Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> اک استاد دا درد

اک استاد دا درد

وچار ڈیسک
May 9th, 2009
صوبہ سرحد وچ جنگ توں متاثر بندیاں لئی بنے مہاجر کیمپ صرف انساناں دا ٹھکانہ نہیں سگوں ایتھے جنگ دی ککھ توں پیدا ہوون والیاں کئی دکھ بھریاں کہانیاں وی نیں۔ انج دی ہی کہانی غالب گل دی ہے جنہاں نے رونکھی آواز وچ کہیا ' میں چار سال دی محنت نال اک سکول بنایا پر طالبان دے سر وڈھن دی تڑی نے میری محنت نوں تباہ کر دتا '۔

غالب گل ضلع بونیر کوگا دے دمغار دے وسنیک نیں تے میری اوہناں نال ملنی صوابی یار حسین مہاجر کیمپ وچ ہوئی۔ گل بات وچکار اوہناں نے دسیا پئی اوہناں دے علاقے وچ کوئی سکول نہیں سی تے اوہناں نے اپنی مدد آپ ہیٹھ اک سکول بنایا جیہدے شروع وچ اٹھائی نیانیاں نوں داخل کروایا گیا پر ویلے دے نال نال گنتری ودھ کے نوے ہو گئی۔

غالب گل پچھلے چواں سالاں توں اوہناں نیانیاںنوں پڑھاندے رہے تے اوہناں نے پہلی کلاس توں شروع ہوون والے سکول نوں درجہ چہارم تیکر اپڑایا پئی اک دن بونیر وچ طالبان آئے جیہڑے گشت کردیاں ہوئیاں غالب گل دے پنڈ وچ اپڑ گئے۔

غالب گل موجب طالبان نے اوہناں نوں تڑھی لائی پئی اوہ این جی او ہیٹھ سکول چلا رہے نیں ایس لئی سکول بند کر دیون نہیں تے اوہناں نوں ذبح کر دتا جاوے گا۔ ایہدے مگروں اوہناں نے پنڈ والیاں نوں سدیا تے کہیا پئی اوہ ہور نیانیاں دی تعلیم جاری نہیں رکھ سکدے انج سکول بند کر دتا گیا۔

غالب نے رونکھی آواز وچ کہیا ' اینے چنگے تے ذہین نیانے سی پئی جدوں وی کوئی اہلکار سکول دا دورہ کردا تے اوہ سانوں انعام دیندا پر جیس دیہاڑ میں نیانیاں نوں کہیا پئی سکول بند ہووے گا تے اوہ روون لگے تے میں وی۔'

اگلے دن فوج نے طالبان دے خلاف کاروائی شروع کیتی تے غالب گل نے تے پہلوں سکول نوں خیر باد کہیا سی پر ہن پنڈ وچ گولہ بارود وچ آکے رہن دے قابل نہیں رہیا۔ اوہ کہندے نیں میرے پتر معاذ نے تن دن تیکر روٹی نہیں کھادی اوہ پچھدا رہیا پئی بابا ایہہ جہاز کیوں بمباری کردے نیں میں دسدا اوہ طالبان نوں مار رہے نیں اوہ پھیر توں پچھن لگ جاندا پئی ایہہ طالبان ہوندے کیہ نیں۔'

غالب گل حالات دی ذمے واری حکومت تے گھٹ تے طالبان تے بوہتا پاوندے نیں۔ اوہناں دے کول دلیل ایہ ہے ' طالبان دی نفاذ شریعت دی منگ پوری ہو گئی تے ہن اوہناں دا متوازی حکومت چلاون دا کوئی جواز نہیں رہیا۔

غالب گل نوں پچھیا گیا پئی جدوں طالبان بونیر وچ سی تے اودوں اوہ گھر چھڈن تے مجبور نہیں ہوئے سی پر فوج آئی تے اوہناں نوں اپنے علاقے نوں چھڈنا پیا ایس لئی اہناں حالاں وچ اوہناں دی ہمدردی طالبان دے نال ہے یاں حکومت دے نال تے اوہناں نے کہیا میری ہمدردی حکومت دے نال ہے ایہہ ٹھیک ہے حکومت نے سانوں علاقہ چھڈن تے مجبور کیتا پر اج تے پناہ وی دے رہی ہے پر طالبان سزا تے دیندے نیں ریلیف نہیں۔'

غالب گل نوں واپس جا کے سکول کھولن دی سدھر ہے پر اوہناں نوں آس نہیں کیوں جو اوہناں موجب اوہناں دے '' ہن فوجی کاروائی شروع ہوئی ہے تے مینوں اوہدے چھیتی مکن دی آس نہیں ہے''۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels