Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> کون بنے گا وزیر اعظم؟

کون بنے گا وزیر اعظم؟

سہیل حلیم
May 13th, 2009
چوناں دا کم پورا ہورہیا ہے پر حالی تیکر ایہہ نہیں پتہ لگیا پئی ملک دا اگلا وزیر اعظم کون ہووے گا۔ پر وزارت عظمیٰ دے دعویدار کون کون نیں تے اوہناں دی کامیابی دے کیہ امکان نیں؟

کانگریس
منموہن سنگھ

ہن دے وزیر اعظم منموہن سنگھ تے نویں حکومت وچ وی وزارت عظمیٰ لئی پارٹی دے امیدوار۔ پر اوہ ایس عہدے تے ایسے صورت وچ قائم رہ سکدے نیں جدوں کانگریس سب توں وڈی جماعت دے طور تے ابھرے تے پارٹی نوں حکومت بناون لئی لیفٹ فرنٹ دی حمیت دی یاں تے لوڑ نہ پوے، یاں لیفٹ فرنٹ اپنے موقف وچ نرمی لیاوے۔ لیفٹ پارٹیز نے جوہری معاہدہ تے پاڑ پاروں یو پی اے حکومت توں حمیت واپس لے لئی سی تے اوہناں دا اصلی روسا منموہن سنگھ نال ہے جیہڑے کسے وی قیمت تے ایس ڈیل نوں پورا کرنا چاہندے سی۔

کامیابی دا امکان

لیفٹ پارٹیز دو ٹوک لفظاں وچ ایہہ کہندیاں رہیاں نیں پئی اوہ کسے صورت کانگریس دی حمیت نہیں کرن گئیاں پر اوہناں دے ورتارے وچ ڈھل ویکھی گئی ہے۔ خورے اوہناں نوں ایس گل دا احساس ہورہیا ہے پئی اوہناں نوں لہندے بنگال وچ واہوا نقصان ہویا ہے پر ایہدے مگروں وی مینوں نہیں لگدا پئی اوہ منموہن سنگھ نوں جھلن گے۔ اوہناں دی شرط ایہہ ہوسکدی ہے پئی کانگریس کسے ہور نوں وزیر اعظم بناوے۔

پرنب مکھر جی

سینئر آگو، ہن دے وزیر خارجہ حکومت وچ لما تجربہ۔ پرنب مکھر جی دا سانگا لہندے بنگال نال ہے تے وسیلیاں موجب اوہ لیفٹ فرنٹ نوں وی قبول ہوون گے۔ اوہناں دا سیاسی قد تے اینا ہے پئی وزیر اعظم بن سکن پر کہیا جاندا ہے اوہناں نوں گاندھی دے خاندان دا پورا اعتماد نہیں ہے۔ اسی دے دھاکے وچ اوہناں نوں اک واری پارٹی توں کڈھیا جاچکیا ہے۔ دوجی گل ایہہ کہی جاندی ہے پئی کانگریس صدر اوہناں نوں ایس انداز وچ ' کنٹرول ' نہیں کر سکن گیأاں جیویں خورے اوہ چاہندیاں نیں۔

اے کے اینٹونی
کیرالہ دے گذریل وزیر اعلیٰ تے موجودہ وزیر دفاع اے ۔ کے اینٹونی دیاں دوصفتاں نیں۔ اوہناں دا ٹریک ریکارڈ چنگا تے اُکا صاف تے نتارواں ہے تے پارٹی کمان نال اوہناں دی وفاداری وچ کوئی شک نہیں۔ پر اوہناں دی غیرمتنازعہ ہستی دی اک وڈی وجہ ایہہ وی دسی جاندی ہے پئی اوہ آپنے آپ نوں بوہتا 'اسرٹ ' نہیں کردے یعنی اپنے موقف تے اینا ڈٹ کے قائم نہیں رہندے خورے جھیڑیاں دی صورتحال پیدا ہو جاوے۔ کانگریس اعلیٰ کمان نوں انج دے بندے 'سوٹ ' کردے نیں۔

بھارتیہ جنتا پارٹی

لال کرشن اڈوانی

بی جے پی دے وزیر اعظم۔ان۔ ویٹنگ۔ اوہناں نے ہندوتوا دے ایجنڈے توں ملک دی سیاست دی شکل ہی بدل دتی تے بی جے پی نوں اقتدار تیکر اپڑایا۔ پر جنے سخت پینترے نال پارٹی اقتدار وچ آئی، اوہی اڈوانی دے گل دی ہڈی وی بن گیا۔ تے اٹل بہاری واجپائی وزیر اعظم بنے۔ ہن وی اوہ اتحادی جماعتان دی پہلی پسند نہیں ہین پر بی جے پی جے سب توں وڈی جماعت دے طورتے ابھردی ہے تے اوہنوں حکومت سازی دی دعوت ملدی ہے تے اوہناں دا وزیر اعظم بننا طے ہے۔ پر اکیاسی سال دی عمر وچ اوہناں لئی ایہہ اخیرلا موقع ثابت ہوسکدا ہے۔

تھرڈ فرنٹ
مایا وتی

اترپردیش دی وزیر اعلیٰ تے بہوجن سماج پارٹی دی پردھان جنہاں نے ملک وچ پسماندہ پوشاں نوں اک طاقتور آواز دتی ہے۔ مایا وتی وزیر اعظم تے بننا چاہندی ہے پر جنہاں جماعتاں دی حمیت دی اوہناں نوں لوڑ ہووے گی اوہ اوہناں تے بھروسہ نہیں کردیاں۔ اوہناں دی سیاست دا انداز ہی کجھ انج دا ہے۔ تھرڈ فرنٹ اوہناں دی حمیت تے چاہندا ہے پر خورے وزیر اعظم دی کرسی دیون تے تیار نہ ہووے۔ پر سارا دارومدار ایس گل تے ہووے گا پئی اوہناں نوں کنیاں سیٹاں ملدیاں نیں۔ جے اوہ چالی توں ودھ سیٹاں لیندیاں نیں تے تھرڈ فرنٹ دی حکومت بندی ہے تے اوہناں دے دعوے نوں نظر انداز کرنا اوکھا ہووے گا۔

سیتا رام پچوری (یاں لیفٹ دا کوئی ہور لیڈر)

پچوری تھرڈ فرنٹ دے محرک لیفٹ فرنٹ دے سب توں اُگڑ دے چہریاں وچوں اک نیں۔ ایس واری لیفٹ پارٹیز غیر کانگریسی تے غیر بی جے پی حکومت دی بنتر لئی جتن تے کر رہیاں نیں۔ ایس نویں حکومت وچ رلت ہی نہیں سگوں ایہدی قیادت نوں وی تیار نظر آرہیاں نیں۔ لیفٹ نے اُنی سو چھیانوے وچ وزیر اعظم دی کرسی ٹھکرائی سی جدوں جیوتی بسو نوں ایس عہدے دی پیشکش کیتی گئی سی مگروں اوہناں نے اہنوں اک تاریخی بھل کہہ دتا سی۔

پر ایس واری مسئلہ ایہہ ہے پئی لیفت فرنٹ دیاں سیٹاں گھٹن دا امکان ہے جیہدے کارن ایہدا دعویٰ کمزور پے جاوے گا۔

اوہناں توں وکھ جیہڑے قومی سیاست دان وزیر اعظم دی دوڑ وچ رل سکدے نیں اوہناں وچ بہار دے گذریل وزیر اعلیٰ لالو پرساد، سماجوادی دے ملائم سنگھ یادو، نیشنلسٹ کانگریس پارٹی دے شرد پوار، تیلگو دیسم دے چندر بابو نائیڈو، اڑیسہ دے گذریل وزیراعلیٰ نوین پٹناک تے گذریل وزیر اعظم ایچ ڈی دیوے گوڑا رلتی نیں پر اہناں وچوں کسے دے کول وی مایا وتی جیا للتا یاں سیتا رام پچوری دے بروبر سیٹاں نہیں ہوون گئیاں۔

بہر حال ملک دا سیاسی منظرناواں ایس ویلے کجھ انج ہے پئی اوہناں وچوں کوئی وی وزیر اعظم بن سکدا ہے۔

تے ہاں انج وی ہوسکدا ہے پئی اوہناں وچوں کوئی وی نہ بنے !


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels