Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی : شہزادہ ہائے ہائے

اکبر کہانی : شہزادہ ہائے ہائے

اکبر کہانی
February 17th, 2008

شہزادہ ہائے ہائے

شہزادے دی بادشاہ نال ان جوڑ ہوگئی۔ کیوں جے اوس بھکھے ڈٹھے تے آکھیا "ہائے ہائے "اوس ننگے ڈٹھے تے آکھیا "ہائے ہائے "اوس لوکاں نوں چھت بناکھلے اسمان تھلے سوندیاں تے مٹی وچ رلدیاں ڈٹھاتے آکھیا"ہائے ہائے "شہزادہ ہے ہائے کردا ایس دے چویں کوٹیں پھریاتے دیس اوہدی ہائے ہائے نال گونج اٹھیا۔ لوکاں اوہنوں اپنے مرنے مردیاں تے اپنے لئی ہوکے بھردیاں ڈٹھاتے پیار نال اوہنوں "شہزادہ ہائے ہائے "آکھن لگ پئے۔ ہن اوہدا ایہہ نواں نانواں دیس وچ کیہ پردیس وچ وی کھنڈ گیاتے جنے کھنے دی جیبھ تے چڑھ گیا۔
دیس وچ عجیب سما بجھا۔ اگے اگے شہزادہ ہائے ہائے کردانسے بھجے تے اوہدے پچھے اوہدے چاہوان اوہدے مٹھے پیارے تے اوہدے ساتھی ہائے ہائے کردے سن۔ دیس وچ ہرپاسے ہائے ہائے پاروں کن پئی گل نہیں سی سنیندی ۔ ہاے ہائے دا اجیہا رولا پیا پئی سہل سبھا والا بادشاہ ہر پاسیوں ہائے ہائے سن کے ماندہ پے گیاتے اوڑک تختوں لہہ گیا۔
لوکاں اپنے پیارے شہزادے ہائے ہائے نوں اپنا حاکم بنالیا۔ شہزادہ ہائے ہائے دے تخت بہندیاں نواں چن چڑھ پیا۔ کھوہاں وچوں پانی مک گیا۔ سٹیاں وچوں دانے مک گئے۔ ککراں توں کنڈے جھڑ پئے۔ لویریاں دا ددھ سک گیا۔ اوہناں دے تھن موہکیاں وانگوں حوانیاں نال جا لگے، چچڑاں وانگوں چمڑی نال جا چمڑے ۔ ککڑیاں آنڈے دینوں رہ گئیاں۔ پیلیاں گنڈھے دینوں رہ گئیاں ۔ دھوڑا اڈ کھلوتی۔ دھرتی سوڑی ہوگئی۔
لوک ہر پاسے ہائے ہائے کردے نسے۔ ہائے ہائے کردیاں تے نسدیاں بھجدیاں دے لیڑے پاٹ گئے۔ کوٹھے ڈھیہہ پئے ۔ شہزاد ہائے ہائے کردا ہر پاسے نٹھا۔ ہائے ہائے کردا کئی وار دیسوں باہر ہو آیا۔ اوس پیاری جنتا نوں تسلی دین لئی تقریر کرنی چاہی ۔ کیوں جے لوک اوہدی تقریر سن کے اپنے دکھ بھل جایا کردے سن۔ پر جیویں کھوہاں دا پانی لہہ گیا سی، اونویں اوہدا سنگھ بہہ گیاسی۔ اوہدی اواز اوہدا ساتھ چھڈ گئی ۔ انج جاپداسی جیویں دیس وچ نہ جنتا ری ، نہ شہزادہ رہیا۔ سکھنی ہائے ہائے رہ گئی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels