Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> مُل دی تینویں >> وینا ورما: خالی پلاٹ

وینا ورما: خالی پلاٹ

وینا ورما
April 14th, 2008
1 / 5 (1 Votes)

جسی نے اج دی ڈاک وچوں آپنے ناں آئی چٹھی چکی تے دفتر دی کینٹین وچ جا کے بیٹھ گئی ' کونے والی سیٹ تے جتھے اوہ ہر روز بیٹھ دی ہندی سی جیویں ایہہ سیٹ لنچ ٹائم لئی اُس لئی ریزرو ہوندی ہووے۔کاؤنٹر تے جا کے سینڈ وچ تے کافی دا کپ لیا تے واپس آکے چٹھی کھول کے پڑھن لگی۔چٹھی انڈیا توں سی۔کافی لمی، بڑی باریک لکھائی تے بڑی نیجھ نال لکھی لگدی سی کسے شام لال دی چٹھی سی۔


پیاری جس
!


تینوں شائد میری یاد نہیں ہونی پر میں تینوں چنگی طراں جاندا ہاں تے تینوں بوہت پسند کردا ہاں پر کہہ نہیں سی سکیا میں مجبور سی۔۔۔وغیرہ۔۔۔۔وغیرہ۔ جسی دا متھا ٹھنکیا۔کون ہے ایہہ بندہ؟ لکھدا اے ' دوروں کسے بھرا دے دوست دے دوست دا مامے دا منڈا ہے۔ جسی نے دماغ دیاں نساں تے زور پایا پر اوس نوں ایس شام لال دا چیتا نہیں آرہیا سی۔کون سی ایہہ بندہ جس نوں ہزاراں میل دور بیٹھے نوں اوس نال عشق جاگ پیا سی۔اوہ وی دس سال بعد۔چٹھی وچ اگے اوس نے لکھیا سی، میرا وی تیرے والا حال ہو گیا ہے۔ مطلب طلاق ہو گیا ہے میرا وی۔ مینوں لگدا ہے، آپاں اک دوجے لئی ہی رب نے بنائے سی جاں شائد اک دوجے واسطے ہی ساڈے طلاق ہوئے نیں۔ توں مینوں چھیتی توں چھیتی ہزار پونڈ انگلینڈ دی ٹکٹ تے سپونسر شپ بھیج دے تاں کہ میں چھیتی ہی انگلینڈ آ سکاں۔ ویہہ تاریک توں پہلاں پہلاں مینوں تیرا جواب مل جانا چاہی دا ہے۔ دیکھیں میرا دل نہ توڑیں۔ اک وار انگلینڈ پہنچ گیا پھیر ساری عمر تیری پوجا کراں گا۔


تیرے خط دی اُڈیک وچ
تیرا آپنا
شام لال


جسی نے بہت سوچیا پر اوس نوں چیتے وچ نہیں آرہیا سی کہ ایہہ بندہ کون ہے تے اوہ ایس نوں کتھے ملی ہے۔ ایس شام لال نے کتھوں اوس دا انگلینڈ دا ایڈریس لیا تے کس نے اوس نوں دسیا کہ جسی دا ویاہ ٹٹ گیا ہے۔ جسی تاں سوچدی سی کہ انڈیا وچ کسے نوں پتہ ہی نہیں کہ اوس دا ویاہ ٹٹ گیا ہے۔اوس نے تے کدی کسے کول بھاف وی نہیں کڈھی سی اپنی نجی زندگی بارے۔کون سی جو دس سال پہلاں اوہنوں چاہندا سی۔۔۔ اوس دے دماغ وچ اجیہی کوئی گھٹنا نہ آئی جیہڑی شام لال نال جڑی ہووے۔ شام لال کیہہ انڈیا دے کسے منڈے بارے وی اوس دی کوئی سوچ کدے رنگین ہوئی ہووے۔ اوس نوں خیال نہیں۔ انڈیا بارے تاں اوہ لگ بھگ بھل ہی چکی سی ہن تک۔ یاداں دھندلیاں پے گئیاں سی۔


بس اک ہی یاد ڈوہنگی اوس دے اندر لہہ گئی سی جو مٹایاں نہیں سی مٹدی۔ اوہ سی ہریندر دی یاد۔ ہریندر جس واسطے اوہ انڈیا چھڈ کے انگلینڈ آئی سی۔ نیڑے دے کسے پنڈ دا منڈا سی اوہ' جس دے ماپے کئی سال پہلاں انگلینڈ آکے وس گئے سی تے اک وار انڈیا گھمن گئے ہوئے جسی نوں آپنے پتر ہریندر لئی پسند کر آئے سی۔ جسی نے وی جد ہریندر دی تصویر ویکھی سی بس ویکھدی ہی رہ گئی سی جیویں تصویر راہیں ہی اوہ ہریندر نوں دل دے بیٹھی ۔ پھیر تے اوہ تصویر سی جاں جسی۔ ایم ۔اے دی پڑھائی وچوں ہی چھڈ کے او انگلینڈ آون نوں تیار ہو گئی۔'' پت پردیساں دے کم پردیساں دے ہی ہوندے نیں۔ ایتھے کیہڑا منڈیاں دا گھاٹا ہے ۔۔۔۔' ماں اوس نوں سمجھاؤندی۔


''اپنی جان پچھان دے بندے نیں، کیہڑا کوئی بیگانہ ہے، بئی کڑی نال دھوکہ ہو جُؤ۔ آہ چار کوہ تے پنڈ اے اجاگر سنگھ دا۔ میرے بھراواں ورگا اے۔ اپنی دھی بنا کے لجا رہے نیں۔ توں ایویں کڑی دا جی تھوڑا کری جانی ایں۔ جے نیانی دا دل کردا اے ولیت جان توں تے جاون دے۔ توں ایتھے گھر بہا کے ایہہ توں سوت کتانا اے؟'' باپو ماں نوں پے جاندا تے جسی باپو ول شکرانہ اکھاں نال ویکھدی۔


پھیر اوہ انگلینڈ آگئی۔ ائیر پورٹ تے پورا سوہرا پروار اوس نوں لین آیا سی۔ نہیں آیا سی تاں ہریندر۔ جسی دے من نوں دھکا جیا لگا۔
'' پت ہریندر باہر کم تے گیا ہویا سی بس آج جُؤ گا اج کل وچ'' سس نے اوس دے سر تے ہتھ پھیردیاں آکھیا۔ جسی نوں تھوڑا دھرواس ہویا۔ نویں دنیا نویں لوک۔ جسی جیویں نویں پن وچ گواچ گئی۔ نناں نال ہسدی کھیڈ دی۔ سس نال گلاں مار دی گھر دے نویں طور طریقے سکھدی۔ شیشے موہرے کھڑی گھنٹیاں بدھی ہار سنگھار کر دے رہندی۔ شائد اج آ جاوے۔ ہریندر جس نوں ویکھن توں پہلاں ہی اوہ اپنا دل دے بیٹھی سی۔


'' جس دن ہریندر آیا اوس توں اگلے دن میں تاں آنند کارن کردُؤں دوہاں دے۔۔۔ میرے پت دا وی گھر وسے۔ ایہہ فرینڈاں تے بھاویں ویہہ لئی پھرے پر اپنے پنڈاں دیاں کڑیاں دی ریس نہیں ہوندی۔ پت آپنے آدمی دا۔ ایہناں ملکاں وچ کڑیاں بڑیاں ڈاڈھیاں ہوندیاں نیں، آپ منڈیاں نوں ڈھاہندیاں نیں پھڑ کے۔ بس ہشیار ہو کے رہیں۔۔۔'' سس اُٹھدی بیٹھ دی اُس نوں متاں دیندی تے جسی شیشے موہرے کھڑی سوچدی۔ میں کسے میم نالوں گھٹ ہاں؟ سوہنی کڑی ہاں۔ ہریندر ویکھدے سار مینوں پسند کر لوے گا تے پھیر میں ہمیشہ ہمیشہ لئی اوس دی ہو جاواں گی۔ نالے اوس نے میری تصویر تاں ویکھی ہوئی ہے۔ کیہڑا سوٹ پاواں گی اوس دن جیس دن اوس نے آونا ہے۔ اوہ ہر روز داج دا نواں سوٹ کڈ کے پالیندی تے پھیر اک دن ہریندر دا فون آیا کہ اوہ شام نوں آرہیا ہے۔


جسی دیاں لتاں کمبیاں تے دل دی دھڑکن دی آواز اوس نے اپنے کناں نال سُنی۔ تاں پھیر اوہ آ ہی گیا، جس دی سالاں توں منوں منیں پوجا کر دی آ رہی ہے۔ اج اوہ آپے اوس دے ساہمنے ہووے گا۔ ہریندر آیا جسی اپنی اکھ اُتے نہ چکے سکی۔'' ہیلو'' آکھ کے تے اوس دا ہتھ پھڑیا تے جسی نوں لگیا بجلی دی ننگی تار نال اوس دا ہتھ چھوہ گیا ہووے تے اوس دے جسم دی ساری طاقت ہریندر نے کِیل لئی ہووے۔


شام ہوئی ہریندر اوس نوں ڈنر کروان لئی باہر لے گیا۔ دوویں نکیاں نکیاں گلاں کردے رہے۔ ڈنر توں بعد اوہ بانہاں وچ بانہاں پائی کسے پارک وچ ادھی رات تک گھمدے رہے۔ چن چاننی رات وچ ہریندر نے اوس نوں آپنیاں بانہواں وچ لے کے پہلی وار چمیا تے جسی جیویں سپیرے دے وس پے گئی ہووے ناگن وانگ مدہوش ہو گئی۔کسے امرویل وانگ اوس پپل نال لیٹ گئی جو آپنیاں بانہواں کھلاری ساہمنے کھڑا سی۔ اوہ بھنجے ہی گیلی گھاہ تے بیٹھ گئے تے ایس گلابی ٹھنڈ وچ جسی نوں جے نِگھ دے رہی سی تے اوہ سی ہریندر دے جسم دی گرمی۔اوہ بے ہوشی جیہی ہوئی اوس دی گود وچ سر رکھی پئی رہی۔ساہمنے چن چمک رہیا سی۔ رات دی چپ تے پریتم دا ساتھ۔۔۔۔ جسی جیویں سورگاں وچ سی۔ اوس دا محبوب اوس کول سی ایس وقت۔ اوس دی منزل اوس دیاں بانہاں وچ سی۔ اوس نے رب دا شکر ادا کیتا کہ ہریندر نے اوس نوں سویکار کر لیا ہے۔ کنی خوش قسمت ہے اوہ۔ کِنیاں کو ہون گیاں اوس وانگ کرماں والیاں جیہناں نوں اوہناں دے من پسند جیون ساتھی ملدے ہوون گے۔


'' گھر نہیں چلنا؟۔۔۔' ہریندر نے اوس نوں بے ہوشی دی حالت وچوں جگایا۔ '' نہیں میرا جی کردا اے میں ایسے طرحاں ساری رات تہاڈے نال ایتھے بیٹھی رہواں۔۔۔ایس رات دا کدے سویرا نہ ہووے۔۔۔۔ کنی ریشمی رات ہے۔ کنی کُولی ۔۔۔ کنی حسین۔۔۔'' اوہ کوِیاں وانگ بولی۔
''ٹھنڈ کافی ہو گئی اے جس، چل گھر چلیئے۔۔۔ اوتھے جا کے میرے نال کر لئیں جو وی کرنیاں نیں۔۔۔۔'' اوہ بدوبدی اوس نوں اُٹھاوندیاں ہوئیاں بولیا۔ جسی اوس دے موڈھیاں تے سر سٹی شرابیاں وانگ اوس دے نال تر دی رہی۔ اک پل لئی وی ہریندرنے اوس دا سر اپنے موڈھے توں نہ چکیا تے جسی وی جیویں چُنبک نال اوس نال چنبڑ گئی سی۔


گھر آکے ہریندر نے آپنے کمرے دا بوہا کھولیا۔ جسی حالے وی اوس دیاں بانہاں وچ سی۔ '' میرے نال سونا ہے توں ۔۔۔؟ اوس نے ہولی جیہی پچھیا۔
''ماں جی کیہہ سوچن گے ۔۔۔؟'' اوس دے بلھ کمبے۔'' ممی تاں ستی پئی ہے۔ توں سونا ہے تاں آجا۔۔۔ تیری مرضی ہے ۔'' اوہ رکھی آواز وچ بولیا۔
جسی نوں لگیا ہریندر اوس نال ناراض ہو گیا ہووے۔ اوہ تاں ہریندر دی ناراضگی بارے سوچ وی نہیں سی سکدی۔ کجھ پل صوفے تے بیٹھی سوچدی رہی '' کل نوں تاں میرا ہری نال ویاہ ہو جانا ہے۔ پھیر ایہہ جھجک کیوں؟ نالے جیہڑے چار گھنٹے اوس نے ہریندر نال بتائے سی اوس دا سرور ہن تک اوس دے دماغ وچ سی۔ اوہ اٹھی تے کپڑے بدلے بغیر ہی ہریندر دے نال چا پئی۔ ہریندر دے پیر چم لئے اوس نے۔۔۔۔ '' میں تیری ہاں ہری۔ میں تیرے توں دور نہیں رہ سکدی'' آکھ کے اوہ پھیر اوس نال لپٹ گئی۔اوس توں بعد پھیر اوس نوں مدہوشی دا دورا پیا تے کجھ وی ہوش نہیں رہی۔


ہوش آئی سی سویرے۔ جدوں اوس نے ہریندر نوں تیار ہوندیاں ویکھیا۔ '' کتھے چلے اوہ تسیں؟ اینی سویرے سویرے''
اوہ اکھاں ملدی اُٹھی۔
'' میں کم تے واپس جانا ہے۔ بہت بزی آدمی ہاں۔ کل وی بڑی مشکل نال آیا سی۔۔ چھٹی کتھے ملدی ہے مینوں۔۔۔'' اوہ پینٹ پاؤندا ہویا بولیا۔
'' چھٹی نہیں ملدی؟ پر اپنا تاں ویاہ ہوون والا ہے۔ کیہ ویاہ دے واسطے وی کسے نوں چھٹی نہیں ملدی۔ '' ویاہ ؟ کس دا ویاہ'' اوہ بوٹ پاؤندا ہویا رک گیا۔


''اپنا ویاہ۔۔۔ میرا تے تہاڈا ویاہ۔۔۔'' اوہ سنگدی جیہی بولی۔ عجیب شانتی سی اوس دے چہرے تے۔ طوفان آؤن توں بعد سمندر تے چھائی شانتی۔۔۔۔ آپا سونپن دی بے فکری۔۔۔ تے کسے سمپورتا دا احساس۔


آپنا ویاہ ؟ تینوں کس نے کہیا ہے کہ آپنا ویاہ ہووے گا؟ تینوں کوئی غلط فہمی تے نہیں ہو گئی میرے بارے؟ اوس دی آواز اچی ہو گئی۔ '' ایہہ تسیں کیہ کہہ رہے ہو؟ غلط فہمی کس گل دی؟ آپنی منگنی ہو چکی ہے۔ تہانوں پتہ ہی ہے گل بات پکی ہے۔ ہن تاں صرف ویاہ ہی ہوونا باقی ہے۔۔۔'' جسی نے اکھاں نیویاں کر لئیاں۔


'' گل سن کڑئیے۔ میرا تیرے نال کیہ دنیا دی کسے وی کڑی نال ویاہ کرواؤن دا کوئی ارادہ نہیں ہے۔ میں تاں تر پھر کے میلا ویکھن والا بندہ ہاں۔ کسے وچ قبضے وچ آون والے شے نہیں نہ میں آپنے آپ نوں کسے نال بنھ سکداں' سمجھی؟ '' اوہ کٹھور آواز وچ بولیا۔ '' پر تسیں ایہہ گل کہہ دیندے ۔ میں ۔۔۔۔ میں۔۔۔۔ اوہ روپئی۔


'' پہلاں تے ہن وچ کیہ فرق ہے ؟ اوس نے اکھاں دے آنے سوال وچ ایدھر اودھر گھمائے۔ '' فرق کیوں نہیں ' میں تہاڈے نال ستی ہاں۔ آپنی عزت دتی ہے۔۔۔ بھلے گھر دی کڑی ہاں۔ پہلاں دسدے تاں۔۔۔ اوہ اوس دے ہتھ پھڑ کے بولی۔


''میں تاں نہیں سی کہیا تینوں کہ توں میرے نال آکے سوں جا۔ توں آپ آ کے میرے نال ستی سی۔ ہن جے جوان کڑی آپ آکے نال پئے جاوے تاں بندہ کیہ کرے گا؟ تیرا اپنا قصور ہے۔ میری کوئی غلطی نہیں۔۔۔۔ '' ہریندر نے دوویں ہتھ پھڑ کے اوہنوں کھڑے کردیاں کہیا۔


رب دے واسطے ایداں نہ کرو ہری۔ میں تہانوں اپنا آدمی سمجھ کے آپنا آپ سونپیا سی۔ تسی کوئی غیر نہیں سی میرے لئی۔ آپنا ویاہ ہوون والا سی۔ مینوں کیہ پتہ سی ہوا دا رخ ایداں بدل سکدا اے۔۔۔ میں آپنیاں ہی نگاہاں چوں گر جاواں گی۔ پنڈ دی کڑی ہاں۔ میں کیہڑا انگریز ہاں۔۔۔۔ جس نوں اک واری عزت دتی دے دتی۔۔۔۔ ہن کتھے جاواں گی۔۔۔'' اوس نے ہری دے پیر پھڑ لئے۔


'' ایہدے وچ کیہڑی عزت وڑ گئی۔ تیرا کجھ نہیں گیا میرا کجھ نہیں گیا۔ عیش کر۔ا
نگلینڈ اپڑ گئی ایں۔ تیری ٹائپ دا دا کوئی بندہ تینوں لبھ ہی جاوے گا۔'' اوس نے سگرٹ سلگاوندیاں کہیا۔ '' پر میں تینوں ہی عشق کردی ہاں ہری۔ میں کسے ہور بارے' کدے سوچیا وی نہیں ہوونا۔'' '' جے توں مینوں عشق کردی ہیں تاں ضروری نہیں کہ میں وی تینوں عشق کراں۔ میرے موہرے دس کڑیاں کم کردیاں نیں۔ جے اوہ میرے نال آکے سوں جان گئیاں تاں مینوں اوہناں نال عشق ہو جاوے گا؟'' اوس نے سگرٹ دا لمبا کش کھچدیاں کہیا۔


'' پر میرے وچ کیہ کمی ہے' پڑھی لکھی ہاں' گھر دے کم کاج جاندی ہاں۔۔۔ ہور۔۔۔'' اوہ اتھرو بھریاں اکھاں نال بولی۔


''وڈی گل تاں ایہہ ہے کہ توں کالی ہیں۔ لوک کیہ کہن گے کیہو جیہی نوں نال لئی پھردا ہے۔ نالے میں رات تیرے نال بالکل انجوائے نہیں کیتا۔ میرا ہن تک موڈ خراب ہے۔ تینوں دس نہیں سکدا۔ سبھ توں وڈی چیز دنیا وچ سیکس ہے جے تسیں ایسے وچ خوش نہیں ہو تاں کیہ فائدہ' اجیہی رلیشن شپ دا۔ آندا جاندا تینوں ککھ نہیں پر تیرا قصور وی کیہ ہے۔ اوتھے پنڈاں وچ تہانوں کون سکھاؤندا ہے، اجیہاں گلاں سیکس ایجوکیشن بارے تاں کوئی سبجیکٹ ہی نہیں ہے اوتھے۔ بس ایم اے۔ بی ۔اے کروا دتا تے روٹیاں پکاؤنیاں سکھا دتیاں''۔ پھیر اوہ وچ دی ساہ لین لئی رکیا۔
''سچ ایداں ہی ہوندا ہے ہر واری' جدوں وی کسے انڈین کڑی نال سیکس کرو ایداں لگدا ہے کسے دیوی ماتا نال سیکس کیتا ہووے' کسے دھارمک ماتا نال۔ سالی کنی گندی فیلنگ ہے ''۔ اوس نے نک چڑاوندیاں کہیا۔ '' کوئی گل نہیں میں ہولی ہولی سبھ سکھ لواں گی۔ اوس نے مونہہ تے ہتھ رکھدیاں کہیا جیویں کہہ رہی ہووے اک وار سیوا دا موقعہ دیو پھر جی جان نال تہاڈی غلامی کراں گی''۔


'' دیکھ کملی نہ بن۔ تیرا میرا کوئی بیس نہیں بندا۔ میرے کول تاں کڑیاں بہت وڈی لسٹ ہے تے تیرا نمبر بہت پچھوں آؤندا ہے۔ بہتر ہے توں آپنا کوئی ہور بندا لبھ لے جاں انڈیا واپس چلی جا'' اوس نے دو ٹوک فیصلہ سنایا۔ ''


انڈیا واپس چلی جاواں؟ پر کس مونہہ نال۔ کیویں میں سماج نوں فیس کراں گی ہری۔ تیری بھین نال کوئی اجیہا کر جاوے تاں تینوں کیویں لگُو؟'' اوس نے ہریندر دا آخری ترلا لیا۔


'' میری بھین دا کیہ پھیر ٹائر گھِس جاؤ؟'' آکھ کے اوہ بیگ چک کے باہر چلا گیا۔ جسی دے لئی بھچال آگیا سی۔ اوس نوں چارے کندھاں گھمدیاں جاپیاں تے اوہ ڈڈیا کے بیڈ تے ڈگ پئی۔ ہریندر چلا گیا سی۔ سارے ٹبر دیاں اکھاں بدل گئیاں۔ سس نے بے وسی ظاہر کیتی۔ '' پت مندا نہیں من دا کیہہ کرئیے''۔


جسی جیویں بھری سبھاء وچ دروپدی وانگ کُر لااُٹھی۔ رب دے واسطے مینوں ننگی نہ کرو۔ پر کوئی کرشن اوس دی مدد لئی نہ آیا۔ سس نے کہہ دتا سی کہ اوہ انڈیا واپس چلی جاوے۔


اوہ لُٹی پُٹی دنیا دا تماشا ویکھ رہی سی تے سر سٹی صوفے تے پئی سوچ رہی سی۔ آپنی زندگی بارے۔ گھر دے سبھ میمبر آپنے کماں تے گئے ہوئے سی تے اوس دا سوہرا جو اکثر گھر رہندا سی' آیا۔ '' کیہ گل اے جس'' ؟ اوس نے ہمدردی نال پچھیا۔


'' باپو جی۔۔۔'' اوہ بچیاں وانگ اجاگر سنگھ دے گل لگ کے رو پئی۔ '' میں کیہ کراں باپو جی۔ آپنا کالا مونہہ لے کے کتھے جاواں۔ سارے پنڈ نوں پتہ اے میں تہاڈی نونہہ ہاں۔''


اجاگر سنگھ نے اوس دی پٹھ تے ہتھ پھیریا۔ '' توں فکر نہ کر میرے ہوندیاں تینوں کجھ نہیں ہون والا۔ آپے سبھ ٹھیک کر لوں''۔ اوہ اوس نوں دھرواس دے رہیا سی۔ '' تسیں کیہہ کر سکدے او باپو جی' جدوں ہریندر ہی نہیں مندا پھیر میرا وسیبا ایس گھر وچ کیویں ہوؤ۔ میں تاں وسن توں پہلاں ہی اجڑ گئی۔'' اوس نوں اجاگر سنگھ دی گل تے یقین نہیں آرہیا سی۔


'' کرن نوں کیہ ہے ؟ میں گھر دا مالک ہاں۔ ہریندر کون ہوندا تینوں گھروں کڈن والا۔ میں جو ہاں۔ میں تیرے نال ہاں۔ گھبرا نہ۔'' آکھدا ہویا اوہ اوس دی پٹھ توں آپناہتھ اوس دی ننگی گردن تے لے گیا۔ بزرگ دے ساہ جسی نوں اپنے کناں تے محسوس ہوئے۔ اکھڑے ٹٹے ہوئے ساہ۔ جسی نوں اچکان جیہی ہوئی۔


اوس نے آپنے آپ نوں ہلایا پر اجاگر سنگھ دی پکڑ مضبوط سی۔ کسے انجانے بھے نال کمب گئی اوہ۔ اوس نے نظراں اپر چکیاں۔ بڈھے دیاں اکھاں وچ شیطان نچ رہیا سی۔ اوس نے جھٹکا مار کے آپنے آپ نوں چھڈایا تے لڑکھڑاؤندی ہوئی پوڑیاں چڑھ کے اپنے کمرے وچ چلی گئی۔


اوس رات کئی وار کسے نے اوس دے کمرے دا بوہا تھپتھپایا تے جسی ساری رات سوں نہ سکی۔ رات اکھاں وچ ہی لنگھ گئی سی۔سویرے اٹھ کے اوس نے دور دی رشتہ داری چوں پیندی آپنی کسے بھین دا فون نمبر لبھیا۔قدرتی رانی نوں فون تے مل گیا۔


'' کیہ حال اے۔ ویاہ دا پتہ تک نہیں دتا؟'' رانی اُلاہما دے رہی سی۔ '' کیہڑا ویاہ تے کیہڑا مکلاو؟ میں تا برباد ہو گئی ہاں۔'' اوس نے روندیاں روندیاں اپنی کہانی رانی نوں سنائی۔


'' نہ ' نہ ۔ انڈیا جان دی غلطی نہ کریں۔ اوتھے تیرا کجھ نہیں بننا۔ میں کردی ہاں تیرے لئی کجھ۔ پردیساں وچ آپنے بندے ہی کم آوندے نیں۔ شام نوں آون دے تیرے بھاء جی نوں۔ توں گھبرا نہ۔ اسیں تیرے نال ہاں۔'' رانی نے سکیاں بھیناں وانگ اوس نوں حوصلہ دتا۔ جسی نے رب دا شکر منایا کہ کوئی تاں ہے اوس دی پکار سنن والا۔


شامیں فون کرن دی بجائے رانی آپنے گھر والے نوں لے کے خود ہی آگئی، جسی دے سوہریاں نے نک بلھ کڈے۔'' کوئی گل نہیں میں آپنے گھر لے جاندی ہاں ایس نوں۔ اسیں آپے منڈا ویکھ کے ایہدا ویاہ کردیواں گے۔ انڈیا جا کے کیہ کرے گی۔ بھارتی عورت جدوں اک وار لچھمن ریکھا ٹپ جاندی ہے پھر اوہدی کوئی واپسی نہیں ہوندی' کوئی یو ٹرن نہیں ہے بھارتی عورتاں واسطے''۔ تے پھیر جسی' رانی دے گھر آگئی۔ اوس نوں لگیا جیویں راون دی لنکا وچ اوس نوں بھویکھن دا گھر مل گیا ہووے۔


کجھ دناں بعد ہی رانی نے اوس نوں کسے سٹور وچ شام دی پارٹ ٹائم جوب لبھ دتی۔ دِنے اوہ سارا دن رانی دے گھر کم کردی تے شام نوں جوب تے چلی جاندی۔


چار پنج ہفتے شانتی دے نکل گئے۔ اک دن شامیں جدوں اوہ کم تے جان توں پہلاں رسوئی کھڑی چاء بنا رہی سی تاں رانی دا گھر والا جگروپ آیا۔ '' بھاء جی چاہ پیو گے تسیں'' اوہنے سہجے ہی پچھیا۔ '' جے اینے پیار نال پچھدی ہیں تاں پی لیندے ہاں۔'' اوس نے جسی دے مونہہ تے ہلکی جیہی چپت دتی۔


'' آہ لؤ اپنی چاء بھاء جی۔'' آکھ کے جسی نے اک کپ جگروپ ول ودھایا۔'' آہ توں بھا جی بھا جی کیہ لا رکھی ہے۔ میں تیرا جیجا ہاں۔ کناں خوبصورت رشتہ ہے۔ جیجے تے سالی دا۔ کناں رومانٹک توں مینوں جیجا کہیا کر جاں رُوپ۔ بھاء جی تاں ایویں بازارو جہیا شبد ہے۔''


جسی بہت دیر تک چپ رہی۔
''نالے اینی اداس کیوں رہندی ہیں توں؟''
''جس دے کرماں وچ اداسیاں ہون اوہ کیہ کرے؟'' اوہ اکھاں بھر کے بولی۔


''کرماں تیریاں نوں گولی وجی ہے؟ سوہنی جوان کُڑی ہیں۔ ویہہ مُنڈے لبھ جان گے۔ ایتھے تاں چار چار نیانیاں والیاں ویاہیاں جاندیاں نیں۔ آپ خوش رہیا کر نالے جیجے نوں وی خوش رکھیا کر۔ پھیر ویکھ تیرے کم کیویں بندے نیں۔'' اوس نے جسی دے والاں وچ ہتھ پھیریا۔


''کیویں''؟
'' دیکھ جسی توں کوئی نیانی تاں ہے نہیں۔دنیا دیکھ چکی ہیں۔توں ساڈا کم کردے۔ اسیں تیرے کم کردیواں گے۔''


''کیہہ مطلب؟''


''مطلب صاف ہے۔ توں میری فیس دے دے جیہو جیہا منڈا کہیں گی لبھ دیاں گا۔اک ہتھ لے اک ہتھ دے۔ دنیا وچ کوئی کم فری تاں ہوندا نہیں ''۔ اوہ ہنڈھے ہوئے وپاری وانگ بولیا۔ '' پر ' پر میں ایہو جیہی کڑی نہیں ہاں بھاء جی۔۔۔'' اوہ تھوڑا غصے وچ بولی۔ '' پہلاں ساریاں ایہو کہندیاں نیں۔نالے توں کیہڑا ہن کواری ہیں، جیہو جیہا اک نال سوں گئی اوہ جیہا اک توں دوھ نال۔ کیہڑا کوئی سٹیمپ لگ جانی ایں''۔
جسی نوں لگیا جیویں جگروپ اوہدے ساہمنے ننگا ہو گیا ہووے۔ اوس دیاں اکھاں ساہمنے رانی دی بھولی بھالی تصویر گھم گئی، کنے وشواس تے پیار نال اوہ اوہنوں اپنے گھر لے کے آئی سی۔'' میں تاں حالی ہریندر نوں بھلی نہیں ہاں۔میرا ویاہ کروان نوں جی وی نہیں کردا۔'' اوہ بے وسی وچ بولی
'' نہیں کردا نہ کروا آپنی جوانی کیوں گالدیہیں ہر یندر واسطے جیجے نال ہی رہی چل۔لوک دو دو کیہڑا رکھدے نہیں۔میں تینوں وی برابر دا درجہ دیواں۔۔۔؟'' اوس نے چھاتی ٹھوک کے کہیا۔ ''رانی بھین کیہ سوچے گی میرے بارے۔'' اوس نے اپنے آپ نوںسوال کیتا۔'' رانی نوں سوا پتا اے ؟ گل اپنے وچکار رہے۔۔۔۔'' اوہ آکھ ہی رہیا سی کہ باہرلا دروازہ کھلیا تے رانی اندر آ گئی۔


'اوہ ڈارلنگ۔۔۔ میں اج ذرا جلدی گھر آگیا سی۔ جسی کہندی جیجا جی چاء پی لؤ پر تینوں تاں پتہ ہے میں کسے دے ہتھ دا پکیا کجھ کھاندا نہیں۔تیرے ہتھاں وچ امرت ہے۔'' آکھ کے اوس نے رانی دے ہتھ چم لئے۔


جسی دا ڈھڈ ہسیا پر اوہ چپ رہی۔ہولی ہولی جسی تے جگروپ دا دبا ودھ دا جارہیا سی۔ہن اوس دا اوس گھر وچ رہنا مشکل ہو گیا۔ اوس نے اخبار پھرولے۔ نیڑے دے ہی کسے شہر وچ کپڑے سین دی فیکٹری وچ مشین مین دی لوڑ سی۔ ٹریننگ اوہ آپ دیندے سن۔جسی نے فون کیتا تے اوہناں نے جسی نوں سد لیا۔فیکٹری دے نیڑے ہی اوس نے کسے بڈھی دے نال رہن دا پربندھ کر لیا۔رانی تے سنیا تاں بڑا حیران ہوئی۔ '' ایہہ توں اچانک کیہہ فیصلہ کیتا، '' بس پیسے سوہنے ملن گے۔ نالے پھر توں میرا ویاہ وی تاں کرنا ہے۔ تھوڑے پیسے جوڑ لواں''۔ جسی نے گل ہاسے وچ اڈائی۔


فیکٹری وچ بھاویں جسی دا جی تاں نہیں سی لگدا پر ہور کردی وی کیہ۔ کئی وار اوس دا ہتھ مشین دی سوئی ہیٹھ آجاندا پر اوہ رو کے چپ کر جاندی۔ سوچدی شائد کدے ہریندر واپس مڑ آوے۔ اوس دا سپروائزر مسٹر شرما کئی وار آکے اوس دی مدد کردا۔ ویلے کویلے اوس نوں پنج دس منٹ دی بریک دے دیندا، اوہ اوس نوں اپنے پیو ورگا لگدا آپنے ہی گھر دا کوئی بندہ۔ اک دن چاء پین دے سمے اوس نے اپنی کہانی شرمے نوں سنائی۔


'' پھیر تاں تیرا ویزہ مکن والا ہونا اے''۔ آپنا حیلا کر نہیں تاں ماری جاویں گی''۔ شرمے نے اوس نوں سمجھایا۔ جسی نوں نویں چنتا نے آن گھیریا '' ہاں ایہہ تے مینوں یاد ہی نہیں سی پر میں کیہ حیلا کراں؟ کسے نوں جاناں نہ بجھاں''۔ اوہ بے وسی وچ بولی۔


کسے نال ویاہ کروا لے فٹافٹ''


ویا کہدے نال کرواواں ؟ اوہ گھبرا گئی۔ جسی جے کتے توں مینوں پہلاں مل جاندی تاں میں ہی تیرے نال ویاہ کر لیندا۔ نالے ایہو جیہی کتی تیویں دے وس نہ پیندا' جیہو جیہی مینوں ملی ہے ''۔ اوہ غصے وچ سر ہلا رہیا سی۔ جسی زور دی ہسی۔ '' چنگا مذاق ہے''۔


سچ میں مذاق نہیں کردا جسی۔ ایس تیویں نے میری زندگی تباہ کر کے رکھ دتی ہے۔ میں تاں کہنا مرے وچوں میرا کھیہڑا چھٹے''۔ '' چلو تسیں اپنی تیویں نوں بعد وچ مارنا پہلاں میرا کم کرواؤ''۔ اوس نے شرمے دا دھیان اپنے ول کھچیا۔


'' ہاں تیرا وی کجھ کرنا ہی پؤ۔کسے گورے نوں ہزار دو ہزار پونڈ دے کے پاسپورٹ تے سٹیمپ لوا دیندے ہاں''۔جسی نے آپنے گہنے ویچے،جیباں پھرولیاں تے کھل کھونجے ہتھ ماریا۔ دو ہزار پونڈ اکٹھے کر کے اوس نے شرمے نوں دے دتے تے اوس دا کاغذی ویاہ ہو گیا۔ اوس دے دماغ توں ویزا ختم ہون دا بوجھ اتر گیا۔ کسے نویں اُتساہ تے اوس اندر جنم لیا۔ اوس دے دل دے سارے زخماں تے صبر دی پٹی بنھی تے نویں زندگی شروع کرن دا فیصلہ کر لیا۔ '' کیہہ حال ہے سوہنیو۔ گل ہی نہیں کردے ۔ اوکھے مطلب نکل گیا تے پچھان دے نہیں۔'' اک دن شرمے نے شکوہ کیتا۔


'' ایہو جیہی تاں کوئی گل نہیں شرما جی۔ اصل وچ ٹائم ہی نہیں ملیا۔۔۔' اوہ حلیمی نال کرسی توں کھڑی ہو گئی۔ ''ٹائم نہیں ملیا؟ ساڈے گھر تاں کلیش پیا ہویا ہے تہاڈے کر کے''
میرے کر کے؟ پر میں اجیہا کیہ کر دتا؟'' اوہ حیران ہوئی۔


کرنا کیہ سی' اوویں کسے نے میری جنانی نوں کہہ دتا کہ اپنا عشق ہے تے اوہ ہن مرن مارن تے اتری ہوئی ہے''۔ '' آپنا عشق؟ پر میں تاں تہانوںآپنے باپ وانگ سمجھدی ہاں۔ سپنے وچ وی کدی میں اجیہا غلط نہیں سوچیا ہونا۔'' جسی نے آپنی صفائی دتی۔


'' اگ توں بغیر دھواں نہیں اٹھدا جسی۔ ساری فیکٹری کہہ رہی ہے کہ شرمے دا تے جسی دا عشق چل رہیا ہے۔ نالے اوہناں دے کہن دا کیہ ہے۔ میں خود وی محسوس کردا ہاں کہ توں مینوں بہت چنگی لگدی ہیں''۔ اوہ بے شرمی نال مسکرایا۔ جسی دے اندر بھمبوکا جیہا اُٹھیا۔ تاں ایہہ اگ ایس دی آپنی لائی ہوئی ہے۔ ''شرما جی، شرم کرو کجھ میں تہاڈے بچیاں ورگی ہاں۔ عشق کنا وی انھا ہووے پر اپنا بولا نہیں ہوندا کہ آپنے پیو جڈی عمر دے بندے نال کیتا جاوے۔ جے کوئی کردا وی ہوؤ تاں مجبوری ہوسکدی ہے۔ عشق نہیں۔۔۔۔'' آکھ کے اوہ مڑ مشین تے کپڑے سین بیٹھ گئی۔


ایس گھٹنا توں بعد اوس نے شرمے نال بولنا چھڈ دتا۔ شرما کیہ اوس نے جیویں کل دنیا نال ہی بولنا چھڈ دتا باہرلی دنیاں توں مونہہ موڑ کے اوس نے اپنے اندر ہی اک دنیاں وسا لئی۔ باہر دی دنیا نال جیویں ہن اوس دا کوئی واہ واسطہ نہیں گیا سی۔ آپنی ایکل نوں ختم کرن لئی اوس نے ایوننگ کلاساں وچ پڑھائی شروع کر دتی۔ اندرلی ایکل تاں بندا کٹ لیندا ہے۔ کدے سزا سمجھ کے تے کدے تپسیا سمجھ کے۔ پر باہرلی ایکل چھپایاں نہیں چھپدی۔ ہر روز کوئی نہ کوئی اوس دا چاہون والا پیدا ہو جاندا تے اوس دا ساتھ منگدا۔ اوس دے زخماں تے ملہم لاؤن دی گل کردا۔ جسی دے جیویں کن پک گئے سی ایہو جیہاں گلاں سندیاں۔ کدے کوئی جان پہچان چوں رشتہ آجاندا کُڑی کول پکے کاغذ نے انگلینڈ دے۔ ساڈا منڈا ہی پکا کروا دیوے۔ پیر دھو دھو کے پیوے گا۔ کدے کسے دا طلاق ہو جاندا، جاں کسے دی تیویں مر جاندی، بھج بھج جاندی، تاں لوکاں نوں جیویں اچانک ہی اوس دا خیال آجاندا۔ہاسا تاں اوس نوں اودوں آؤندا جدوں اوس نالوں پنج ست سال چھوٹی عمر دے منڈیاں دے وی اوس نوں رشتے آؤندے۔ صرف ایس کر کے کہ اوس کول انگلینڈ دی پکی رہائش ہے، جیویں اوس دے ہتھ وچ کوئی گِدڑ سنگھی سی جاں جادو دی کوئی چھڑی۔


جیویں ہر مرد دا فرض سی اوس نال ہمدردی جتاؤنا۔ ہمدردی جو صرف اِکو طریقے نال جتائی جا سکدی سی' جیویں ہر بندے نوں اوس تے ترس آؤندا سی۔ جاں اوس نوں ویکھ کے بے درجہ ہی لوکاں نوں عشق دا دوراپے جاندا سی۔ کئی وار اوہ سوچدی: عورت دی وی کیہ زندگی ہے۔ انگلینڈ ہووے بھاویں انڈیا۔ مرد لئی اوہ صرف بھوگ دی چیز ہے۔ ورتن دی جیویں اوہ کوئی جائیداد ہے جاں کوئی تُری پھر دی اگ جس تے ہر کوئی آپنے ہتھ سیکنے چاہندا ہے۔ کوئی اکاش اُڈ دی اکلی پتنگ جس تے ہر شرارتی بچے دی اکھ ہے کہ اکاش اوہ کٹ کے اوس دی جھولی وچ آپوے۔ کوئی اوس نوں سمجھن دا جتن نہیں کردا کہ اوس دے وی کوئی ارتھ ہن۔ اوس نوں وی جین دے حق ہن۔ آپنی زندگی آپ جین دے۔ کیوں ہر وار مرد سوچدا ہے کہ عورت مرد بغیر رہ ہی نہیں سکدی؟ عورت لئی مرد بہت ضروری ہے۔


خوش قسمتی نال ایہناں دناں وچ اوس نوں سوشل سروسز وچ سوہنی نوکری مل گئی۔نواں ماحول، نویں لوک تے نواں کم۔ جسی دا چا نہ چکیا گیا۔فیکٹری دے ماحول چوں نکل کے اوہ دفتر دے ماحول وچ آ گئی۔ پڑھے لکھے لوک نے ایتھے سارے۔ اوس دی پڑھائی دی قدر ہووے گی۔ کجھ نواں سکھے گی اوہ تے نواں گرہن کرے گی۔ گھٹو گھٹ کوئی جگروپ جاں شرما تاں نہیں ایتھے ہووے گا۔ اوہ پھیر توں پھل وانگ کھڑنی شروع ہو گئی۔ آپنی پرانی زندگی نوں بھلن لگی تے نویاں سہیلیاں ساتھی بناؤن لگی۔


تے ایتھے ہی اوس دی ملاقات ہوئی سی کنول نال۔ کنول جو اوس دے نال ہی کم کردا سی۔ سوہنا سُنکھا منڈا سی۔ کئی سال پہلاں ویاہ کروا کے انڈیا توں انگلینڈ آیا سی۔ عام ویاہاں وانگ اوس دا ویاہ وی ٹٹ گیا سی تے ہن اوہ اکلا سی۔ جسی داہم عمر سی۔ جدوں جسی نال پینڈو لہجے وچ گل کردا تاں جسی دے جیویں اندر ٹھنڈ پے جاندی۔


''چل کڑئیے چاہ پی کے آئیے۔کڑئیے توں تاں جماں ای پنڈ دی کڑی ایں بھائی۔'' جدوں اوہ آکھدا تاں جسی نوں لگدا اوہ آپنے پنڈ آپنے گھر دے ویڑھے وچ کھڑی ہووے۔ کدے کدے لوڑ پین تے اوہ کم وچ اوس دی مدد کردا تے دفتر دے طور طریقے سمجھاوندا۔ جسی نوں اوہ جیویں مسیحا جاپدا تے اوہ گل گل تے اوس دا شکریہ کردی۔
تینوں میں کیہو جیہا لگداں؟'' اوہ کئی وار پچھدا۔
'' بہت چنگا''۔


'' آپنے بھرا ورگا نہ کہہ دیویں کِتے۔ میں کدے کسے کڑی نوں آپنی بھین نہیں بناؤندا۔'' اوہ زرو دی ہسدا تے جسی وی مسکرا پیندی۔ جسی تینوں پتہ اے اسیں بہت چنگے دوست بن سکدے ہاں۔ بغیر کسے لاگ لپیٹ توں تے دوستی وچ بہت کجھ آجاندا ہے۔ کئی رشتے ہنڈھاؤندی ہے دوستی اکو ویلے۔۔۔۔'' اوہ کدے آکھدا تاں گل جیویں جسی دے اندر لہہ جاندی۔ پر اوہ کوئی جواب نہ دیندی۔


'' جسی توں کیویں اگلی جیہی رہ کے آپنے آپ نوں سزا دے رہی ہیں؟ میرا تاں کئی وار بہت من گھبراندا ہے' ایس ایکل توں''۔ اوس نے اک وار جسی کول دل پھرولیا سی۔ '' نہیں کنول ہن تاں جیویں عادت جیہی پے گئی ہے اکلے رہن دی' کوئی زیادہ محسوس نہیں ہوندا۔'' اوس نے جیویں اپنے اندرلا سچ دسیا۔ '' تیرا جی نہیں کردا تیرا وی کوئی گھر ہووے۔۔۔ تیری گرہستی ۔ تینوں وی کوئی پیار کرے۔۔۔؟ '' اوس نے جسی دے زخم چھیڑے۔


'' ہاں کئی وار جدوں بہت اداس ہو جاندی ہاں تے زندگی دے پچھلے سفر تے جھات مار دی ہاں تاں جوڑ جمع کردی ہوندی ہاں بئی کیہہ کھویا تے کیہہ کھٹیا۔ پھیر میرا من کر دا اے کئی واری کہ کاش میری وی کوئی چھوٹی جیہی دنیا ہووے، جتھے میں چھوٹے چھوٹے بچیاں نوں مٹی کھان توں کُٹاں۔۔۔ رات نوں آدمی گھر لیٹ آئے تاں گھر دے بھانڈے بھناں۔ اُچی اُچی لڑائی کراں جاں پھیر کدے سیالاں وچ ڈھڈ ودھا کے نگھی نگھی دُھپ وچ بیٹھ کے چھوٹے چھوٹے موزے بناں۔۔۔'' اوس نے ٹھنڈا ہوکا بھریا۔ '' پر ایڈاہوکا بھرن دی کیہڑی گل ہے؟ایہہ کوئی ایڈا وڈا سپنا نہیں ہے جو پورا نہ ہو سکے۔۔۔'' اوس تے ہسدیاں کہیا۔


'' نہیں کنول' مینوں پتا اے سپنا کوئی وڈا نہیں ہے۔ پر سپنے دے پورے ہون دا اک وقت ہوندا ہے۔ میں اوہ سٹیج ٹپ چکی ہاں ہن۔ ہن تاں بچیاں دیاں کھیڈاں لگدیاں نیں ایہہ گلاں۔'' اوہ دُھر اندروں اُداس سی۔


'' نہیں جسی، تیرا گھر ہووے تے تیرا آدمی' پھیر تینوں پتہ لگے کہ عورت دے ارتھ کیہ نیں''۔ '' میں سمجھدی یاں عورت دے ارتھ تے گھر دے ارتھ۔ عورت ہاں میں، پنچھی وی آپنے آہلنے لوچدے نیں۔ پھیر عورت تاں ہوندی ہی گھر لئی ہے۔ پر جدوں اک واری اوس توں اوس دا گھر کھوہ لیا جاوے تے اوس توں راہاں دی خاک چھاننی پے جاوے تاں بہت حد تک اوس دے اندرلی عورت مر جاندی ہے''۔
'' توں آپنے جذبیاں دی آپ قیدن ہیں۔ آپنے آپ نوں ایس خول چوں باہر کڈھ۔ عورت ندی وانگ ہوندی ہے' جدوں تک کسے سمندر وچ نہ ملے اوہ سمپورنتا نوں نہیں پہنچدی بھٹکدی رہندی ہے۔ کسے مرد وچ جذب کر آپنے آپ نوں۔ تیرا ادھورا پن ختم ہووے''۔ اوہ ٹھنڈی سیت آواز وچ بولیا۔
'' کوئی ضروری نہیں ایہہ بھٹکن ہووے۔ تلاش وی ہوسکدی ہے' صحیح دی تلاش''۔ اوس نے بحث کیتی۔تلاش زیادہ لمی ہو جاوے تاں ہار بن جاندی ہے'' اواہ کھج گیا۔ '' ضروری نہیں ہر تلاش نوں منزل ملے۔ کئی راہاں وچ وی رہ جاندے نیں۔ مینوں لگدا اے میرا وی ایہی حشر ہونا ہے''۔ اوس نے دور آکاش وچ ویکھدیاں کہیا۔'' کیوں؟ سکھ نال تیری چھ فُٹ دی منزل تیرے ساہمنے کھڑی ہے' توں کیوں راہاں وچ رہیں''۔
آکھ کے اوہ زور دی ہسیا تے جسی وی ہاسا نہ روک سکی۔


ایس طرحاں کئی واری کنول اُس نال سوال جواب کردا۔ پر ہن اوس دی عادت وچ عجیب جیہا چڑچڑا پن آگیا سی۔ جسی ایس بدلاؤ نوں محسوس کررہی سی۔ '' توں کیہ سوچیا میرے بارے جسی۔۔۔؟'' اچانک اک دن کنول نے اوس نوں پچھیا سی۔ '' میں کیہ سوچنائے؟ توں بہت چنگا بندہ ہیں۔ پڑھیا لکھیا، افسر لگیا ہویا ہیں تے میرا بہت چنگا دوست ہیں۔۔۔۔'' اوس نے ہسدیاں ہوئیاں کہیا۔


'' بس ہور کجھ نہیں؟''
ہور کیہ ہوسکدا اے؟


'' اینی بھولی نہ بن۔ مینوں پتا اے آپاں ایس توں ودھ وی کجھ ہاں اک دوجے لئی۔۔۔۔ میں چاہنداں کہ آپاں ویاہ کروا لئے ہن۔ بہت ہو گیا ایہہ دوستی دا ناٹک۔' اوہ کاہلی کاہلی بولیا۔ جسی نوں کنول توں اجہی امید نہیں سی۔ اوس نے لمی چپ دھاری رکھی۔'' میری گل دا جواب دے جسی۔ میں اج تیرے نال فیصلہ کر لینا چاہندا ہاں''۔ اوہ اوس دا ہتھ پھڑدیاں بولیا۔


'' کیہ جواب دیواں۔۔۔۔ میں تاں کدے ویاہ بارے سوچیا ہی نہیں۔ خاص کر کے تیرے بارے، جدوں کہ توں مینوں پہلے دن ہی کہہ دتا سی کہ آپاں چنگے دوست ہاں۔ دوستی تاں بہت پاک رشتہ ہے کنول، جو گل اسیں کئی وار اپنے آپ نال وی نہیں کر رہے ہوندے دوستاں نال کر لینے آں۔'' '' پر ایہہ کیہو جیہی دوستی ہے مرد تے عورت دی جیس وچ جسم دا رشتہ ہی نہ ہووے''


ایہہ وی کیہ خاص شرط ہے مرد تے عورت دی دوستی وچ جسم دا رشتہ ہووے؟'' جسی نے سوال کیتا۔ '' میں تیرے لئی بہت سماں برباد کیتا جسی۔ کنا سماں کھپایا ہے۔ میں تینوں اینا کجھ سکھاون وچ۔ سال بھر ہو گیا میں تیرے لئی جل رہیا ہاں۔ ۔۔۔ تے تیرے تک سیک وی نہ پہنچیا ہووے۔ ایہہ کیویں ہوسکدا ہے؟''


'' جے توں جلیا ہیں تاں مینوں پچھے جاں دسے بغیر جلیا ہین کنول۔ میں تینوں سچ دساں کہ میں نہیں سوچدی ویاہ توں بعد توں میرے نال خوش رہیں گا۔ میرے واسطے ویاہ ہن اک سردردی توں سوا کجھ وی نہیں ہے۔ ہن میں کسے دا ادِھین نہیں رہ سکدی تے ویاہ بہت وڈا سمجھوتا ہے' جس دے وچ تسیں کئی قنوناں دے ادِھین چلدے ہو'' اوس نے پشٹ شبداں وچ کہیا۔


''کیہہ توں میری غلام ہو جاویں گی؟''
'' سبھ توں وڈی غلامی آرتھل غلامی ہے کنول' جدوں تسیں کسے اگے ہتھ اڈدے ہو۔ ایسے بنا تے مرد عورت اُتے صدیاں توں رول کردا آرہیا ہے تے میرا خیال نہیں میں ایس پکھوں غلام ہاں۔ جاں پھیر سوچ دی غلامی ہوندی ہے''۔ اوس نے اپنے شبداں تے دباؤ پایا۔
'' اوہ کیہڑی''


جیویں توں ادھی راتیں دارو پی کے کہیں کہ میرے دوستاں واسطے روٹی پکا تے مینوں اوس وقت نیند آئی ہووے۔۔۔۔ میرا خیال نہیں ہے کہ میں اوس ویلے تیرا حکم مناں گی۔'' کنول نوں جسی توں ایہو جیہے جواب دی امید نہیں سی۔ اوہ تاں سوچدا سی ویاہ دی گل سن کے جسی کٹی ہوئی ٹاہنی وانگ اوس دے قدماں وچ آڈگے گی۔ اوہ غصے وچ تلملایا۔


'' مینوں نہیں لگدا کنول ،ہن میں کسے گھر وچ سما سکدی ہاں۔ زندگی دا بوہتا حصہ راہاں وچ لنگھ گیا۔ ہن تاں گھر وساؤن دی حسرت ہی نہیں رہی۔ گھر دا سپنا دیکھنا میریاں اکھاں نے کدوں دا چھڈ دتا ہے '' اوہ کجھ چر چپ رہن توں بعد بولی۔ '' گھر وچ سما نہیں سکدی؟'' دراصل جس ویہڑکی نوں تھاں تھاں کھرلیاں وچ مونہہ مارن دی عادت پے جاوے اوہ اک کِلے تے بجھنا کدے پسند نہیں کردی۔۔۔۔ توں کیہ سمجھدی ہیں توں اکلی ہی ہیں میری نگاہ وچ۔ میرے کول تاں کڑیاں دی بہت وڈی لسٹ ہے۔۔۔'' اوہ اپنے اُپمان دا بدلہ لینا چاہندا سی۔


'' تے اوس لسٹ وچ میرا نمبر بہت پچھوں آؤندا ہے۔۔۔۔'' جسی نے گھور کے کنول ول ویکھیا۔ '' کنول میں تیری بہت عزت کردی ہاں۔ مینوں آپنی بے عزتی کرن تے مجبور نہ کر ۔ ننگا نہ ہو میرے ساہمنے اوس دا آپنے تے قابو نہیں سی رہیا۔


'' ننگا نہ ہوواں کیہ مطلب؟''


ضروری نہیں کہ تسیں کپڑے لاہ کے ہی ننگے ہوندے ہو۔ کئی واری بندہ صرف اپنے بولن کر کے ہی ننگا ہوجاندا ہے' جدوں سبھیتا دا لباس اتار سٹدا ہے۔۔۔'' اوہ بولدی چلی گئی۔
'' توں کنے کو ننگے بندے ویکھے نیں ہن تک'' کنول نے جملہ کسیا۔


'' میں تاں ہن تک زیادہ ننگے بندے ہی ویکھے نیں تے بہت ویکھے نیں۔ کپڑیاں وچ تمیز والے بندے تاں انگلیاں تے گنے جاسکدے نیں۔۔۔'' آکھ کے اوہ کافی دا خالی پیالا زور نال میز تے پٹک کے کھلو گئی سی۔ تے اج جدوں اوہ انڈیا توں آئی چھٹی پڑھ دی ہوئی آپنے خیالاں دی دنیا وچ گم سم سی تاں کنول اوس نوں کلی بیٹھی ویکھ کے آگیا۔ ''کیہ گل بہت زیادہ ناراض ہو گئی توں تاں۔ چاہ پانی وی نہیں پچھدی؟'' اوہ ساہمنی کرسی تے بیٹھدا ہویا بولیا۔


'' نہیں میرا کیہ حق ہے تیرے نال ناراض ہون دا۔۔۔۔'' جسی نے گل مکائی۔'' میں سوچیا تینوںمنا لواں' اوس دن دی گرما گرمی کر کے سجی پھر دی ہیں۔'' جسی نوں لگیا جیویں کنول کسے ہارے ہوئے جواری وانگ اوس نوں اک بازی ہور کھیڈن لئی کہہ رہیا ہووے۔


ایہہ سوچدے سار ہی اوس نوں زہر جیہا چڑھیا تے اوس نے ہتھ وچ پھڑی چٹھی ٹکڑے ٹکڑے کر کے کافی دے خالی کپ وچ سٹ دتی۔
'' کس دی چٹھی ہے۔۔۔؟'' کنول نے بے چینی نال پچھیا۔ '' پتہ نہیں کس دی ہے۔ انڈیا توں آئی ہے کسے دی۔'' اوہ لاپرواہی نال بولی۔ '' تینوں نہیں پتا کس دی ہے تیرے ناں تے آئی ہے؟ '' اوہ حیران ہویا۔
تیرے ورگا ہے کوئی میرا نواں عاشق پیدا ہویا۔ مینوں '' خالی پلاٹ'' سمجھ کے آپنا قبضہ کرنا چاہندا ہے۔ کتھے کتھے نشانے مار دے نیں لوک۔۔۔'' جسی نے نفرت نال نک نوں ایدھر اودھر گھمایا۔


'' خالی پلاٹ؟'' توں خالی پلاٹ ہیں جسی۔۔۔؟'' کنول دے پلے جیویں کجھ نہیں پیا سی۔ '' میں کیہ دنیا بدی ہر اکلی عورت بھاویں کتے وی رہندی ہووے، خالی پلاٹ وانگ ہے، جس تے ہر مرد آپنے ناں دا پھٹا لاؤنا چاہندا ہے۔ قبضہ کرنا چاہندا ہے آپنا۔۔۔'' آکھ کے اوس نے آپنا پرس چکیا تے باہر توں تر پئی۔ کنول کدے دور جاندی جسی ول ویکھ رہیا سی تے کدے کپ وچ پئے چٹھی دے ٹکڑیاں ول۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels