Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> سوات وچ فوجی کاروائی تے سیاست دان

سوات وچ فوجی کاروائی تے سیاست دان

وچار ڈیسک
May 9th, 2009
پاکستان وچ صوبہ سرحد دے ضلع سوات تے نیڑلے ضلعیاں وچ فوجی آپریشن دے حکومتی فیصلے بارے سیاسی جماعتاں دا رلیا ملیا جواب ساہمنے آیا ہے۔ کئی پارٹیاں نے فوجی کاروائی دی مخالفت کیتی ہے جدوں کہ حکومت دی اتحادی جماعتاں نے حمیت کیتی ہے۔

مسلم لیگ نون دے ترجمان تے گذریل وفاقی وزیر احسن اقبال نے محتاط جواب دیندیاں ہوئیاں کہیا چنگا ہوندا جے حکومت فوجی کاروائی کرن توں پہلوں کوئی قومی کانفرنس سد لیندی۔ اوہناں موجب اوہ سمجھدے نیں پئی کسے وی جھیڑے وچ ملٹری آپریشن چھیکڑلا حربہ ہوندا ہے تے اوہناںنوں آس ہے پئی حکومت نے ایہہ پیر پٹن توں پہلوں ساریاں پکھاں توں جائزہ لیا ہووے گا تے سیاسی حکمت عملی وی تیار کر لئی ہووے گی۔

امیر جماعت اسلامی سید منور حسن نے ایس فوجی آپریشن دی کھل کے مخالفت کیتی تے کہیا ہے ساریاں سیاسی جماعتاں کئی ہفتیاں توں وزیر اعظم نوں آل پارٹیز کانفرنس سدن دی منگ کر رہیاں سی پر ایہدے تے گوہ نہیں کیتا گیا تے واشنگٹن توں حکم آون توں مگروں قوم نوں اعتماد وچ لئے بناء ہی فوجی آپریشن شروع کر دتا گیا۔

اپنے اک بیان وچ اوہناں کہیا فوجی آپریشن حکومت دی ناکامی دا وڈا ثبوت ہے ایس آپریشن وچ سارا کجھ ملیا میٹ ہو جاوے گا۔ اوہناں نے کہیا جدوں حکومتاں فوج نوں مدد لئی سد دیاں نیں تے پھیر انج دا مرحلہ آوندا ہے پئی سول حکومتاں نوں ٹور کے فوج اقتدار تے قبضہ کر لیندی ہے۔

مسلم لیگ قاف دے مرکزی آگو کامل علی آغا نے کہیا پئی فوجی آپریشن تے تن دن پہلوں شروع ہو گیا سی وزیر اعظم نے مگروں تقریر کیتی ہے۔ اوہناں کہیا عام شہریاں نوں سوات توں نکلن دا موقع تیکر نہیں دتا گیا تے ہن وڈی گنتری وچ لوک مر رہے نیں۔

اوہناں کہیا وزیر اعظم نے اپنی تقریر وچ جیہڑے واقعے دسے اوہ سارے اک سال توں ہورہے سی کوئی نویں گل نہیں ہورہی سی۔ سوال ایہہ ہے پہلوں امن معاہدہ کیتا کیوں تے ہن اچن چیتی فوجی آپریشن کیوں شروع کر دتا گیا؟ مسلم لیگ قاف دے آگو نے کہیا ایہہ آپریشن بے یقینی تے ہے تے ایہدا تت چنگا نہیں نکلے گا۔اوہناں کہیا جدوں پارلیمان موجود ہے تے کمیٹی نے اک سانجھا طریقہ وی بنا لیا ہے ہن جدوں کہ اہنوں قومی اسمبلی تے سینٹ وچ لایا جانا سی پر ایہدے توں پہلوں ہی فوجی آپریشن شروع کر دتا گیا۔ اوہناں نے کہیا ایس فوجی آپریشن نوں قوم دی حمیت نہیں ہے۔ جمہوریت دا راگ گاون والیاں نے غیر جمہوری ورتارا ورتیا۔

کئی مذہبی جماعتاں دے اتحاد دے پردھان مفتی سرفراز نعیمی نے کہیا پئی سوات وچ اپنی مرضی دی شریعت تھوپن دی کوشش کرنا غلط ہے۔ انج دے لوکاں نے ملک تے اسلام دوہواں نوں نقصان اپڑایا ہے پر فوجی آپریشن اک انج دے موقعے تے شروع کیتا گیا جدوں صدر امریکہ دے دورے تے سی۔ اوہناں نے کہیا ایسے پاروں ایس آپریشن بارے شک شبہے پیدا ہوئے نیں پئی ایہہ امریکہ دے آکھن تے شروع کیتا گیا ہے۔

عوامی نیشنل پارٹی دے آگو تے صوبہ سرحد دے اطلاعواں دے وزیر میاں افتخار حسین نے کہیا پئی حکومت نے معاہدہ امن راہیں بتھیرے جتن کیتے پئی امن قائم ہو جاوے پر کھاڑکواں دے مقصد کجھ ہور سی۔ اوہناں کہیا حکومت نے اوہناں دی ہرمنگ منی سی پر پھیر وی اوہناں نے لوکاں دا قتل جاری رکھیا۔ سرکاری تے غیر سرکاری عمارتاں تے لوکاں دیاں جائیداداں تے قبضہ کیتا۔ اوہناں کہیا لوکائی نوں تحفظ دینا حکومت دا فرض ہے تے اوہ ایہہ ہر صورت پورا کرے گی۔

ایم کیو ایم نے حکومتی کاروائی تے فوجی آپریشن دی غیر مشروط حمیت دا اعلان کیتا ہے۔ ایم کیو ایم دے ترجمان نے اپنے اک بیان وچ کہیا ہے پئی اوہ ہر اُس کاروائی دی حمیت کرن گے جیہدے نال طالبانائزیشن مک سکے۔

بشکریہ بی بی سی اردو ڈاٹ کام


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels