Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> ہالبروک نے باڈی لینگویج توں کیہہ کہیا؟

ہالبروک نے باڈی لینگویج توں کیہہ کہیا؟

وچار ڈیسک
April 8th, 2009

جے ' باڈی لینگویج' بین الاقوامی سفارتکاری دا کوئی غیر روایتی ہتھیار ہے تے وڈے امریکی تے پاکستانی سفارتکاراں نے اپنے ہن ہوون والیاں ملنیاں تے پریس کانفرنساں وچ اہنوں بڑا کھلا ورتیا۔ پاکستانی وزیر خارجہ شاہ محمود قریشی نے پیر دے دیہاڑے سانجھی پریس کانفرنس کردیاں ہوئیاں امریکی اُچیچے ایلچی رچرڈ ہالبروک تے وڈے امریکی فوجی افسر مائیک مولن ولوں مڑ کے بھرویں تے مصنوعی مسکان دے نال ایہہ کہیا ' بلینک چیکس دی گل وی کیتی جاندی ہے۔بالکل ٹھیک اسیں نہ کوئی بلینک چیک لواں گے تے نہ دیواں گے۔'

ایہہ گل جیہڑے انداز وچ کیتی گئی اوہ بریفنگ ہال وچ موجود صحافیاں لئی بڑی انوکھی تے غیر متوقع سی۔ پر وزارت خارجہ دے اک افسر نے جیہڑے امریکی تے پاکستانی وفد وچکار پریس کانفرنس توں پہلوں ہوون والے مذاکرات دی تفصیل توں وی جانکاری رکھدے سی بی بی سی نوں دسیا پئی باہر جو کجھ ہویا اوہ ردعمل سی اوہدا جیہڑا کجھ اندر ہویا۔'

دوہواں ملکاں دے وڈے سفارتکاراں وچکار گل بات دسن توں تے ایس افسر نے انکار کیتا پر ایس میٹنگ توں مگروں رچرڈ ہالبروک نے پریس کانفرنس کرن توں انکار کر دتا سی پر پاکستانی تے امریکی افسراں دی درخواست تے اوہ کجھ چر پہلوں میڈیا دا ساہمنا کرن تے تیار ہوئے۔

وزارت خارجہ دے کجھ افسراں وچ شاہ محمود قریشی ولوں ایہہ وی سوچیا جاندا ہے پئی اوہناں دے لہجے دا مصنوعی پن بوہتا ڈوہنگا ہوندا جارہیا ہے۔ کجھ افسر اہنوں سفارتکاری دے طور تے کامیابی کہندے نیں تے دسدے نیں پئی اُس دیہاڑ شاہ محمود قریشی اپنے ایس نویں دھندے دی معراج تے سی۔

اوہناں نے جیہڑے انداز وچ پاکستان امریکا سانگیاں وچ ' ریڈ لائنز ' تے ' گیپ ' دی گل کیتی تے اوہ بڑے معنی رکھدا سی تے اوہناں دوہواں پاڑ والے کماں دے ذکر دے نال اپنے چہرے تے بھیڑے سٹائل بناوندیاں ہوئیاں وزیر خارجہ نے ایہہ وی کہیا اہناں موضوعاں تے ہن واشنگٹن وچ گل ہووے گی۔'

مبصراں دا کہنا ہے پئی امریکی ریاست لئی اوکھے دور توں اپنی سفارتکاری شروع کرن والے رچرڈ ہالبروک بارے ایہہ کہنا پئی اوہ منے پرمنے سفارتکار ہین، اوہناں دیاں خوبیاں چنگی طرحاں نہیں کھولدا۔

بین الاقوامی سفارتکاری وچ اپنے پینترے نوں منوان وچ مہارت لئی مشہور رچرڈ ہالبروک ایس دیہاڑ انج لگیا جیویں دفاعی پوزیشن وچ آگئے۔ اوہناں نے اک صحافی دے سوال دا جواب دیون توں انکار کیتا تے ایس صحافی نوں ڈانٹ دیاں ہوئیاں کہیا پئی جے اوہناں نوں ہور سوال کیتے گئے تے اوہ اک اعلان کیتے بناء ہی پریس کانفرنس توں ٹر جاون گے۔ انج لگیا جیویں اوہ کسے دی کاوڑ کسے ہور تے کڈھ رہے نیں۔

تے اوہ اعلان سی پئی امریکا فرینڈز آف پاکستان راہیں پاکستان دی بھرویں معاشی امداد کرن دا فیصلہ کر چکیا ہے تے ٹوکیو اجلاس لئی پاکستانی وزارت خارجہ نوں سیکرٹریٹ آکھیا گیا ہے۔ رچرڈ ہالبروک نے ایس صحافی نوں کہیا پئی اوہ ایس دورے دے وچکار کسے دوجے موقعے تے صحافیاں نال کھل کے گل کراں گے۔

تے ایہہ دوجا موقع اُسے شام آگیا جدوں امریکی سفارتخانے نے کجھ ملکی تے غیر ملکی صحافیاں نوں امریکی وڈے سفارتکار نال ملنی دی دعوت دتی۔ کہیا جاندا ہے پئی امریکی سفارتکار نے ایس موقعے تے کھل کے وچار وٹاندرا کیتا۔

ایس سوال تے کہ اوہ ایس وتھ ولوں کیہہ کہن گے جیہدی پاکستانی تے امریکی موقف وچ موجودگی دی نشاندہی پاکستانی وزیر خارجہ شاہ محمود قریشی نے کیتی ہے، رچرڈ ہالبروک نے غیر متوقع بھیڑے لہجے وچ کہیا '' ایہدی تفصیل اہناں نوں ہی پچھو''۔مبصر ہن ایہہ سوال پچھ رہے نیں پئی جدوں پاکستانی وزیر خارجہ نے کھلی پریس کانفرنس وچ کھل کے اپنے موقف دا وکھالا کیتا تے سخت پینترے دے کھلے وکھالے لئی مشہور امریکی سفارتکار نے انج کرن لئی وکھری مجلس دا چون کیوں کیتا؟

ایہدا اک کارن تے ظاہر وچ ایہہ ہے پئی اوہناں نے صحافیاں دے ساہمنے پاکستان دے قبائلی علاقیاؓں وچ ودھدے پھلدے باغی رجحاناں دے کارن دسے۔ اوہناں دا کہنا سی پئی طالبان تے اوہناں دا ودھدا ہویا اثر بوہت گنجل دار معاملہ ہے تے اوہ آپوں ایس معاملے دی روز بدلدیاں حقیقتاں نوں سمجھن دی کوشش کر رہے نیں۔

جدوں رچرڈ ہالبروک اسلام آباد وچ ' طالبانیت ' دیاں بدلدیاں جہتاں دی گل کر رہے سی عین ایس لمحے پاکستان وچ طالبان دا اک نواں روپ ساہمنے آیا۔ ایس پریس کانفرنس توں کجھ لمحے پہلوں فون تے آپنے آپ نوں ' تحریک طالبان پنجاب ' دا ترجمان ظاہر کرن والے اک بندے نے اتوار دے دیہاڑ چکوال وچ ہوئے آپ مارو دھاڑے دی ذمے واری قبولی تے اعلان کیتا پئی بیت اللہ محسود دی پردھانگی وچ پنجاب وچ طالبان دی ایہہ نویں تنظیم اگلے کجھ دناں وچ صوبہ پنجاب وچ انج دیاں ہور وارداتاں کرن دی منصوبہ بندی کر رہی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels