباد کھڑیا گیا تے میڈیا نال ملایا گیا مقامی الیکٹرانک میڈیا تے اوہناں دے انٹرویو نشر کرائے گئے تے ایہہ دسیا گیا پئی اوہ بیت اللہ محسود دا بدل نیں۔ اوہناں دے ترکستان بٹنی وی انٹرویو دیندے رہے۔

ایسے وچکار اوہناں نے اپنے دو اڈے بنائے جنہاں وچوں اک ٹانک وچ سی تے اک ڈیرہ اسماعیل خان دی مدینہ کالونی وچ۔

ایس مدینہ کالونی والے مرکز وچ ہی اوہناں دے راکھے گلبدین نے اوہناں نوں قتل کر دتا۔ قاری زین الدین دے بھرا موجب گلبدین پچھلے چھ سالاں توں قاری زین الدین دے نیڑلے سنگی سی۔ قاری زین الدین دے نال آون توں پہلوں گلبدین بیت اللہ محسود دے وی راکھے رہ چکے سی پر قاری زین الدین اوہناں تے بڑا اعتماد کردے سی۔

گلبدین آپوں وی محسود نیں تے دا سانگا محسود علاقے مکین نال ہے۔ ہن قاری زین الدین دے بھرا مصباح الدین نے جیہڑا مقدمہ درج کروایا ہے ایہدے وچ کہیا ہے قاری زین الدین دا قتل بیت اللہ محسود دے کہن تے ہی ہویا ہے۔
بی بی سی دے شکرئیے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels