Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> زرداری نفاق دی نشانی: وال سٹریٹ

زرداری نفاق دی نشانی: وال سٹریٹ

وچار ڈیسک
February 28th, 2009

امریکی اخبار وال سٹریٹ جرنل نے اپنے اک مضمون وچ صدر آصف علی زرداری بارے گل کردیاں ہوئیاں کہیا ہے جو اوہ چون ہوندے ویلے اک لمی آمریت توں مگروں ملک دے کھلرے ہوئے دھارے نوں اکٹھا کرن دے ارادے نال آئے سی پر ہن اوہ پاڑ دی نشانی بن دے جارہے ہین۔

اخبار دے تجزئیے موجب زرداری دی اوہناں دے سنگی تے ویری دوہویں ہی نکھیندی کر رہے ہین۔ بینظیر بھٹو دے کئی نیڑلے سنگی جیہڑے حکومت وچ وی رلتی نیں رُسے ہوئے نیں تے اوہناںنال سدھا ساہواں رابطہ کرن توں ولاندے نیں۔ اخبار نے کئی گواہواں دے حوالے نال دسیا ہے کہ اوہناں نے سینئر وزیراں دے خلاف اجلاساں وچ مندا وی بولیا ہے۔

شریف برادران دے خلاف سپریم کورٹ دے فیصلے نے ملک نوں اک واری پھیر سیاسی بحران ول دھک دتا ہے۔ کئی سرکاری اہلکاراں تے مغربی سفارتکاراں موجب زرداری دے حکمرانی دے ورتارے نال ہوون والے مسئلے حکومت نوں لسا کرن توں وکھ کئی چیلنجاں نال نبڑن وچ اڑیچ نیں۔

عدالتی فیصلے نال کراچی وچ سٹاک مارکیٹ وچ گراوٹ آئی۔ امریکہ نوں نواز شریف ولوں زرداری دے خلاف احتجاجی مہم چلاون نال چنتا ہوسکدی ہے۔ نویں اوباما پربندھیاں دی ترجیح القاعدہ تے طالبان نال نبڑنا ہے پاکستان دے وچ سیاسی عدم استحکام نال نہیں۔پچھلے سال ستمبر وچ صدارت دا عہدہ سنبھالن توں مگروں توں صدر زرداری دے دوالے جیہڑے کجھ مشیر خاندان دے بندے تے اوہناں لوکاں دا ٹولہ ہے جنہاں نال اوہناں دا سانگا قید وچ بنیا تے جنہاں وچوں کئی چون نہیں ہوئے دے۔

انج دے حالات وچ سرکاری اہلکار چھچھوپنج وچ ہین پئی اصلی چارج کیہدے کول ہے۔ اوہناں وچ اوہناں دے گذریل ڈاکٹر عاصم حسین وی رلتی نیں جیہڑے کراچی وچ اک ہسپتال چلاون توں وکھ پیٹرولیم تے حکومت دے مشیر دی ڈیوٹی وی کر رہے ہین حالانکہ اوہناں دا ایس شعبے وچ کوئی تجربہ وی نہیں ۔اخبار موجب ترونجاہ سالاں دے آصف علی زرداری نے انٹرویو دی اک عرضی رد کر دتی سی پر اوہناں دے ترجمان فرحت اللہ بابر موجب صدر حکومت وچ چنگے لوکاں نوں لیاون دی کوشش کر رہے ہین۔ اوہناں نے اوہناں ولوں کسے دے خلاف مندا بولن دے الزام توں وی انکار کیتا۔

صدر دے پھڈے والے فیصلیاں وچوں اک سوات وچ طالبان دے نفاذ شریعت دی منگ ساہمنے نیونا وی ہے۔ ایس معاہدے نے امریکہ نوں وی حیران کر دتا جنہوں ڈر ہے جو طالبان ایہدے توں فیدا چک سکدے نیں۔ صدر زرداری اپنی گھر والی دے قتل توں مگروں اچن چیتی پاکستان دے تگڑے سیاستدان دے طور تے ابھر کے ساہمنے آئے۔ پچھوکڑ وچ اوہ پولو لئی اپنے چاہ تے بے ایمانی دے کارن مشہور سی۔نویں سروے موجب اوہناں دی مقبولیت گھٹ ہوئی ہے تے ہن ایہہ گذریل صدر مشرف جنی ہو گئی ہے۔

اپنے ہی چنے ہوئے وزیر اعظم دے نال وی سرکاری اہلکاراں موجب صدر دے سانگے حالیں خراب ہو گئے نیں۔ وزیر اعظم یوسف رضا گیلانی دے نیڑلے سنگیاں دا کہنا ہے وزیر اعظم صدر ولوں اپنے اختیار گھٹاون وچ کویل توں غصے ہین۔ اخبار موجب ممبئی دھاڑیاں دی پن چھان تے پاڑ دے کارن مشیر قومی سلامتی محمود درانی دی معطلی ایسے سلسلے دی کڑی ہے۔ محمود درانی اخبار موجب زرداری دے واہوا نیڑے سی۔پر فرحت اللہ بابر کسے پاڑ نوں نہیں من دے۔

اخبار موجب آصف علی زرداری نے ثابت کیتا ہے جو اوہ پالیسیاں وچ بدلیاں تے راضی ہین جیہدی فوج دے پردھان جنرل اشفاق پرویز کیانی مخالفت کردے نیں۔نومبر وچ زرداری نے اعلان کیتا جو پاکستان اپنے ایٹمی ہتھیاراں دے ورتن وچ پہل نہیں کرے گا۔ ایہہ اعلان فوج دے موقف تے اوہدی حکمت عملی توں الٹ سی جیہدے موجب خطے وچ اُچیچا ہندوستان دے نال طاقت دا توازن برقرار رکھیا جاوے تے ایسے کارن فوجی قیادت نے اہنوں پسند نہیں کیتا۔

زرداری اپنے صدارتی محل توں گھٹ ہی باہر جاندے نیں تے جدوں اوہناں اپنے محل توں باہر جانا ہووے تے اسلام آباد اک ریڈزون بن ایریا بن جاندا ہے سڑکاں دی ٹریفک نوں پلس چیک پوائنٹس تے سیمنٹ دیاں چوکیاں بنا کے روک دتا جاندا ہے۔ عیداں تے مقامی مسیت وچ جا کے نماز پڑھن دی ریت وی مکا دتی گئی ہے۔ زرداری تے اُچ پدھری پربندھیاں نے ایس سال وڈی عید دی نماز اپنے صدارتی محل وچ پڑھی۔

صدارتی ترجمان دا کہنا ہے سیکورٹی پاروں زرداری اپنے آپ نوں ریڈ زون تیکر محدود رکھدے نیں تے اوہناں دی پوری کوشش ہوندی ہے جو اوہ اپنے محل دے وچ ہی عام شہریاں تے مقامی سیاستداناں نال ملن۔ اخبار موجب پربندھی کہندے نیں زرداری دا ورتارا لوکاں نوں اُس پاسے کھڑ رہیا ہے جتھے اوہ زرداری دے نال کم نہ کرن دی کوشش کرن گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels