Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> بیت اللہ محسود کون؟

بیت اللہ محسود کون؟

وچار ڈیسک
June 15th, 2009
5 / 5 (1 Votes)
اُنج تے وزیرستان وچ القاعدہ تے طالبان دے خلاف ست سال توں جاری کاروائیاں دے وچکار کئی مقامی طالبان کمانڈر ساہمنے آئے پر بیت اللہ محسود اوہ کلے کمانڈر نیں جنہاں نوں وزیرستان توں باہر دوجے قبائلی علاقیاں وچ وی شہرت ملی۔ ایس ویلے ساری دنیا بیت اللہ نوں تحریک طالبان پاکستان دے پردھان دے طور تے جاندی ہے۔

تیتی سالاں دے بیت اللہ محسود صوبہ سرحد دے ضلع بنوں وچ کینٹ دے علاقے داؤد شاہ وچ جمے۔ بیت اللہ محسود دا سانگا قبائل دی نکی شاخ شوبی خیل نال ہے۔ اوہناں دے پیو مولانا محمد ہارون داؤد شاہ دی اک نکی جئی مسیت وچ پیش امام سی تے مسیت دے نیڑے پنڈ والیاں نے اوہناں نوں رہن لئی اک مکان دتا ہویا سی۔ بیت اللہ دے ٹبر نے بوہتی حیاتی بنوں وچ ہی لنگھائی۔

مولانا محمد ہارون دے چھ پتر سی جنہاں وچ بیت اللہ توں نکے یحییٰ خان محسود نوں پچھلے سال بنوں وچ ان ڈٹھے بندیاں نے گولیاں مار دتیاں سی تے پنج حالی تیکر جیوندے نیں۔اوہناں وچوں بیت اللہ توں وڈے بھرا ظاہر شاہ تے نکے محمد اسحاق اوہناں دے گروپ دا حصہ نیں۔ اوہناں دے اک وڈے بھرا ملکوں باہر محنت مزدوری کردے نیں۔بیت اللہ دے پیو مولانا محمد ہارون کجھ چر پہلوں مر گئے نیں تے اوہناں دی ماں حالی تیکر جیوندی ہے جیہڑی اہناں دناں وچ اوہناں دے نال دکھنی وزیرستان وچ ہی رہندی ہے۔

بیت اللہ دا پہلا ویاہ بنوں وچ ہویا سی۔ پر اوہدی پہلی گھر والی وچوں کسے قسم دی اولاد نہیں سی ایس لئی اوہناں نے پچھلے سال دکھنی وزیرستان دے اک قبائلی سردار ملک اکرام الدین دی دھی نال دوجا ویاہ کیتا۔ ملک اکرام الدین اوہناں دے نیڑلے ساکاں وچوں نیں۔

بیت اللہ محسود نے مڈھلی دینی تعلیم بنوں دے علاقے داؤد خیل پیپل مدرسے وچ ہی لئی۔ ایہدے توںمگروں ہور دینی تعلیم لئی دکھنی وزیرستان دے صدر مقام میرانشاہ دے اک مدرسے وچ داخلہ لیا۔ پر اوتھوں اوہناں نے علم دے درجیاں نوں پورا نہیں کیتا تے مڑ کے بنوں چلے گئے جتھے ایف آر بنوں دے علاقے ماتی ممن خیل وچ اوہناں نے کجھ چر تیکر اک مسیت وچ امامت کیتی۔

میرانشاہ وچ پڑھائی وچکار افغانستان دے طالبان نال اوہناں دیاں ملنیاں ہوندیاں رہندیاں سی۔ تے میرانشاہ بازار دے لہندے دے حصے وچ جلاالدین حقانی دا اسلامی مدرسہ تے افغانستان دے طالبان دا مرکز سی۔ بیت اللہ محسود دی وی ایسے مدرسے وچ آونی جاونی سی۔

بیت اللہ محسود مگروں طالبان تحریک وچ رل گئے تے بگرام وچ دکھنی اتحاد دے خلاف طالبان دے نال لڑائی وچ حصہ لیا تے جتے۔ ایہدے مگروں بیت اللہ مسلسل کئی محاذاں تے طالبان دے نال رہیا۔

بیت اللہ محسود طالبان دی ہار دے ویلے افغانستان توں جنوبی وزیرستان آگئے تے اوتھے آون والے جنگ بازاں نوں پناہ دتی۔ دوہزار چار وچ دکھنی وزیرستان دے علاقہ محسود وچ فوجی کاروائی وچ بیت اللہ محسود اگے اگے رہے۔ فوجی قافلیاں تے سکاؤٹس قلعیاں تے دھاڑیاں وچ سیکورٹی فورسز نوں بڑا نقصان ہویا۔ سکیورٹی فورسز نے ست فروری دو ہزار پنج نوں سرروغہ وچ اوہناں نال امن معاہدہ کیتا پر معاہدہ بوہتا چر تیکر نہ رہیا تے کجھ چر مگروں ہی ٹٹ گیا۔ معاہدہ ٹٹن توں مگروں اوہناں نے تحریک طالبان پاکستان دے ناں توں اک ستھ دا مڈھ رکھیا جیہڑی مگروں سارے قبائلی علاقیاں تے سرحد دے کئی علاقیاں وچ تنظیم نے اپنا مقام بنا لیا۔

ایس ویلے امریکہ نے بیت اللہ محسود سنے تن طالبان تے القاعدہ آگواں دی گرفتاری وچ مدد تے گیاراں ملین ڈالر انعام دا اعلان کیتا ہے۔

بی بی سی دے شکرئیے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels