Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی: ڈنڈے دے یار

اکبر کہانی: ڈنڈے دے یار

اکبر کہانی
February 16th, 2008

ڈنڈے دے یار

اوہدا جثہ بھرواں نہیں سی۔ انج سرویاں سفیدے ہار سدھا تک پکاتے نگر سی۔ کھلوتا ہووے تے تھنے وانگوں گڈیا جاپے۔ سبھا دا کاہلا تے چھوہلا۔ ہتھ چھٹ کسے دی گل نہ سہن والا، کسے دی گل سنن نہ والا۔ جیہدے تالوتے اوہدا گھسن پیا اوس انج جاتا جیویں ڈنڈا وجا۔ کجھ قد بت ولوں تے کجھ نت وی ٹھوکا ٹھوکی ہتھوں لوک اوہنوں "ڈنڈا"کر کے بلاندے سن۔ اوہدی گل چھڑے تے آہندے "ڈنڈے "دی ایہہ گل ، ڈنڈے دی اوہ گل۔ اوہدے ول پیار دی نگاہ نال ویکھن والی اک مٹیار نے ایہہ گاون کڈھیاـ
"یار سرو دا بوٹاتے ویڑھے وچ لا رکھدی ۔ "
اوہدے بارے ہور تے ہور اک وار مسیت دے میئیں ہوراں وی ہیک لاکے سنادتا۔
"ایہہ نکتہ چمکیلا جانی جیوں بجلی دا انڈا
حضرت موسی وی نکلے سن ہتھ وچ پھڑ کے ڈنڈا

سیدھ ویکھ کے کڈھ لے گنیا
ڈنڈے دے ہتھ ساری دنیا

ڈنڈا جس ٹابری دا بدنہ سی اوس ٹابری وچ اوہدے ورگے ہور وی کئی ہوئے سن۔ اوہدے دادے نوں لوک "کھونڈا"کرکے بلاندے سن اوہدے پیو بہشتی نوں "سونا"آہندے سن۔ کھونڈے ، سوٹے تے ڈنڈے والیاں دی ایہہ دھم دور تیک پئی سی۔ اوہ اپنے یاراں بیلیاں لگیاں لانیاں دی کوک اتے ویلے سراپڑدے سن تے جتھے اوہناں دے یاراں دا مڑھکا چووے اوتھے اپنی رت ڈولن توں نہیں سی ہٹدے ْ دور دور تل اوہناں دی مانگی پیندی ہندی سی تے اوہناں دے بیلی اوہناں دا ناں لے کے بڑے بڑے اتھرے سورمیاں نوں ونگاریا کردے سن۔
ایس بستی وچ پردیسیاں نے آکے کر خانہ لایا۔ پردیسی مٹ دا ست کھچ کے پردیسی بیجاں دا کاروبار کردے سن۔ ایس وہار تے ایس بپار دی چڑھ مچ گئی تے مٹی دے ست وی باشنا دور دور تیکر گئی۔
پردیسیاں دے گوانڈھیاں نے ایس کاروبار دی چڑھ مچی ڈٹھی تے اوہناں نے وہ ایتھے آگے مٹی دے ست کرخانے لان داجتن کیتا۔ پر پردیسیاں نے ڈنڈے تے ڈنڈے دے یاراں تے پردیسیاں دے گوانڈھیاں نے اجیہی بھن دتی پئی اوہ اپنا جمع جتھا مال اسباب اوتھے ای چھڈ کے نس گئے۔
پردیسیاں دا کاروبار پہلے نالوں بہتا چمکیاتے چوکھا چر چمکدا ای رہیا۔ پر ہن اک ہور اوکڑ آن پئی۔ بستی دے وسنیکاں ڈٹھا پئی پردیسی بیوپاری دیسی مٹی کھچ کے پردیس پچائی جاندے نیں تے ست کھچن پاروں پاروں دیس دی مٹی بے ستی ہندی جاندی اے۔ اوہناں رل کے متا پکایا پئی پردیسیاں دا بوٹا ایتھوں پٹیا جاوے تے ڈنڈے دے یاراں نے ایس جھگڑے وچ پردیسیاں دا ساتھ دتا۔ کیوں جے اوہ مٹی داست کھچن وچ پردیسیاں دے بھائیوال سن۔ پر اوڑک پردیسیاں نے وسنیکاں دے کٹھ تے اوہناں دے دبا ہتھوں اپنے پیر اکھڑدے ڈٹھے۔ اوہناں اپنا کرخانہ ڈنڈے دے یاراں دے پلے پاکے اپنی لت وچوں کھچ لئی۔
پردیسیاں تے سنیکاں دا جھگڑا اینا لما ہوگیا پئی وسنیکاں وچوں بہتے تھک گئے ہار گئے تے اوہناں دا اک دھڑا ایہہ آکھ کے لانبھے ہوگیا پئی ڈنڈے دے یار اپنے دیسی بھرانیں ، کوئی پردیسی تے نہیں ۔ سانوں ایہناں نال جھگڑا مکا کے صلح کرلینی چاہیدی اے۔ وسنیکاں دے آگوواں آکھیا یار ایس ویلے تہاڈے جسے ای نہیں تہاڈی ہمت تے تہاڈی مت وی تھک گئی اے۔ ویلے دی منگ ایہہ پئی تساں پردیسیاں توں چھٹکارا پایا اے تے تتے تا ڈنڈے دے یاراں توں وی چھٹکارا پالوو۔ کیوں جے ڈنڈے دے یار بہہ گئے تے سمجھو سدا ای ایتھے رہ گئے۔ پر سیانیاں دی سوچ سچی سی۔ لڑن والیاں دے جسے ای نہیں سن تھکے اوہناں دی سمجھ وی تھک چکی سی۔ اوہناں اپنے ہتھیار ہتھوں سٹ دتے تے کرخانےاتے ڈنڈے دے یاراں دا قبضہ پکاہوگیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels