Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی :مغل تے چول

اکبر کہانی :مغل تے چول

اکبر کہانی
February 26th, 2008

مغل تے چول

مغل تھوڑے سن تے چول بہتے سن۔ پر تھوڑے ہندیاں وی مغلاں دیاں وادیاں کجھ اجیہیاں سن پئی چول ایہناں دا آکھا مندے سن۔ چولاں اتے مغلاں دا رنگ روپ تے نہیں سی کیوں جے دیس وچ ایہہ اکھان دیندے سن پئی "مغلوں گورا سو کوڑھا "پر فیر وی چول مغلاں دی ہر کچجی گل دی نقل کردے۔ انج انج جاپدا اے پئی چولاں کوئی اجیہا متا پکایا ہویاسی پئی مغلاں دی کسے چنگی گل دی نقل نہیں
کرنی ۔
نگونی گل ایہہ وے پئی جے مغلاں نے آکھنا پئی تسیں وی اپنے ایانے پڑھاؤ تے چولاں نے آکھنا بہتے پڑھیاں دیادں پڑپڑیاں پاٹ جاندیاں نیں، اسیں اجیہی پڑھائی توں سکھنے ای چنگے آں۔ ایہہ تاں نری سر پیڑ ہندی اے۔ نتیجہ ایہہ ہویا پئی جتھے مغل بچے سارے دے سارے علم دے گہنے نال سجے ہوئے سن اوتھے چولاں دا کوئی ورلا ایانا ای مغل استاداں دی بہنی بہہ کے چار حرف اٹھان دے لائق ہونداسی۔ انج اچرج گل ایہہ وے پئی مغل سیانے اپنے علم تے اپنی سیانف تے اینا مان نہیں سن کردے۔ جیہناں چولاں نوں اپنے کھت ان پڑھ ہون تے مان سی۔ چول گبھرو تے چول وڈیرے سرہلا ہلاکے، دھون بھواں بھواں کے، ناساں پھلا پھلا کے تے دند کڈھ کڈھ کے آہندے سن پئی مالک دا رحم اے، ساڈے سراں وچ علم دا گند نہیں وڑیا تے ساڈیاں پھٹیاں تے اونویں دھوتیاں دھاتیاں تے نویاں نکور نیں جیویں اسیں ماں دی ککھ توں لے کے آئے ساں۔ مکدی گل ایہہ وے پئی چولاں نوں مغلاں دا ہرکرنے سار کم کوجھاتے ہر منن سار گل کوڑی جاپدی سی۔ جدوں کدی مغلاں کوئی نواں مدرسہ کھولنا تے چولاں دے وڈیاں چھوٹیاں رولا پا دینا پئی ایہہ اک ہور بلا آئی جے۔ پڑھ پڑھ کے منڈیاں دیاں پڑپڑیاں پاٹ جان گیاں۔ اوہناں دیاں جوانیاں نوں روگ لگ جاوے گا۔ لیڑے نوں تھوڑا جیہا لگا ہویا گھٹا ویکھ کے اوہ ٹپ اٹھن گے تے ساری برادری توںاڈ سوچاں سوچن گے تے وکھرے گاون گاون گے۔ اصل وچ ایہہ مغ لوک ساڈے ایانیاں نوں اپنے رنگ وچ رنگ کے ساڈے اتے دھونس جمانا لوڑودے نیں تے اساں جیوندی جانے ایہہ نہیں ہون دینا۔
اک مغل سیانے نے اجیہی کتاب لکھی جیہدے وچ مڈھ توں لے کے دیس دے آگوواں ، سورمیاں، سیانیاں تے نامی بندیاں دا حال سی تے نال ای لکھیا سی پئی پرانے سورمے، سیانے تے نامی بندے جمن گیاں۔ چولاں نوں ایہہ گل سن کے وی سینے ٹھنڈ نہیں سی پیندی ۔ اوہ سگوں تپ جاندے سن تے آہندے سن دیس دے موتیاں دیاں کہانیاں وچ ساڈے لئی کیہ اے؟ کیوں جے کسے چول دا ناں ایہناں وچ بولدا ای نہیں ۔
ایہہ کتاب پڑھ سن کے تے سگوں لوکاں دا دھیان ایس پاسے جاندا اے پئی کدی کوئی آگو ، سورما، سیانا تے نامی بندہ جمیااگیا نہیں ۔ ایس طرح مغلاں دا بونڈا اچا ہوندا اے تے چولاں دی لہائی ہندی اے۔
مغلاں نے اک شبھ دیہاڑے تے سلکھنی گھڑی اک اجیہا باغ لایا جیہدے وچ بے بہا پھل تے پھل سدا رہندے سن۔ باغ دے وڈے وڈھ وچ نکیاں نکیاں کیاریاں تے سیر کرن لئی سوہنیاں سوہنیاں پگڈنڈیاں بنائیاں تاں جے لوک دوروں دوروں آکے ٹھنڈیاں سومیاں دے مٹھے پانی پین ، سدا بہار پھلاں دی موج مانن تے سدا باہر پھلاں دے سواد لین۔ چولاں نوں ایہہ باغ ویکھ کے وی چپ چڑھ گئی۔ اوہناں آکھیا ایس باغ نال سگوں ہرپاسے مغلاں دی نیک نامی تے وڈیائی ہووے گی، اوہنادں دی چڑھ مچے گی تے لوک ویکھ ویکھ کے آکھن گے چولاں دا ککھ نہ رہوے، ایہناں کجھ نہ بنایا۔ چولاں دا کرودھ اینا ودھیا پئی اوہناں باغ دی اٹ نال اٹ کھڑکا دتی۔
سومیاں وچ پھانے ٹھوک دتے تے پھل دار رکھاں نوں کپ کے اوہناں دیاں کھدو کھونڈیاں بنالئیاں۔ وڈے دیساں توں آئے ہوئے سیانیاں دی سکھیامت لے کے مغلاں اک اجیہا وڈا ہسپتال بنایا جیہدے وچ روگیاں پھٹڑاں نوں مخت دوا دارو لبھداسی۔ چولاں ہسپتال نوں بند کرکے تھاں ٹھانے والیاں نوں دے دتی، جیہناں ادھی تھاں تے حوالاتاں کھول لئیاں تے ادھی تھاں وچ پاگل خانہ کھول دتا۔ ہندیاں ہندیاں مغلاں تے چولاں دی انجوڑ دا اک اجیہا پاسا ساہمنے آیا جیہنوں ویکھ کے وڈیاں وڈیاں دے پیراں ہیٹھوں بھوئیں نکل گئی۔ چول منڈیادں نوں مدرسیاں دی پڑھائی بن دوڑنگے ماردیاں ویکھ کے مغل منڈے و اوہناں دے رنگیں رنگ گھتے۔ پڑھائیاں چھڈ بیٹھے ۔ مغل منڈے وی اوہناں دے رنگیں رنگ گھتے۔ پڑھائیاں چھڈ بیٹھے ۔ مغل سیانے اپنے اپنے ہوئیاں ماڑیاں نوں ڈھیہندیاں ویکھ کے دل ڈھاہ بیٹھے۔ دیس دا حال لکھن والے سیانیاں دیاں قلماں ٹٹ گئیادں تے ہسپتالاں ورگے دیس بھلائی دے کاج سوارن والیاں دیاں نبضاں چھٹ گئیاں۔ ہندیاں ہندیاں دیس وچوں مغل مرگئے ، تے چول رہ گئے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels