Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> معمر قذافی: بادشاہواں دا بادشاہ

معمر قذافی: بادشاہواں دا بادشاہ

وچار ڈیسک
June 15th, 2009
لیبیا دے صدر معمر قذافی پہلی واری اٹلی دا دورہ کر رہے نیں۔ لیبیا پچھوکڑ وچ اٹلی دی نو آبادی رہی ہے تے ہن ایہہ دوہویں ملک بڑے وپاری سنگی نیں۔ پر بی بی سی دے نامہ نگار ڈیوڈ بلی دا کہنا ہے پئی روم وچ جیہڑا اثر چھڈ کے جاون گے اوہ انج دا نہیں ہے پئی جیہدی اوہناں نے آپوں سدھر کیتی ہووے گی۔

اٹلی تے لیبیا دے پچھوکڑ دے سانگے بوہتے خوشگوار نہیں رہے ہین۔

پر پچھوکڑ دیاں بھیڑیاں یاداں نوں بھلانا سوکھا ثابت نہیں ہویا جدوں کہ معمر قذافی اپنے فوجی یونیفارم وچ سی تے سینے تے عمرمختار ناں دے لیبیا دے اُس آگو دی تصویر لائی ہوئی سی جنہاں نے نو آبادیاتی نظام دے خلاف جنگ سی تے جنہاں نوں 1931 وچ اٹلی وچ قتل کیتا گیا سی۔ ایس موضوع تے ہالی وڈ نے اک فلم وی بنائی سی جیہدے وچ انتھونی کوئین نے عمر مختار دا کردار ادا کیتا سی۔ پچھوکڑ دی ایہہ فلم ایس مہینے توں پہلوں اٹلی وچ کدی نہیں وکھائی گئی۔

معمرقذافی اک خیمہ لا کے رہے جنہوں اوہناں نے اک وڈے پارک وچ لوایا سی تے جیہدے وچ اوہ بدوواں وانگوں رہے۔

سوچو ذرا، ہزاراں دی گنتری وچ فیشن ایبل زنانیاں روم دے نویں کنسرٹ ہال وچ اکٹھیاں ہوون تے مہنگےفیشن ڈیزائینرز دے لیڑے پا کے لیبیا دے آگو نوں ملن دیاں چاہوند ہوون۔ اوہ ساریاں زنانیاں جنہاں نے بزنس، سیاست یاں کسے ہور میدان وچ ناں کمایا۔ لیبیا دیاں مشہور زنانیاں جیہڑا کہ معمر قذافی دے آون تے اٹلی دی اک وزیر دی دعوت تے اکٹھیاں ہوئیاں۔ اٹلی دی ایہہ وزیر گذریل ملکہ حسن رہ چکیاں نیں۔

جدوں لیبیا دے آگو اوتھے اپڑے تے زنانیاں دی بے دلی ویکھن والی سی۔ اوہناں نے اپنا خطاب عربی وچ کیتا جنہوں اوتھے موجود مترجم مسلسل ترجمہ کردے رہے۔ ایسے خطاب تے واہوا ویلالگیا۔ قذافی دا موضوع وی یورپ تے افریقہ وچ زنانیاں دی بھیڑی حالت سی۔

ایہہ خطاب ہولی آواز وچ سی۔ قذافی دی آواز سنن لئی زنانیاں اوکھیاں ہوندیاں رہیاں۔

اہناں ماڈرن زنانیاںنوں خطاب دا اوہ حصہ پسند آیا جیہدے وچ اوہناں نے عرب دنیا دیاں زنانیاں دی حالت دسی۔ قذافی دا کہنا سی پئی اہناں زنانیاں دے نال کجھ ویلا کسے فرنیچر دے ٹوٹے وانگوں ورتارا ورتیا جاندا ہے جنہوں جدوں دل چاہے بدلیا جاسکدا ہے تے ایہدے تے کوئی ایہہ وی نہیں پچھ سکدا پئی انج کیوں کیتا۔

اوہناں نے دعویٰ کیتا پئی لیبیا وچ زنانیاں تے مرد برابر نیں پر اوتھے موجود زنانیاں اوہناں دے ایس دعوے تے بوہتیاں قائل نظر نہیں آئیاں۔

اوہناں نے اپنے آپ نوں تیجی صدی اے ایس رومن بادشاہ دی آل اولاداں وچوں دسیا جیہڑا کہ بحیرہ روم دے دکھنی ساحل تے جمیا سی۔ یعنی کہ اوہ علاقہ جیہڑا کسے زمانے وچ اطالوی نو آبادی وی سی۔

اوہناں نے اپنے میزبان نوں ایہہ دس کے وی شرمندہ کیتا پئی اٹلی نوں اپنیاں ساریاں سیاسی جماعتاں مکا کے طاقت تے اختیار لوکائی دے حوالے کر دینا چاہی دا جیویں پئی اوہناں نے آپوں لیبیا وچ کیتا ہے۔

اوہناں نے کہیا ' سیاسی جماعتاں دا نظام، جمہوریت دا قتل ہے۔ سیاسی جماعتاں نہیں ہوون گئیاںتے ملک وچ سجا، کھبا یاں مرکزی کوئی دھڑا نہیں رہوے گا۔

مگروں صحافیاں نال گل بات وچکار روم دے میئر گیوانی الیمانو نے بڑی ناگواری دے نال کہیا ' سانوں جمہوریت تے کسے کولوں سبق سکھن دی لوڑ نہیں ہے'۔

روم دی یونیورسٹی وچ پڑھیار اںنے لیبیا وچ انسانی حقاں دی تاریخ دے خلاف روس وکھالا کیتا۔

مگروں سرکاری میزبانی دے محل وچ رہن وچکار قذافی نے امریکہ دے خلاف سخت لفظ ورتے۔ اوہناں نے کہیا اُنی سو چھیاسی وچ ٹرائیپولی تے امریکی دھاڑا جیہدے وچ اوہناںدی اپنی نکی کڑی مری سی، اینا ہی بھیڑا ہے جنا کہ القاعدہ دی ات واد۔

دوہواں ملکاں دے وچکار مضبوط وپاری سانگے نیں۔ اٹلی نے ویہویں صدی دے شروع وچ لیبیا تے تریہہ سالاں دی حکومت وچکار کیتیاں گئیاں اپنیاں بد سلوکیاں تے لیبیا نوں پنج ارب ڈالر دیون دا وعدہ کیتا ہے۔

روم وچ جیہڑا تاثر اوہ چھڈ کے جاون گے تے اوہ انج نہیں ہے پئی جیویں اوہناںنے آپوں چاہیا ہووے گا۔ پر اوہ اگلے مہینے جی ایٹ کانفرنس وچ رلت لئی پھیر اٹلی آون گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels