Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> گجیاں اطلاعواں نے ' مرکز ' نوں ڈرا دتا

گجیاں اطلاعواں نے ' مرکز ' نوں ڈرا دتا

وچار ڈیسک
February 27th, 2009

پاکستان پیپلز پارٹی دے شریک چیئر مین تے صدر پاکستان آصف علی زرداری ولوں صوبہ پنجاب وچ گورنر راج نافذ کرن دا اک بوہت وڈا کارن مسلم لیگ نون دی متحدہ قومی موومنٹ تے مسلم لیگ قاف نال اچن چیتی نیڑتا دسی جاندی ہے۔ متحدہ قومی موومنٹ نال اک دھاکے تیکر سیاسی ویر توں مگروں میاں شہباز شریف دی اک ہفتے توں وی گھٹ چر وچ دو واری گورنر سندھ ڈاکٹر عشرت العباد نال ملنیاں تے مسلم لیگ نون دے وڈے سیاسی مخالف چودھری برادران نال اوہناں دیاں ملنیاں نے پیپلز پارٹی دی قیادت نوں ڈرا دتا تے اوہناں نوں اپنی سیاسی حیاتی بچاون لئی ایہہ وڈا پیر پٹن تے مجبور کر دتا۔

پیپلز پارٹی دے وسیلیاں دا کہنا ہے جو صدر آصف علی زرداری نوں چین دے دورے وچ اپنے اک اتبار والے انٹیلی جنس افسر توں ایہہ پتہ لگیا میاں نواز شریف نے جتھے مسلم لیگ قاف نال رل کے پنجاب وچ اپنی حکومت مضبوط کرن دا منصوبہ بنایا ہے اوتھے اوہنے ایم کیو ایم دے نال رل کے مرکز وچ وی اپنی حکومت بناون دی گجی کوشش وی شروع کر دتی ہے۔

قومی اسمبلی وچ مسلم لیگ نون مسلم لیگ قاف تے ایم کیو ایم دے رکناں دی گنتی اک سو ستر دے نیڑے بن دی ہے۔ جدوں کہ مرکز وچ حکومت بناون لئی اک سو بہتر رکناں دی لوڑ ہے تے تناں جماعتاں دے اکٹھے ہوون توں مگروں فاٹا دے باراں رکناں تے ہور آزاد رکناں دی اوہناں لئی حمیت لینا تے حکومت بناونا کوئی اوکھا کم نہیں ہے۔

ایم کیو ایم نوں مسلم لیگ نواز اک فاشسٹ ستھ تے فوجی آمر دی حمیتی جماعت کہندی رہی ہے پر میاں شہباز شریف نے ستاراں فروری نوں اچن چیتی کراچی وچ ایم کیو ایم دے گورنر ڈاکٹر عشرت العباد نال ملنی کر کے سیاسی جتھیاں وچ اک نویں بحث چھیڑ دتی پئی اخیر اچن چیتی مسلم لیگ نون دی قیادت نوں انج دی کیہہ مجبوری پیش آئی کہ اوہ آپوں ٹر کے ایم کیو ایم دے کول گئی؟

جدوں چویہہ فروری دی شام نوں گورنر عشرت العباد نے لہور آکے میاں شہباز شریف نال ملنی کیتی تے ایہدے بارے کئی گلاں ہونیاں شروع ہو گئیاں پئی ایہہ کسے وڈے طوفان دی تیاری ہو سکدی ہے۔ ویہہ فروری نوں چودھری شجاعت دی ماں تے پرویز الٰہی دی سس دے چلانے تے میاں نواز شریف تے شہباز شریف دا چودھری برادران دے نال ہرکھ لئی جانا وی پیپلز پارٹی دے آگواں لئی خطرے دی گھنٹی توں گھٹ نہیں سی۔

پیپلز پارٹی دے اک وڈے آگو دا دعویٰ ہے کہ صدر آصف علی زرداری نے میاں شہباز شریف نال جدوں ڈیڈھ مہینہ پہلوں ملنی کیتی سی تے اوہناں نوں صلاح دتی سی کہ اوہ وکیلاں دی تحریک توں اپنے آپ نوں وکھ کر لین اوہناں موجب صدر پاکستان نے ایہدے بدلے وچ پنجاب دا گورنر بدلن تے حکومت ولوں سپریم کورٹ وچ میاں برادران دی نااہلی رکوان دی کوشش کرن دی پک کروائی سی،
پر اوہناں موجب جدوں مسلم لیگ نون دی قیادت نے پنجاب حکومت وچ رہندیاں ہوئیاں وکیلاں دے لانگ مارچ نوں سرکاری
سرپرستی وچ اسلام آباد گھلن دی تیاری شروع کر دتی تے ایہدے نال نال مرکز وچ وی حکومت سازی لئی گجیاں کوششاں شروع کیتیاں تے پھیر پیپلز پارٹی دے کول میاں برادران دی سپریم کورٹ وچ حمیت نہ کرن تے گورنر راج نافذ کرن توں وکھ کوئی حل نہیں سی۔

اطلاعواں موجب مسلم لیگ قاف دے پردھان چودھری شجاعت حسین مسلم لیگ نال تعاون دے چاہوند ہین جدوں کہ پرویز الٰہی پیپلز پارٹی دے نال اتحاد نوں ترجیح دیندے ہین پرویز الٰہی دا خیال ہے جے اوہ مسلم لیگ نون دے نال تعاون کردے ہین تے اک سیاسی جماعت دے صدر دی اوہناں دی حیثیت ہولی ہولی مک جاوے گی۔

خورے ایہو کارن ہے جو چودھری شجاعت نوں پہلوں اطلاع دتے بنا پرویز الٰہی اپنے پتر مونس الٰہی دے نال صدر آصف علی زرداری دے نال گجیاں رابطے وچ رہے تے جدوں میاں نواز شریف چودھری شجاعت حسین نال ملے تے اوہناں تے دبا ودھیا تے اوہناں نے ملک دے صدر نوں اخیرلا موقع دتا کہ جے اوہناں نال اتحاد کرنا ہے تے ہنے نہیں تاں کدی نہیں۔'

پیپلز پارٹی دے وسیلیاں دا کہنا ہے ایم کیو ایم حکومت دا حصہ ہوندیاں ہوئیاں وی اوہناں توں دلی طور تے ایس لئی خوش نہیں ہے کہ جیویں اوہ اپنی سیاسی مخالف ایم کیو ایم حقیقی دی قیادت دے خلاف ہور مقدمے بناون دی چاہوند ہے پیپلز پارٹی اوہدے وچ مدد نہیں کر رہی تے صوبہ سندھ وچ ایم کیو ایم نوں مرضی موجب حالی وزارتاں نہیں مل سکیاں۔

کجھ ماہراں دا خیال ہے جو آصف علی زرداری ظاہر وچ تے میاں نواز شریف نوں وڈا بھرا کہندے نیں پر اوہناں دے بنائے ہوئے مقدمیاں وچ نو سال قید، کراچی جیل وچ اوہناں نوں قتل کروان دی کوشش تے جیبھ وڈھن دی کوشش سنے جیہڑی مارا مار ہوئی اوہ اوہنوں حالی تیکر بھلا نہیں سکے۔

پیپلز پارٹی دے کول ہن اکو ہی راہ ہے جو اوہ مسلم لیگ قاف نال رل کے پنجاب وچ حکومت بنائے تے مرکز وچ وی تعاون کرے۔ انج اوہناں دی منگ پنجاب دی وزارت اعلیٰ مونس الٰہی نوں دینا یاں سینٹ دا چیئر مین چودھری شجاعت حسین نوں بناون دی ہووے گی۔

دوہواں صورتاں وچ پیپلز پارٹی دی اوکڑ ایہہ ہے جو اوہ پنجاب وچ اپنا وزیر اعلیٰ بنا کے اک ہی ویلے وچ چواں صوبیاں وچ اپنی جماعت دی پردھانی چاہندی ہے۔ پر انج جے اوہ سینٹ دی چیئر مین شپ چودھری شجاعت حسین نوں دیندی ہے تے آئین موجب قائم مقام صدر سینٹ دا چیئر مین بن دا ہے تے جدوں اسمبلی توڑن دا اختیار صدر دے کول ہووے تے انج اوہ چودھری شجاعت تے کیویں اتبار کرسکدی ہے؟ بہرحال ایس بارے دوہویں آپشن کھلے ہین تے کسے وی گل تے مک مکا ہوسکدا ہے۔



مسلم لیگ قاف دے پیپلز پارٹی نال اتحاد دی صورت وچ اوہناں دے کجھ لوک اوہناںنوں چھڈ کے مسلم لیگ نون وچ رل سکدے ہین پر پرویز الٰہی نوں اک فیدا ایہہ ہووے گا جو اوہناں دی وکھری سیاسی پچھان برقرار رہوے گی۔ جدوں کہ مسلم لیگ نون لئی انگریزی اکھان موجب ' کرو یاں مرو ' والی صورتحال ہے تے اوہ کسے وی قیمت تے زرداری دے کھیڈ دی بازی پلٹن دی کوشش کرے گی۔ ایس صورت وچ اوہدے لئی وکیلاں دے نو مارچ دے ایس لانگ مارچ تے سولاں مارچ دے دھرنے نوں کامیاب بناونا اوہناں لئی اک بوہت وڈا امتحان ہووے گا۔ ظاہر وچ لگدا ہے جو ملک دے مستقبل دا سیاسی منظر مارچ دے وچکار ہی ظاہر ہووے گا تے ایہہ گویڑ لاونا ایس ویلے سوکھا ہووے گا کہ اوٹھ کیس کروٹ بیہہ رہیا ہے۔

بی بی سی دے شکریے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels