Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> فیچرز >> ممبئی وچ پھڑے دہشت گرد دے ناں کھلی چٹھی

ممبئی وچ پھڑے دہشت گرد دے ناں کھلی چٹھی

ابھے سنگھ
December 19th, 2008

پیارے پتر اجمل،
میں پورا سوچ سمجھ کے تینوں پتر کہہ کے بلا رہیا ہاں۔ اس دا مطلب تیرے کارے دی سلاہنا بالکل نہیں۔ اس دی پہلی وجہ تاں عمراں دا فرق ہے۔ دوجی ایہہ کہ تیرا پیو وی میرے ورگا ہووے گا تے میری طرحاں ہی تیرے کماں توں دکھی۔ تیجا ایہہ کہ میرا پتر وی ایسے رستے نہ پے جاوے، کوئی گارنٹی نہیں دے سکدا۔ موتاں دے وپاری اوہ وی بندے ویکھ رہے ہاں جیہناں بارے کسے سوچیا وی نہیں سی۔ خورے اک کارن ایہہ وی ہووے کہ توں پنجابی ہیں۔ مذہباں تے سیاستاں نے کوئی وی لکیراں کھچیاں ہون اسیں پنجاں دریاواں دی اکو دھرتی دے جائے ہاں۔ مینوں ایہہ جان کے دکھ ہویا کہ تیرے باقی سنگی وی پنجابی ہن۔ تیری عمر والیاں نے تاں نہیں پر پنجاب دی مٹی نے فرقو قتل وغارت دا اوہ منظر ویکھیا ہے جس دی دنیا وچ کوئی مثال نہیں۔ گھٹو گھٹ سانوں تاں توبہ کر لینی چاہیدی ہے۔

شروع شروع وچ تیرے ناں نال قصاب لگا سن کے دھکہ جیہا لگا کہ توں کنا بھیڑا تخلص رکھیا ہے۔ پر پھیر پتہ لگا کہ تیرے والے پنجاب وچ ناواں نال ذاتاں جوڑن دا رواج اجے وی چل رہیا ہے۔ ایہہ بہت غلط رواج ہے۔ اخباراں تے ٹی وی اُپر تینوں بار بار قصاب کہہ کے بلایا جانا بھیڑا لگدا ہے۔ اس لئی میں تینوں صرف اجمل ہی کہاں گا۔

اخباراں وچوں پڑھ رہیا ہاں کہ ممبئی پولیس چوکسی ورت رہی ہے کہ توں خودکشی نہ کر لویں۔ میں پہلی گل ایہی کہنی چاہوندا ہاں کہ توں نہتیاں نوں جانوں مار کے پہلاں ہی اک پاپ کما لیا ہے۔ ہن آپنی جان لے کے اک ہور تے وڈا پاپ نہ سہیڑ لویں۔ جو کجھ توں ہن تک کیتا، بھاویں بہت اوکھا سی، پر اوہ بہادری نہیں سی۔ تیرا بہادری دا امتحان ہن ہے جس نوں زندہ رہ  کے ہی پاس کر سکدا ہیں۔ مرنا بزدلی ہووے گی۔

مینوں تیرے سنگیاں دے مارے جان دا دکھ ہے پر جیہناں نے ماریا غلط نہیں کیتا۔ اس دھرتی تے انسان نوں جانو مارن توں وڈا کوئی گناہ نہیں تے انسانی جاناں بچاؤن توں وڈا کوئی پُن نہیں۔ ممبئی واردات دے موقعے پولیس تے فوج دے سپاہیاں دا اصل مقصد تہانوں مارنا نہیں معصوم تے بے گناہ لوکاں دیاں جاناں بچاؤنا سی، جو تہانوں مارے بناں نہیں سن بچائیاں جا سکدیاں۔

منیا کہ وڈے جوکھم چک کے تے دو ملکاں دیاں سرکاراں دے اکھیں گھٹا پا کے تسیں بیگانے شہر ممبئی پہنچے پر ایتھے آ کے کیتا کیہ؟ تسیں بے قصور، انجانے تے نہتے مسافراں نوں بناں کارن دسے گولیاں نال بھن رہے سو۔ دوجے پاسے حفاظتی دستے دے بندے اوہناں دیاں جاناں بچاؤن دی خاطر تہاڈا، ہتھیار بند قاتلاں دا، مقابلہ کر رہے سن۔ صرف ہورناں دیاں جاناں بچاؤن دی خاطر آپنیاں جاناں وارن والے ہی شہید دا درجہ لے سکدے ہن، دوجیاں نوں ماردے ہوئے آپ مارے جان والے نہیں۔ جے رب ہویا تے اوداں دا ہویا جس طرحاں اوس دی تعریف کرن والے دسدے ہن تاں اوس دی درگاہ وچ تسیں گناہگار ہوووگے تے حفاظتی دستے والے اوس دے خدمتگار۔ سنیا ہے کہ تہانوں جنت دا لارا دتا جاندا ہے پر جے واقعی ہی نیکی تے بدی نال ہی جنت تے دوزخ دا فیصلہ ہوندا ہویا تاں تیرے سنگیاں نوں جنت دے دیدار نہیں ہو سکدے۔

تیرے شروعاتی بیان دسدے ہن کہ تساں ایہہ سبھ کجھ گجرات وچ مسلماناں دے قتلام دا بدلہ لین لئی کیتا ہے پر کیہ تساں پتہ کر لیا سی کہ جیہناں نوں جانو مار رہے ہو ایہہ اوس قتلام وچ رلتی سن۔ تساں اوہ بندے وی مارے جو گجرات قتلاں دی نندا کرن والیاں وچ سن۔ تسیں مسلماناں دے خدمتگار ہون دا دعویٰ کردے ہو پر ممبئی دے حملے وچ تہاڈے ہتھوں مرن والے نہتے لوکاں وچوں چالیہہ مسلمان سن۔ خورے تینوں پتہ نہیں ہونا کہ اس ملک وچ بہت لوک ہن جو گجرات دے دنگیاں دی نہ صرف نندا کردے ہن، پیڑت لوکاں نوں راحت، ملزماں نوں سزاواں تے اجیہی قتل وغارت کدھرے نہ ہون دین لئی جدوجہد کردے ہن۔ ایہناں وچ سبھ دھرماں دے لوک رلتی ہن۔ تہاڈی کاروائی نال ایہناں لوکاں دیاں اوکڑاں ودھیاں ہن۔

جو کجھ توں تے تیرے سنگیاں نے کیتا ایہدے نال صرف گجرات دے قاتلاں نوں ہی خوشی ہوئی ہو سکدی ہے تے سبھ توں ودھ دکھ ایتھوں دے مسلماناں نوں ہویا۔ بدقسمتی نال ساڈے ملک وچ وی وکھ وکھ ناواں والے لشکر طیبہ ہن جو دہشت گردی نال لڑن دے ناں تے مسلماناں خلاف نفرتاں پیدا کردے ہن۔ ساڈے ملک وچ وی ایسے لوک ہن جو تیرے تے تیرے سنگیاں دی طرحاں ہی بھارت تے پاکستان وچ لڑائی چاہندے ہن۔ دوہاں ملکاں وچالے چلدی ریل گڈی نوں ادھر ایہہ بند کرواؤنا چاہندے ہن تے اودھر تیری ٹیم والے۔ دلی توں لہور جاندی بس تے ادھر شو سینا نے پتھر مارے تے اودھر لشکر طیبہ نے تے اوہ وی اکو دن۔ کیہ تسیں ایہہ کم آپس وچ صلاح مشورہ کر کے کردے ہو؟

اک آخری سوال میرے توں ایہہ پچھیا جا سکدا ہے کہ جے میں تینوں پتر آکھیا ہے تاں کیہ میں تیری لمی زندگی واسطے دعا وی کراں گا۔ میرا جواب ہاں وچ ہے۔ توں دو سو بندیاں دیاں زندگیاں ختم کرن وچ ہتھ وٹایا ہے، جے وس چلدا تاں کئی دو سو ہور مارن دا ارادہ سی۔ تیرے ہتھ معصوماں دے خون نال رنگے ہن۔ تینوں اس گناہ دی سزا ضرور ملنی چاہیدی ہے۔ صرف تیرے کرکے نہیں، میں کئی سالاں توں دنیاں بھر وچوں پھانسی دی سزا ختم کرن واسطے جدو جہد کر رہیا ہاں۔ میں سمجھدا ہاں کہ پھانسی وی قتل ہے تے اج دے انسانی دور وچ بندے ہتھوں بندے دا قتل، قاتل دا قتل وی پاپ ہے۔

میں تیری لمی عمر تے اونی ہی لمی سزا دی منگ کراں گا۔ اینی لمی کہ جدوں کدے موت تیرے تک پہنچے تاں تینوں اک سچے انسان، اک سچے مسلمان دی شکل وچ ویکھے، دہشتگرد دی شکل وچ نہیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels