Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی : قربانی

اکبر کہانی : قربانی

اکبر لہوری
March 7th, 2008

قربانی

بادشاہ نے چونہہ برجاں والا تیار کرن دا حکم دتا۔ کیوں جے ایس چوگھٹے محل وچ بادشاہی دے چار وڈے انگ وسانے سن۔ اک برج وچ اوس بہادر جرنیل دا دفتر سی جیہدے چوڑے موڈھیاں تے بادشاہی نوں ویریاں توں جان بچان لئی فوج تے فوجی دفتر دا بھار سی۔ دوجا برج وزیر خوراک دا سی، کیوں جے ڈھڈوں بھکھے دیس تے دیس دے وسنیک کوئی عزت پت تے بل بانہہ نہیں رکھدے۔
تریجا برج دیس لئی قانون والیاں لئی سی جیہڑے اپنی ڈونگھی سوچ توں کم لے کے اجیہے پکے پیٹھے تے نیائیں قانون بنان جیہناں تے ٹرکے دیس دی یکتائی نوں ڈاڈھی ڈاڈھ ملے۔
چوتھا برج دیس دے ججاں منصفاں نوں وسان لئی سی، تاں جے اوہدیاں اچیاں تے کرڑیاں کندھاں اتے نیاں دا جھنڈا گڈیا جاوے۔
پرتقدیر نے ہار دتی تے محل دے بندیاں ای دیس تے بھوچال آگیا۔ محل دے چار برج ڈولن لگے۔ انج جاپداسی جیویں ایہناں دے ڈولن پاروں شاہی محل ڈھیہہ کے ڈھیری ہو جاوے گا۔ بادشاہ نے دیس دے وڈے وڈے سیانیاں تے بھلیاں لوکاں توں پچھیا پئی کیہ اپا کرئے کیوں جے شاہی محل دا کانبا بند نہ ہویاتے ایہہ ڈھیہہ کے ڈھیری ہوجائے گا۔ سیانیاں اک اجیہے وڈیرے کولوں پچھیا جیہدی سوچ سمجھ تے سارے دیس نوں اعتبار سی تے جیہڑا نویاں تے پرانیاں ساریاں پوتھیاں پڑھیا ہویاسی۔
سیانے دی مت بادشاہ نے من لئی تے اوس حکم دتا پئی فوج دے جرنیل دی دھون وڈھ کے برج دی نینہہ ہیٹھاں دتا جاوے جرنیل دی دھون دے لہو دا اجیہا ٹھمنا ملیا پئی برج کنبدا کنبدا کھلو گیا۔
وزیر خوراک دے برج نوں کانبا چڑھیا ہویاسی پئی کھادھ خوراک دی ہرشے اڈ اڈ کے اسماناں نوں چڑھدی سی تے جیہڑی خوراک عاماں لوکاں دے کم آون والی سی اوہ اڈ اڈکے دیسوں باہر پئی پیندی سی۔ مثال دے طور تے گنڈھے اسمانیں جاچڑھے سن۔ لوک ولک ولک کے گنڈھے دی چٹنی منگدے سن تے نہیں سی ملدی۔
سیانے ایہدا اپاء وی ایہو دسیاپئی وزیر خوراک دی دھون ذرا نیڑیوں وڈھ کے برج دی نینہہ ہیٹھاں دتی جاوے تاں جے اوہدے پاک لہو دی برکت نال خوراک دا برج ڈولنوں ہٹ جاوے۔ جھٹ وزیر خوراک دی دھون لہہ گی تے برج دی نینہہ ہیٹھاں دتی گئی تے برج کمبنوں تے ڈولنوں کھلو گیا۔
دیس لئی قانون بنان والیاں دا برج بہت ای ڈولداسی۔ سیانے آکھیا "ایہدے وچ اگا ڈھل نہ کرو۔ قانون بنان والے آگوں دے موہری دی دھون لاہ کے ایس برج دے ویڑھے دے وڈے کھوہ وچ سٹ دیو۔ برج دا تاپ لہہ جائے گاتے کانبا کھلو جائے گا۔ ایہہ ٹناوی دوجے ٹونیاں وانگوں ڈاڈھا کاری نکیا۔ کیوں جے اک دھون لین نال برج دا ڈولنا ہٹ گیا۔ نیاں دے برج دیاں جڑاں وچ لہو ڈولھن وچ سیانیاں نوں سوچاں نے گھیر لیا۔
انیاں دے آگوواں دی دھون دا لہنا ہڈوں نیاں سی تے چھری چلان دے برابر سی۔ پر کانبے ہتھوں تے نیاں دے برج دے ڈھیہہ جان دا ڈرسی۔ اک خانسامے نے کئی بادشاہیاں دا لون چکھیا ہویاسی۔ اوس صلاح دتی پئی ججاں منصفاں نال وکھرا سلوک کیتا گیا تے اوہدے اتوں سبھ توں بہتا اعتراض ججاں منصفاں نوں ہووے گاتے ہور موڑ گھیر دا نیاں، اک جج دا سرلاہ کے ڈگدے محل دی نینہہ تھلے دے دتا گیا۔
ہن سارے محل دا کانبا کھلو گیاسی تے سیانیاں نے ایس سارے اپاء دا ویروا کردیاں ہویاں دسیاپئی جے سیاست دے محل نوں کانبے تے ڈولن توں بچانا ہووے ریاست دے اڈوا اڈانگ تے آگوواں نوں اپنی اپنی دھون دی قربانی دینی پوے گی۔



Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels