Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی : کہانی بابے اسلام دین

اکبر کہانی : کہانی بابے اسلام دین

اکبر کہانی
March 3rd, 2008

کہانی بابے اسلام دین دی

بابا اسلام دین سالم پنڈ دا کلا مالک سی۔ اوہدا پنڈ سارے پنڈاں توں نویکلا، دریڈاتے وکھراسی۔ پنڈ دی جوہ نیڑے نین وگدی سی تے اک بنے پہاڑی ورگا ٹباسی۔ ایس ٹبے تے بابے اسلام دین دے وڈیاں سن تے اوہناں دے ہتھاں دی بنی ہوئی مسیت سی۔
بابا چوکھی وڈیری عمر دا بندہ سی۔ بعضے آہندے نیں پئی اوہ سو ورھیاں توں پٹیا کھلوتا سی۔ پر ہڈ کاٹھ دا ڈاڈھاسی۔ اوہ ڈنگوری تے بھار نہیں سی پاوندا۔ سرو وانگ سدھا کھلوندا تے جواناں وانگ ڈنگوری کھڑکاندا ٹرداسی۔ بھرویں داڑھی کلف نال شاہ کالی کردا، سرتے رگڑ کے استرا پھرانداتے ہمیشہ ٹنڈ لشکائی رکھدا۔ آہندے نیں بابے دیاں دندیاں دوجی وار اگیاں سن جیہناں نال بابا روز لوڈھے ویلے دانے بھنا کے چنداسی۔
اوہدی وڈیری عمر دا کجھ پتہ ایس توں لگداسی پئی ہن اوہدے پتران دے اگے پوترے سن اوہناں وچوں کئی ویاہے ورھے ہوئے سن بال بچڑ دار سن۔
بابا اسلام دین بڑے کھڑکے دھڑکے والا بندہ سی ۔ اوہ پنڈ وچ کسے نوں چوں نہیں سی کرن دیندا۔ اوس پتر پوتریاں نوں وی لوڑ جوگی بھوئیں دے چھڈی سی پر اوہناں نوں کدی بھوئیں بھانڈے توں لڑن نہیں سی دیندا۔ جس جوان نے ذرا کواہری گل کرنی بابے اسلام دین دی ڈنگوری اوہدی کنڈتے ورھنی تے تکلے وانگ سدھا ہو جانا۔ بابے اسلام دین دی سکھیا مت سبھ نوں ایہو سی پئی نک دی سیدھ ٹرو۔ کسے دی پیلی دا یتلانہ چھیڑو۔ کسے دے مال ڈنگر ول لوبھ دی نگہ نال نہ ویکھو۔ کسے دی دھی بھین ولے اوپری نظرنہ پاؤ۔ کھاؤ پیو موج کرو پر حدوں نہ لنگھوتے جے کوئی بابے دی سکھیا مت تے نہ چلے یاں اوہدا حکم عدولے تے بابا فیر کن مروڑن تیک نہیں سی رہندا ۔ حکم عدولنوالے دے لنگ گوڈے بھن چھڈدا سی۔ پٹیاں وچ سواہ پا دینداسی۔ گوانڈھی پنڈاں دے سارے چودھری بابے توں پچھ کے ٹردے سن۔ شریک اوہدے گوڈیاں نوں ہتھ لاندے سن تے ویری اوہنوں نیوں نیوں کے سلاماں کردے سن۔ بابے دے دابے نلا اوہدے پنڈ وچ تے نال دے پنڈاں وچ دی ڈاڈھی چپ چان تے امن امان سی۔ کتے کوئی کواہی گل نہیں سی ہندی ۔ کوئی فسادی کن نہیں سی پھڑکدا
پر جدوں بابے دے محل نوں ڈھاہ لگی اوہدے اپنے اندروں ای لگی۔ جدو
ںاوہدی پگ نوں ہتھ پیا اوہدے اپنے گھروں ای پیا۔ اوہدےپوتریاں پڑیوتریاں وچوں کئی گبھرو اوہدی لمی حیاتی توں اک کھلوتے سن تے اوہدے نت نویں دابیاں جھاسیاں توں عاقی ہو گئے سن۔ کسے دا جی چاہنداسی پئی میں گوانڈھی دی پنج کلیان جھوٹی نوں بھجاکے لے جاں، کسے دے من وچ آوندی پئی میں نال دے دا بوہل پاکھڑاں ۔ کسے دا دل پنڈ دے پرلے بنے کواری کڑی نے کھوہ لیاسی تے اوہ اوہنون ماپیاں توں کھوہ کے اپنے اندر سٹنا لوڑدا سی۔ پر اوہناں وچوں ہر کوئی بابے دی ڈنگوری تو ں ڈراسی۔
اوڑک پڑپوتریاں نے پوتریاں نوں آکھیا۔ پوتریاں نے پیوواں نوں آکھیا۔ پیوواں نے مانواں نال صلاح کیتی تے سبھ نے رل کے بابے نوں کیل کے رکھن تے واک وچ لیان دا چارہ کیتا تے ایہہ ویکھ کے سارے تھاؤں تھائیں بڑے راضی ہوئے پئی بابے اسلام دین نے جد ڈٹھا پئی اوہدے پتر پوترے اوہدے توں عاقی ہوگئے نیں ، اوہنے سی نہ کیتی تے چپ وٹ گیا، دڑ مار گیا۔ انج جاپداسی اوہدا سار بل بلکار اودوں تیک ای سی جدوں تیک گھر دے سارے جی اوہدے آکھے لگدے سن، اوہدی گل نہیں سن موڑودے، اوہدی نہیں سن اتھلدے ۔ پتراں پوتریاں نے رل کے بابے نوں اچے ٹبے اتے مسیت دے حجرے وچ ڈک دتا۔ اوس ٹبے تے جتھے اوہدے وڈیاں دیاں ڈھیریاں سن۔
تے ہن اوہناں نوں کوئی ہٹکن موڑن والا نہیں سی۔ جیہدا جی چاہیا پئی میں گوانڈھی دی پنج کلیان نوں بھجالاں ، اوس بھجالئی۔ جیہدے من وچ آئی پئی میں نال دے دا بوہل پا کھڑاں، اوس پ کھڑاں ، اوس پا کھڑیا۔ جیہدا دل پنڈ دے پرلے بنے وسدی کواری نے کھوہ لیاسی، اوس اوہنوں اوہدے ماپیاں توں کھوہ کے اپنے اندر سٹ لیا۔ ہر پاسے پنڈ وچ گھول گھلمے ، لٹ مار، کھوہ موہ تے کٹ وڈھ دا راج ہوگیا۔
نال دے پنڈاں دے چودھری نسے پئی ویکھیے ایس وسدے پنڈتے کیسی انھیری آئی پئی بندے نال بندہی نہ رہیا۔ تیلے نال یتلا نہ رہیا۔چپ چان ، سکھ سان ، امن امان کتے پرلا کے اڈگئے۔
اوہناں آوندیاں پچھیا "بابا اسلام دین کتھے گیا؟"کسے دسیاپئی اوہ اچے ٹبے تے رہندا اے ، جتھے مسیت اے تے اوہدے وڈیاں دیاں ڈھیریاں نیں۔
بابے دے پرانے بیلی واہو واہی اودھر نوں نسے۔ بابا ودھیا وچھائی والے رنگیل پلنگ تے بیٹھاسی۔اتے ہرا توتے رنگادو شالاسی۔ کنڈپچھے چاندی دے لچھے والا سنبل سرھاناسی۔ سرتے چٹا ددھ ورگا ریشمی پٹکاسی۔ اگے چموڑا حقہ سی۔ حجرے دیاں کندھاں تے تھاؤں تھائیں "بابا اسلام دین زندہ باد "گوڑھے حرفاں نال لکھیا ہویاسی۔
بیلیاں توں نہ رہیا گیا۔ اوہناں آکھیا "بابا! تیری جڑ ماری جائے توں عیش تے آرام نال مسیتے بہہ گیا ایں تے ہیٹھاں تیرے پنڈ وچ رب دی تھاں شیطان دا راج ہوگیا اے۔۔۔۔ "بابا بٹ بٹ اوہناں ولے تکدا رہیا پر مونہوں کجھ نہ بولیا۔
"اوڑک اوہدے اک بیلی نے اگانہہ ودھ کے اوہدا ہرا دوشالا دھروہ کے پرانہہ سٹیاتے ایہہ ویکھ کے سبھ دا ہیٹھلا ساہ ہیٹھاں تے اتلا ساہ اتانہہ رہ گیا۔ پئی بابے دے ہتھاں وچ ہتھکڑیاں تے پیراں وچ بیڑیاں سن تے سنگلاں وچ کڑیاتے جوڑیاہویا بابا ملن جوگا نہیں سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels