Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> وسیب دی موت

وسیب دی موت

رحیم اللہ یوسفزئی
April 20th, 2009

پختوناں نوں دِلوں پیاریاں تھانواں، ادارے اک اک کرکے کھاڑکواں دے دھاڑیاں ہیٹھ آ رہے نیں۔ مسیتاں، مزاراں تے بمب مارے جارہے نیں۔ لوک اتے سیاسی بیٹھکاں دی نشانی "حجریاں" تے ہر دیہاڑے حملے ہوندے ہین۔ جرگے دی بیٹھک نوں نشانہ بنایا جاندا اے۔ قبائلی وڈکیاں اتے مولویاں دی ودھیر گنتری قتل ہوچکی ہے۔ مسلح قبائلی رضاکاراں دے اُسارے لشکراں نوں آپ مارو دھاڑویاں دے غصے دا نشانہ بننا پے رہیا اے۔

پختوناں بارے ایہہ آکھیا جاندا سی پئی اوہ چنگے کھانے تے بندوق نوں پسند کردے ہین سنگیت اتے مخول دا چس مانندے نیں۔ پختوناں نوں اپنی پسند چوں سنگیت نوں کڈھنا پوے گا کیونجے طالبان کھاڑکو گاؤن وجاؤن نوں پسند نہیں کردے ۔ پر اوہ چنگے کھانے، چنگی بندوق دا برا نہیں مناؤندے اتے کسے نال بھیڑے مخول کرنا پسند کردے ہین۔

مزار اتے مسیتاں کھاڑوکواں دی لسٹ تے آچکیاں ہین۔
 
نوشہرہ وچ بہادر بابا ہوراں دے مزار اُتے راکٹاں نال دھاڑا ماریا گیا جیس وچ کوئی جان تے نہیں گئی پر کھنڈر ہوئےمزار نال پیروکاراں نوں واہو ہرکھ ہویا۔ کجھ ہور روحانی شخصیات دے مزاراں تے وی ہلے بولے گئے۔ فیر پشاور دے نیڑلے قصہ خوانی پِنڈ وچ مشہور صوفی شاعر رحمان بابا دا مزار بمباری ہیٹھاں آئیا۔ ایہہ کھاڑکواں ولوں گُجھا اِٹ کھڑکے دا عمل سی، رپورٹاں موجب کھاڑکواں نے مزار دے خادماں نوں دھمکی دِتی جیکر زنانیاں نوں ایتھے آؤن اتے مرداں وچ رلن توں ڈکیا نہیں گیا تاں حملہ کردتا جاوے گا۔

رحمان بابا بارے آکھیا جاندا ہے اوس توں ودھ کسے ہور پشتو بولی دے شاعر نوں پسند نہیں کیتا جاندا۔ صوفی ہوون اتے پیار محبت، رواداری دے پرچار پاروں اوس دا ودھیر آدر کیتا جاندا اے۔ اوہدی قبر نیڑے بمب اتے چونہاں کھمبیاں نوں دھماکہ خیز مواد رکھیا گیا جیہدا ہریک پختون نوں ڈاہڈا ہرکھ پُجیا۔ رحمان بابا دی امن پریت بھری طبیعت نوں پچھانن لئی اوہناں دی پشتو شاعری دی کجھ ونگی ویکھو۔

پھُل بیجو تانجے تہاڈے دوالے خشبو بھریا باغ بنے
کنڈے جو بیجو گے تہاڈے اپنے پیراں نوں وڈھے گا
تیر دوجیاں نوں مارن گے
ڈِگن توں پہلاں مُڑ کے تہانوں وجے گا
تُسیں آپ بُلھاں ہار تھڑکدے ہووگے

رحمان بابا دے مزار اُتے دھاڑے نال صرف پختوناں نوں اِی دُکھ نہیں پُجیا سگوں دوجیاں نسلاں تے علاقیاں دی لوکائی وی مایوس ہوئی۔ کجھ دے نیڑے افغانستان دے صوبے بامیان وچ بُدھا دے بُتاں نوں طالبان ہتھوں ڈائنامائٹ نال اُڈاؤنا چیتے آؤندا اے۔

مسیتاں وچ بمب پھٹنا خؤرے مسلماناں اتے پختوناں لئی کجھ ورہے پہلاں ناقابل یقین گل ہووے پر خیبر ایجنسی دے علاقے جمرود وچ 27 مارچ نوں بھگیاری مسیت دی تباہی چوتھی واری ہوئی جیس وچ کسے ات گرد نے سرحد دی مسیت نوں نشانہ بنایا۔

مسیتاں جیہڑا اللہ دا گھر ہوندیاں ہین جاپدا اے پئی کھاڑکوواں نے انتقام دی نمبر بازی وچ ایہناں نوں نشانہ بنانا اپنا اصول متھ لیا اے۔ عبادتی تھانواں مقدس سن صوبہ سرحد وچ مسیتاں نوں ودھ آدر دِتا جاندا سی جتھے اسلام دا زندگی وچ وڈا کردار ہوندا سی ۔ پر ات گرداں نوں مسیتاں وچ بمب دھماکے کرن تے کوئی نموشی نہیں تے ایتھے نماز پڑھن لئی آؤن والیاں معصوم مسلماناں نوں مارن لئی آپ مارو گھلدے ہین۔

بگھیاری اتے ضلع چارسدہ دے پنڈ شیرپاؤ دی مسیت وچ ہون والے دھماکیاں وچ سرکار والی جاری کیتی گئی پورٹ موجب پنجاہ توں ودھ لوک مرے ہین۔ غیرسرکاری اطلاعواں موجب بھگیاری مسیت وچ ستر توں ودھ ہلاک ہوئے اتے پھٹڑ ہون والیاں دی گنتری دوسو توں وی ودھ ہے۔

بگھیاڑی مسیت وچ کوئی وڈے بندے نوں نشانے بناؤنا ظاہر نہیں ہوئیا کیونجے سڑک کنڈھے مسیت وچ جمعے دی نماز پڑھن لئی عام قبائلی، پاندھی تے فرنٹیر کور تے خاصہ دار فورس دے تھلڑی پدھر دے افسر اِی نماز پڑھدے سن۔

شیرپاؤ پنڈ وچ آپ مارو دھاڑے دا نشانہ گذریل وزیر آفتاب شیر پاؤ سن۔ ایہہ عید دا دیہاڑا جدوں شیرو پاؤ، اوہدے مُنڈے سکندر تے مصطفٰی، ساک تے راکھے پنڈ دی مسیت وچ نما پڑھ رہے سن۔ شیر پاؤ اتے اوس دے منڈے بچ گئے مصطفٰی تھوڑا پھٹڑ ہویا پر پنجاہ توں ودھ لوک مر گئے۔
ایس مقدس دیہاڑے نال ایہہ گل نتر گئی جیہڑے اپنے آپ نوں اِسلامی جنگجو آہندے ہین اوہناں نیڑے مسیتاں کوئی مقدس نہیں ہین۔

دو ہور مسیتاں تے وی کھاڑکواں نے دھاڑے مارے۔ اک پشاور دے جھانگی محلہ وچ شیعاں دی امام بارگاہ قاسم بیگ سی جتھے آپ مارو نے 18 جنوری 2008 ء نوں اپنے آپ نوں اُڈا دتا۔ امام بارگاہ بھویں وسوں والے علاقے وچ ہون پاروں دھماکے نال نال 12 نمازی مارے گئے تے 20 پھٹڑ ہوئے۔

دوجا بمب لوئر دیر دے علاقے مسکینی درا دی مسیت وچ پھٹیا۔ ایہہ واپری رمضان دے مقدس مہینے وچ ہوئی جیہدے وچ ست نمازی مارے تے کئی پھٹڑ ہوئے۔

دو ہور اکٹھاں دی رپورٹ ملی جتھے عبادت کرن والیاں نوں آپ مارو دھاڑے مارن والے اپنا نشانہ بناؤنا چاہوندے سن۔ اک واری آپ مارو جیکٹ پائے دھماکہ کرن والے نوں ڈیرہ اسماعیل خان دی امام باگارہ وچ وڑدیاں ہوئیاں پُلس والیاں نے پھڑ لیا۔ جیکر جوان آپ مارو اپنے غلط مشن وچ کامیاب ہوجاندا تاں امام بارگاہ وچ مرن والیاں دی گنتری کسے شمار وچ ناں ہوندی۔

دوجی واپری ڈگر ضلع بونیر وچ ہوئی جتھے عیدالفطر دی نماز پڑھن والیاں تیکر اپڑن توں پہلاں نامکمل سِکھلائی اتے بھمبل بھوسے پاروں آپ مارو نے اپنے آپ نوں اُڈا لیا۔ نیڑے تیڑے کھیڈن والے دو نیانے دھماکے دے زور ناں پھٹڑ ہوگئے۔

جرگہ وچ بیٹھے بُڈھڑے دا آدر کیتا جاندا ہے کیونجے اوہ رولیاں رپھڑاں نوں لوک بھلیائی واسطے حل کرن لئی اک مُکی دا فیصلہ کردا ہے۔ جرگہ اک آدر جوگ ادارہ ہے تے ایہہ ممبر اُچیچ ہوندے نیں۔ پر ایہہ وی بدل چکیا جدوں کھاڑکواں نے جرگہ ممبراں نوں دھمکیاں دینیاں شروع کردِتیاں اتے آپ ماروواں نوں کالی پگ بنھن والے بزرگاں نوں مارن لئی گھلنا شروع کردِتا۔ ایہہ سبھ کجھ درہ آدم خیل، اورکزئی ایجنسی، باجوڑ تے ہور دوجیاں تھانواں تے ہوئیا۔ جرگہ دی خطریاں، رقم دی کشش، تے سرکاری مداخلت پاروں اہمیت گھٹ چکی ہے۔ کھاڑکو درجناں دی گنتری وچ وڈکیاں نوں مار کے باقی رہندے کھوہندیاں توں اپنے مطلب دا کم لینا چاہوندے ہین۔

قبائلی لشکر نے اِک مک ہوکے جرگے دے متفقہ فیصلے نوں لاگو کرن لئی سِر چُکیا سی۔ ہتھیار چُکو قبائلی جرگے دے فیصلے دا نفاذ مجرم قبائلی دا گھر ڈھا کے کردے یا فیر کوئی اوہناں دی ریت رواج نوں توڑدا ، اوس نوں سزا دیندے سن۔ ہُن لشکر دا واہ آپ مارواں نال پے گیا جیس نال فیصلے کرن دا کم نمانا ہوچکیا ہے۔

پختوناں دی رہتل بہتل نوں خطرہ ہے کوئی نہیں جاندا پئی بھلک وچ ایہدا کیہ مہاندرہ ہووے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels