Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی : سروں بغیر

اکبر کہانی : سروں بغیر

اکبر لہوری
March 6th, 2008

سروں بغیر

اچن چیتی چلدا کارخانہ کھلو گیا۔ مشیناں کجھ چر گرڑ گرڑ چلیاں۔ چوتھیاں کجھ چرڑ چرڑ چیکیاں ۔ پہیاں وچوں ٹھک ٹھک دیاں اوازاں آئیاں۔ انجن نے شوں شوں کیتا۔ گراریاں رگڑ رگڑ پھریاں تے اوڑک ٹھاہ ٹھک کرکے کر خانہ کھلو گیا۔ لوک ہم ہماکے اندر نوں نسے ۔ کیوں جے کرخانہ سبھ دیاں لوڑاں پوریاں کرن لئی لگا ہویاسی۔ بھانویں جے کجھ چر توں اوہ ساریاں لوڑاں تے پوریاں نہیں سی کردا۔ پر جیویں کیویں چل رہیاسی تے اوہدے چالو رہن دی اواز نال لوکاں نوں سہارا سی پئی کدی ایہدی چال ٹھیک ہو جاوے گی۔ پر اج جیویں اچن چیتی اوہناں دا سفنا ٹٹ گیا۔ کرخانہ اکا ای کھلو گیا تے اوہ گھابر کے کرخانے دے اندر نوں نسے ۔ بندے بڈھیاں ، ایان سیان سبھ نے انج کرخانے دے وڈے بوہے ول دھائی کیتی جیویں اوہناں دے پیراں ہیٹھاں مشیناں لگیاں ہون۔ پر اوہ سبھ کرخانے دے وڈے بوہیوں وڑدیاں ای ہیبھو نال کھلو گئے۔ جیویں اگے موت کھلوتی ہووے ۔ اوہناں کیہ ڈٹھا جتھے کرخانے دا چوکیدار بیٹھا ہویاسی اوتھے چوہے کیردا ڈھیرسی۔ چوکیدار دی بندوق دی نالی مٹی دے ڈھیر وچ پٹھی دبی ہوئی سی ۔ بندوق دے کنڈے نوں سیونک کھاگئی سی تے بندوق دے تسمے نوں لیہ چٹ گئی سی۔ مشیناں تے پٹیاں تے گھٹا جمیا ہویاسی تے پیٹاں دے ٹوٹے تھاؤں تھائیں کھلرے ہوئے سن۔ تیل بنا سکیاں چل چل کے مشیناں دی لوہ چون دوالے چوالے کھلری ہوئی سی۔ جس کرسی تے موئیاں چمگدڑاں دیاں لوتھاں پئیاں سن۔ میز اتے جنگلی کبوتری آنڈیاں تے بیٹھی ہوئی سی۔ کرخانے دیاں چونہاں گٹھاں دے وچ کاہلی تے کالیاں بھونڈاں نے چھج چھج جیڈیاں کھکھراں لائیاں ہوئیاں سن۔
آون والے کرخانے دے وڈے بوہے تے انج کھلوتے سن جیویں کسے اوہناں دے پیراں نوں جادو نال کیل دتا ہووے۔
اوڑک اک سیانا بولیا "یارو ایہہ کرخانہ تے انج جاپدا اے جیویں مدتاں توں کسے دیکھ بھال بنا چل رہیا ہووے۔ پر کیوں جے چلدیاں چلدیاں کھلو جان دا کھڑاک اج ای آیا اے تا اساں اج ای سنیا اے ایس لئی اگانہہ ودھ کے ویکھنا چاہیدا اے پئی ہن توڑی ایہنوں کون چلاندا رہیا اے ۔ "
اوہدے نال کھلوتیاں نے اک زبان ہوکے کہیا "ایہہ گل اے تے تسیں پہل کرو۔ سیانا اگے ودھیاتے اوہدے پیر میدے وانگون مہین دھوڑ وچ کھب گئے تے تھاں تھاں مکڑی دے جالے دیاں تاراں اوہدیاں اکھاں وچ پیندیاں جاپیاں ۔ پر اوہ جالیاں نون ہٹاندا ہویا اگانہہ ودھیا تے عجیب نظارہ ڈٹھا۔ کرخانے نوں چالو کرداسی تے ڈنڈا ہلار کے کرخانے وچ دابے مارداسی تے حکم چلانداسی۔ باہواں ، سینہ ڈنڈا، پٹاتے کلاں کوکیاں والے بوٹاں سمیت اوہدا جسا سوادھان سی۔ بس اوہدی دھون سروں بغیر چلدیاں کرخانہ اکو وار ٹھاہ ٹھک کرکے کھلو گیاتے پتلے دی ہمت وی ہوا ہوگئی تے اہو مویاں ہارکندھ نال جا لگاتے پتھر دے بت ونگوں کھلو گیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels