Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> خالد حسن : اک بوہت وڈے لکھاری تے صحافی سن

خالد حسن : اک بوہت وڈے لکھاری تے صحافی سن

عارف وقار
February 6th, 2009
5 / 5 (1 Votes)

پاکستان دے منے پرمنے صحافی لکھاری خالد حسن چھ فروری دی سویرے امریکی ریاست ورجینیا وچ چلانا کر گئے نیں۔ لہور وچ وسنیک اوہناں دے بھرا مسعود حسن نے دسیا ہے کہ اُنی جنوری نوں نمونیے دی شکایت تے اوہناں نوں ہسپتال وچ داخل کرایا گیا سی پر خون دے کئی ٹیسٹ کرن تے کینسر دا پتہ لگیا جیہڑا کہ اپنے اخیرلے مرحلے وچ داخل ہو چکیا سی۔

چھ فروری نوں اوہناں نوں خصوصی ٹیسٹ لئی اک ہور ہسپتال وچ گھلن دی تیاری ہورہی سی پر فرشتہ اجل نے ایہدا موقع ہی نہیں دتا۔ اوہناں سوگواراں وچ اپنی امریکی بیوی وینیتا حسن اک پتر جیفری حسن تے اک دھی جہان حسن چھڈی ہے۔

خالد حسن سن اُنی سو چوتی وچ سری نگر وچ جمے۔ سکول دی تعلیم جموں توں لئی جتھے اوہناں دے پیو ڈاکٹر نور حسین محکمہ صحت وچ ڈپٹی ڈائریکٹر سی۔ خالد حالی نویں جماعت وچ سی کہ ونڈھ دا رولا پیا تے کشمیر دی جنگ شروع ہو گئی۔ سن اُنی سو اڑتالی وچ خالد حسن نے میٹرک دا امتحان پاس کیتا۔

اوہناںنے اُنی سال دی عمر وچ مرے کالج سیالکوٹ توں ایم اے انگریزی کر لیا تے جدوں اسلامیہ کالج لہور وچ انگریزی پڑھاونی شروع کیتی تے اپنے کئی شاگرداں نوں عمر وچ آپنے آپ توں وڈا پایا۔ مگروں اوہ مرے کالج سیالکوٹ تے لارنس کالج گھوڑا گلی وچ وی انگریزی زبان تے ادب نال جڑے رہے۔ سن پچاسی دے دھاکے وچ اوہ مقابلے دا امتحان دے کے انکم ٹیکس افسر بن گئے پر اوہناں موجب ' نہ تے مینوں ایس کم توں کوئی سواد سی تے نہ ہی پیسہ اکٹھا کرن دا شوق سی۔ ایس لئی چھیتی ہی نوکری چھڈ دتی۔

بوہت گھٹ لوکاں نوں پتہ ہے جو سن اُنی سو سٹھ دے نیڑے نیڑے ریڈیو پاکستان دی اصلاح لئی جیہڑی براڈ کاسٹنگ کمیٹی بنائی گئی سی خالد حسن ایہدے سیکرٹری سی۔ لکھنا لکھاونا اُنی سو ستاٹھ وچ ہویا جدوں اوہناں نے آئی ایچ برنی دے رسالے '' آؤٹ لک '' وچ کالم نگاری شروع کیتی۔ صحافت دا ماحول اوہناں نوں بڑا راس آیا تے ایسے زمانے وچ اوہناں نے انگریزی روزنامے پاکستان ٹائمز وچ سینئر رپورٹر دی نوکری کر لئی تے ہفتے وار کالم
OF THIS AND THAT وی لکھنا شروع کر دتا۔صحافیانہ حیاتی دے شروع وچ ہی انگریزی کالماں دے دو مجموعے A mus's game تے The Crocodiles are here to swim آگئے سی۔

1972 دے شروع وچ خالد حسن اک انج دے سوادی عہدے تے لگے جیہدیاں سوہنیاں یاداں اخیرلے دناں تیکر اوہناں دے نال رہیاں تے جنہاں دا ذکر اوہ یاراں بیلیاں وچ ہی نہیں سگوں اپنے کالماں وچ وی کردے رہے۔ ایہہ عہدہ سی ذوالفقار علی بھٹو دے پریس سیکرٹری دا۔ بھٹو ہوریں اودوں پاکستان دے صدر سی۔ حامد بلال دے نال رل کے خالد حسن نے بھٹو ہوراں دیاں تھاں تھاں کھلریاں ہوئیاں لکھتاں نوں جمع کرنا شروع کیتا تے تناں جلداں دی شکل وچ اہناں لکھتاں نوں لکھیا۔
فارن سروس وچ رلتی ہوون توں مگروں اوہ پنج سال تیکر پیرس اوٹاوہ تے لندن وچ کم کردے رہے پر اُنی سو ستتر وچ ضیاء الحق دا مارشل لاء آیا تے اوہناں نے لندن وچ پریس کونسلر دے عہدے توں روس وکھالے لئی استعفیٰ دے دتا تے لندن ہی وچ تھڑڈ ورلڈ فاؤنڈیشن دے رسالے ' ساؤتھ ' دے ایسوسی ایٹ ایڈیٹر بن گئے۔

1979 توں 1990 تیکر اوہ ویانا وچ تیل پیدا کرن والے ملکاں دی ستھ اوپیک دی نیوز ایجنسی دے ایڈیٹر رہے۔ نوکری دی حیاتی وچ ایہہ پہلا چنگا دور سی جدوں تھوڑی جئی محنت کر کے اوہناںنوں چنگی تنخواہ تے وادھو سوکھتاں ملدیاں سی۔ خوشحالی تے ویہلے رہن دے اہناں ہی دناں وچ خالد حسن نے اردو دے بوہت سارے ادبی شہ پاریاں نوں پڑھیا تے سعادت حسن منٹو دیاں کہانیاں دا انگریزی ترجمہ کرن تے لک بنھ لیا۔ترجمیاں دا ایہہ سلسلہ کئی ورہے جاری رہیا۔ کہانیاں توں وکھ اوہناں نے منٹو دے لکھے ہوئے شخصی خاکیاں تے منٹو دے مضموناں نوں دو ہزار اک وچ اسلام آباد دے اشاعتی ادارے الحمرا نے اک جلد وچ کر دتا جیہدا عنوان سی
A wet Afternoon

لہور وچ خالد حسن نال اوہناں دی اخیرلی ملنی دو ہزار چھ وچ ہوئی جدوں اوہ اپنی کتاب '
O city of lights ' دی مکھ وکھالی لئی ایتھے آئے سی ایہہ کتاب فیض احمد فیض دیاں نظماں دے ترجمیاں دیاں سی۔

خالد حسن دی حیاتی دا بوہت سارا حصہ یورپ تے امریکہ وچ لنگھیا پر اوہناں کسے زمانے وچ وطن توں رابطہ نہ توڑیا۔ سن ستر دے دھاکے وچ اوہ باہرلے ملکوں لہور دے ہفت روزے ویو پوائنٹ لئی کالم گھلدے رہے۔ ایہدے توں مگروں اوہ نیشن دی نیوز تے ڈان لئی وی لکھدے رہے۔

موت توں کجھ دیہاڑ پہلوں تیکر اوہ ڈیلی ٹائمز وچ کالم لکھدے رہے سی جنہاں دا اردو وچ روپ روزنامہ اجکل تے ہفت روزہ ہم شہری وچ وی چھپ دا سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels