Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی: گھیچر میچر

اکبر کہانی: گھیچر میچر

اکبر لہوری
March 9th, 2008

گھیچر میچر

گھیچر میچر دو اڈو بندیاں دے ناں نیں دو اڈو اڈ قبیلیاں دے ناں نیں ۔ ایہہ اکو تھاں رہندے سن، اکو پانی پیندے سن، اکو دھرتی وچ اگیا ان کھاندے سن تے اکو بولی بولدے سن۔ ایہناں دی رہتل وی اکو جیہی سی، گن اوگن وی اکو جیہے سن تے دین دھرم وی سانجھا سی۔ کیوں جے اوہناں وچوں کوئی وی سچے رب دا نکاری یاں ایڈا اتیا چاری نہیں سی پئی سچ نوں جھوٹھ ، کوڑ نوں نیکی یاں چوری یاں ٹھگی ٹھوری نوں ساؤپنا یاں پاپ نوں پن آہندے ہووے۔ گھیچر میچر جس بستی دے وسنیک تے جس دھرتی دے کیڑے سن اوہدے تے قدرت دا وی بڑا کرم سی۔ تھوڑی کھیچل نال سلبا رزق لبھ جانداسی۔ گھیچراں میچراں دیاں سوانیاں تے ایانے دکھ چنتا بنا سکھ دی نیندر سوندے سن۔
اینیاں سانجھاں ہندیاں ہویاں وی گھیچراں میچراں وچ کجھ گلاں وکھریاں وی سن۔ نمونے دے طور تے ایہو سنو۔
"دونہاں دھڑیان دے کار روز گار وکھرے وکھرے سن۔ گھیچر ہٹی کردے سن۔ تے میچر واہی بیجائی دا کم کردے سن۔ تے کرخانیاں لئی وڈیاں وڈیاں حویلیاں ولیاں ہوئیاں سن تے میچراں نے فصل بنے تے رہن لئی کچے کوٹھے بنائے ہوئے سن تے ڈنگراں لئی کڑھاں چھتیاں ہوئیاں سن۔ ہٹیاں والے گھیچر نہاتے دھوتے تے آنڈے ورگے چٹیاں کپڑیاں کارن چٹ کپڑیے بابو اکھواندے سن تے میچر واہی وان ہون کارن مٹی نال مٹی ہوکے رہندے سن تے اوہناں دے کپڑیاں وچوں مٹی گھٹا کسے دن دہار نکلے تاں نکلے۔ انج مٹی گھٹا اوہناں دے لیڑیاں دا اصل رنگ جاپداسی۔ پر دونویں تھاؤں تھائیں راضی سن۔ گھیچر اپنے مال وچ مست سن تے ہٹیاں وچ گاؤ تکیے دا ڈھاسنا لاکے بہندیاں اوہناں دیاں گوگڑاں دولتاں دا بھنڈار جاپدیاں سن۔ میچر موکلی بھوئیں دے مالک اکھواندیاں اپنے آپ نوں دیس دے راجے جاندے سن ۔ پشوواں دے وگ، چڑھن نوں گھوڑیاں تے سیر،شکار نوں شکاری کتے تے باز پالدے سن۔ پنڈیاں نوں مکھن مل کے بودیاں نوں تھندے نال لشکا کے بڈھے وار دی جوانیاں ماندے سن۔
گھیچراں دے منڈے شہر دیاں پکیاں کندھاں پچھے ڈکے ہوئے کھلی ہوا نوں سہکدے س۔ پر اک طرح کبے نوں لت کاری آگئی سی۔ کیوں جے شہراں وچ رہ رہ کے اوہ اگانہہ ودھے سمے دی ہر ہر خوشی دا سواد چکھدے سن تے وڈی کمائی دے گاشے لیندے سن۔
اودھر میچراں دے پرانے لیڑے اوہناں دے جسے تے پاٹ پاٹ کے لیراں ہوندے سن تے نہ کدھرے نواں جوڑا جڑداسی۔ مکدی گل ایہہ وے پئیگھیچر میچر دونویں امن امان تے سکھ ساند نال وسدے سن تے اوہناں دے سانجھے لکھاری چین دی ونجھلی وجاندے تے اپنے دیسی شاعر دا ایہہ مصرع بڑے مان تے حدوں باہلے چاء نال پڑھیا کردے سن۔
"سکھ وسدیاں جیڈ نہ بھلا کوئی اتے اوگن نہیں فتور جیہا"
ایس امن چین دا اک کارن تے ایہہ وی سی پئی بستی دے امن امان دا ٹھیکی اجیہے ٹھیکیداراں کول سی جیہڑے ہر اک نکے وڈے فساد تے وگاڑ وچ اپنی کمائی دا گھانا ویہندے سن۔ اوہ سمندروں پار توں گھاٹا کھان لئی ایتھے نہیں آئے س۔ ایس لئی اوہ گھیچراں میچراں نوں نتھ پائی رکدھے سن۔ کسے نوں بولن برکن یاں اچی ساہ نہیں سن کڈھن دیندے۔ امن امان بنائی رکھن لئی اوہ کدی گھیچراں دی رسی ڈھلی کردیندے سن تے کدی میچراں نوں کھل دے دیندے سن پئی اوہ گھیچراں دا مکو ٹھپ لین۔ امن امان دے ایس سربندھ کارن گھیچراں میچراں دی بستی وچ اجیہا امن امان سی پئی کسے مڑھی یاں قبرستان وچ وی اینا امن امان نہیں ہونا۔ ورھیاں بدھی نہ کسے پردیسی نے ٹھیکیداراں دی مرضی بنا ایس دھرتی تے پیر رکھنا تے نہ ایس دھرتی دے کسے وسنیک نے ایس بستیوں باہر جانا۔ باہروں آوندیاں نویں سمے دیاں ہواواں داہ راہ ٹھیکیداراں نے ایس چالاکی تے ہشیاری نال ڈکیا ہویاسی پئی ایس بستی دے وسنیکاں نوں نویں سمے دی واء لگدی سی تے ٹھیکیدار اوہنوں بندیوان کر چھڈ دے سن۔
پر ویلا سدا اکو جیہا نہیں رہندا۔ اوڑک بدلے سمے ہتھوں اجیہا چکر چلیا پئی ٹھیکیداراں نوں اپنے ٹھیکے وچ گھاٹا پیندا دسیاتے اوہناں سلامتی ایسے گل وچ ڈٹھی پئی ٹھیکے دا کاروبار ٹھپ کرکے ایس بستی توں ڈیرا ڈنڈا چک لیئے۔ پر سیانیان نے ایہہ مت دتی پئی ایتھے ٹھیکے دے سامان دا اینا کھلار پیا ہویا اے پئی اک واری کم بند کرن وچ بڑا گھاٹا اے۔ بچت دی اکو صورت اے پئی گھیچر میچرآپو وچ پاٹ جان تے ٹھیکیدار دونہاں دھڑیان نال وکھرا وکھرا ویہار نویں سرے کھولن۔ پر وڈی مصیبت ایہہ سی پئی گھیچر تے میچر ایس بستی وچ انج پھس کے پئے وسدے سن جیویں مونہہ وچ دند۔ اک دند نوں پٹدیاں سارے بیڑھ دے ہل جان دی اکھیائی سی۔ پر ٹھیکیداراں دے سیانیاں آکھیا، بیڑھ دے ہل جان نال اکھیائی تے ہے پر سانوں کیہ اکھیائی اے۔ بگانی کنڈے موہلا تے کپاہ نالوں کولا۔
ٹھیکیدار اپنے ٹھیکے دی سبھ توں وڈی صفت ایہہ دسیا کردے سن پئی اسیں ایتھے امن امان اجیہا بنایا اے پئی شیر تے بکری اکو گھاٹ پانی پیندے نیں۔ ہن ٹھیکیداراں نے پہلاں امن دی جڑ وچ پانی پادتا۔ اپنے امن دے جتھے نوں نویں قواعد سکھائے ۔ اوہ قواعد ایہہ سی پئی جے کتے مار دھاڑ لچ پنا تے ہیٹھلی اتے ہندی ہووے اوہنوں ویکھ کے اودھروں کنڈ کر لوو۔ امن دے جتھے دا سردار کاشن دیوے ، "ڈھونگا موڑو"تے سبھ امن جتھے والے اودھروں ڈھونگا موڑ کے کھلو جاندے تے کناں وچ انگلاں دے لیندے تے اکھاں نوں کھوپے چاڑھ لیندے۔
اکھ دے پلکار وچ امن دا بنھ ٹٹ گیا۔ میچراں گھیچراں دیاں ہٹیاں تے کوٹھیاں سانبھ لئیاں تے گھیچراں ، میچراں دا مال ڈنگر ہک لیا، اگے لالیا۔ کئی گھیچراں نے میچراں دیاں جنجاں لٹ لئیاں۔ جدوں بندیاں دا لہو آڈاں بن کے وگیاتے اوہناں دے گھر نوں مواتیاں نے گھیرلیاتے ٹھیکیداراں نے مڑدیاں بستی دے وچ کندھ چا کیتی تے اوس کندھ دے دو نہیں پاسیں کھائی کھٹ کے لہو بھریاں آڈاں دا مونہہ نہ کرن۔ ایس طرح گھیچراں میچراں دیاں اڈو اڈ دوبستیادں ہوگئیاں تے ٹھیکیداراں آپے ای ایہناں داناں رکھ دتا "گھیچر منڈی "تے "میچر منڈی "۔ مطلب ایہہ سی پئی گھیچروتے میچرو تساں دونہاں دیاں بستیاں نوں منڈی سمجھدے ہاں تے ہن تسیں اڈو اڈ ساڈے نال کاروبار کر سکدے او، پر شاواشے شیرو! اک دوجے کولوں دبنا ، لفناتے تریہنا نہیں ۔ جے لڑنا ہووے تے دوویں دھڑے ساڈے کولوں ہتھیار مل لے سکدے او، نقد بھانویں ادھار تے جے کسے وچ مل لین دی آنکس نہ ہووے تے اسیں ہتھیار رب لیکھے وی دے سکنے آں۔ پر اک دوجے کولوں دبنا نہیں ، لفنا نہیں ، تریہنا نہیں۔
تے ہن گھیچر منڈی تے میچر منڈی دے وسینک تھاؤں راضی سن۔ اوہناں اپنے اپے آگو وی وکھرے چن لے۔ گھیچر منڈی والیاں نے اپنے پنچو نوں اپنے سردا سائیں بنالیا۔ گھیچراں دیاں ہٹیاں وچوں بھوئیں آئی اوہناں اوہدے وڈے وڈے کرخانے لائے تے میچر ، گھیچراں دیاں ہٹیاں وچوں مال کڈھ کے شاہو کاربن گئے۔ میچراں نوں اوہناں دے ویری "نگانیں دمیں شاہو کار "دا مہناتے ماردے رہے لپر جیہدی کھاکھ وچ مٹھے چول پھسے ہون اوہنوں کسے دے طعنیاں مہنیاں دی کوئی پرواہ نہیں ہندی۔ میچر سن سن کے گڑھکدے سن تے مونہوں کجھ نہیں سی آہندے۔
پر آہندے نیں بگانا مال تلی تے آوے تے ٹکدا نہیں۔ کجھ چر پچھوں گھیچر تے میچر دونویں پھانک ہوگئے تے آپو وچ اک دوجے نوں وڈھ وڈھ کھان لگ پئے۔ اڈ ہون لگیاں میچراں نے آکھیا پئی ہٹیاں والے گھیچر سانوں لٹدے نیں۔ پر جدوں میچراں، گھیچراں دیاں ہٹیاں سانبھ لئیاں اوہ گھیچراں توں ودھ میچراں نوں لٹن لگ پئے۔ اوہناں اجیہی لٹ مچائی جیہدی مثال ایس دھرتی تے کدی نہیں سی ڈٹھی۔ اڈ ہون لگیاں اپنے بھرا میچراں نے آکھیا سی پئی گھیچر اہلکار اسامیاں دا ککھ نہیں رہن دیندے ۔ پر ہن میچر اہلکار میچر اسامیاں دی دھون بھن کے اوہناں دے کلیجے دی رت مونہہ تھانیں کڈھدے سن پئی ماڑے میچراں دی کوئی نہیں سی سندا۔
اودھر گھیچراں نے اپنے گھیچر بھرانواں دی کھل پٹھیاں کرکے لاہن دا جتن کیتا ہویاسی۔
گھیچرتے میچر منڈی وی وچکارلی کندھ دے دو نہیں پاسیں ہاہاکار مچی ہوئی سی۔ کدی کوئی گھیچراپنے پاسیوں کندھ ٹپ کے میچراں ولے ویہنداسی تے اوہنوں اگانہہ ودھن دی آنگس نہیں سی رہندی۔ کیوں جے ٹھیکدار لہو بھریاں کھائیاں دے اتے اوہناں دیاں دھیاں بھیناں دے ٹوٹے ٹنگ گئے سن جیہڑے گھیچراں میچراں دے ہتھوں ہوئے سن تے دھیاں بھیناں دے اوہناں توٹیاں نوں ویکھ ویکھ کے گھیچر میچر چڑیلاں وانگوں چیکاں مار کے پچھانہہ پرت جاندے سن۔
گھیچر منڈی آگو للوتے میچر منڈی دے آگو پنجو نے اپنی اپنی برادری دی سرت ٹکانے کرن دا بڑا جتن کیتا۔ پر رولے گولے تے ہاہا کار وچ اوہناں دی گل نہ سنی۔ سگوں اک گھیچر نے پستول دیاں کٹھیاں چار گولیاں للو دی ہک وچوں لنگھا دتیاں ۔ میچراں دے آگو پنجو رب دی رضا نال چلانا کر گیاتے ہن گھیچر تے میچر دونویں آگوواں بنا رہ گئے، سروں ننگے ہوگئے۔
گھیچر منڈی تے میچر منڈی دیاں ماڑیاں سرکاراں وی بنیاں اوہ سرکاراں تکڑی تے چڑھیاں پر ہر واری پیش آئیاں مصیبتاں توں ہولیاں نکلیاں۔ اوڑک گھیچراں میچراں نوں تھاؤں تھائیں پتہ لگ گیا۔ پتہ کیہ لگ گیا اوہناں دے چودھیں طبق چانن لگ پیا پئی ساڈے آگو ککھاں توں ہولے نیں تے پیش آئیاں مصیبتاں دے بھار دے نہیں۔
تے ہن گھیچراں تے میچراں دیاں سرکاراں نوں اکو چنتا رہ گئی پئی کتے گھیچر جنتا تے میچر جنتا کٹھے ہوکے ٹھیکیداراں دے ایہناں پاپاں پارے گل بات کرن تے سوچن نہ لگ پین۔ ایس لئی اوہناں گھیچراں تے میچراں دے وچکار بولی دے سمبندھ نوں توڑن دا جتن کیتا تاں جے ایہہ نہ اک دوجے دی بولی سمجھن تے نہ اک دوجے نال رل کے سوچن۔ پہل گھیچراں نے کیتی۔ اوہناں سمے دی بولی توں اڈ اک اجیہی بولی بنائی جس بولی نوں اوہناں دی سرکار دا آگو نہیں سی سمجھداتے ہر واری باہروں آکے پچھداسی "گھیچر سجنو! ایہہ بولی بولدے او جیہدی مینوں وی سمجھ نہیں آوندی۔ "گھیچر ودوان آہندے سن "ایہہ بولی اوہ بولی اے جیہنوں آون والیاں پیڑھیاں سمجھن گیاں۔ "اودھر میچر کتاباں دی بولی نوں جنتا دی بولی بناون دا جتن کردے سن۔ پر جنتا کتاباں پڑھی ہوئی نہیں سی۔ ایس لئی میچراں دے آگوواں تے میچراں دی جنتاوچ بولی دا کوئی سمبندھ نہیں سی رہ گیا۔ مکدی گل ایہہ وے پئی گھیچر منڈی تے میچر منڈی وچ ہر پاسے رولا گولا پیا ہویاسی تے کسے نوں کسے دی کوئی گل سمجھ نہیں سی آوندی۔ سبھ توں بہتی چنتا ٹھیکیداراں نوں سی۔ کیوں جے گھیچراں میچراں دے رولے گولے وچ اوہناں دا اپنا کاروبار اکا ڈبدا جانداسی۔ قرضے اگھرن دی کوئی سبیل نظریں نہیں سی آوندی۔
اودھر ٹھیکیداراں دے شریک گھیچر منڈی تے میچر منڈی دی وچکارلی کندھ دے دو نہیں پاسے اپنیاں شرلیاں تے ہوائیاں نے ایڈا طوفان چکیا پئی گھیچراں تے میچراں دی مت ماری گئی۔ کندھ پار کرکے گھیچر، میچراں دیاں کچھاں وچ سرتن کھلوتے تے میچر گھیچراں نوں گلو کڑی مارن لگ پئے۔ ایس گڑ بڑ وچ کندھ کئی تھاں تھاں توں اکھڑ گیا۔ سبھ توں دونی مصیبت ایہہ پیش آئی پئی لوک گھیچر میچرا اکھوان توں عاقی ہوگلئے ۔ ہندیاں گھیچر منڈی تے میچر منڈی دا نانوں رہ گیا، پر گھیچراں تے میچراں دے نانوں گل ہوگیا ۔ رہے رب دا ناں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels