Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> ہن اعتزاز کیہہ کرن ؟

ہن اعتزاز کیہہ کرن ؟

وچار ڈیسک
April 11th, 2009
وکیلاں دی دو سالاں دی تحریک کامیاب ہوئی تے ایہدے وڈے آگو اعتزاز احسن ہن اک لمی چھٹی بارے وچار رہے نیں۔ دو ورہے تھکا دیون والی تحریک توں مگروں جیہدے وچ اوہناںنوں کدی ڈرائیور کدی شاعر تے کدی وڈے بلارے دا کردار ادا کرنا پیا اوہناں نوں کجھ آرام دی لوڑ ہے پر ہن سوال اوہناں دے سیاسی مستقبل بارے اٹھ رہے نیں۔

لوکی جاننا چاہندے نیں پئی اوہ وکیلاں دی تحریک دی کامیابی توں کنے راضی نیں مستقبل دے چیلنج اوہناں دے ساہمنے کیہہ نیں تے سب توں ودھ اوہ اپنے سیاسی مستقبل بارے کیہہ ارادے رکھدے نیں۔

اعتزاز ہن ایس وکیلاں دی تحریک جیہدی پردھانی اوہناں نے دوجے سنگیاں دے نال بڑی ودھیا کیتی وکھ ہوون یاں دور ہوون دی کوشش کردے نظر آوندے نیں۔ اوہناں کہیا وکیلاں نے اپنا ہدف پا لیا ہے جیہدے نال تحریک مکی تے نہیں پر غیر فعال ضرور ہو گئی ہے۔ یعنی جدوں پھیر لوڑ پئی تے پھیر وکیل میدان وچ لتھ سکدے نیں پر حالی اوہدی لوڑ نہیں رہی۔

پر اوہ من دے نیں پئی معزول ججاں دی بحالی دے ویری اج وی ہے نیں تے وڈے سرکاری عہدیاں تے لگے ہوئے نیں۔ اوہناں موجب ' نواں خطرہ کسے وی ویلے پیدا ہوسکدا ہے پر حالی ایہہ ویری چپ نیں کوئی وی موقع اوہ ہتھوں خورے ہی جان دیون۔' جے چیف جسٹس دی بحالی توں مگروں اوہناں تے دبا ہے لوکاں دے مسئلے حل کرن لئی تے وکیل سول سوسائٹی تے سیاسی جماعتاں تے وی دبا ہوونا چاہی دا پئی عدلیہ دی بحالی تحریک ایس ملک دا کلا مسئلہ نہیں سی ایتھے غربت، بے ایمانی تے امن دی حالت تے قابو پاون لئی انج دی اک تحریک دی لوڑ ہے جیہڑی امریکہ تے کھاڑکواں دے خلاف چلائی جاوے پئی دوہویں اپنی جنگ ساڈے ملک وچ نہ لڑن۔

ایس ویلے اعتزاز دے ذہن تے جے کوئی جماعت ولوں مسئلہ چھایا ہویا تے اوہ ہے بینظیر بھٹو دے قتل دی پن چھان۔ اوہ اقوام متحدہ توں ودھ اپنے کاہڈو اداریاں نال اوہدی غیر جانبدار کاہڈ دے حق وچ نیں تے کہندے نیں پئی ویلا لنگھن دے نال نال قاتلاں تیکر اپڑنا اوکھا ہو جاوے گا۔

پر اوہناں نوں ایس بارے کوئی بھلیکھا نہیں پئی اوہ ایس پاڑ والے نکتہ نظر دے نال کیویں پارٹی قیادت دے نال ٹر سکن گے۔ اوہناں کہیا سی پئی اوہ خورے اقلیت وچ رہن پر جماعت دے وچ اوہناں دا وکھرا دھڑا بناون دا کوئی ارادہ نہیں ۔ کسے ماہر وکیل وانگون اعتزاز احسن پیپلز پارٹی دے سیکرٹری جنرل جہانگیر بدر ولوں اوہناں دی مرکزی مجلس عامہ دی رکنیت نوں معطل کرن دے فیصلے نوں غیر قنونی کہہ دیندے نیں جیہدا اوہناں موجب اوہناں نوں کوئی اختیار نہیں۔ پر اوہناں منیا پئی جے جماعت نے اوہناں نوں سدیا تے اوہ کسے وی اجلاس وچ ٹر جاون گے تے جے نہ سدیا تے رکن دے طور تے جماعت وچ رہن گے۔
اعتزاز احسن ایس خیال نوں نہیں من دے پئی اوہ پارٹی دی قیادت لئی خطرہ بن گئے نیں یاں پارٹی دے وچ ایس حد تیکر اک سیاسی آگو دی وڈی ہستی بن گئے نیں پئی پارٹی نیام وچ اک توں ودھ تلواراں دا ظاہر وچ مسئلہ پیدا ہو گیا سی؟ پر پارٹی دے وچ اک وچار ایہہ ضرور ہے پئی اعتزاز احسن نوں پیپلز پارٹی دی نہیں پیپلز پارٹی نوں اعتزاز احسن دی لوڑ ہے۔ اوہ اینے اہم نیں پئی جے اوہ پیپلز پارٹی دے نال رہے تے ایہدے نال پیپلز پارٹی نوں ہی فیدا ہووے گا۔

پر اعتزاز آپوں کہندے نیں پئی اوہناں نے معزول ججاں دی بحالی توں پہلوں کدی وکیلاں دی ٹریڈ یونین کاروائیاں وچ حصہ لیا تے نہ لین دا ارادہ ہے۔ اوہ سیاست دان وی سیلانی طبیعت دے نیں تے اوہ اک کامیاب وکیل نیں دوجیاں گلاں اوہناں دے سائیڈ بزنس نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels