Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> وکیلاں دی تحریک:پاکستانی تاریخ دی سب توں وڈی تحریک

وکیلاں دی تحریک:پاکستانی تاریخ دی سب توں وڈی تحریک

وچار ڈیسک
March 16th, 2009

پچھلے دوہواں سالاں وچ معزول چیف جسٹس افتخار محمد چودھری سنے وڈیاں عدالتاں دے ججاں دی بحالی تے آزاد عدلیہ لئی چلائی جاون والی وکیلاں دی تحریک بےشک پاکستان دی تاریخ وچ سب توں وڈی تحریک ہے۔ ایس تحریک وچ بڑا کجھ ہوندا رہیا موجودہ تے گذریل حکومت ولوں ایس تحریک وچ رلتی وکیلاں نوں کئی نوکریاں دتیاں گئیاں جنہاں وچ ہائی کورٹ دے جج بناونا وی رلتی سی پر ایہدے مگروں وی ایہہ تحریک چلدی رہی۔

نو مارچ سن دو ہزار ست نوں گذریل صدر جنرل ریٹائرڈ پرویز مشرف ولوں سپریم کورٹ دے چیف جسٹس افتخار محمد چودھری دے خلاف ریفرنس دائر کیتا گیا جنہوں سپریم جوڈیشل کونسل نوں گھل دتا گیا۔ جسٹس خلیل الرحمن رمدے دی پردھانی وچ بنے سپریم کورٹ دے بنچ نے حکومتی الزاماں نوں رد دیاں ہوئیاں اوہناں نوں ویہہ جولائی سن دو ہزار ست نوں بحال کر دتا۔

افتخار محمد چودھری تے اودوں دی حکومت وچکار سانگے چنگے نظر نہیں آئے تے اودوں دے صدر جنرل ریٹائرڈ پرویز مشرف نے تن نومبر سن دو ہزار ست نوں ملک وچ ایمرجنسی نافذ کر کے اوہناں سنے سٹھ ججاں نوں معزول کر کے اوہناں نوں گھراں وچ نظر بند کر دتا۔ اودوں دے صدر پرویز مشرف دے خلاف سپریم کورٹ وچ درخواستاں سنوائی وچ سی جیہڑیاں اوہناں دے آرمی چیف دے طور تے صدارتی چوناں وچ حصہ لین دے خلاف دائر کیتیاں گئیاں سی۔

بھاویں سپریم کورٹ نے جنرل ریٹائرڈ پرویز مشرف نوں چھ اکتوبر سن دو ہزار ست نوں صدارتی چوناں وچ حصہ لین دی اجازت تے دے دتی سی پر الیکشن کمیشن نوں ہدایت کیتی گئی پئی اوہ اُس ویلے تیکر کسے وی امیدوار دی کامیابی دا نوٹیفکیشن جاری نہیں کیتا سی ایس لئی اوہناں نوں خطرہ سی پئی سپریم کورٹ اوہناں دے خلاف کوئی فیصلہ نہ دیوے اہنوں نظر وچ رکھدیاں ہوئیاں تن نومبر سن دو ہزار ست نوں ملک وچ ایمرجنسی لاون توں مگروں عبدالحمید ڈوگر نوں پی سی او ہیٹھ سپریم کورٹ دا چیف جسٹس بنا دتا گیا جنہاں نے نظریہ ضرورت ہیٹھ پرویز مشرف نوں وردی وچ چوناں وچ حصہ لین نوں جائز آکھدیاں ہوئیاں الیکشن کمیشن نوں اوہناں دی کامیابی دا نوٹیفکیشن جاری کرن دے حکم دتے۔

پی سی او ہیٹھ حلف چکن والے سپریم کورٹ دے چیف جسٹس عبدالحمید ڈوگر تے حلف چکن والے ہور جج وکیل برادری وچ جھیڑا رہے تے وکیلاں دی اک وڈی گنتری اوہناں نوں نہ من دیاں ہوئیاں وڈیاں عدالتاں وچ پیش نہیں ہوئی۔ پندراں دسمبر سن دو ہزار ست نوں ملک وچ آئین بحال کر دتا گیا تے پی سی او دے ججاں نے آئین موجب پھیر حلف لیا۔ بھاویں معزول ججاں وچوں کئی ججاں نے حلف چک لیا پر افتخار محمد چودھری سنے سپریم کورٹ دے پنج ججاں نے حلف نہیں چکیا۔

ججاں دی بحالی دی تحریک جیہڑی اک ویلے مکدی نظر آوندی سی پر ایس سال سپریم کورٹ دے چیف جسٹس عبدالحمید ڈوگر دی دھی نوں
وادھو نمبر دیون دا معاملہ ساہمنے آون توں مگروں ایس تحریک وچ اک واری پھیر جان آگئی۔ وکیلاں توں وکھ سیاسی جماعتاں نے وی ایس واپری نوں بڑا چکیا تے اوہ عبدالحمید ڈوگر نوں استعفیٰ دیون دا کہندے رہے جدوں کہ ایس معاملے وچ حکومت وچ رلتی وزیر جیہڑے پہلوں افتخار محمد چودھری دی بحالی دی تحریک وچ شامل ہوئے سی ایس معاملے وچ عبدالحمید ڈوگر نوں بچاوندے نظر آوندے سی۔

سید یوسف رضا گیلانی نے وزیر اعظم چون ہوون توں مگروں جیہڑا سب توں پہلا کم کیتا سی اوہناں وچ اوہناں ججاں نوں چھیتی چھڈن دے حکم جاری کیتے گئے جنہاں نوں پرویز مشرف دی حکومت نے نظربند کیتا سی۔ افتخار محمد چودھری دنیا دے کلے چیف جسٹس نیں جنہاں نوں دو واری معزول کیتا گیا تے پھیر دوبارہ اوہناں نوں بحال کیتا گیا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels