Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> خالد حسن : کجھ یاداں کجھ گلاں

خالد حسن : کجھ یاداں کجھ گلاں

اکمل علیمی
February 11th, 2009

میری تے خالد حسن دی یاری پروگریسو پیپرز لمیٹیڈ لہور دی نوکری دے زمانے توں ہوئی۔ اسیں دوہواں نے اک دوجے نوں کدی بوہت تعظیم نال نہیں سی سدیا۔ میں اُنی سو چھونجاہ وچ ایس ادارے دے اردو اخبار ' امروز ' نال جڑیا سی اوہ اُنی ستاٹھ وچ انگریزی اخبار ' پاکستان ٹائمز ' دے رپورٹر دی پکھ توں آیا۔

اوہدے وچ صحافت دے جراثیم مڈھوں ہی سی۔ ایہو کارن ہے جو پہلوں اوہنے لارنس کالج گھوڑا گلی وچ پڑھاونا شروع کیتا پھیر انکم ٹیکس سروس دی نفعے والی نوکری نوں لت ماردی۔

اخباراں نے پریس ٹرسٹ دے نیش پرچھاویاں وچ اپنی ویہویں سالگرہ منائی۔ ہن ساڈا بوہتا زور فنون لطیفہ تے سی۔ میں فلمی موسیقی تے خواجہ خورشید انور دا انٹرویو کیتا تے خواجہ ہوریں کوئی ساز وجاونا نہیں جاندے۔ جدوں پچھیا گیا تسی گیت دی دھن کیویں بناوندے اوہ تے اوہناں نے ماچس تے انگلیاں وجاندیاں ہوئیاں کہیا '' انج ''۔ اودوں فلم گھونگھٹ بن رہی سی جیہدی گائیکی سارے ملک دی رگ رگ وچ سما گئی۔ خالد حسن نے ایہہ گل سنی تے کہیا اک انقلابی توں جنہوں انگریزی عدالت نے موت دی سزا دتی سی ہور کیہہ آس کیتی جاسکدی ہے۔

اج وی بوہت گھٹ لوک جاندے نیں کہ خواجہ خورشید انور وی مشہور شہید آزادی دے سنگیاں وچوں سی تے اوہناں نوں وی سزائے موت ہوئی سی جیہڑی اپیل تے کینسل کر دتی گئی سی۔

میں پچھیا تیرا انٹرویو کیویں دا رہیا تے خالد بولیا بوہت چنگا پر ملکہ ترنم دے بیان نوں انگریزی وچ کرنا بوہت اوکھا ہے۔ میں پچھیا مثلاََ تے اوہ بولیا، بی بی کہہ رہی سی جدوں میں کسے سوہنے جوان نوں ویکھنی آں تے مینوں اوہ چنگا لگدا ہے تے میریاں ہڈیاں وچ اچوائی ہوون لگدی ہے۔ خالد حسن نے انٹرویو وچ ایس جملے نوں انج لکھیا:
I have a funny feeling under my bones .

خالد سیالکوٹ وچ پلے تے اوتھے ہی مرے کالج توں انگریزی ادب وچ تعلیم لئی۔ اوہ سیالکوٹ دے کرداراں نال بڑی لگن رکھدے سی تے کئی وار اوہناں دے بیان نقل کردے ہوندے سی۔ اوہناں وچ بین الاقوامی انصاف دے جج تے پاکستان دے پہلے وزیر خارجہ چودھری ظفراللہ خان توں لے کے فضلو نائی تیکر سارے رلتی سی۔

پاکستان وچ روایتی طور تے انگریزی دے صحافی مغرور رہے ہین پر میں خالد حسن نوں ہمیش بزرگ صحافیاں دا فین ہی ویکھیا تے انگریزی توں ودھ صحافت بارے فکر مند رہے۔ ایہو کارن ہے تسی اوہناں دی ویب سائٹ تے چراغ حسن حسرت دی اک گل ویکھدے او جیہدے وچ اوہ پڑھن والیاں نوں تاکید کردے ہین کہ صحافیاں دیاں گلاں تے بوہتی توجہ نہ دیو کیوں جو سویرے جیہڑے کاغذ تے اوہ لکھدے نیں اُس وچ شامی مچھلی لپیٹ کے ویچی جاندی ہے۔

حسرت دی گل نوں اپنی ویب سائٹ وچ سجاون دے مگروں وی خالد نے صحافت نوں عبادت جانیا۔ پاکستانی اخباراں لئی کم کرن والے چنگے صحافیاں وانگوں ڈیڈ لائن دو وجے دوپہروں مگروں سی جیہڑا پاکستان وچ اخبار دی کاپی پریس جاون دا ویلا ہے۔ اودوں تیکر اوہ فون یاں کمپیوٹر تے ہوندے سی تے جے کوئی گپ شپ لئی فون کردا سی تے اوہنوں جھاڑاں پاوندے سی۔

اوہناں دا اک سنگی جیہڑا کہ اک وکیل ہے تے صحافیاں نال چنگے سانگے رکھن دے مگروں وی اوہناں دی ڈیڈ لائن دا خیال نہیں رکھدا سی انج دی ہی اک ڈانٹ کھا کے چپ ہورہیا تے دوہواں وچ اخیرلے ویلے تیکر پھیر گل نہیں ہوئی پر اوہ دوہویں اک دوجے دیاں خوبیاں دی قدر کردے سی۔

جنوری دے شروع وچ اوہناں مینوں فون کیتا تے دسیا کہ میرا معالج اک پاکستانی امریکی ہے میری تکلیف تے توجہ نہیں دیندا پاکستان دے سیاسی حالات تے وچار وٹاندرا کردا رہندا ہے وونیتا واہوا چر توں ڈاکٹر بدلن دی صلاح دے رہی ہے لگدا مینوں اوہدی گل من لینی چاہی دی ہے۔ توں مینوں ڈاکٹر '' خ '' کول لے چل کیوں جو میں ہن ڈرائیو کرن جوگا نہیں رہیا۔ ایہہ ڈاکٹر پیشے وچ سنجیدہ تے صحافیاں دا مدد گار ہے۔

میں اوہنوں گھرتوں کوئی پنجاہ میل دور میری لینڈ وچ لے گیا تے اوہدا طبی معائنہ کروایا میں ہر دوجے دن جاندا تے خالد نوں چک کے کدی کسے لیبارٹری وچ تے کدی کسے سپیشلسٹ دے دفتر وچ لے جاندا سی۔وونیتا آئے دن اک بیلی نوں جیہڑا آپوں وی بمار سی لمی ڈرائیونگ دی تکلیف دیون دے خلاف سی تے ایہہ اوہناں دا کلچر سی پر خالد حسن اپنے تے میرے کلچر موجب جدوں چاہندا مینوں کال کردا سی تے جتھے اوہ جانا چاہندا سی میں اوہنوں کھڑ دا سی پر واپسی تے اسیں کئی وار بروک فیلڈ پلازا کھلوندے سی تے چٹ پٹے کھانے کھاندے سی۔

ویہہ جنوری نوں میں اوہنوں میری لینڈ وچ اک دل دے ماہر دے کول کھڑنا سی پر اک دن پہلوں میاں بیوی دوہواں دی طبیعت بوہتی خراب ہوئی تے اوہ ایمرجنسی نوں کال کر کے فیر فیکس ہسپتال جا اپڑے۔ وونیتا نے خالد دے حکم تے ہن تیکر نیانیاں نوں اطلاع نہیں سی دتی پر ہسپتال دے بسترے توں اوہنوں نے جیفری نوں کیلے فورنیا تے جہان نوں فلوریڈا فون کر دتا تے اگلے دن اوہ ماں پیو دے کول اپڑ گئے۔ ویہہ جنوری نوں وونیتا نوں تے چھٹی مل گئی پر خالد دا علاج شروع ہو گیا۔

میں ستاراں دن دے وچ اک پہاڑ توں ڈھیندیاں ہوئیاں ویکھیا۔ دارالہدی اسلامک سینٹر سپرنگ فیلڈ ورجینا وچ ست فروری نوں خالد حسن دے سنگیاں نے اوہناں نوں وداع کیتا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels