Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> مُل دی تینویں >> وینا ورما : پچھلا دروازہ

وینا ورما : پچھلا دروازہ

وینا ورما
April 25th, 2008
5 / 5 (4 Votes)

اج پنجویں وار گیتا ایس کلینک وچ آئی سی۔ شائد چھیویں وار۔۔۔ نہیں شائد۔۔۔۔ اوس نوں پکا یاد نہیں آرہیا کہ اوہ پہلاں کنی وار ایس کلینک وچ آئی ہے پر جدوں وی آئی ہے اک ہوک جیہی اوس دے اندروں نکلی ہے۔ اک اُداسی نے اوس نوں گھیریا ہے تے اوس دا جی کیتا ہے کہ اُچی اُچی وین پا پا کے رووے۔


ایس عمارت دے چپے چپے توں واقف ہے اوہ ۔ کتھے باتھ روم ہے، کتھے ٹوئلٹ ہے۔۔۔ کتھے آپریشن تھیٹر۔۔ کتھے کیہڑا کمرا تے کتھے کیہ۔ اوس نوں سبھ یاد ہے۔ باراں سالاں بعد وی ایتھے سبھ کجھ اوہی ہے' اوہی دروازے اوہی کندھاں' کندھاں تے اوہی پینٹ تے اوہی فرنیچر۔ شائد ڈاکٹر تے نرساں وی اوہی ہون۔


گیتا سٹنگ روم وچوں اٹھ کے پچھلے گارڈن وچ آکے بیٹھ گئی۔ گارڈن وچ کنی شانتی ہے۔ کنی خاموشی تے اپریل مہینے دی خوشگوار ہوا پر اوہ بے چین ہے۔ تازہ کھڑے گلاب دے پھل اوس نوں اپنے بچیاں دی یاد دلا گئے۔ جیویں ایہہ پھل اوس دے بچیاں دیاں قبراں تے لگے ہون۔ کول پئیاں کرسیاں تے بیٹھن دی بجائے اوہ بھنجے ہی زمین تے بیٹھ گئی۔


مٹی نوں ہتھاں وچ چکیا، چمیا تے مٹھیاں وچ گھٹ لیا۔ اوس دے دُھر اندروں کتے درد دی لہر جیہی اٹھی۔اوس نے لہر دا اک سرا پھڑلیا۔ ایس لہر دا دوجا سرا بہت دور ہے۔۔۔باراں سال دور۔۔۔۔ باراں سال بعد وی کوئی درد کدے اینی تبرنا نال اٹھ سکدا ہے ؟ اوہ بھلی نہیں سی اوس پیڑ نوں جو باراں سال پہلاں اوس دے جسم نے ہنڈھائی سی اتے من اج وی ہنڈھا رہیا ہے۔ کسے پل چین نہیں آیا۔


باراں سال پہلاں اوہ ایسے گارڈن وچ اوہ کرسی تے بے ہوش جیہی پئی سی۔ چار پنج گھنٹے پہلاں ہی اوس دا اپریشن ہو کے ہٹیا سی۔ نچوڑ کے سٹے کپڑے وانگ نرس نے اوس نوں کرسی تے لیا بٹھایا سی۔ '' تیرا کوئی وزٹر تینوں ملن آوے گا مسز۔۔؟ نرس نے پچھیا سی۔ '' نہیں میرا کوئی نہیں ہے میں اکلی ہاں۔'' اوس نے سر پچھے کرسی تے سٹدی نے کہیا تے اکھاں جھکا لئیاں سی۔


شائد ایس ڈر نال کہ نرس اوس دیاں اکھاں وچ اوس دا جھوٹھ نہ پھڑ لوے۔ اوس دا جھوٹھ کہ اوس دی اک دو سال دی بچی وی ہے جیس نوں اوہ دتہ انکل دے گھر اکلی نوں چھڈ کے آئی ہے۔ دتہ انکل جیہڑا اوس دا دھرم دا باپ ہے' اوس دا رہنما اوس دا ر کھشک (محافظ) تے اوس دا والی وارث مسز دتہ پچھلے تن مہینیاں توں انڈیا گئی ہوئی ہے۔ دھرم استھاناں دی یاترا تے۔ ہر سال اوہ چار مہینے لئی انڈیا دھرم استھاناں دی یاترا کرن جاندی ہے تے مسٹر دتہ پچھوں گھر وی سنبھالدا ہے تے بزنس وی۔ کنی بھگتن ہے مسز دتہ رب دی۔ دنیا دے لالچ چھڈ کے وراگن ہوئی اوہ سارا دن مندراں وچ کیرتن منڈلیاں نال گھمدی ہے۔ دان پُن کردی ہے تے آپنی اگلی درگاہ سوار رہی ہے۔


پہلے دن ہی گیتا دے من وچ مسز دتہ لئی ڈونگھا ستکار جاگیا سی جوں اوہ اوس دے گھر جوب انٹرویو دین گئی سی۔ جوب سینٹر والیاں نے اوس نوں مسٹر دتہ دے گھر بھیجیا سی۔ بوہا کھول کے مسز دتہ نے اوس نوں اندر بٹھا لیا سی۔


'' میرا نام کشلیا دیوی ہے۔ سارا دن پر بھو دی بھگتی وچ مگن رہندی ہاں۔ سوچدی ہاں جے ایسے جنم وچ پر بھو دے درشن کر لواں تاں ٹھیک ہے پھیر اگلے جنم وچ پتہ نہیں کیہڑی جون وچ پینا ہے۔ گھر بار دا کم ہن میرے توں نہیں ہوندا،بس پربھو دی بھگتی ہی چنگی لگدی ہے۔۔۔۔'' کشلیا دیوی اِکو ساہ کہہ گئی سی۔


گیتا نوں حیرانی ہوئی۔ اوہ تاں ایتھے جوب منگن آئی سی پر مسز دتہ اوس دا چاہ تے مٹھیائیاں نال سواگت کر رہی سی۔'' سبھ دے وچ بھگوان ہے۔۔۔ تیرے وچ وی مینوں اوہی نظر آؤندا ہے۔۔۔'' اوس نے گرم ناشتہ گیتا اگے رکھیا۔ گیتا نوں جوب مل گئی۔ بھاویں کلینر دی ہی سہی پر کنی چنگی عورت ہے گھر کافی وڈا سی۔ پنج بیڈ روم دا تن منزلا مکان۔ دویں میاں بیوی رہندے سن تے بچہ کوئی نہیں سی۔گھر وچ پورا شاہی ٹھاٹھ باٹھ سی پر ورتن والا کوئی نہیں سی۔


گیتا نے دو کو ہفتے کم کیتا۔ شروع وچ تاں مسز دتہ کافی خش رہی پر پھیر ہولی ہولی اوہ گیتا دے کم وچوں نگوچاں کڈھن لگ پئی، '' آہ ٹھیک نہیں۔۔۔ اوہ غلط ہے۔۔۔۔ فلانی چیز صاف نہیں کیتی۔۔۔ ہوور توڑ دتا۔گیتا دا من کئی وار اُکتایا پر اوس نوں بڑی مشکل نال کم ملیا سی۔ اوہ کسے حالت وچ وی کم نہیں چھڈنا چاہندی سی۔


'' توں اپنی نکی جیہی بچی نوں وی نال لے آوندی ہیں۔ کم کیہ سواہ کریں گی؟ ایہہ ٹیٹنی سارا دن روندی رہندی ہے۔ تینوں کیہہ کرن دیوے گی۔۔۔؟ کشلیا دتہ کھج نال بھر کے آکھدی۔


'' ایس توں کتھے چھڈاں آنٹی جی۔ میری سس تاں ایس دی شکل وی ویکھن لئی تیار نہیں ہے۔ تسیں فکر نہ کرو میں تہاڈا کم پورے دھیان نال کروں گی''، اوہ کشلیا دیوی دا ترلا لیندی پر اندروں ڈری ہوئی سی کہ پتہ نہیںکدوں اوس نوں کم توں جواب مل جاوے، پھیر اوہی سس دیاں گالہاں۔ گھر والے دی مار کٹ تے گھر دا کلیش۔ سوشل سیکورٹی اوس نوں کجھ دیندے نہیں سن کیوں کہ اوس دا پتی کماؤندا سی۔ پتی اوس نوں پچھدا نہیں سی کیوں کہ اوس نوں اوہ پسند نہیں سی۔


تے پھیر اچانک اک دن کشلیا دیوی نے اوس نوں دسیا سی کہ اوہ انڈیا جا رہی ہے۔ جے اوس نے صفائی کرن آؤنا ہے تاں شام نوں آوے۔ جدوں مسٹر دتہ گھر ہون۔ گیتا من گئی سی ۔اگلے ہفتے توں اوس نے شام چھ وجے توں بعد کم تے آونا شروع کرتا۔ شروع وچ تاں اوہ دتہ انکل اوس نوں کجھ نہ بولیا پر ہولی ہولی اوہ اوس دی بچی نال کھیڈن لگ پیا۔ اک دن اوہ ڈھیر سارے کھلونے اوس دی بچی نیتو واسطے لے آیا۔


'' اینے کھلونے انکل جی۔۔۔'' اوہ حیران ہوئی۔
'' کوئی گل نہیں میں بچی واسطے لیاندے نیں۔'' اوہ نیتو نوں گودی چکدا ہویا بولیا۔ دوجے دن اوہ نیتوواسطے گرم کپڑے تے بوہت ساریاں دوجیاں شیواں لے آیا۔


مسٹر دتہ دے اپنے کوئی بچہ نہیں ہے۔ شائد ایسے لئی میری بچی نوں ویکھ کے ایس دے من وچ بچے لئی پیار جاگ پیا ہے۔سچ ہے اولاد دی بھکھ وی بندے نوں کتھوں تک لے جاندی ہے۔ گیتا آپنے آپ نال سوال کردی۔ اک دن شام نوں بڑے زور دی بارش ہو رہی سی۔ اوہ گھر دا کم ختم کر کے بس پھڑن لئی ترن لگی سی کہ دتہ نے روکیا۔'' بارش رک جان دے پھیر چلی جائیں بچی بیمار ہو جاوے گی''۔


'' پھیر انھیرا بوہت ہو جاوے گا۔ بس وچ اکلی جاندی نوں ڈر لگدا ہے '' گیتا نے اپنی مجبوری دسی۔ '' کوئی نہیں چھڈ آواں گا جا کے '' دتہ نے دروازہ بند کردتا۔ اوہ سمٹ کے کرسی تے بیہہ گئی۔ نیتو کھیڈ دی ہوئی کارپٹ تے ہی سوں گئی سی۔''


گیتا توں اینی سوہنی کڑی ہیں' اک کلینر دا کم کیوں کر دی ہیں ؟پھیر نال ایس چھوٹی جیہی جان نوں وی چکی پھر دی ہیں ٹھنڈ وچ'' دتہ نے اچانک پچھیا سی۔


اوہ دو پل لئی گھبرائی پر مسٹر دتہ دی شرافت تے سبھاء نے اوس دے دکھ نوں پھوڑے وانگ پھیہ دتا۔ '' انکل جی میرے سوہرے مینوں بہت تنگ کر دے نیں۔ میرا آدمی مینوں ماردا کٹدا ہے۔ روز میرا سامان چک کے باہر سٹ دیندے نیں ' کہ جا بھج جا جتھوں آئی ہیں۔ جے کم کر کے چار پیسے نہ کماواں تاں اک دن وی گھر نہیں رکھن گے۔ کتھے جاواں گی؟'' بہت ماڑی گل ہے سالے لوک پتہ نہیں آپنے آپ نوں کیہ رب سمجھن لگ جاندے نیں۔ نوہاں دھیاں گھر دی عزت ہوندیاں نیں کہ پونڈ کماؤن دا وسیلہ؟'' اوس نے ہمدردی نال آکھیا۔ بارش بند ہوئی تاں دتہ اوس نوں گھر چھڈ آیا۔
دوجے دن دتہ گیتا واسطے بہت سوہنی لال رنگ دی ساڑھی لے کے آیا۔ گیتا حیران ہوئی۔ '' ایہہ کیہ اے انکل جی۔ میں ایہہ چیزاں کِتھے رکھاں گی''؟ اوس نوں سجھ نہیں سی رہیا کہ کیہ کہے۔ '' میں تیرے واسطے سپیشل لے کے آیا ہاں۔ روز اک ہی سوٹ پایا ہوندا ہے توں''۔ اوہ ساڑھی دا پیکٹ کھولدا ہویا بولیا۔ پھیر اوس نے سوٹ دی جیب وچ ہتھ مار کے نوٹاں دی گُتھی کڈھی تے گیتا اگے سٹ دتی۔ گیتا دیاں لتاں کمب گئیاں۔ اینے پیسے؟ اوس نے زندگی وچ پہلی وار اینے پونڈ ویکھے سی۔ او تاں پینیاں گنن والی کڑی سی۔


'' چک لے گیتا، ایہہ تیرے لئی ہن۔'' دتہ نے ہولی جیہی کہیا۔
'' میں۔۔۔۔۔ میں۔۔۔۔۔۔ میں ''؟ اوہ بوکھلائی۔
'' ہاں تو۔۔۔'' اوہ مسکرایا۔


'' نہیں ۔۔۔ نہیں ۔۔۔۔ ایہہ تاں بہت زیادہ ہن۔ تسیں نیتو نوں دو چار پونڈ دےدیو۔ اوس نے پیسے کارپٹ توں چک کے دتہ نوں دینے چاہے۔
'' میں واپس لین نوں نہیں دتے ایہہ تیرے نے ہن۔۔۔۔'' اوس نے پیسے پھڑ کے اوس دے پرس وچ پا دتے۔ '' پر ایہہ مہربانی کیوں انکل جی؟ میں تاں کوئی اینا زیادہ کم نہیں کردی۔ نالے کشلیا آنٹی نوں تاں میرا کم وی پسند نہیں ہے۔'' اوس دی آواز کمب رہی سی۔


'' گولی مار کشلیا آنٹی دے۔ پاگل ہے سالی۔ ہور توں جیب نال فرش چٹیں گی؟ صفائی ہی صفائی ہے۔ پرواہ نہ کر۔'' اوہ نفرت نال بولیا۔ '' پاگل ہے ''؟ گیتا نوں یقین نہ آیا۔


'' ہور پاگل نہیں تاں کیہ ہے ؟ سارا دن مندراں وچ ٹلیاں وجاؤندی پھر دی ہے۔ کدے گھر دا خیال آیا ہے؟ ہرے راما ہرے کرشنا۔ ہرے کرشنا ہرے راما۔ سویرے چار وجے اٹھ کے جگاون بیہہ جاندی ہے۔ میں اوتھے پیا۔۔۔ ہن میں تینوں کیہ کہاں۔ '' اوہ غصے وچ آپنی پتنی دیاں نقلاں اُتار رہیا سی۔
چنگی گل ہے رب دی بھگتنی کرنی۔۔۔ کرماں والے کردے نیں۔۔۔ '' گیتا نے کہیا۔


'' ہاں چنگی گل ہے پر ہر گل دی اک حد ہوندی ہے۔ عورت واسطے ہور وی بتھیرے کم ہوندے نیں۔ چار چار مہینے آدمی نوں نہیں پچھدی۔ پنڈتاں مگر چھینے وجاؤندی پھری جاؤ ۔ جے کدے زور زبردستی نال اوس نال سوں وی جاواں تاں ادھی رات نوں اٹھ کے نہاؤن بہہ جاندی ہے۔ اکھے پاپ ہوگیا' ادھرم ہو گیا۔ بے وقوف عورت! سارا دن دھرم دا پکھنڈ کردی ہے ویہہ سال ہو گئے۔ سالی نوں ایہہ نہیں پتہ کہ عورت واسطے پتی ہی میشور ہے۔ آدمی دیاں وی کجھ ضرورتاں ہوندیاں نیں۔ صرف روٹی تاں نہیں چاہی دی کھان نوں' ہور وی کاسے دی لوڑ ہے۔ جیوندا جاگدا مرد ہاں میں۔ کِتے باہر کھیہ کھان جاواں تاں لوک کیہ کہن گے ؟ عزت والا بندہ ہاں۔۔'' اوہ رون ہاکا ہویا بیٹھا سی۔


گیتا چپ کر گئی۔ اوس نوں اگوں کوئی گل نہ سجھی۔


'' تیرا آدمی تیرے نال ایس طرحاں کرے تاں تینوں کیویں لگے ؟'' دتے نے سوال کیتا۔ '' میرے نال تاں تن سال توں ایہی کجھ ہو رہیا ہے انکل جی ''۔ اوہ بولی۔ '' پھیر ؟ تاں ہی مرجھائی پئی ہیں ۔ قدرت نے سبھ کجھ ایویں بے ارتھ تاں نہیں بنایا۔ پر بے وقوف لوک سمجھدے نہیں۔ سیکس ایہناں واسطے پاپ تے ادھرم دی گل ہے۔۔۔۔'' دتہ اج پوری گرمی وچ سی۔ میری گل من۔ دھکا دے تیرے نال وی اوہ ہی ہو رہیا ہے جو میرے نال۔ تیرے نال اک ظالم مرد کر رہیا ہے تے تاں میرے نال اک بے وقوف عورت۔۔۔ سالی مینٹل۔۔۔۔ آپاں دوہیں اک دوجے دا ساتھ دیئے۔۔۔ توں وی سکھی تاں میں وی سکھی۔'' اوہ کرسی توں اٹھ کے بھنجے گیتا دے کول ہی بیہہ گیا۔


'' انکل جی' میں کدے سوچیا نہیں ایداں دیاں گلاں بارے میں۔۔۔ میں۔۔۔ آنٹی۔۔۔۔'' اوس توں گل نہیں ہو رہی سی۔


کوئی گل نہیں سوچ لے۔ مینوں کوئی کاہلی نہیں ہے۔ آنٹی اونٹی دی نہ کر۔ اوہ تاں پاگل ہے سالی۔ پر میں تینوں اک گل دس دیواں کہ میں تینوں کاسے لئی مجبور نہیں کر رہیا تے نہ ہی تیرا رستہ روکاں گا۔ توں میریاں دھیاں ورگی ہیں۔ میں آپنے ہتھ نال تیرا دوجا ویاہ کردیواں گا۔ توں آپنے آدمی نوں ڈائیواس دے کے کھیہڑا چھڈا لے۔ میرے نال تیری کوئی نہ وی گل ہووے پر پھیر وی مینوں تیرے نال ہمدردی ہے۔ تیرے تے ترس آؤندا ہے مینوں۔ ایس چھوٹی جیہی بچی ول ویکھ ۔۔۔'' اوس نے گیتا دی دکھدی رگ تے ہتھ رکھیا۔


گیتا سر جھکائی چپ کیتی بیٹھی رہی۔ دتے نے اپنی گل جاری رکھی۔ میں وی تیرا باپ ہاں تے تیری بچی دا وی۔ تینوں سیٹ کرنا میرا فرض ہے۔ جے تیرا ہتھ پھڑاں گا تاں ساتھ وی دیواں گا۔ ایویں پھوکیاں پھڑاں نہیں مار رہیا۔۔۔''


اوس رات گیتا چپ چاپ گھر آگئی سی۔ ساری رات اوس نوں نیند نہ آئی۔ اپنے پیسے کتھے چھپاوے۔ کدے بیڈ دے ہیٹھاں کدے پرس وچ تاں کدے کارپٹ نیچے، ساری رات اوہ کروٹاں بدلدی رہی۔ دتے دیاں کہیاں گلاں اوس دے کناں وچ گونجدیاں رہیاں۔


گیتا گھمن گھیریاں وچ پے گئی۔ اوس نوں سمجھ نہیں آرہی سی کہ کیہ کرے۔ بڑی مشکل نال کم ملیا ہے۔ جے ملیا ہے تاں نویں چنتا نے آگھیریا۔ پنڈتاں دی کڑی۔ اگے نہ پچھے کسے نے پریوار وچ اجیہا کم نہیں کیتا۔ ایس پاپ دا بوجھ کیویں چکے گی۔ اوس نے من نے لعنت پائی۔ دوجے دن اوہ کم تے گئی تاں دتہ انکل اوہنوں بڑے پیار نال ملیا۔ اوس نے اک وار وی ثابت نہ ہوون دتا کہ اوس دے دل وچ گیتا لئی کوئی روس ہے۔ گیتا چپ چاپ کم کر کے واپس آگئی۔


اوس رات وی اوس نوں نیند نہیں آئی۔ پرس وچ پئے نوٹ اوس نوں سون نہیں دے رہے سی۔ ادھی کو رات نوں اوس دے آدمی نے گھر دے بوہے بھنے۔ شائد اوہ شراب پی کے آیا سی اتے غصے وچ اوس نوں گالھاں کڈھ رہیا سی۔ گیتا نے اٹھ کے بوہا کھولیا۔ بوہا کھلدیاں ہی اوس نے گیتا دے تن چار تھپڑ مارے۔ پھیر لتاں مار کے اوس دی پٹھی توڑن والی کر دتی۔


''سٹوپڈ۔۔۔ آئی ول کل یو۔۔۔ کداں ستی پئی آ۔۔۔ میں دو گھنٹے توں ڈور ناک کر رہیا ہاں۔۔۔۔ تینوں سندا نہیں؟'' اوہ نشے وچ ڈکو ڈولے کھا رہیا سی۔


گیتا دیاں چیکاں نکل گئیاں۔ گھر دا کوئی ممبر اٹھ کے اوس نوں چھڈاون نہ آیا۔ سبھ آرام نال اپنے کمریاں وچ ستے پئے سی جیویں ایہہ روٹین دی گل ہووے۔ اوس دی چھوٹی جہی دھی نیند چوں ڈر کے جاگ پئی سی تے اوس دیاں لتاں نال چمبڑی رو رہی سی۔ گیتا نے بچی نوں چک کے چھاتی نال لگا لیا اتے روندی روندی آپنے کمرے وچ چلی گئی۔ ساری رات اوہ درد نال کرلاندی رہی۔


'' تیرے مونہہ تے ایہہ نیل کاہدے پئے ہوئے نیں؟''دوجے دن دتے نے اوس دے سجے ہوئے مونہہ نوں ویکھ کے پچھیا سی۔


'' انکل جی میرے آدمی نے رات مینوں بہت ماریا۔ گھر دے کسے جی نے نہیں چھڈایا۔ میرے پاسے بھن دتے۔۔۔ آکھ کے گیتا نے اپنی پٹھ اوس اگے ننگی کر دتی۔


'' اوئے ہوئے۔۔۔۔ میں تینوں کنا سمجھایا سی کہ اوہ ٹبر قصائیاں دا ہے۔ تینوں جانوں مار دیون گے۔ آپنی نہ سوچ' آپنی بچی دی سوچ۔ ماں بغیر ایس دا کیہ بنے گا۔۔۔؟'' دتے نے اوس دے اتھرو پونجدیاں ہوئیاں کہیا۔ گیتا جو رات دی مار کارن بھر پیتی سی تھوڑی جیہی ہمدردی پا کے ہی پھٹ پئی۔


'' میں کیہ کراں انکل جی تن سال ہو گئے نیں مارا کٹاں کھاندی نوں۔ کسے ارتھ نہیں لگ رہیاں۔ ہن تاں اوہ میری نوں وی چک چک کے ماردا ہے کہ تیرے نال ایس دا وی کم مُکا دینا ہے ۔''


'' ایداں کیویں مار دیوے گا۔؟ کوئی قانون ہے ایس ملک دا۔ سالے دے بھانڈے نہ وکوا دتے تاں دتہ نہ کہیں۔'' نیتو جو ستی پئی سی دتے دی آواز سن کے جاگ پئی۔


'' نیتو نے اج سویر دا ددھ نہیں پیتا انکل جی۔۔ بھکھی رو رہی ہے۔ '' گیتا نے روندی نے دسیا۔ '' پاگل بچی نوں کیوں بھکھی رکھیا؟'' اوس نے بھج کے نیتو نوں چک لیا۔ کچن وچ جا کے نیتو نوں ددھ گرم کر کے پلایا۔


مینوںتاں لگدا اے جیویں اج توں وی کجھ نہیں کھادا۔'' دتے نے گیتا دے موڈھے تے ہتھ رکھیا۔ گیتا نے ہاں وچ سر ہلا دتا۔ دتے نے فرج وچوں کڈھ کڈھ کے شیواں گرم کیتیاں، دو دناں دی بھکھی گیتا روٹی کھان لگی پھٹ پھٹ کے رو پئی۔ تے پھیر اوس رات جیویں گیتا نے اپنے سوہریاں نال بدلا لیا سی۔ شرافت دے جھوٹھے خول نوں توڑ کے اوہ دتے دے نال جا ستی سی۔


'' ہن دساں گی کنجراں نوں کیویں ماری کُٹی دا ہے بگانیاں دھیاں نوں'' ایہناں دی ہک تے مونگ نہ دلی تاں میرا وی ناں نہیں۔ دوجا ویاہ کرواکے ساہمنے گھر وساؤں ایہناں دے۔ پھیر پتہ لگو نقص ایہناں دے منڈے وچ نیں کہ میرے وچ۔ فسٹ کلاس میچ لبھاں گی اپنی پسند دا جاں انڈیا توں منڈا لے آواں گی۔ اوہ ساری رات دتے نال پئی بھوکھ (مستقبل) دیاں سکیماں گھڑ دی رہی۔ سویرے دتے دے چہرے تے لالیاں چڑھیاں ہوئیاں سی اکھاں وچ جت دی چمک جیویں اوس نے کوئی قلعہ فتح کیتا ہووے۔


دوجے دن دتے نے دوہاں ماواں دھیاں نوں سوشل سیکورٹی دے دفتر بھیج دتا۔ گیتا اتے بچی دی حالت نوں ویکھدیاں ہوئیاں سوشل سیکورٹی والیاں نے جھٹ اوہناں نوں سپیشل کیئر وچ لے لیا۔ اوس دے سوہریاں نوں ہوا وی نہ ملی کہ گیتا اپنی دو سال دی دھی نوں لے کے کتھے گئی ہے۔ چھیتی ہی گیتا نوں کونسل دا فیصلہ مل گیا۔


کشلیا دیوی انڈیا توں تیرتھ یاترا کر کے واپس آگئی سی۔ دتے نے گیتا دی ساری کہانی اپنی پتنی نوں سنائی۔ '' دیکھ توں رب دی بھگتنی ہیں۔ جَنے کھَنے دا بھلا کردی ہیں۔ ایس کڑی دا وی بھلا کردے۔ نالے ایہہ پنڈتاں دی دھی اے تیرا پھل دُگنا ہو کے لگے گا، وچاری دا ایس ملک وچ کوئی نہیں ہے۔ اپنی دھی بنا لے ایس نوں، تیری سیوا کرے گی۔۔۔ نالے پُن نالے پھلیاں۔''


کشلیا دیوی نوں زندگی وچ پہلی وار اپنے آدمی دی کوئی گل چنگی لگی سی۔ ایہہ شرابی کبابی بندہ ساری عمر باہر تیویاں نال دھکے کھاندا رہیا ہے۔۔۔ پہلی وار ایس نے کسے دی دھی بھین نوں آپنی دھی وانگ سمجھیا ہے تے ایس دے من وچ چاء جاگی ہے۔ شائد ایہہ اوس دی تیرتھ یاترا دی ہی پھَل ہے کہ اوس دا آدمی سدھے رستے تے آگیا ہے۔ اوہ خود گیتا دے گھر گئی اتے اوس دے سر تے ہتھ رکھیا کہ اوہناں دے ہوندے اوہ آپنے آپ نوں کلی نہ سمجھے۔


گیتا نوں فلیٹ کیہہ ملیا دتے واسطے آرام گاہ بن گئی۔ دنے جدوں وی ویلھا ہوندا اوہ اوتھے آجاندا۔ راتاں اوہدے نال گزار داا تے سارے ملک وچ اوہنوں آپنے نال گھمائی پھردا۔ گیتا دے جیویں اچانک دن بدل گئے سی۔ ہر سکھ آرام اوس نوں ہن حاصل سی۔ اوہ انتظار کر رہی سی کہ کدوں اوس دا ڈائیورس ہووے تے اوہ آپنا دوجا ویاہ کرواوے۔ کشلیا دیوی اتے دتے نے کورٹ کچہری ہون وچ اوس دی پوری مدد کیتی سی۔ ساری دنیا نوں دس دتا سی کہ اوہناں گیتا نوں اپنی دھی بنا لیا ہے۔ اوہ سرعام اوہناں دے گھرآوندی جاندی سی تے دتے لئی وی گیتا دے گھر جاون دے راہ کھل گئے سی۔


تن سال کیویں لنگھ گئے گیتا نوں پتہ وی نہ لگیا۔ اوکھا لنگھیا سی تاں پہلاں سال جدوں اوہ سال وچ چھے وار گربھ وتی ہو گئی سی۔ ہر دوجے مہینے اوہس نوں گربھ ٹھہر جاندا ' جدوں پہلی وار ایداں ہویا تے اوہ بوہت گھبرائی سی۔ پتہ نہیں سی کیہ کرے پر دتے نے اوس نوں پیسے دے کے پرائیویٹ کلینک گھل دتا سی۔ گیتا بوہت روئی سی جدوں اوس نے فارم بھریا سی کہ اوس دا کوئی نہیں ہے اوس نے اکھاں میٹ کے آپنے آپ نوں آپریشن تھیٹر وچ سٹ دتا سی۔ ہوش آئی تاں اوہ ہلکی پھل ورگی ہو چکی سی۔ پھیر ایہہ کئی وار ہویا۔ ہر وار دتہ اوس نوں پیسے دیندا تے کلینک بھیج دیندا۔ اوہ درد نال ٹرپ دی۔۔۔ روندی کرلاندی تے اگے لئی توبہ کردی۔ پر ہفتے دس دن بعد دتے وچلا مرد جاگ پیندا۔ دتے لئی ایہہ اک کھیڈ بن گئی سی جیویں کوئی کھڈاری وار وار گول کردا ہے تے اوس دا اُتم وشواش ودھدا جاندا ہے کہ اوہ کنا ودھیا کھڈاری ہے۔ شائد اوویں ہی دتے دی پوری ہوندی سی کہ اوہ پنجاہ سال دا ہو کے ویہہ سالاں دی کڑی نوں گربھ وتی کرسکدا ہے۔ جدوں وی گیتا ایس حال وچ ہوندی دتے دے چہرے تے عجیب جیہی چمک آجاندی۔ درد برداشت کردی تاں گیتا۔ ہار کے اوس نے آپریشن ہی کروا لیا۔ روز روز دا جھگڑا مکایا۔


تن سالاں بعد گیتا نوں طلاق ہو گئی۔ اوہ سوچ رہی سی کہ ہن اوہ ویاہ کروا لوے۔ نیتو حالے چھوٹی ہے۔ وڈی ہو گئی تاں کسے اجنبی نوں باپ دے طور تے سویکار نہیں کرے گی۔ اوس نے اک دن آپنے دل دی گل دتے نوں دس دتی۔ دتے دے چہرے تے دھواں جیہا اُڈیا۔ اوہ بولیا کجھ نہیں۔ پر اوس دن توں بعد اوس دا رویہ بدل گیا سی۔ ہن ہر ویلے اوہ گیتا تے اکھ رکھدا۔ ویلے کویلے گھر چکر مار دا کہ پچھوں کوئی ہور تاں نہیں آوندا۔ اک دن گیس ککر ٹھیک کرن والا مکینک آیا ہویا سی۔ اوس ویلے دتہ وی گھر آگیا۔


'' اچھا میرے پچھوں بہانے بنا کے یاراں نوں بلاوندی ہیں۔۔۔؟'' اوس نے گیتا تے ہتھ چکیا۔
گیتا ہکی بکی رہ گئی۔ دتے دا ایہہ روپ اوس نے پہلی وار ویکھیا سی۔ '' انکل جی۔۔'' اوہ چیک پئی۔
''شٹ اپ سالی انکل جی دی۔۔۔۔ انکل ہاں میں تیرا؟ دنیا ساہمنے ڈرامے کردی پھر دی ہے۔۔۔ بے غیرت۔ آپنے اندر جھاک کے دیکھ میں تیرا کیہہ لگدا ہاں۔۔۔''؟ اوہ دھاڑیا۔
'' توں میرا کی لگدا ہیں۔۔۔۔ اوہ تینوں وی پتہ ہے تاں مینوں وی لوکاں ساہمنے جلوس کیوں کڈھدا ہیں۔ کسے باہرے بندے دی تاں شرم کر''۔ اوہ تسیں توں توں تے اتر آئی سی۔
'' شرم توں کر ۔ مال میرا کھاندی ہیں تے عیش یاراں نال کر دی ہیں سالیئے جے جوان منڈیاں نال سون دا اینا ہی شوق ہے تاں مینوں بڈھے نوں کیوں پچھے لائی پھر دی ہیں۔۔۔'' دتہ جھگ چھڈ رہیا سی۔


گورا مکینک جو اوہناں دی زبان نہیں سمجھدا سی مسکراؤندا ہویا باہر چلا گیا۔ گیتا نے آپنے آپ اُپانت ہویا محسوس کیتا۔ اوس نوں دتے توں اجیہی امید نہیں سی۔


'' میں نہیں چاہندا میرے پچھے بغیر کوئی میرے گھر وچ آوے۔۔۔ '' اوہ اوس دے وال پٹ دا ہویا بولیا۔
'' تیرا گھر گھر تاں میرا ہے۔ کونسل نے دتا ہے۔ تیرا ایس گھر وچ کیہ ہے؟'' گیتا نے مشکل نال آپنے وال چھڈائے۔


کونسل نے دتا ہے ؟جدوں روندی روندی میرے کول آئی سی اودوں تینوں کسے نے مکان نہیں دتا رہن نوں۔ ایہہ میریاں مہربانیاں نیں جو اج توں ایس پوزیشن وچ ہیں۔ نہیں تاں تیرے ورگیاں زنانیاں دو دو پونڈ وچ وکدیاں پھردیاں نیں۔'' دتہ جو مونہہ وچ آرہیا سی بول رہیا سی۔
'' ٹھیک ہے میں آئی سی تیرے گھر پر توں مینوں کہیا سی کہ میں تیری دھی ہاں۔ توں میرا ویاہ کردیویں گا۔۔۔۔ میرا گھر وسا دیویں گا میں۔۔۔۔ میں تاں تیرے تے یقین کیتا سی'' گیتا رو پئی۔


'' ہاں کہیا سی تاں گھر وسا وی دتا۔ ہن باہر کیوں کھیہ کھاندی پھر دی ہیں۔ میرے وچ کیہ کمی ہے ؟ تینوں کوئی کسر چھڈی ہے میں سکھ دین ولوں؟ آدمی دا آدمی تینوں ملیا ہویا ہے۔ گھر ہے بچہ ہے۔ ہور توں رب توں کیہ بھالدی ہیں۔۔۔'' اوس دی آواز کجھ نیویں ہوئی۔


لوکاں ساہمنے توں میرا باپ ہے۔ میرا آدمی نہیں۔ پھیر کنی کو دیر آپنی ایہہ کہانی چلے گی۔ میں وی کسے دی تن پتن لگاں۔۔۔ زندگی وچ سیٹ ہوواں۔ کھل کے لوکاں ساہمنے آپنے آدمی نال آواں جاواں۔ ایہہ وی کوئی زندگی ہے۔ نوٹاں نال بینک بھرے پئے نیں' گھر وچ ہر چیز موجود ہے پر ۔۔۔ پر میں اکلی ہاں بناں کسے سہارے توں۔۔۔'' اوس نے سوال کیتا۔


'' سہارا میں ہاں تیرا۔ میری عورت دا میرے نال ویاہ ہویا ہے۔ کنا کو میں اوس کول رہ رہیا ہاں۔ ہروقت تیرے کول ہاں۔''
'' پر مینوں چنگا نہیں لگدا ایہہ۔ جے میری مجبوری تیرے کول وک گئی سی تاں ایس دا مطلب ایہہ نہیں کہ میں ساری عمر دا سودا کیتا سی۔ دو چار سال دی گل سی۔۔۔ ہن میں آپنے پیراں تے کھڑی ہاں۔۔'' گیتا تھوڑا کٹھور ہو آواز وچ بولی۔


'' پیراں اُتے کھڑی ہیں؟ تیرے ایہہ پیر میں توڑ وی سکدا ہاں۔ اوہناں دی گلیاں وچ سڑکاں تے تینوں خاک چھانن تے مجبور کرسکدا ہاں جتھوں توں اٹھ کے آئی ہیں۔ اک فون کرن دی دیر ہے سوشل سیکورٹی والیاں نوں کہ پچھو ایس عورت کول اینا پیسہ تے سامان کتھوں آیا۔ جے پٹھی چکی نہ گھما دتی تاں دتہ نہ کہیں۔'' اوس نے غصے وچ کندھ تے مُکا ماریا۔


'' جے توں واپس کھوہنا سی تاں دتا کیوں سی۔'' گیتا نے پچھیا،


'' میں تیری اوقات ویکھدا سی بازارو عورت ویکھدا سی توں کتھوں تک گردی ہیں' تیرے ورگیاں چھتی سو تریٹھ۔۔۔ مینوں پتہ سی توں ناگن وانگ اک دن ڈنگ ماریں گی۔ تیرا مطلب صرف میرے توں پیسے بٹورنا ہے نہ توں میری دھی سی تے نہ تیویں۔ تیرے ورگیاں عورتاں صرف پیسے دیاں پیر ہوندیاں نیں۔۔۔۔ اوہناں واسطے صرف پیسے دے رشتے ہوندے نیں نہ پیو دے نہ پتی دے۔'' اوہ پھیر گیتا ول ودھیا۔


'' بازارو ہووے گی تیری عورت۔ میں کیوں بازارو ہاں۔ پہلاں تاں توں مینوں گمراہ کیتا۔ ہن الزام دے رہیا ہیں۔ تیرے توں وڈا گناہ گار کون ہووے گا۔۔۔'' اوہ ڈر کے پچھے ہٹ گئی۔


'' میری عورت؟ توں میری عورت دی ریس کریں گی۔ اوہدے پیراں ورگی وی نہیں توں گشتیے۔۔۔۔ اوہ دیوی ہے دیوی۔۔۔ سارے شہر نوں پتہ ہے میری عورت کیہ ہے۔ لوک اوس نوں پوجدے نیں تے تیرے پرچھاویں توں وی ڈر دے نیں۔ سبھ نوں پتہ ہے تیریاں کرتوتاں دا۔۔۔۔ جو توں کر رہی ہیں لوکاں توں چھپیا نہیں۔ لوک پاگل نہیں ایہہ باپ دھی دا ڈرامہ کشلیا ورگی بھولی بھالی شریف عورت نوں تاں بے وقوف بنا سکدا ہے پر ساری دنیا نوں نہیں۔ سارے شہر نوں پتہ ہے تیرا میرا کیہ ریلیشن ہے۔۔۔'' جدون اوس نے چھاتی ٹھوک کے کہیا تاں جیویں گیتا دے سر تے بجلی گری۔
اوس سن کے صوفے تے بیٹھ گئی ۔ کیہہ سوچیا سی کیہ ہو گیا۔ تاں ایہہ قدر ہے دتے دی نگاہ وچ اوس دی۔ اوس دا دھرم دا باپ۔۔۔۔ گیتا بیٹھی بیٹھی ہس پئی۔ دتہ جو اوس نوں دور کھڑا دیکھ رہیا سی۔ اوس دے کول ہی آکے بیٹھ گیا۔


'' آپنا نہ سوچ آپنی دھی دا سوچ، بھانت بھانت دے بندے گھر وچ بلائیں گی تاں تیری دھی تے وی اکھ رکھن گے۔ مینوں تاں کوئی فرق نہیں پینا۔ دس پونڈ وچ تیویں مل جاندی ہے۔۔۔ میں تاں سوچیا سی بئی چل توں بے سہارا ہیں۔ سو پنجاہ تینوں دیوں شریف گھر دی کڑی لگی توں مینوں۔ باہر کِتے جاؤں تاں سو بیماریاں دا ڈر ہے۔'' اوہ گل کردا گیتا دے مونہہ ول ویکھ رہیا سی۔ گیتا نے کوئی جواب نہ دتا۔


'' پاگلے پہلی گل تاں تیرے نال کسے چج دے منڈے نے ویاہ کرواؤنا نہیں۔ سبھ نوں میرے تیرے عشق دا پتہ ہے۔ جے کوئی انگلینڈ دے لالچ نوں کروا وی گیا تاں پاسپورٹ تے سٹمپ لوا لے تیرے لت مارے گا۔ چنگی طرحاں سوچ لے ''۔ آکھ کے اوہ غصے وچ اٹھ کے چلا گیا۔


پچھے رہ گئی سی گیتا۔ پتہ نہیں کیہ سوچ کے اوس دی ماں نے اوس دا ناں گیتا رکھیا سی۔ کناں پوتر ناں۔۔۔ تے کنی گندی دلدل وچ پھس گئی سی گیتا۔ دلدل جس وچ اوہ اکھاں تے کناں تک پھس گئی سی۔ اکھاں ویکھدیاں سی تے کن سندے سی پر اوہ بول نہیں سکدی سی۔ کجھ کر نہیں سکدی سی' صرف ویکھ سکدی سی۔ اوہ دلدل جیس وچ اوس دی معصوم دھی وی اوس نال پھسی ہوئی سی۔ کیہ سوچ کے گھروں نکلی سی کہ اوہناں نوں سبق سکھا دیوے گی پر زندگی تے حالات اوہنوں کتھے لے گئے سی۔۔۔۔


کنہاں رستیاں تے جنہاں دی کوئی منزل نہیں سی۔۔۔ صرف رستے ہی رستے لمے۔۔۔۔ بے انت رستے۔ انھیرے سنسان رستے۔ گھمن گھیریاں تے بھل بھلیکھے۔ کوئی سرا نظر نہیں آرہیا سی۔پہلا آدمی ملیا پتی بن کے۔ اوس نے زندگی تباہ کر کے رکھ دتی اک رات اوس نال سوں کے کواری نوں ویاہی بنا دتا تے نکلی جیہی عمر وچ اوہ ماں بن گئی۔ دوجا آدمی ملیا باپ بن کے۔ اوس نوں ورتدا رہیا تے اخیر وچ بازارو عورت دا ٹھپہ اوس دے متھے تے لگا دتا۔ واہ نی عورتے۔۔۔ تیری قسمت۔ مرد دیاں غلطیاں دیاں سزاواں دی توں بھگتدی ہیں تے بدنامیاں وی تیرے سر وچ پیندیاں نیں۔


گیتا دے من وچ پوری مرد جاتی لئی گھرنا جیہی جاگی تے اوس نے کارپٹ تے ہی '' تھو'' کر کے تھُک دتا۔ نیتو سکولوںآگئی سی۔ گیتا نے سرسری اوس ول جھات ماری۔ پتہ نہیں کیوں اوس نوں نیتو اج اک دم وڈی ہوئی لگی۔ سویرے جدوں اوہ اوس نوں سکول چھڈ کے آئی سی تاں اوہ نکی جیہی بالڑی سی۔ دتے نال لڑائی جھگڑے وچ اوہ نیتو نون سکولوں لین جانا وی بھل گئی سی تے نیتو آپے کلی سکولوں گھر آگئی سی۔ گیتا نوں لگیا جیویں نیتو اچانک ہی جوان ہو گئی سی۔ اوس نے آپنی بچی نوں گھٹ کے جپھی پا لئی۔


'' لوک کل نوں تیری دھی تے وی اکھ رکھن گے ۔۔۔'' دتی دے کالے شبد اوس دے کناں وچ گونج گئے۔ ٹھیک ہی تاں کہندا ہے دتہ۔ کون اوس دی دھی نوں آپنی دھی سمجھے گا۔ دنیا کنی گندی ہے۔۔۔ اوہ جے ویاہ کروا وی گئی تاں نیتو دا کیہہ بنے گا؟ میری بچی رل جاوے گی۔ میرے وانگ اوس نوں کوئی کھیہ کھراب کرے گا۔ تے ۔۔۔ تے بازارو وی کہوے گا۔۔۔۔ نہیں۔۔۔۔۔ نہیں ۔۔۔ ایہہ نہیں ہوسکدا۔دتہ نے دنیا ویکھی ہے۔۔۔ اوس نوں سب پتہ ہے۔۔۔ میں آپنی زندگی سیٹ کرن واسطے بچی دی بلی دی دیواں؟ نہیں۔۔۔ نہیں۔۔ اوہ آپے نال گلاں کر رہی سی تے رو رہی سی۔
نیتو حیران جیہی ہوئی ماں ول ویکھ رہی سی۔ اوس نوں سمجھ نہیں آرہیا سی کہ اچانک اوس نوں ویکھ کے ماں نے رونا کیوں شروع کر دتا سی۔ ممی تاں اوس نوں ویکھ کے پھل وانگ کھڑ جاندی ہوندی سی۔


'' بیٹے تیری ماں اکلی ہے۔ ویک فیل کردی ہے۔ توں سہارا بنے گی اپنی ماں دا؟'' اوس نے نیتو نوں گودی وچ چک لیا۔ '' بیٹے تیری ماں اکلی ہے۔ ویک فیل کردی ہے۔ توں سہارا بنے گی اپنی ماں دا ؟'' اوس نے نیتو نوں گودی وچ چک لیا۔ '' یس مم۔ آئی ول بیکم اے پولیس وومین۔ یو ڈونٹ وری مم۔ آئی ول لک آفٹر یو۔۔۔'' نیتو نے ماں دے اتھرو پونجھے۔ گیتا دے جیویں دماغ توں بوجھ اتر گیا۔ چھوٹی جیہی بچی نے ہی اوس نوںر اہ وکھا دتا سی۔ میں ہن آپنی زندگی اپنی بیٹی دے ناں لگا دیواں گی۔ ایس نوں پڑھا لکھا کے بہت وڈی افسر بناواں گی تا کہ میرے وانگ دھکے نہ کھاندی پھرے۔میرا کیہ ہے ادھی عمر نکل گئی ہے، ادھی نکل جاوے گی۔ اوہ حوصلے نال اٹھی تے نیتو دے کپڑے بدلن لگی۔


شام نوں ہی دتہ پھیر مڑ آیا۔ گیتا کجھ نہ بولی۔ بولن نوں رہ وی کیہ گیا سی۔ دتہ نے عادتاََ شراب پیتی ہوئی سی۔ روز وانگ اوس نے نیتو نوں پیار کیتا تے کھانا کھادا۔ گیتا چپ چاپ اوس دی سیوا وچ لگی رہی۔


'' میں چاہندی ہاں نیتو نوں کسے پرائیویٹ سکول وچ پڑھنے پا دیواں''؟ اوس نے ہولی جیہی دتے نوں سمبو دھن کیتا۔'' کیوں پھیر تیرے یاراں نوں آؤن جان دی کھل ہو جاوے گی۔ ہن ایہہ نیانی مینوں دس دیوے گی کہ تیرے کول کون کون آؤندا ہے ؟'' دِتے دا دوپہر دا غصہ حالے لتھا نہیں سی۔
'' نہیں۔۔۔۔ میں فیصلہ کرلیا ہے کہ میں ساری عمر ویاہ نہیں کرواواں گی۔ تیرے نال ہی رہاں گی پر نیتو ہن وڈی ہونی شروع ہو گئی ہے۔ میں نہیں چاہندی میری بچی دی زندگی تے میرا اثر پوے۔۔۔ دھیاں ماواں دے پرچھاویں ہوندیاں نیں۔اوہی کردیاں نیں جو ماواں کر دیاں ویکھدیاں نیں۔ اوہ چنگے ماحول وچ رہ کے پڑھے لکھے تے آپنے آپ جوگی ہو جاوے۔۔۔'' گیتا دا گلا بھر آیا۔


'' بہت سمجھدار ہو گئی ہیں اج دن وچ ہی۔ چنگی رہیں گی۔ نیتو دی پڑھائی دا توں فکر نہ کر ۔ جنا خرچا ہووے گا' میں دیواں گا۔ اوہ تیری نہیں میری وی بچی ہے۔ توں میرے نال ہیرا پھیری نہ کر۔ میں کھڑا ہاں پھیر تیرے نال ہرویلے۔تیری ساری عمر دیاں روٹیاں پکیاں نیں۔۔۔'' اوہ بوہت کجھ کہندا رہیا پر گیتا لئی ہن سبھ گلاں بے ارتھ ہو گئیاں سی۔


نیتو بورڈنگ سکول وچ پڑھن چلی گئی ' گیتا دے دماغ توں بوجھ اتر گیا۔ ہن زندگی پھیر آپنی چالے پے گئی سی۔دن دے چٹے چانن وچ اوہ دتے دی دھی تے رات دے ہنھیرے وچ اوس دی عورت۔۔۔ بازارو جاں گھریلو۔۔۔ کیہ فرق پیندا ہے۔


عورت عورت ہی ہے بھاویں گھر وچ ہووے بھاویں بازار وچ۔ مرد اوس نوں پیسے دیندا ہے بچے دیندا ہے تے بدلے وچ اوہ ساری عمر اوس دی غلامی کردی ہے۔ کئی واری قانونی طور تے ویاہ کروا کے جیویں کشلیا دیوی کر رہی ہے تے کئی واری غیرقانونی جیویں گیتا کر رہی سی۔ مرد نوں کوئی فرق نہیں۔ اوس لئی دوویں در کھلے ہن کیونکہ اوس کول طاقت ہے۔ پیسہ ہے۔ پیسہ جو سبھ کجھ کرسکدا ہے۔ دس پونڈ وچ تیویں خرید سکدا ہے۔ گیتا نوں سڑکاں دی خاک چھانن تے مجبور کر سکدا ہے۔ جاں پھیر جے دیال ہے تاں نیتو نوں بہترین سکول وچ پڑھن لئی بھیج سکدا ہے۔ کنی وڈی طاقت ہے پیسہ۔۔۔۔۔ اوہ کئی واری سوچدی۔


چھ مہینے پہلاں اک دن اچانک گیتا دے پیٹ وچ درد اٹھیا سی۔ اوس دا ہرنیاں دا اپریشن ہویا تے ڈاکٹر نے کہیا سی کہ بسترے توں نہ ہلے۔ کمپلیٹ بیڈ ریسٹ۔ امتحان دے کے نیتو گھر واپس آگئی سی۔ ہن نیتو چوداں سال دی ہو گئی سی تے ماں دا دکھ درد سمجھدی سی۔ اوہ ماں نوں اپر پئی نوں چاء پانی دے کے آؤندی۔ سارا گھر سنبھالدی۔ دتہ انکل آوندا تاں اوس نون روٹی بنا کے کھلاندی۔ بہت رات تک ہیٹھاں آپنے کمرے وچ بیٹھی پڑھ دی رہندی۔


گیتا خوش سی کہ نیتو پڑھائی وچ ہر ویلے مگن رہندی ہے۔ بی بی کڑی ہے چلو اوس دی قربانی رنگ لیا رہی ہے۔ اک دن نیتو پچھے گارڈن وچ کپڑے سکنے پاون گئی بے ہوش ہو کے ڈگ پئی۔ گیتا نے فٹ ڈاکٹر نوں فون کر کے گھر بلالیا۔ ڈاکٹر نے نبض ویکھی تے دسیا کہ نیتو پریگننٹ ہے۔ گیتا دے ہوش اُڈ گئے۔ اوہنوں ہارٹ اٹیک ہون والا ہو گیا۔ اوہ کالجا پھڑ کے بیڈ تے بیٹھ گئی۔


'' گھبراؤ نہ گیتا جی۔ ایداں ہوندا ہی ہے۔ ساڈے کول روز ہی اجیہے کیس آوندے نیں ۔ پچھمی ملک دیاں گلاں نیں۔۔۔ تہانوں خود ہی اپنی بچی نوں سمجھا دینا چاہیدا سی کہ اوہ پلز لیا کرے۔ باہر اکلی پڑھدی ہے ۔ کوئی بوائے فرینڈ ہووے گا۔ نیانی تھوڑی ہے۔ چوداں پندراں سالاں دی ہو چکی ہے۔'' ڈاکٹر اوس نوں تسلی دے کے چلی گئی۔


' گیتا تے جیویں پہاڑ ٹٹ پیا سی۔ شرم نال اوہ سر جھکائی بیٹھی سی۔ بچی نوں کیہ کرے۔ اوس واسطے تاں گیتا نے اپنی زندگی گال دتی سی۔ دتہ نال گل کرے گی تاں اوہ تاں پہلاں ہی مان نہیں۔ کہے گا آپ ایداں دی ہیں تاں ہی تیری دھی ایہے جیہی نکلی ہے۔نیتو نوں کجھ کہے گی تاں جوان کڑی ہے۔ باغی ہو کے گھروں نہ چلی جاوے۔کیہ پتہ کیہڑا منڈا ایس دا دوست ہے۔ گورا ہے کہ کالا جاں کوئی انڈین۔ اوس نے ویکھیا نیتو اوس نال اکھ نہیں ملا رہی سی۔ بغیر کجھ دسے ہی گیتا دھی دی بے وسی سمجھ گئی۔ اوس نوں کجھ کہہ کے دکھی کرنا اوس نے ٹھیک نہ سمجھیا۔ چپ چاپ کلینک وچ فون کر کے نیتو لئی اپوائنٹمنٹ لے لئی۔


تے اج اوس دی بچی دا ابارشن ہویا سی۔اوہ باہر بیٹھی انتظار کر رہی سی کہ کدوں نیتو ہوش وچ آوے تے اوس دی چنتا مکے۔ پر کافی دیر توں نرس اوس نوں کجھ نہیںدس رہی سی۔ اوہ ہار کے باہر آکے بیٹھ گئی۔ ایس کلینک وچ اوس دا دل گھبرا رہیا سی۔ '' گیتا یور ڈاٹر وانٹس ٹو سی یو''۔ نرس نے اوس نوں آواز دتی۔ گیتا جیویں سپنے چوں جاگی تے اندر ول نوں بھجی۔


'' میری بچی۔۔۔'' اوہ نیتو دا نچڑیا ہویا چہرہ ویکھ کے روپئی۔
'' مم '' نیتو دے بلھ کمبے پر اوہ درد کارن بول نہ سکی۔


'' بیٹے۔۔۔۔ میں تاں تینوں کدے دھی سمجھیا ہی نہیں۔ آپنی دوست سمجھیا ہے۔ پھیر توں میرے توں کیوں چھپا رکھیا؟ تینوں کوئی صلاح دیندی۔۔۔ تیرا درد سمجھدی بیٹے۔ تیرے کول کوئی بوائے فرینڈ ہے تاں مینوں دس دے۔ میں خوش ہووواں گی اوس نوں مل کے۔۔۔'' گیتا کسے طریقے وی دھی دے مونہہ تے مسکراہٹ دیکھنا چاہندی سی۔


پر نیتو چپ سی۔


'' کیہ گل بیٹے توں مم نال ناراض ہیں؟ میرے توں کیہ غلط ہو گیا میری بچی جو توں مینوں آپنے توں دور سمجھدی ہیں؟ میں چار سال نوں اوسے منڈے نال تیرا ویاہ کر دیواں گی۔ تیرے بوائے فرینڈ نال۔۔۔ تیری پڑھائی پوری ہو لین دے۔۔۔۔۔توں دس تاں سہی۔۔۔؟'' اوس نے نیتو دے والاں وچ ہتھ پھیریا۔


نیتو توں صبر نہ ہویا۔ ماں دی ممتا اوس دے زخماں تے مرہم وانگ لگی تے پھٹ پئی۔ '' میرے کول کوئی بوائے فرینڈ نہیں ہے مم۔۔۔۔ آئی ڈونٹ لائیک اینی باڈی ایلس۔ آئی لو اونلی مائی مم۔'' نیتو توں گل نہیں ہو رہی سی۔


'' پھیر ایہہ پرابلم کتھوں آگئی بیٹے۔۔۔۔؟'' گیتا پریشان ہو گئی۔
''دتہ انکل۔۔۔'' نیتو نے سبکی لئی۔
''دتہ انکل ؟ کیہہ ہویا دتہ انکل نوں؟''


''جدوں تیرا اپریشن ہویا سی دتہ انکل رات نوں میرے نال پلے کردا ہوندا سی بیڈ وچ۔۔۔'' نیتو نے آپنیاں اکھاں پونجھیاں۔ گیتا دے جیویں کناں کول بمب پھٹیا۔


'' پر ۔۔۔ پر دتہ انکل تاں رات نوں آپنے گھر چلا جاندا ہوندا سی۔۔۔۔'' گیتا نوں دھرتی ہلدی جاپی۔ '' نہیں اوہ تھوڑی دیر بعد واپس آجاندا سی تے مینوں بہت سارے پریزنٹ وی دیندا سی۔ کہندا سی مم نوں نہ دسیں نہیں تاں کِل کر دیواں گا''۔ بچی نے سچ اگلیا۔


'' مینوں پتہ نہیں لگا نیتو۔۔۔۔ میں تاں کدے رات نوں پوری طرحاں ستی وی نہیں ہونی۔۔۔''
'' اوہ بیک ڈور چوں آؤندا سی مم' جتھوں پہلاں تیرے کول آؤندا ہوندا سی۔
بیگ ڈور''؟ گیتا کمبی جا رہی سی۔
'' یس بیک ڈور مم '' پچھلا دروازہ'' جو آپنے گارڈن ول نوں کھلدا ہے۔''
کہندے ہوئے نیتو پھیر بے ہوش ہو گئی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels